33. ୩୩- ତାସିନେ କେରାଲ୍
ଦିନେକ୍, ଜିସୁ ପେରେଟ୍ତିନ୍ ପେଙ୍ଗୁର୍ତୁଲ୍ ଲକୁଙ୍ଗ୍ ସିକିୟା ସିଗିନଣ୍ତ୍। ପେଙ୍ଗୁର୍ତୁଲ୍ ଲକ୍ ୱେନିଙ୍ଗ୍ ପାୟିଟ୍ ଜିସୁଙ୍ଗ୍ କାକେଲ୍ ୱାନର୍ ଆରେ ଲକ୍ଗୁଲୁଙ୍ଗ୍ ଏରେୱାଡିନ୍ ପେରିନ୍ ସିକିୟା ସିଗିଙ୍ଗ୍ ଅଡ୍ତାଣ୍ତ୍ ଆଦିଙ୍ଗ୍ ପାୟିଟ୍ ଅଣ୍ତ୍ ପେରେଟ୍ ପାଲିନ୍ ଉକୁଟ୍ ଡଙ୍ଗା ପୟ୍ତାନ୍ ଉଣ୍ତେଣ୍ତ୍। ଅଣ୍ତ୍ ଡଙ୍ଗାନ୍ ଉଣ୍ତେଣ୍ତ୍ ଆରେ ଲକୁଙ୍ଗ୍ ସିକିୟା ସିନଣ୍ତ୍।
ଜିସୁ ଇ କେରାଲ୍ ପକେଣ୍ତ୍। “ଉକୁର୍ ତାସି ୱିତିଲ୍ ୱିତିଙ୍ଗ୍ ପେତଣ୍ତ୍। ଅଣ୍ତ୍ ଏସେବେଲ୍ କିଇନା ୱିତିଲ୍ ୱିତିଙ୍ଗ୍ ଉଣ୍ତେଣ୍ତ୍, ଏରେ ୱିତିଲ୍ ରାସ୍ତାନ୍ ଇଲେଟେୱ୍, ଆରେ ତିତେଲ୍ ୱାରି ଆୟ୍ ୱିତିଲିଙ୍ଗ୍ ତିଞ୍ଜି କାରେଟେୱ୍।
“ୱେନ୍ ୱିତିଲ୍ ଆଟ୍ୱା ମାନଣ୍ଡି ବାସେ ପୟ୍ତାନ୍ ଇଲେଟେୱ୍, ଏରେମାନ୍ କି କାଣ୍ତେକ୍ ତୁକୁଡ୍ ମାଟେ। ଆଟ୍ୱା ବାସେ ପେଲ୍ ଇଲିମାନଣ୍ତି ୱିତିଲ୍ ଦାପ୍ରେନ୍ ଗାଜା ଏନେୱ୍, ମାତର୍ ଆୱ୍ଗୁଲ୍ନେ ୱେର୍କିଲ୍ ବାସେ ତାନିର୍ ସିତିଙ୍ଗ୍ ଅଡୁଟେୱ୍। ଏସେବେଲ୍ ୱେଲେ ୱାନେ ଆରେ କାରୁପ୍ କେନେ, ମାରିନ୍ ୱାରିସେଣ୍ତେ ଆରେ ସାୟି ସେଣ୍ତେ।”
ଆରେମେନ୍ ୱେନ୍ ୱିତିଲ୍ ସାପୁଲ୍ବୁଟା ପେଲ୍ ଇଲେଟେୱ୍। ଇ ପାଟିନ୍ ୱିତିଲ୍ ସାନ୍ଦିଙ୍ଗ୍ ଉଣ୍ତେଟେୱ୍ ମାତର୍ ସାପୁଲ୍ବୁଟାଲ୍ ଆଦ୍ବି କାରେଟେୱ୍। ଆଦିଙ୍ଗ୍ ସାପୁଲ୍ବୁଟାଲ୍ ତିନ୍ ମାନଣ୍ତି ମାର୍କିଲ୍ ପଲ୍ ସିୟୁଟେୱ୍।
“ୱେନ୍ ୱିତିଲ୍ ନିୟାଟେ ବାସେନ୍ ଇଲେଟେୱ୍। ଏଙ୍ଗିଟ୍ ୱିତିଲ୍ ୱିତି ଏରିମାଟେ, ଆୟ୍ ପାଟିନ୍ ୱିତିଲ୍ ସାନ୍ଦି ୩୦ ଗୁନ୍, ୬୦ ଗୁନ୍ ଇ ୱାଡିନ୍ ୧୦୦ ଗୁନ୍ ଆରେକ୍ ପଲ୍ ପାତିଙ୍ଗ୍ ଉଣ୍ତେଟେୱ୍। ଏଇର୍ନେ କେକଲ୍ ମାୟା, ଆୟ୍ଲକ୍ ୱେଣ୍ତୁର୍।”
ଇ କେରାଲ୍ ଦୁସ୍ଟ ସିସୁତୁଲୁଙ୍ଗ୍ ଅଇରାନ୍ କେନେ। ଆଦିଙ୍ଗ୍ ଜିସୁ ବୁଜାସି ପକେଣ୍ତ୍,“ ୱିତିଲ୍ ଏରିଦା ମାପ୍ରୁନେ ବାକିୟ୍। ରାସ୍ତା ଏରିଦା ଆୟ୍ଲକ୍ ଏଇର୍ ମାପ୍ରୁନେ ବାକିୟ୍ ୱେୟାର୍, ମାତର୍ ଆଦ୍ ବୁଜ୍ ଏରାର୍, ଆରେ ସୟ୍ତାନ୍ ଆୟ୍ଲକୁନ୍ପେଲ୍ଟୁକ୍ ବାକିୟଙ୍ଗ୍ ସାଡାସି ଉଦା।”
“ଆଟ୍ୱା ବାସେ ଏରିଦା ଆୟ୍ ଲକ୍ ଏଇର୍ କି ମାପ୍ରୁନେ ବାକିୟ୍ ୱେୟାର୍ ଆରେ କିର୍ଦେନା ପାଲନ୍ କେଦାର୍। ମାତର୍ ଏସେବେଲ୍ ଅଣ୍ତ୍ କସ୍ଟ ଆରେ ନିନ୍ଦା ତାଡନା ପାୟ୍ଏଦାଣ୍ତ୍, ଅଣ୍ତ୍ ନସ୍ଟ ଏରିସେୟାଣ୍ଡ୍।”
“ସାପୁଲ୍ବୁଟାଟେ ବାସେ ଏରିଦା ଆୟ୍ଲକ୍ ଏଇଣ୍ତ୍ ମାପ୍ରୁନେ ବାକିୟ୍ ୱେୟାଣ୍ତ୍, ମାତର୍ ଏସେବେଲ୍ ସମୟ୍ ୱାଦା, ଜତନ୍ ଉୟଣ୍ତି, ଦନ୍ ଆରେ ଜିୱେଟେ ସୁକ୍ ମାପ୍ରୁଙ୍ଗ୍ ପେଲ୍ ମାନଣ୍ତି ଲାଡିଙ୍ଗ୍ ଗର୍ବେ ତାନିର୍ ଆଦ୍ବି କାର୍ଦା।” ଅଣ୍ତ୍ ଏରେ ସିକିୟା ୱେଞ୍ଜି ସେୟ୍ଦାଣ୍ତ୍ ଆଦ୍ ପଲ୍ ପାତିଙ୍ଗ୍ ଅଡାଣ୍ତ୍।”
“ମାତର୍ ନିୟାଟେ ବାସେ ଏରିଦା ଆୟ୍ଲକ୍ ଏଇଣ୍ତ୍ ମାପ୍ରୁନେ ବାକିୟ୍ ୱେୟାଣ୍ତ୍, ବିସ୍ବାସ୍ କେଦାଣ୍ତ୍, ଆରେ ପଲ୍ ପାତ୍ଦାଣ୍ଡ୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୧୩:୧-୮, ୧୮-୨୩; ମାର୍କ ୪:୧-୮,୧୩-୨୦; ଲୁକ ୮:୪-୧୫
Free to use, adapt, and share under an open license (CC BY-SA 4.0).