31. ୩୧- ଜିସୁ ନିର୍ ପୟ୍ତାନ୍ ତାକଣ୍ଡି
ଆଦିନ୍ କୁଣ୍ତେଲ୍ ଜିସୁ ଅଣ୍ତୁନେ ସିସୁତୁଲ୍ନା ଡଙ୍ଗାନ୍ ସସି ଆଦିଙ୍ଗ୍ ସାଲାସି ସେରୁ ଆୟ୍ଟ୍ପାକା ସେନିଙ୍ଗ୍ ପାଇଟ୍ ପକେଣ୍ତ୍ ଏସେବେଲ୍ ଅଣ୍ତ୍ ଲକୁଙ୍ଗ୍ ସୟ୍ତଣ୍ତ୍, ଜିସୁ ଲକୁଙ୍ଗ୍ ସୟ୍ତାନ୍ କୁଣ୍ତେଲ୍, ଅଣ୍ତ୍ ପାର୍ତନା କେଗିଙ୍ଗ୍ ପାଇଟ୍ ଉକୁଟ୍ କପେ ପୟିତାନ୍ ସେୟଣ୍ତ୍, ଜିସୁ ଆମାନ୍ ଉକୁରି ମାଟଣ୍ତ୍ ଆରେ ଅଣ୍ତ ସାରାରତି ଆରେକ୍ ଆମାନ୍ ପାର୍ତନା କେଗିଙ୍ଗ୍ ଉଣ୍ତେଣ୍ତ୍।
ଆମାଟୁକ୍ ସିସୁତୁଲ୍ ଆୟ୍ଲକ୍ନେ ଡଙ୍ଗା ସେନିଙ୍ଗ୍ ଅଡାମାନ୍ନେ, ମାତର୍ ପେରିନ୍ ସିକାଟ୍ତିନ୍ ଆୟ୍ଲକ୍ ସେରୁଟେ ନେଣ୍ତିନ୍ ଏଦେର୍, ଆୟ୍ଲକ୍ନେ ଡଙ୍ଗା ପେରିନ୍ କସଟ୍ନା ସାଲାକିନର୍ ଏନାଦିଙ୍ଗ୍ କି ୱାଲ୍ ୱାଇନ୍ ଆୟ୍ଲକୁନ୍ ଦିଗାଲି ୱାରିନେ।
ଆମାଟୁକ୍ ଜିସୁ ପାର୍ତନା କେଇ ପଲେଣ୍ତ୍ ଆରେ ସିସୁତୁଲୁଙ୍ଗ୍ କାକେଲ୍ ସେୟଣ୍ତ୍। ଅଣ୍ତ୍ ସେରୁଟେ ନିର୍ ପୟ୍ତାନ୍ ଆୟ୍ଲକ୍ନେ ଡଙ୍ଗା ଦିଗାଲ୍ ତାକିସେୟଣ୍ତ୍।
ଆୟ୍ଲକ୍ ଏସେବେଲ୍ ଜିସୁଙ୍ଗ୍ ସୁଡେର୍ ଆଟେଲ୍ ସିସୁତୁଲ୍ ନାର୍ସି ସେୟର୍, ମାତର୍ ଆୟ୍ଲକ୍ ବୁତ୍ ଏଞ୍ଜି ଏତାତର୍, ଜିସୁ ପୁଟଣ୍ତ୍ ଜେ ଆୟ୍ଲକ୍ ନାର୍ସି ସେଞ୍ଜିମାର୍, ଆଦିଙ୍ଗ୍ ଅଣ୍ତ୍ ଆୟ୍ଲକୁଙ୍ଗ୍ ଅର୍ଗି ପକେଣ୍ତ୍, “ନାରିସ୍ମେର୍, ଇୟଣ୍ଡ୍ ଆନ୍।”
ଆମାଟୁକ୍ ପିତର୍ ଜିସୁଙ୍ଗ୍ ପକେଣ୍ତ୍, “ଗୁରୁ, ଜଦି ଅଣ୍ଡ୍ ଇନ୍, ଆଟେକଡ୍ ନିର୍ ପୟିତାନ୍ ତାକିଙ୍ଗ୍ ପାଇଟ୍ ଆନୁଙ୍ଗ୍ ଆଦେସ୍ ଇନ୍ଦେ, ଜିସୁ ପିତରୁଙ୍ଗ୍ ପକେଣ୍ତ୍, “ୱା।”
ଆମାଟୁକ୍ ପିତର୍ ଡଙ୍ଗାଟୁକ୍ ପେସି ଜିସୁନ୍ କାକେଲ୍ ନିର୍ ପୟିତାନ୍ ତାକିଙ୍ଗ୍ ଉଣ୍ତେଣ୍ତ୍, ମାତର୍ କାଣ୍ତେକ୍ ଦୁରିଙ୍ଗ୍ ସେୟାନ୍ କୁଣ୍ତେଲ୍, ଅଣ୍ତ୍ ଜିସୁଙ୍ଗ୍ କାକେଲ୍ଟୁକ୍ ନିଜେଟେ କାନୁଲ୍ ଦୁରିଙ୍ଗ୍ ସୁଡ଼଼େଣ୍ତ୍ ଆରେ ଉଲ୍କାଲିଙ୍ଗ୍ ସୁଡୁଙ୍ଗ୍ ଉଣ୍ତେଣ୍ତ୍ ଆରେ ଅଣ୍ତ୍ ପେରିନ୍ ୱାଲ୍ ୱାରଣ୍ତିଙ୍ଗ୍ ଏତାତଣ୍ତ୍।
ଆଟେଲ୍ ପିତର୍ ନାର୍ସି ସେୟଣ୍ତ୍ ଆରେ ସମ୍ଦୁର୍ତୁନ୍ ମୁଲ୍ଗୁଙ୍ଗ୍ ଉଣ୍ତେଣ୍ତ୍, ଅଣ୍ତ୍ ଆୱ୍ଲି ଏରି ପକୁଙ୍ଗ୍ ଉଣ୍ତେଣ୍ତ୍, “ଏ ଗୁରୁ, ଆନୁଙ୍ଗ୍ ଉଦାର୍ କେ!” ଆୟ୍ବେଲ୍ ଜିସୁ ସେଞ୍ଜି ଅଣ୍ତୁଙ୍ଗ୍ ଉଦାର୍ କେନଣ୍ତ୍, ଆମାଟୁକ୍ ଅଣ୍ଡ୍ ପିତରୁଙ୍ଗ୍ ପକେଣ୍ତ୍, “ଏ ତାୟେନି ବିସ୍ବାସିଟଟ୍, ଇନ୍ ଏନାଦିଙ୍ଗ୍ ଦୁଇମନ୍ କେନଟ୍?”
ଆୟ୍ବେଲ୍ ପିତର୍ ଆରେ ଜିସୁ ଡଙ୍ଗାନ୍ ସେୟର୍, ଆଟେଲ୍ ୱାଲ୍ ଦାପ୍ରେନ୍ ତବିର୍ ଏନେ ଆରେ ନିର୍ ସାନ୍ତି ଏନେ, ସିସୁତୁଲ୍ କାବାଏରି ସେୟର୍, ଆୟ୍ଲକ୍ ଜିସୁଙ୍ଗ୍ ଆରାଦନା କେୟି ପକେର୍ ସତ୍ଇ ଇନ୍ ମାପ୍ରୁନେ ସେପାଲ୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୧୪:୨୨-୩୩; ମାର୍କ ୬:୪୫-୫୨; ଜଅନ୍ ୬:୧୬-୨୧
Free to use, adapt, and share under an open license (CC BY-SA 4.0).