3. ୩- ବାଗାଦି
ପେଙ୍ଗିର୍ ଦିନାମ୍ କୁଣ୍ତେଲ୍, ପେଙ୍ଗୁର୍ତୁଲ୍ ଲକ୍ଗୁଲ୍ ଇ ଜଗତ୍ତୁନ୍ ବାସେ ଏରିଙ୍ଗ୍ନର୍। ଆୟ୍ଲକ୍ ପେରିନ୍ ଦୁସ୍ଟନା ପୁରୁନ୍ ଏରି ମାଟର। ଏନେତ୍ ଉୟାଏରି ସେଣ୍ତେ ଜେ ମାପ୍ରୁ ଇ ସାରା ଜଗତୁଙ୍ଗ୍ ପେରିନ୍ ବନିୟା କେୟି ଇ ପୁର୍ତିଙ୍ଗ୍ ବୁଡ଼଼ାକିଙ୍ଗ୍ ପାୟିଟ୍ ନିସ୍ପତି ଉନଣ୍ତ୍।
ମାତର ନଆ ମାପ୍ରୁଙ୍ଗ୍ କାନୁଲତୁନ୍ ଆସିର୍ବାଦ୍ଟଣ୍ତ୍ ଏନଣ୍ତ୍। ଅଣ୍ତ୍ ନର୍ ଲକୁଙ୍ଗ୍ ପେଲ୍ଟୁକ୍ ନିୟାଟଣ୍ତ୍ ମାଟଣ୍ତ୍, ଆରେ ଧରମ୍ନା ପିୟିନଣ୍ତ୍। ଆଦିଙ୍ଗ୍ ମାପ୍ରୁ ନଆଙ୍ଗ୍ ପେରିନ୍ ବାଗାଦି ସୟପଣ୍ତି ବିସୟରେନ୍ ପକେଣ୍ତ୍। ଅଣ୍ତ୍ ନଆଙ୍ଗ୍ ଉକୁଟ୍ ବେର୍ଟେ ଜାଆଜ ତିୟାର୍ କେଗିଙ୍ଗ୍ ପାୟିଟ୍ ପକେଣ୍ତ୍।
ସଏ ଚାଲିସ୍ ମିଟର ଲମ୍ତି, ତେଇସ୍ ମିଟର ଅସାର୍ ଆରେ ତେର ୧୩.୫ ମିଟର ଉଚାଟେ ଜାଆଜ ତିୟାର୍ କେଗିଙ୍ଗ୍ ପାୟିଟ୍ ମାପ୍ରୁ ନଆଙ୍ଗ୍ ପକେଣ୍ତ୍। ଆଦିଙ୍ଗ୍ ମାର୍କିଲ୍ନା ତିୟାର୍ କେଗିଙ୍ଗ୍ ଆରେ ତିନ୍ ମଉଲାଟେ ପେଙ୍ଗିଟ୍ ବାକ୍ରାଲ୍, ଉକୁଟ୍ ପେପୁଲ୍ ଆରେ ଉକୁଟ୍ ଜର୍କା ତିୟାର୍ କେଗିଙ୍ଗ୍ ପକେଣ୍ତ୍। ଇ ଜାଆଜ ବାଗାଦି ବେଲେନ୍ ନଆନେ, ପରିବାର୍ ଆରେ ପାଟିନ୍ ପର୍କାରଟେ ବାସେଟେ ପଶୁଲୁଙ୍ଗ୍ ରକ୍ଷା କେଦା।
ନଆ ମାପ୍ରୁନେ ପାଟେଙ୍ଗ୍ ମାନ୍ ଏନଣ୍ତ୍। ମାପ୍ରୁ ଏଟେନ୍ ପକେଣ୍ତ୍, ଆୟ୍ ୱାଡିନି ନଆ ଆରେ ଅଣ୍ତୁନେ ତିନ୍ଲକ୍ ସେପାକିଲ୍ ଜାଆଜ୍ ତିୟାର୍ କେନର୍। ଜାହାଜ୍ ତିୟାର୍ କେଗିଙ୍ଗ୍ ପେଙ୍ଗିର୍ ବରସ୍ ପାତେଟେ ଏଟେନ୍ କି ଇଦ୍ ବେସି ବେର୍ଟେ ମାଟେ। ୱାରଣ୍ଡି ବାଗାଦି ବିସୟ୍ରେନ୍ ନଆ ଲକ୍ଗୁଲୁଙ୍ଗ୍ ଜାଗ୍ରତ୍ କେଗିଙ୍ଗ୍ ଇରିଙ୍ଗ୍ ନଣ୍ତ୍, ଆରେ ମାପ୍ରୁଙ୍ଗ୍ ପେଲ୍ ୱାରିଙ୍ଗ୍ ପକୁଙ୍ଗ୍ ନଣ୍ତ୍, ମାତର ଆୟ୍ଲକ୍ ଅଣ୍ତୁନେ ପାଟେଙ୍ଗ୍ ବିସ୍ବାସ୍ କେୟୁଟର୍।
ମାପ୍ରୁ ନଆଙ୍ଗ୍ ଆରେ ଅଣ୍ତୁନେ ପରିବାରିଙ୍ଗ୍ ଅଣ୍ତୁଙ୍ଗ୍ ପାୟିଟ୍ ଆରେ ପସୁଲୁଙ୍ଗ୍ ପାୟିଟ୍ ପେରିନ୍ କାଦି ଜମାକିଙ୍ଗ୍ ଆଗିୟା ସିନଣ୍ତ୍। ଆୟ୍ ବେଲେନ୍ ପାଟିନ୍ ଜମା ଏନେ, ନଅଙ୍ଗ୍ ମାପ୍ରୁ ପକେଣ୍ତ୍, ଇଣ୍ତି ଇନ୍, ଇନ୍ ଆୟାଲ୍,ଇନ୍ ସେପାକିଲ୍ ଆରେ ଅରୁନେ ଆୟାସିଲ୍ ପାଟିନ୍ ଆଟ୍ଲକ୍ ଜାଆଜ୍ ତାନିର୍ ସେନିଙ୍ଗ୍ ବେଲା ଏରିସେଣ୍ତେ।
ମାପ୍ରୁ ପସୁ ଆରେ ତିତେଲିଙ୍ଗ୍ ମାଈଆଣ୍ତିରାଙ୍ଗ୍, ନଆଙ୍ଗ୍ ଆର୍ସେଲ୍ ସୟ୍ତଣ୍ତ୍ ଏଟେନ୍ କି ଆୱ୍ଗୁଲ୍ ବାଗାଦି ବେଲେନ୍ ଜାଆଜ୍ ତାନିର୍ ସେଞ୍ଜି ସୁରକ୍ୟାରେନ୍ ସେୟ୍ଦାୱ୍। ମାପ୍ରୁ ବଲି ଆନିସ୍କିଙ୍ଗ୍ ପାୟିଟ୍ ସାତ୍ଗଟା ଅଣ୍ତିରା ଆରେ ତାଣ୍ଡେଦ୍ ପାଟିନ୍ ପର୍କାର୍ଟେ ପସୁଲୁଙ୍ଗ୍ ନଆଙ୍ଗ୍ ଆର୍ସେଲ୍ ସୟତଣ୍ତ୍। ଆୟ୍ ବେଲାଙ୍ଗ୍ ଆୟଲକ୍ ଜାଆଜ୍ ତାନିର୍ ମାଟର୍। ମାପ୍ରୁ ନିଜେନ୍ ୱାଲ୍ସାଟେ କେଟି ସିନଣ୍ତ୍।
ଆଦିଙ୍ଗ୍ କୁଣ୍ତେଲ୍ ପେରିନ୍ ୱାଇନ୍, ଆରାମ୍ ଏନେ। ଚାଲିସ୍ ଦିନ୍ ଚାଲିସ୍ ରାତି ଆରେକ୍ ପେରିନ୍ ୱାଇନ୍ ୱାନେ। ପୁର୍ତି ପୟ୍ତାନ୍ ନିର୍ ଏରିଙ୍ଗ୍ ଉଣ୍ତେଟେ। ପୁର୍ତି ପାଟିନ୍ ପୟତାନ୍ ଇ ୱାଡିନ୍ ବେର୍ଟେ କପେଲିଙ୍ଗ୍ ମେନ୍ ନିର୍ ମୁଲୁଗ୍କୁଙ୍ଗ୍ ଉଣ୍ତେଟେ।
ଜାଆଜ୍ ତାନିର୍ ମାନ୍ଲକ୍ଗୁଲ୍ ଆରେ ପସୁ ପକିଲିଙ୍ଗ୍ ସାକାରି, ପୁର୍ତିନ୍ ମାନଣ୍ତି ପାଟିନ୍ ଜିୟାତ୍ଗିଲ୍ ଏଙ୍ଗିଟ୍ ବାସେ ଏରିମାଟେୱ୍ ସାୟି ସେଣ୍ତେୱ୍। ଜାଆଜ୍ ନିର୍ ପୟ୍ତାନ୍ ଉମୁଙ୍ଗ୍ ଉଣ୍ତେଟେ। ଆରେ ଜାଆଜ୍ ତାନିର୍ ମାନଣ୍ତି ପାଟିନିଙ୍ଗ୍ ମୁଲୁଗ୍ଦାନ୍ ପେଲ୍ଟୁକ୍ ସୁରକ୍ୟାରେନ୍ ଇରେଟେ।
ୱାଇନ୍ ସାକାର୍ ଦାନ୍ କୁଣ୍ତେଲ୍, ଜାହାଜ୍ ନିର୍ ପୟତାନ୍ ପାସ୍ ମାସ୍ ପାତି ବାସ୍ ଏରିମାଟେ, ଆରେ ଇ ବେଲାଙ୍ଗ୍ ନିର୍ କମ୍ଏରିଙ୍ଗ୍ ଉଣ୍ତେଟେ। ଆଦିଙ୍ଗ୍ କୁଣ୍ତେଲ୍ ଉକୁଟ୍ ସିରିସ୍ ଜାହାଜ୍ କପେଲ୍ ଟିପେନ୍ ମେର୍ସି ଏନେ, ମାତର୍ ଇ ଦିନାମ୍ ଆରେଙ୍ଗ୍ ଜଗତ୍ତୁନ୍ ନିର୍ ଡାବା ଏରିମାୟା। ଆରେ ତିନ୍ ମାସ୍ କୁଣ୍ତେଲ୍, କପେ ସିଲ୍ନେ ସୁଲିୟା ତଣ୍ତୁଙ୍ଗ୍ ଉଣ୍ତେଟେ।
ଆରେ ଚାଲିଶ୍ ଦିନ୍ କୁଣ୍ତେଲ୍ ନିର୍ ୱାଟେଟେ କି ମାନା ଏଞ୍ଜି ସୁଡୁଙ୍ଗ୍ ପାୟିଟ୍ ନଆ ଉକୁଟ୍ କାକାଲିନ୍ ତିତେଙ୍ଗ୍ ୱାଟଡି ବାସେଙ୍ଗ୍ କାଣ୍ତ୍କିଙ୍ଗ୍ ପାୟିଟ୍ ସୟତଣ୍ତ୍, ଇଟ୍ ୱାଟ୍ ଉଡ୍ଏରି ମେୟ୍କେଟେ, ମାତର୍ ଏରେ ମାନ୍ମେନ୍ ୱାଟଣ୍ଡି ବାସେ ତଣ୍ତୁଟେ।
ଆଦିଙ୍ଗ୍ ନଆ ଆରେ ଉକୁଟ୍ ପାରାୱେ ତିତେଙ୍ଗ୍ ବାଆରେନ୍ ସୟ୍ତଣ୍ତ୍। ମାତର୍ ଆଦ୍ ଏରେମାନ୍ମେନ୍ ୱାଟଣ୍ଡି ବାସେ ପାୟ୍ ଏରୁଟେ, ଆୟ୍ ତିତେଙ୍ଗ୍ ଆଟେକ୍ କୁଣ୍ଡେଲ୍ ନଆ ଆରେତରେକ୍ ବାଆରେନ୍ ସୟ୍ତଣ୍ତ୍, ମାତର୍ ଆଦ୍ ଜିତ୍ ମାରିନ୍ଟେ ପରେ ଆଦିନେ ସଣ୍ଡିନ୍ କଟି ଇନ୍ଦ୍ରେଟେ। ନିର୍ ଦିରେନ୍ ଦିରେନ୍ ତିଣ୍ଡେଟେ, ଆରେ ମାର୍କିଲ୍ ଆରେତରେକ୍ ସାନ୍ଦିଙ୍ଗ୍ ଉଣ୍ତେଟେ।
ନଆ ଆରେ ଉକୁଟ୍ ଆଟେକ୍ କାତାନ୍ କୁଣ୍ତେଲ୍ କାକାଲିନ୍ ତିତେଙ୍ଗ୍ ତିନ୍ପାଲି ବାଆରେନ୍ ସୟତଣ୍ତ୍। ଇ ତରେକ୍ ବିସ୍ରାମ୍ ଉଗୁଙ୍ଗ୍ ବାସେ ତଣ୍ତେଟେ ଆରେ ମାଣ୍ଡି ୱାରୁଟେ। ନିର୍ ୱାଟିଙ୍ଗ୍ ଉଣ୍ତେଟେ।
ଦୁଇ ମାସ୍ କୁଣ୍ତେଲ୍ ନଆଙ୍ଗ୍ ମାପ୍ରୁ ପକେଣ୍ତ୍, ଇନେ ପରିବାର୍ ଆରେ ପାଟିନ୍ ପସୁ ପକିଲ୍ ଆରେ ଇନ୍ ଜା ଆଆଜ୍ଟୁକ୍ ୱାଲ୍ତିନ୍ ପେକିଙ୍ଗ୍ ଅଡ୍ତାର୍। ପେଙ୍ଗିଟ୍ ସିଣ୍ତିଲ୍ ମାସିଲ୍ ନାତି ତିତି ଜନମ୍ କେୟି ପୁର୍ତିନ୍ ପୁରୁନ୍ କେୟୁର୍। ଆଦିଙ୍ଗ୍ ନଆ ଆରେ ଅଣ୍ତୁନେ ପରିବାର୍ ଜାଆଜ୍ଟୁକ୍ ଇଡିଗି ୱାନର୍।
ନଆ ଜାଆଜ୍ଟୁକ୍ ୱାଲ୍ତିନ୍ ୱାଦାନ୍ କୁଣ୍ତେଲ୍, ଅଣ୍ତ୍ ଉକୁଟ୍ ବେଦି ତିୟାର୍ କେନଣ୍ତ୍ ଆରେ ଏଙ୍ଗିଟ୍ ପସୁଲୁଙ୍ଗ୍ ବଲିସିଗିଙ୍ଗ୍ ଦର୍କାର୍ ଆଙ୍ଗିଟ୍ ପର୍କାର୍ଟେ ପସୁଲୁଙ୍ଗ୍ ଉୟି ବଲି ଆନିସ୍ତଣ୍ତ୍। ମାପ୍ରୁ ନଇବେଦିୟନ୍ କିର୍ଦେ ଏନଣ୍ତ୍। ଆରେ ଅଣ୍ତୁନେ ପରିବାରିଙ୍ଗ୍ ଆସିର୍ବାଦ୍ କେନଣ୍ତ୍।
ମାପ୍ରୁ ପକେଣ୍ତ୍, “ଆନ୍ ଜିଦ୍ କେଦାନ୍ ଲକ୍ଗୁଲୁଙ୍ଗ୍ ପାୟିଟ୍ ବାସେଙ୍ଗ୍ ଅବିସାପ୍ ଏସେଲ୍ ମେନ୍ କେୟାନ୍। ଜଦି ଆୟ୍ଲକ୍ଗୁଲ୍ ଜନମ୍ ବେଲ୍ଟୁକ୍ ପାପି ଏଙ୍ଗ୍ଡ୍ ମେନ୍ ଆନ୍ ପୁର୍ତିଙ୍ଗ୍ ଆରେତରେଙ୍ଗ୍ ବାଗାଦିନା ବୁଡ଼଼ାପାନ୍।
ଜିଦ୍ଟେ ଉକୁଟ୍ ଚିନ୍ ୱାଡିନ୍ ମାପ୍ରୁ ପର୍ତୁମ୍ ନାଗେବାମ୍ ତିୟାର୍ କେନଣ୍ତ୍। ପାଟିନ୍ ବେଲ୍ ଆକାସ୍ତିନ୍ ନାଗେବାମ୍ ତଟ୍ସି ଏଦା, ମାପ୍ରୁ ଅଣ୍ତୁନେ ଜିଦିଙ୍ଗ୍ ଏତାକିଙ୍ଗ୍ ପାୟିଟ୍ ଇ ୱାଡିନ୍ ଲକ୍ଗୁଲ୍ ମେନ୍ କେଦାର୍।
ବାଇବଲ୍ଟେ ଉକୁଟ୍ କେରାଲ୍: ଆଦିପୁସ୍ତକ୍ ୬-୮
Free to use, adapt, and share under an open license (CC BY-SA 4.0).