4. ୪- ଅବ୍ରାମ୍ ଆରେ ମାପ୍ରୁନେ ନିୟମ୍
ବାଗାଦି ଏରି ପେଙ୍ଗିର୍ ବରସ୍ କୁଣ୍ତେଲ୍ ଜଗତ୍ତୁନ୍ ପେଙ୍ଗିଟ୍ଲକ୍ ବାସେ ଏରିଙ୍ଗ୍ ଉଣ୍ତେର୍ ଆରେ ଆୟ୍ଲକ୍ ଉକ୍ଟି ପାଟେନା ପାର୍କିଙ୍ଗ୍ନର। ମାପ୍ରୁନେ ଆଗିୟା ଅନୁସାରେନ୍ ପୁର୍ତିଙ୍ଗ୍ ପରିପୁରୁନ୍ କେଦାନ୍ ବାଦୁଲ୍ନା ପାଟିନ୍ ଲକ୍ ମିସ୍ଏରି ଗଡ୍ ତିୟାର୍ କେଗିଙ୍ଗ୍ ଉଣ୍ତେର୍।
ଆୟ୍ଲକ୍ ପେରିନ୍ ଗରବ୍ ମାଟର୍ ଆରେ ମାପ୍ରୁନେ ପାଟେ ବିଲ୍କୁଲ୍ ୱେନା ମାନ୍ନର୍। ଆୟ୍ଲକ୍ ସରଗ୍ତୁନ୍ ଏଦିଙ୍ଗ୍ ପାୟିଟ୍ ବେର୍ଟେ ଗଡ୍ ତିୟାର୍ କେନର୍। ମାପ୍ରୁ ସୁଡେଣ୍ତ୍ ଜେ, ଜଦି ଆୟ୍ଲକ୍ ଉୟା କାମେଲ୍ କେୟେଟି ସେୟ୍ଦାର୍, ଆଟେକଡ୍ ଆୟ୍ଲକ୍ ପେରିନ୍ ପାପ୍ଟେ କାମେଲ୍ କେଦାର୍।
ଆଦିଙ୍ଗ୍ ପାୟିଟ୍ ମାପ୍ରୁ ଆୟ୍ଲକନେ ପାଟେଙ୍ଗ୍ ପେଙ୍ଗିଟ୍ ପାଟେଲ୍ନା ବାଦ୍ଲାତଣ୍ତ୍ ଆରେ ପୁର୍ତିଟେ ୱେନେଲ୍ ୱେନେଲ୍ ଜାଗାଙ୍ଗ୍ ସୟ୍ସି କାରେଣ୍ତ୍।ଏରେ ନଗର୍ ଆୟ୍ଲକ୍ ତିୟାର୍ କେଗିଙ୍ଗ୍ ଆରାମ୍ କେୟିମାଟର୍, ଆଦିନେ ପିଦିର୍ ବାବିଲ୍ ମାଟେ। ଇଦିନେ ଅରତ “ଗାବ୍ରା¬”।
ସଅ ସଅ ବରସ୍ କୁଣ୍ତେଲ୍, ଉକୁର୍ ଲକ୍ ଅବ୍ରାମ୍ନା ପାର୍କେଣ୍ତ୍। ମାପ୍ରୁ ଅଣ୍ତୁଙ୍ଗ୍ ପକେଣ୍ତ୍, ଇନ୍ ପରିବାର୍ ଆରେ ଇନ୍ ଦେସ୍ ସାକାରି ଆନ୍ ଏରେ ଦେସ୍ ତଟ୍ତାନ୍ ଆୟ୍ ଦେସ୍ତିନ୍ ସେନ୍। ଆନ୍ ଇନୁଙ୍ଗ୍ ଆସିର୍ବାଦ୍ କେଦାନ୍ ଆରେ ଇନୁଙ୍ଗ୍ ପେରିନ୍ ବେର୍ଟେ ଜାତି କେଦାନ୍। ଆନ୍ ଇନେ ପିଦିରିଙ୍ଗ୍ ବେର୍ଟେ କେଦାନ୍। ଏରେଲକ୍ ଇନୁଙ୍ଗ୍ ଆସିର୍ବାଦ୍ କେଦାର୍ ଆୟ୍ଲକୁଙ୍ଗ୍ ଆନ୍ ଆସିର୍ବାଦ୍ କେଦାନ୍, ଏରେଲକ୍ ଅବିସାପ୍ ସିଦାର୍ ଆୟ୍ଲକୁଙ୍ଗ୍ ଅବିସାପ୍ ସିଦାନ୍। ଇନେ ଉନିଟ୍ ପୁର୍ତିଟେ ପାଟିନ୍ ପରିବାର୍ଟେ ଲକ୍ ଆସିର୍ବାଦ୍ ପାୟ୍ଏଦାର୍।
ଆଦିଙ୍ଗ୍ ଅବ୍ରାମ୍ ମାପ୍ରୁନେ ଆଦେଶ୍ ମାନ୍ଏନଣ୍ତ୍। ଆଟେଲ୍ ଅଣ୍ତ୍ ଅଣ୍ତୁନେ ଆୟାଲ୍ ସାରିଙ୍ଗ୍ ଉନଣ୍ତ୍, ଅଣ୍ତୁନେ ଦାସ୍କିଲିଙ୍ଗ୍ ଆରେ ଏନାଦ୍ ମାଟେ ଆଦ୍ ପାଟିନ୍ ପାତି ମାପ୍ରୁ ଏରେ ଦେଶ୍ ତଟ୍ତଣ୍ତ୍ ଆୟ୍ କିନାନ୍ ଦେଶ୍ତିନ୍ ସେୟର୍।
ଏରେ ବେଲାଙ୍ଗ୍ ଅବ୍ରାମ୍ କିଣାଣ ତିନ୍ ଏଦେଣ୍ତ୍, ମାପ୍ରୁ ପକେଣ୍ତ୍,“ ଇନେ ସାରିବେଡ୍ତେନ୍ ସୁଡ୍। ଏନାଦ୍ ଇନ୍ ସୁଡୁଙ୍ଗ୍ ଅଡୁକିଦାଟ୍, ଇ ପାଟିନ୍ ବାସେ ଆନ୍ ଇନୁଙ୍ଗ୍ ଆରେ ଇନେ କୁଲୁଙ୍ଗ୍ ଅଦିକାର୍ ସିଦାନ୍। ଆଦିଙ୍ଗ୍ କୁଣ୍ତେଲ୍ ଅବ୍ରାମ୍ ଆୟ୍ ବାସେନ୍ ବାସେ ଏନଣ୍ତ୍।
ଦିନେକ୍, ଅବ୍ରାମ୍ ବେର୍ଟେ ମାପ୍ରୁନେ ଜାଜକ୍ ଏନଣ୍ତ୍, ମଲକିସଦକୁଙ୍ଗ୍ ବେଟ୍ ଏନଣ୍ତ୍। ମଲକିସଦକ୍ ଅବ୍ରାମୁଙ୍ଗ୍ ଆସିର୍ବାଦ୍ ସିନଣ୍ତ୍ ଆରେ ପକେଣ୍ତ୍,, ସାରା ପୁର୍ତିଟେ ମାପ୍ରୁ ଏୟିର୍ କି ସରଗ ଆରେ ପୁର୍ତିଟେ ପାଟିନ୍ ଅଦିକାରି ଅବ୍ରାମ୍ଙ୍ଗ୍ ଆସିର୍ବାଦ୍ କେ। ଆଦିଙ୍ଗ୍ କୁଣ୍ତେଲ୍ ଅବ୍ରାମ୍ ଅଣ୍ତୁନେ ପାଟିନ୍ ସମ୍ପତିଟେ ଦସ୍ମାଙ୍ଗ୍ସ(ଦଶବାଗ୍ଟୁଙ୍ଗ୍ ବାଗେକ୍) ସିନଣ୍ତ୍।
ପେଙ୍ଗିଟ୍ ବରସ୍ ସେୟାନ୍ କୁଣ୍ତେଲ୍, ମାତର୍ ଇ ଆରେକ୍ ଅବ୍ରାମ୍ ଆରେ ସାରିଙ୍ଗ୍ ସିଣ୍ତିଲ୍ ମାସିଲ୍ ମାନା ମାଟର୍। ମାପ୍ରୁ ଅବ୍ରାମୁଙ୍ଗ୍ ଆରେତରେକ୍ ଜିଦ୍ ସି ପକେଣ୍ତ୍ ଜେ ଅଣ୍ତୁନେ ଉକୁଟ୍ ସେପାଲ୍ ଏଦାଣ୍ତ୍ ଆରେ ଅଣ୍ତୁନେ କୁଲ୍ ମଗୁଲ୍ଟେ ପୁତ୍କୁଲ୍ ୱାଡିନ୍ ଏଦାର୍। ମାପ୍ରୁନେ ଜିଦିଙ୍ଗ୍ ଅବ୍ରାମ୍ ବିସ୍ବାସ୍ କେନଣ୍ତ୍।
ଆଦିଙ୍ଗ୍, ମାପ୍ରୁ ଅବ୍ରାମ୍ ନା ନିୟମ୍ ଉକୁଟ୍ କେନଣ୍ତ୍। ଜଡ଼଼େକ୍ ଦଲ୍ତୁନ୍ ଉକୁଟ୍ ନିୟମ୍ ଏଦା, ମାପ୍ରୁ ପକେଣ୍ତ୍ ଇନ୍ ମେନ୍ଟୁକ୍ ଆନ୍ ଉକୁଟ୍ ସେପାଲିଙ୍ଗ୍ ସିଦାନ୍। ଇନ୍ କୁଲଙ୍ଗ୍ କିନାଣ୍ ଦେଶ୍ ସିଦାନ୍। ମାତର୍ ଅବ୍ରାମୁଙ୍ଗ୍ ଇ ଆରେକ୍ ସେପାଲ୍ ମାନୁଟଣ୍ତ୍।
ବାଇବଲ୍ଟେ ଉକୁଟ୍ କେରାଲ୍: ଆଦି ୧୧-୧୫
Free to use, adapt, and share under an open license (CC BY-SA 4.0).