32. ୩୨- ଜିସୁ ଉକୁର୍ ବୁତ୍ପାତାକିଙ୍ଗ୍ ଆରେ ଅକାଲ୍ ନେତିର୍ ସେନଣ୍ଡି ଆସ୍ମାଲିଙ୍ଗ୍ ନିୟା କେୟଣ୍ଡି
ଦିନେକ୍ ଜିସୁ ଆରେ ଅଣ୍ତୁନେ ସିସୁତୁଲ୍ ଉକୁଟ୍ ଡଙ୍ଗାନ୍ ସସି ଗରାସିୟ ଲକ୍ ବାସେ ଏଦାନ୍ ସେରୁ ଆୟଟ୍ ପାକା ସେୟର୍।
ଆଟେଲ୍ ଆୟ୍ଲକ୍ ସେରୁ ଆୟଟ୍ ପାକା ଏଦେର୍, ଉକୁର୍ ବୁତ୍ପାତାକ୍ ଜିସୁନ୍ କାକେଲ୍ ୱେଡ୍ରି ୱାନଣ୍ତ୍।
ଅଣ୍ଡ୍ ପେରିନ୍ ବପୁଟଣ୍ଡ୍ ମାଟଣ୍ତ୍ ଜେ ଏରେଲକ୍ମେନ୍ ଅଣ୍ତୁଙ୍ଗ୍ ପାତିଙ୍ଗ୍ ଅଡାମାନ୍ର୍। ଲକ୍ଗୁଲ୍ ଇ ୱାଡିନ୍ ଅଣ୍ତୁନେ କାଲ୍ଗିଲିଙ୍ଗ୍ ଆରେ କିଲ୍ଗିଲିଙ୍ଗ୍ ସିକ୍ଲିଲ୍ନା କାଟିନର୍, ମାତର୍ ଆଉଙ୍ଗ୍ ଅଣ୍ତ୍ ପୁଟ୍ସି କାରିନଣ୍ତ୍।
ଅଣ୍ତ୍ ଆଟ୍ ଦିଗାଲ୍ ମାନଣ୍ତି ସାୟ୍କିଲ୍ଗିଲିଙ୍ଗ୍ ବାସେ ଏରି ମାନିନଣ୍ତ୍, ଅଣ୍ତ୍ ପାଟିନ୍ ଦିନ୍ ଆରେ ପାଟିନ୍ ନାର୍କାମ୍ବେଲ୍ ପେରିନ୍ ଆୱ୍ଲି ଏରିନଣ୍ତ୍, ଅଣ୍ତ୍ ବସ୍ତର୍ ନୁଡାମାନଣ୍ତ୍ ଆରେ ଆରେ ଅଣ୍ତ୍ ନିଜେନିଙ୍ଗ୍ କାଣ୍ତ୍କିଲ୍ ନା କୁର୍କି ଏରିନଣ୍ତ୍।
ଏସେବେଲ୍ ଅଣ୍ତ୍ ଜିସୁନ୍ କାକେଲ୍ ୱାନଣ୍ତ୍, ଅଣ୍ତ୍ ଜିସୁନ୍ କାକେଲ୍ ଉମ୍ତାଡ୍ ଏରି ଇଲେଣ୍ତ୍। ଜିସୁ ଆୟ୍ ବୁତୁଙ୍ଗ୍ ପକେଣ୍ତ୍, “ଇ ଲକୁନ୍ ପେଲ୍ଟୁକ୍ ପେସି ୱା।”
ବୁତ୍ପାତାକ୍ ପେରିନ୍ ଆୱ୍ଲିଏରି ପକେଣ୍ତ୍, “ପାଟିଟୁକ୍ ବେର୍ଟେ ମାପ୍ରୁଙ୍ଗ୍ ସେପାଲ୍ ଜିସୁ ଇନ୍ନା ଆନେ ଏନାଦ୍ ମାୟା? ଦୟାକେ ଆନୁଙ୍ଗ୍ ସାଦାମେନ୍, ଆମାଟୁକ୍ ଜିସୁ ଆୟ୍ ବୁତୁଙ୍ଗ୍ ପକେଣ୍ତ୍, “ଇନେ ପିଦିର୍ ଏନାଦ୍?” ଆଦ୍ ଉତର୍ ସିନେ, “ଆନ୍ ପିଦିର୍ ବାୟିନି, ଏନାଦିଙ୍ଗ୍ କି ଆମ୍ ପେଙ୍ଗୁର୍ତୁଲ୍।” (ରମିୟ ସନିୟଦଲ୍ତୁନ୍ ମାନଣ୍ତି ପେଙ୍ଗିଟ୍ ଅଜାର୍ ମାନଣ୍ଡି ଉକୁଟ୍ ଦଲ୍।)
ବୁତ୍ଗୁଲ୍ ଜିସୁଙ୍ଗ୍ ବାତିମାଲ୍ ଏରି ପକେଟେୱ୍, “ଦୟାକେ ଆମୁଙ୍ଗ୍ ଇ ଇରିୟାଟୁକ୍ ୱେନ୍ଦିଗାଲ୍ ସୟ୍ମେନ୍!” ଆର୍ସେଲ୍ଟେ ଉକୁଟ୍ କପେ କିଡିନ୍ ପାଣ୍ଡ୍ରାସି କକୁନର୍, ଆଦିଙ୍ଗ୍ ଆୟ୍ ବୁତ୍ଗୁଲ୍ ଜିସୁଙ୍ଗ୍ ବାତିମାଲ୍ ଏରି ପକେଟେୱ୍, “ଆମୁଙ୍ଗ୍ ଆୟ୍ ପାଣ୍ତ୍ ରାସିନ୍ ସୟ୍ସି ଇନ୍ଦେ!” ଜିସୁ ପକେଣ୍ତ୍ “ସେଣ୍ତୁର୍।”
ବୁତ୍ଗୁଲ୍ ଅଣ୍ତୁଙ୍ଗ୍ ପେଲ୍ଟୁକ୍ ପେସି ପାଣ୍ତ୍କିଲ୍ ତାନିର୍ ନାନେଟେୱ୍। ଆୟ୍ ପାଣ୍ତ୍କିଲ୍ ୱେଟିସେଞ୍ଜି ପେରେଟ୍ତିନ୍ ମୁଲ୍ଗି ସାନେୱ୍। ଆମାନ୍ ପାକାପାକି ୨୦୦୦ ପାଣ୍ତ୍କିଲ୍ ମାଟେୱ୍।
ଏରେ ଲକ୍ଗୁଲ୍ ପାଣ୍ତ୍କିଲ୍ନେ ଜତନ୍ ଉଗୁନର୍ ଆୟ୍ଲକ୍ ଏନାଦ୍ ଗଟ୍ ଏନେ ଆଦ୍ ସୁଡେର୍, ଆୟ୍ଲକ୍ ଗଡ୍ତୁନ୍ ୱେଟେର୍ ଆରେ ଜିସୁ ଏନାଦ୍ ଏନାଦ୍ କେନଣ୍ତ୍ ଆଦ୍ ଆୟ୍ଲକ୍ ଏଙ୍ଗୁର୍ତୁଲୁଙ୍ଗ୍ ବେଟ୍ଏନର୍ ପାଟିନ୍ ଲକୁଙ୍ଗ୍ ୱେଣ୍ତୁତର୍। ଗଡ୍ତୁନ୍ ମାନଣ୍ତି ଲକ୍ଗୁଲ୍ ୱାରି ଆଗାଡିଟୁକ୍ ବୁତ୍ ପାତଣ୍ତି ଲକୁଙ୍ଗ୍ ଏନାଦ୍ ଏନାଦ୍ ଗଟ୍ଏରିମାଟେ ଆଦ୍ ପାଟିନ୍ ସୁଡେର୍। ଅଣ୍ତ୍ ସାନ୍ତିରେନ୍, ବସ୍ତର୍ ନୁଡି ନିୟା ମନ୍ରେନ୍ ମାମୁଲିଟେ ଲକ୍ ୱାଡିନ୍ ଉଣ୍ତି ମାନଣ୍ତି ସୁଡେର୍।
ଲକ୍ଗୁଲ୍ ପେରିନ୍ ନାର୍ସି ସେଞ୍ଜିମାଟର୍ ଆରେ ଆୟ୍ଲକୁଙ୍ଗ୍ କାକେଲ୍ଟୁକ୍ ଜିସୁଙ୍ଗ୍ ପେସିସେନିଙ୍ଗ୍ ପାୟିଟ୍ ପକେର୍। ଆଦିଙ୍ଗ୍ ଜିସୁ ଡଙ୍ଗାନ୍ ସସି ପେସି ସେନିଙ୍ଗ୍ ପାୟିଟ୍ ତିୟାର୍ ଏନଣ୍ତ୍। ଏରୁଙ୍ଗ୍ ବୁତ୍ ପାତିମାଟେ ଅଣ୍ତ୍ ଜିସୁ ନା ସେନିଙ୍ଗ୍ ପାୟିଟ୍ ଅଣ୍ତୁଙ୍ଗ୍ ବିନତି କେନଣ୍ତ୍।
ମାତର୍ ଜିସୁ ଅଣ୍ତୁଙ୍ଗ୍ ପକେଣ୍ତ୍, “ମାନା, ଆନ୍ ଇସା, ଇନ୍ ଉଲେନ୍ ସେନ୍ ଆରେ ଇନେ ସାଙ୍ଗସାତିଙ୍ଗ୍, ଇନେ ବାୟ୍କୁଟୁମୁଙ୍ଗ୍ ମାପ୍ରୁ ଇନେ ପାୟିଟ୍ ଏନାଦ୍ ଏନାଦ୍ କେନଣ୍ତ୍ ଆରେ ଇନ୍ ନା ଏରେ ଦୟା ତଟ୍ତଣ୍ତ୍ ଆଦ୍ ପାଟିନ୍ ପକ୍।”
ଆଦିଙ୍ଗ୍ ଅଣ୍ତ୍ ଅଣ୍ତୁନେ ରାସ୍ତାନ୍ ପେସିସେୟଣ୍ତ୍ ଆରେ ଜିସୁ ଅଣ୍ତୁଙ୍ଗ୍ ପାୟିଟ୍ ଏନାଦ୍ ଏନାଦ୍ କେୟିମାଟଣ୍ତ୍ ଆୟ୍ ବିସୟ୍ ପାଟିନ୍ ପକେଣ୍ତ୍। ଏରେଲକ୍ ଅଣ୍ତୁନେ ଗଟନା ୱେଟର୍ ଆୟ୍ଲକ୍ କାବା ଏନର୍।
ଜିସୁ ପେରେଟ୍ ଆୟଟ୍ ପାକା ସେୟଣ୍ତ୍। ଅଣ୍ତ୍ ଆମାନ୍ ଏଦ୍ଦାନ୍ କୁଣ୍ତେଲ୍,ପେଙ୍ଗୁର୍ତୁଲ୍ ଲକ୍ଗୁଲ୍ ଜମାଏରି ଉକୁଟ୍ ପେଲ୍ ରୁଣ୍ତା ଏନର୍ ଆରେ ଅଣ୍ତୁଙ୍ଗ୍ ପୟ୍ତାନ୍ ଟେଲାପେଲା ଏରି ଅଣ୍ତୁଙ୍ଗ୍ ଆର୍ସେଲ୍ ସେନ୍ନର୍। ଲକ୍ ମାନ୍ଦା ତାନିର୍ ଟୁକ୍ ଅକାଲ୍ ଆସ୍ମାଲ୍ ବାର୍ବରସ୍ ଆରେକ୍ ଆଦିନେ ମେନ୍ଟୁକ୍ ନେତିର୍ ପେସିସେନଣ୍ତି ରଗ୍ ଆଦିଙ୍ଗ୍ ପାତିମାଟେ। ଆଦ୍ ପେଙ୍ଗୁର୍ତୁଲ୍ ଗୁନିୟାଗୁରୁ କାକେଲ୍ ସେଞ୍ଜି ନିୟା ଏରିଙ୍ଗ୍ ପାୟିଟ୍ ପାଟିନ୍ ଡାବୁଲ୍ ପଲିକାରେଟେ ମାତର୍ ଆଦିନେ ଅବସ୍ତା ଦିନିଙ୍ଗ୍ ଦିନିଙ୍ଗ୍ ଉୟାଏରିଙ୍ଗ୍ ଉଣ୍ତେଟେ।
ଆଦ୍ ୱେଞ୍ଜିମାଟେ ଜେ ଜିସୁ ପେଙ୍ଗୁର୍ତୁଲ୍ ଅସୁସ୍ତ ଲକୁଙ୍ଗ୍ ସୁସ୍ତ କେୟିମାଟଣ୍ତ୍ ଆରେ ଏତାତେ ଜେ ଆନ୍ ନିଚୟ୍ ଜେ ଆନ୍ ୱାୟ୍କେ ଜିସୁନେ ସେନ୍ଦ୍ରା ମେର୍ସି ସିଦାନ୍, ଆଟେନ୍ ଆନ୍ ସୁସ୍ତ ଏଦାନ୍। ଆଦିଙ୍ଗ୍ ଆଦ୍ ଜିସୁଙ୍ଗ୍ ପଟ୍ତେଲ୍ ୱାରି ଅଣ୍ତୁନେ ସେନ୍ଦ୍ରା ମେର୍ସି ସିନେ। ଏସେବେଲ୍ ଆଦ୍ ବସ୍ତର୍ ମେର୍ତେ ଆସେବେଲ୍ ଆଦିନେ ନେତିର୍ ପେପଣ୍ତି ବନ୍ଦ୍ ଏରିସେଣ୍ତେ।
ସାଙ୍ଗେନ୍ ସାଙ୍ଗେନ୍ ଜିସୁ ପୁନୁଙ୍ଗ୍ ଅଡ୍ତଣ୍ତ୍ ଜେ ଅଣ୍ତୁଙ୍ଗ୍ ପେଲ୍ଟୁକ୍ ସକ୍ତି ପେସିସେଣ୍ତେ। ଆଦିଙ୍ଗ୍ ଅଣ୍ତ୍ ମାଣ୍ତିସୁଡି ପାସାର୍ତଣ୍ତ୍ ଏୟିର୍ ଆନିଙ୍ଗ୍ ମେର୍ତର୍।
ସିସୁତୁଲ୍ ଉତର୍ ସିନର୍ “ପେଙ୍ଗୁର୍ତୁଲ୍ ଲକ୍ ଇନ୍ ସାରିବେଡ୍ତେନ୍ ମାୟାର୍ ଆରେ ଇନ୍ ପୟ୍ତାନ୍ ଟେଲାପେଲା ଏରିଦାର୍।” ଆନିଙ୍ଗ୍ ଏଇର୍ ମେର୍ତର୍?” ଏଞ୍ଜି ଏନାଦିଙ୍ଗ୍ ପାସାର୍କିଦାଟ୍? ଆୟ୍ ଆସ୍ମାଲ୍ ଜିସୁଙ୍ଗ୍ କାକେଲ୍ ୱାଙ୍ଗୁସୁଲ୍ କୁଟେଟେ, ଆଦ୍ ତିର୍ଗିଙ୍ଗ୍ନେ ଆରେ ପେରିନ୍ ନାର୍ସି ସେଞ୍ଜିମାଟେ। ଆଦ୍ ଏନାଦ୍ କେୟିମାଟେ, ଆଦ୍ ପାଟିନ୍ ଅଣ୍ତୁଙ୍ଗ୍ ପକେଟେ ଆରେ ଆଦ୍ ସୁସ୍ତ ଏନେ। ଜିସୁ ଆଦିଙ୍ଗ୍ ପକେଣ୍ତ୍ ଇନେ ବିସ୍ବାସ୍ ଇନିଙ୍ଗ୍ ସୁସ୍ତ କେୟିମା। ସାନ୍ତିରେନ୍ ସେନ୍।”
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୮:୨୮- ୩୪; ୯:୨୦-୨୦; ମାର୍କ ୫:୧-୨୦; ୫:୨୪-୩୪; ଲୁକ ୮:୨୬-୩୯; ୮:୪୨-୪୮
Free to use, adapt, and share under an open license (CC BY-SA 4.0).