2. ୨- ପାପ୍ ଜଗତ୍ତୁନ୍ ଏଟେନ୍ ୱାନେ
ମାପ୍ରୁ ଆୟ ଲକୁଙ୍ଗ୍ ପାୟିଟ୍ ତିୟାର୍ କେୟଣ୍ତି ସୁନ୍ଦରଟେ ଏଦନ୍ ୱାଡ଼଼େନ୍ ଆଦମ୍ ଆରେ ଅଣ୍ତୁଙ୍ଗ୍ ଆୟାଲ୍ ପେରିନ୍ କିର୍ଦେନା ପିୟିଙ୍ଗ୍ନର୍। ଆୟ୍ଲକ୍ ଏୟିର୍ମେନ୍ ବସ୍ତର୍ ନୁଡାମାଟର୍,ମାତର୍ ଆୟ୍ ଲକୁଙ୍ଗ୍ ପାୟିଟ୍ ଏନାମେନ୍ ଲାଜ୍ ମାନା ମାଟେ।ଏଟେନ୍ କି ଜଗତ୍ତୁନ୍ ପାପ୍ ମାନା ମାଟେ। ଆୟ୍ ଲକ୍ ପାଟିନ୍ବେଲେନ୍ ୱାଡ଼଼େନ୍ ସେନିଙ୍ଗ୍ ୱାରିଙ୍ଗ୍ ଏରିଙ୍ଗ୍ନର୍ ଆରେ ମାପ୍ରୁ ନା ପାର୍କିନର୍।
ମାତର ୱାଡ଼଼େନ୍ ଉକୁଟ୍ ସତୁର୍ଟେ ବାମ୍ ମାଟେ। ଆଦ୍ ଆସ୍ମାଲିଙ୍ଗ୍ ପାଚାର୍ତେ, ମାପ୍ରୁ ସତ୍ରେନ୍ ୱାଡ଼଼େଟେ ଏରେ ମେନ୍ ମାରିନ୍ଟେ ପଲ୍ ତିନିଙ୍ଗ୍ ପାୟିଟ୍ ଇମୁଙ୍ଗ୍ ମାନା କେୟିମାଣ୍ତ୍ କି?
ନାରି ଉତର ସିନେ, ମାପ୍ରୁ ଆମୁଙ୍ଗ୍ ପକେଣ୍ତ୍ ଉୟା ଆରେ ନିୟା ଗିୟାନ୍ ତଣ୍ଡଣ୍ଡିଟେ ମାରିନ୍ ପଲୁଙ୍ଗ୍ ସାକାରି ଏରେମେନ୍ ମାରିନ୍ଟେ ପଲ୍ ଆମ୍ ତିନିଙ୍ଗ୍ ଅଡତାମ୍। ମାପ୍ରୁ ଆମୁଙ୍ଗ୍ ପକେଣ୍ତ୍, ଜଦି ଇମ୍ ଇ ପଲୁଙ୍ଗ୍ ତିୟାର୍ କି ମେର୍ତାର୍ ଆୟ୍ ସିରିସ୍ ଇମ୍ ସାଦାର୍।
ବାମ୍ ନାରିଙ୍ଗ୍ ପକେଟେ, ଆଦ୍ସତ୍ ଏରା। ଇମ୍ ସାୟାର୍। ମାପ୍ରୁ ପୁୟା ଜେ ଇମ୍ ତିୟାନ୍ ସାଙ୍ଗେନ୍ ସାଙ୍ଗେନ୍ ମାପ୍ରୁନ୍ ୱାଡିନ୍ ଏରିସେୟାର୍ ଆରେ ଅଣ୍ତୁନ୍ ୱାଡିନ୍ ନିୟା ଆରେ ଉୟା ବୁଜ୍ ଏଦାର୍।
ନାରି ଆଦ୍ ସୁଡେଟେ, ଆୟ୍ ପଲ୍ ସୁଡୁଙ୍ଗ୍ ସୁନ୍ଦର୍ମାଟେ ଆରେ ତିନିଙ୍ଗ୍ ପାୟିଟ୍ ତିରେନ୍ ମାଟେ। ଆଦ୍ ମେନ୍ ବୁଦିମାନ୍ ଏରିଙ୍ଗ୍ ପାୟିଟ୍ ଇଚା କେନେ, ଆଦିଙ୍ଗ୍ ପାୟିଟ୍ ଆଦ୍ ଉକୁଟ୍ ପଲ୍ କନେ ଆରେ ତିଣ୍ଡେ। ଆଦିଙ୍ଗ୍ କୁଣ୍ତେଲ୍ ଆଦ୍ ଉକୁଟ୍ ପଲ୍ ଆଦିନେ ମାଗିଣ୍ତିଙ୍ଗ୍ ସିନେ, ଅଣ୍ତ୍ ଆଦିନା ସଙ୍ଗେନ୍ ମାଟଣ୍ତ୍ ଆରେ ଅଣ୍ତ୍ ମେନ୍ ଆମାଟୁକ୍ କାଣ୍ଡେକ୍ ତିୟଣ୍ତ୍।
ଦାପ୍ରେନ୍ ଆୟ୍ଲକ୍ନେ କାନୁଲ୍ ତାଇସି ଏନେ, ଆରେ ଆୟ୍ ଲକ୍ ଏତାତର୍ ଜେ ଆୟଲକ୍ ନାଙ୍ଗା ମାର୍। ପରେଲିଙ୍ଗ୍ କୁଟେର୍ ଆରେ ଆୟଲକ୍ନେ ମେନିଙ୍ଗ୍ ଡାବା ଏରିଙ୍ଗ୍ ପାୟିଟ୍ ସେସ୍ଟା କେନର୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ଉଦିୟାନ୍ ତାନିର୍ଟୁକ୍ ତାକି ୱାରଣ୍ତି ସବତ୍ ମାଗିଣ୍ତ୍ ଆରେ ଅଣ୍ତୁନେ ଆୟାଲ୍ ୱେନିଙ୍ଗ୍ ଅଡ୍ତର୍। ଆୟ୍ଲକ୍ ଇରୁଲ୍ ମାପ୍ରୁଙ୍ଗ୍ ପେଲ୍ଟୁକ୍। ଆଦିଙ୍ଗ୍ କୁଣ୍ତେଲ୍ ମାପ୍ରୁ ମାଗିଣ୍ତ୍ସିଣ୍ତିଙ୍ଗ୍ ଅର୍ଗେଣ୍ତ୍, ଇମ୍ ଏରେମାନ୍ ମାୟାର୍? ଆଦମ୍ ଉତର ସିନଣ୍ତ୍, ଇନ୍ ଏଦନ୍ ୱାଡ଼଼େନ୍ ତାକଣ୍ତି ଆନ୍ ୱେଟନ୍ ଆରେ ଆନ୍ ନାର୍ସି ସେୟନ୍,ଏନାଦିଙ୍ଗ୍ କି ଆନ୍ ନାଙ୍ଗା ମାଟନ୍। ଆଦିଙ୍ଗ୍ ଆନ୍ ପାକେନ୍।
ଅଣ୍ତୁଙ୍ଗ୍ ମାପ୍ରୁ ପକେଣ୍ତ୍ ଇମ୍ ଜେ ନାଙ୍ଗା ମାୟାର୍, ଇମୁଙ୍ଗ୍ ଏୟିର୍ ପକେର୍। ଏରେ ପଲ୍ ଆନ୍ ତିନିଙ୍ଗ୍ ପାୟିଟ୍ ମାନା କେୟି ମାଟନ୍ ଆୟ ପଲ୍ ତିୟର୍ କି? ମାଗିଣ୍ତ୍ ଉତର୍ ସିନଣ୍ତ୍ ଇ ଆସ୍ମାଲିଙ୍ଗ୍ ଇନ୍ ଆନୁଙ୍ଗ୍ ସିନଟ୍ ଆରେ ଆଦ୍ ଆନୁଙ୍ଗ୍ ପଲ୍ ତିନିଙ୍ଗ୍ ସିନେ। ମାପ୍ରୁ ଆସ୍ମାଲିଙ୍ଗ୍ ପକେଣ୍ତ୍ ଇଦ୍ ଇନ୍ ଏନା କେନଟ୍? ଆସ୍ମାଲ ଉତର୍ ସିନେ, ବାମ୍ ଆନୁଙ୍ଗ୍ ନାଡ଼଼ାତେ।
ମାପ୍ରୁ ବାମୁଙ୍ଗ୍ ପକେଣ୍ତ୍, ଇନ୍ ଅବିସାପ୍ ପାୟ୍ ଏରିମାଟ୍। ଇନ୍ ଇନେ ପୁଡ଼଼ୁକ୍ନା ତାକ୍ଦାଟ୍। ଆରେ ଦୁଲି ତିୟାଟ୍ ଇନ୍ ଆରେ ନାରି ଉକୁର୍ଆରେକୁରୁଙ୍ଗ୍ ଗୁରୁନା କେଦାର୍। ଆରେ ଇନେ ସିଣ୍ତିଲ୍ ଆରେ ଅଣ୍ଡୁନେ ସିଣ୍ତିଲ୍ମେନ୍ ଗୁର୍ନା କେଦାର୍। ନାରିନେ ସିଣ୍ଡିଲ୍ ଇନେ ତାଲିଙ୍ଗ୍ କୁରୁକ୍ଦାର୍ ଆରେ ଇନ୍ ଆଦିନେ ରେଡିଙ୍ଗ୍ କଟ୍ଦାଟ୍
ଆଦିଙ୍ଗ୍ କୁଣ୍ତେଲ୍ ମାପ୍ରୁ ଆସ୍ମାଲିଙ୍ଗ୍ ପକେଣ୍ତ୍। ଆନ୍ ଇନେ ଜନମ୍ବେଲ୍ଟେ ବେଦ୍ନ୍ ଦୁକା ପେରିନ୍ କେଦାନ୍। ଇନ୍ ଇନେ ମାଗିଣ୍ତିଙ୍ଗ୍ ସୁଡ୍ଦାଟ୍ ଆରେ ଅଣ୍ତ୍ ଇନ୍ ପୟ୍ତାନ୍ ସାଶନ୍ କେଦାଣ୍ତ୍।
ମାପ୍ରୁ ମାଗିଣ୍ତ୍ସିଣ୍ତିଙ୍ଗ୍ ପକେଣ୍ତ୍, ଇନ୍ ଇନେ ଆୟାଲ୍ନେ ପାଟେ ୱେଟଟ୍ ଆରେ ଆନେ ଅମାନିୟା ଏନଟ୍। ଆରେ ଆଟେଲ୍ଟୁକ୍ ବାସେ ଅବିସାପ୍ ଏନେ, ଆରେ ଇମୁଙ୍ଗ୍ କାଦି ପାଡିଙ୍ଗ୍କିଙ୍ଗ୍ ପାୟିଟ୍ ପେରିନ୍ କାମେ କେଗିଙ୍ଗ୍ ଏଦା। ଇମ୍ ସାଦାର୍ ଆରେ ଇମେ ମେନ୍ ତୁକୁଡ୍ତୁନ୍ ମିସ୍ଏଦା। ମାଗିଣ୍ତ୍ ଅଣ୍ତୁନେ ଆୟାଲିଙ୍ଗ୍ ହବା ପିଦିର୍ ସିନଣ୍ତ୍। ଆଦିନେ ଅରତ୍ ଜିୱେଟେ, ମାତର୍ ଆଦ୍ ପେଙ୍ଗିଟ୍ ଲକ୍ନେ ଆୟା ଏଦା। ଆରେ ମାପ୍ରୁ ଆଦମୁଙ୍ଗ୍ ଆରେ ହବାଙ୍ଗ୍ ପସୁନେ ତନ୍ନା ନୁଡୁତେ।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ପକେଣ୍ତ୍, ଇଣ୍ତି ନିୟା ଆରେ ଉୟା ବୁନ୍ତାଲିନ୍ ନର୍ ଆମ୍ ୱାଡିନ୍ ଏରିମାଣ୍ତ୍। ଆୟ୍ ଲକୁଙ୍ଗ୍ ପାଟିନ୍ ବେଲେନ୍ ଜିୱେ ମାନିଙ୍ଗ୍ ପାୟିଟ୍ ଜିୱେଟେ ମାରିନ୍ଟେ ପଲ୍ ତିନିଙ୍ଗ୍ ମାନା ଏଞ୍ଜି ପକେଣ୍ତ୍। ଆଦିଙ୍ଗ୍ ମାପ୍ରୁ ଆଦମୁଙ୍ଗ୍ ଆରେ ଅବାଙ୍ଗ୍ ସୁନ୍ଦରଟେ ୱାଡେଟୁକ୍ ପେପ୍ତଣ୍ତ୍। ଆରେ ଦୁରିଙ୍ଗ୍ ସୟତଣ୍ତ୍, ଜିୱେଟେ ମାରିନ୍ଟୁକ୍ ଏଟେନ୍ କି ତିନିଙ୍ଗ୍ ଅଡ଼଼ାର୍। ମାପ୍ରୁ ପେରିନ୍ ସକ୍ତିସାଲି ଦୁତ୍ଗୁଲୁଙ୍ଗ୍ ଏଦନ୍ ୱାଡ଼଼େ ଚାରିବେଡ୍ତେନ୍ କାପୁତଣ୍ତ୍।
ବାଇବଲ୍ଟେ ଉକୁଟ୍ କେରାଲ୍: ଆଦି ୩
Free to use, adapt, and share under an open license (CC BY-SA 4.0).