5. ୫- ଜିଦ୍ଟେ ସିଣ୍ଡ୍
ଦସ୍ ବରସ୍ କୁଣ୍ତେଲ୍ କିଣାନ୍ ତିନ୍ ୱାତାଲିନ୍ ମେନ୍ ଅବ୍ରାମ୍ ଆରେ ସାରିଙ୍ଗ୍ ସିଣ୍ତିଲ୍ ମାସିଲ୍ ମାନା ମାଟର୍। ଆଦିଙ୍ଗ୍ ଅବ୍ରାମୁଙ୍ଗ୍ ଆୟାଲ୍ ସାରି ଅବ୍ରାମୁଙ୍ଗ୍ ପକେଟେ, “ଇ ଆରେକ୍ ମାପ୍ରୁ ଆନୁଙ୍ଗ୍ ସିଣ୍ତିଲ୍ ମାସିଲ୍ ସିଗିଙ୍ଗ୍ ମାନାକେୟି ମାନ୍ତାଲିନ୍ ଇଣ୍ତି ସିଣ୍ତିଲ୍ ମାସିଲ୍ ଜନମ୍ କେଗିଙ୍ଗ୍ ଆନେ ପେରିନ୍ ବୟସ୍ ଏରିସେଞ୍ଜି ମାୟା, ଇଦ୍ ଆନେ ଦାସି, ଆଗାର୍ ମାୟା। ଆଦ୍ ଆନ୍ ପାୟିଟ୍ ସିଣ୍ତିଲ୍ ମାସିଲ୍ ଜନମ୍ କେଦା।
ଆଦିଙ୍ଗ୍ ଅବ୍ରାମ୍ ଆଗାରିଙ୍ଗ୍ ଅଦୁର ଏନଣ୍ତ୍। ଆଗାରିଙ୍ଗ୍ ଉକୁର୍ ସେପାଲ୍ ଜନମ୍ ଏନଣ୍ତ୍ ଆରେ ଅବ୍ରାମ୍ ଅଣ୍ତୁଙ୍ଗ୍ ଇସ୍ମାଏଲ୍ ପିଦିର୍ ଇରେଣ୍ଡ୍। ମାତର୍ ସାରିଙ୍ଗ୍ ହାଗାର ଗିଦ୍ରି ଏରିଙ୍ଗ୍ନେ। ଏରେବେଲାଙ୍ଗ୍ ଇସ୍ମାଏଲ୍ଲିଙ୍ଗ୍ ତେର ବରସ୍ ଏନେ, ଆରେତରେକ୍ ମାପ୍ରୁ ଅବ୍ରାମୁଙ୍ଗ୍ ପାଟେ ପକେଣ୍ତ୍।
ମାପ୍ରୁ ପକେଣ୍ତ୍, “ଆନ୍ ସର୍ବସକ୍ତିମାନ୍ ମାପ୍ରୁ। “ଇନ୍ ନାଟ୍ ଆନ୍ ଉକୁଟ୍ ନିୟମ୍ କେଦାନ୍। ଆଦିଙ୍ଗ୍ ଅବ୍ରାମ୍ ବାସେଙ୍ଗ୍ ଜୁୱାର୍ କେନଣ୍ତ୍। ମାପ୍ରୁ ମେନ୍ ଅବ୍ରାମୁଙ୍ଗ୍ ପକେଣ୍ତ୍, “ଇନ୍ ପେଙ୍ଗିଟ୍ ଦେଶ୍ଗିଲ୍ଟେ ଅବା ଏଦାଟ୍। ଆନ୍ ଇନୁଙ୍ଗ୍ ଆରେ ଇନେ କୁଲୁଙ୍ଗ୍ କିଣାନ୍ ଦେଶ୍ଟେ ଅଦିକାର୍ ସିଦାନ୍, ଆୟ୍ ଲକ୍ ଇମାନ୍ ବାସେ ଏଦାର୍। ଆନ୍ ପାଟିନ୍ ଦିନ୍ ଆୟ୍ଲକ୍ନେ ମାପ୍ରୁ ଏଦାନ୍। ଇନ୍ ପରିବାର୍ଟେ ପାଟିନ୍ ମାଗିଣ୍ତ୍କିଲ୍ ସୁନତ୍ ଏରିଙ୍ଗ୍ ଏଦା।
ଇନ୍ ଆୟାଲ୍ ସାରିଙ୍ଗ୍ ଉକୁର୍ ସେପାଲ୍ ଜନମ୍ ଏଦାଣ୍ତ୍, ଅଣ୍ତ୍ ଜିଦ୍ଟେ ସେପାଲ୍ ଏଦାଣ୍ତ୍। ଅଣ୍ତୁନେ ପିଦିର୍ ଇସାହାକ୍ ଇର୍ଦାର୍। ଅଣ୍ତୁନା ଆନ୍ ଉକୁଟ୍ ନିୟମ୍ ଗଡାତାନ୍ ଆରେ ଆଦ୍ ଉକୁଟ୍ ବେର୍ଟେ ଦେଶ୍ ଏଦା। ଆନ୍ ଇସ୍ମାଏଲିଙ୍ଗ୍ ମେନ୍ ଉକୁଟ୍ ବେର୍ଟେ ଦେଶ୍ କେଦାନ୍, ମାତର୍ ଆନେ ଜିଦ୍ ଇସାକ୍ ନା ସେୟ୍ଦା। ଆଦିଙ୍ଗ୍ କୁଣ୍ତେଲ୍ ମାପ୍ରୁ ଅବ୍ରାମ୍ ପିଦିରିଙ୍ଗ୍ ଆବ୍ରାଆମ୍ ପିଦିର୍ ନା ବାଦ୍ଲାତଣ୍ତ୍, ଇଦିନେ ଅର୍ତ ପେଙ୍ଗୁର୍ତୁଲ୍ନେ ଅବା। ମାପ୍ରୁ ସାରିଙ୍ଗ୍ ପିଦିରିଙ୍ଗ୍ ମେନ୍ ସାରା ପିଦିର୍ ନା ବାଦ୍ଲାତଣ୍ତ୍, ଆଦିନେ ଅର୍ତ ରାଜ୍କୁମାରି।
ଆୟ୍ସିରିସ୍ ଟୁକ୍ ଅବ୍ରାମ୍ ଅଣ୍ତୁନେ ପରିବାର୍ ନା ପାଟିନ୍ ମାଗିଣ୍ତ୍ସିଣ୍ତ୍କିଲିଙ୍ଗ୍ ସୁନତ୍ କେନଣ୍ତ୍। ଉକୁଟ୍ ବରସ୍ ସେୟାନ୍ କୁଣ୍ତେଲ୍, ଅବ୍ରାମୁଙ୍ଗ୍ ଏରେବେଲେନ୍ ୧୦୦ ବରସ୍ ଏନେ, ଆରେ ସାରାଙ୍ଗ୍ ୯୦ ବରସ୍ ଏନେ, ସାରା ଉକୁର୍ ସେପାଲିଙ୍ଗ୍ ଜନମ୍ ସିନେ। ମାପ୍ରୁ ଆୟ୍ଲକୁଙ୍ଗ୍ ପକଣ୍ତି ୱାଡିନ୍ ଇସହାକ ପିଦିର୍ ସିନର୍।
ଏରେବେଲାଙ୍ଗ୍ ଇସାକ୍ ବେଣ୍ଡିୟା ଏନଣ୍ତ୍, ମାପ୍ରୁ ଅବ୍ରାମ୍ନେ ବିସ୍ବାସିଙ୍ଗ୍ ପରିକିୟା କେନଣ୍ତ୍ ଆରେ ଇନେ ଉକୁର୍ ସେପାଲ୍ ଇସାକିଙ୍ଗ୍ ଉୟି ଆନ୍ ପାୟିଟ୍ ବଲି ସି। ଆଦିଙ୍ଗ୍ ଅବ୍ରାମ୍ ମାପ୍ରୁନେ ଆଦେଶ୍ ମାନ୍ଏରି ବଲି ସିଗିଙ୍ଗ୍ ତିୟାର୍ ଏନଣ୍ତ୍।
ଏରେବେଲେନ୍ ଅବ୍ରାମ୍ ଆରେ ଇସାକ୍ ବଲି ଆନିସ୍ ପଣ୍ତି ବାସେନ୍ ସେୟାନ୍ ବେଲେନ୍, ଇସାକ୍ ଆବାଙ୍ଗ୍ ପକେଣ୍ତ୍, ବଲି ଆନିସ୍କିଙ୍ଗ୍ ପାୟିଟ୍ ତାନ୍ ଆମ୍ ଆର୍ସେଲ୍ କାଡ୍ସିଲ୍ ମାୟାୱ୍ ମେଣ୍ତା ଏରେମାନ୍ ମାୟା। ଅବ୍ରାମ୍ ଉତର ସି ପକେଣ୍ତ୍, ଆନ୍ ସେପାଲିଙ୍ଗ୍ ବଲି ଆନିସ୍ଙ୍ଗ୍ ପାୟିଟ୍ ମାପ୍ରୁ ମେଣ୍ତା ଜାଗାସି ସିଦାଣ୍ତ୍।
ଏରେବେଲେନ୍ ଆୟ୍ଲକ୍ ବଲି ଆନିସ୍ପଣ୍ତି ବାସେନ୍ ଏଦେର୍, ଆବ୍ରାମ୍ ଅଣ୍ତୁନେ ସେପାଲ୍ ଇସାକିଙ୍ଗ୍ କାଟେଣ୍ତ୍ ଆରେ କାଡ୍ସିଲ୍ ପୟ୍ତାନ୍ ଅଡ଼଼ୁତଣ୍ତ୍। ଆଟେଲ୍ ଅଣ୍ତ୍ ତାନ୍ ସେପାଲିଙ୍ଗ୍ ସିତିଙ୍ଗ୍ ଆରାମ୍ କେୟିମାଟଣ୍ତ୍, ମାପ୍ରୁ ଅଣ୍ତୁଙ୍ଗ୍ ପକେଣ୍ତ୍, “ମାନ୍” ସେପାଲିଙ୍ଗ୍ ସିତ୍ ମେନ୍। ଇଣ୍ତି ଆନ୍ ଇନୁଙ୍ଗ୍ ପୁୟାନ୍ ଜେ, ଇନ୍ ଅନୁଙ୍ଗ୍ ନାର୍ସିଦାଟ୍। ଇନ୍ ଇନେ ଉକୁର୍ ସେପାଲିଙ୍ଗ୍ ମେନ୍ ଇରୁଟଟ୍।
ଆୟ୍ ଆର୍ସେଲ୍ଟେ ଉକୁଟ୍ ବୁଟାନ୍ ମେଣ୍ତାପାପୁଙ୍ଗ୍ ସୁଡେଣ୍ତ୍। ଇସାକ୍ନେ ବାସେନ୍ ମାପ୍ରୁ ଉକୁଟ୍ ମେଣ୍ତାପାପୁଙ୍ଗ୍ ସିନଣ୍ତ୍। ଅବ୍ରାମ୍ ମେଣ୍ତାପାପୁଙ୍ଗ୍ କିର୍ଦେ ନା ବଲି ସିନଣ୍ତ୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ଅବ୍ରାମୁଙ୍ଗ୍ ପକେଣ୍ତ୍, “ଇନେ ପାଟିନ୍ ଇ ୱାଡିନ୍ ଇନେ ସେପାଲିଙ୍ଗ୍ ମେନ୍ ଆନ୍ ପାୟିଟ୍ ବଲି ସିଗିଙ୍ଗ୍ ଇଚା କେନଟ୍, ଆଦିଙ୍ଗ୍ ପାୟିଟ୍ ଆନ୍ ଆସିର୍ବାଦ୍ କେଗିଙ୍ଗ୍ ଜିଦ୍ କେଗିଦାନ୍। “ଆକାଶ୍ଟେ ପୁତ୍କୁଲ୍ ୱାଡିନ୍ ଇନେ କୁଲ୍ ଜାତ୍ ଏକା। ମାତର୍ ଇନ୍ ଆନେ ଆଦେଶ୍ ମାନ୍ ଏରିମାଟ୍, ଇନ୍ ନାଟ୍ ପୁର୍ତିଟେ ପାଟିନ୍ ଲକ୍ ଆସିର୍ବାଦ୍ ପାୟ୍ଏଦାର୍।
ବାଇବଲ୍ଟେ ଉକୁଟ୍ କେରାଲ୍: ଆଦି ୧୬-୨୨
Free to use, adapt, and share under an open license (CC BY-SA 4.0).