30. ୩୦- ଜିସୁ ପାସ୍ ହଜାର୍ ଲକୁଙ୍ଗ୍ ତିଣ୍ଡୁପଣ୍ଡି
ପେଙ୍ଗିଟ୍ ୱେନ୍ ୱେନ୍ ପଲ୍ଗୁଲୁଙ୍ଗ୍ ପର୍ଚାର୍ କେଗିଙ୍ଗ୍ ଆରେ ସିକିୟା ସିଗିଙ୍ଗ୍ ପାୟିଟ୍ ଜିସୁ ଅଣ୍ତୁନେ ସିସୁତୁଲୁଙ୍ଗ୍ ସୟତଣ୍ତ୍। ଜିସୁ ଏରେମାନ୍ ମାଟଣ୍ତ୍ ଆମାନ୍ ଆୟ୍ଲକ୍ ଏସେବେଲ୍ ୱାନର୍, ଏନାଦ୍ ଏନାଦ୍ ଗଟ୍ଏରି ମାଟେ ଆଦ୍ ଆୟ୍ଲକ୍ ଅଣ୍ତୁଙ୍ଗ୍ ପକେର୍। ଆଦିଙ୍ଗ୍ କୁଣ୍ତେଲ୍ ଜିସୁ ପେରେଟ୍ ଆୟଟ୍ପାକା ମାନଣ୍ତି ଉକୁଟ୍ ସିମ୍ରା ବାସେନ୍ ସେନିଙ୍ଗ୍ ପାୟିଟ୍ ଆୟ୍ଲକୁଙ୍ଗ୍ ଅର୍ଗେଣ୍ତ୍ ଆଦିଙ୍ଗ୍, ଆୟ୍ଲକ୍ ଉକୁଟ୍ ଡଙ୍ଗାନ୍ ଉଣ୍ତେର୍ ଆରେ ପେରେଟ୍ ଆୟଟ୍ପାକା ସେୟର୍।
ମାତର୍ ଆୟ୍ ବାସେନ୍ ପେଙ୍ଗୁର୍ତୁଲ୍ ଲକ୍ ମାନ୍ ପାୟିଟ୍ ଜିସୁ ଆରେ ଅଣ୍ତୁନେ ସିସୁତୁଲ୍ ଡଙ୍ଗାଙ୍ଗ୍ ସାକାରି ସେୟର୍। ଇ ଲକ୍ଗୁଲ୍ ଆୟ୍ଲକୁଙ୍ଗ୍ କାକେଲ୍ ସେନିଙ୍ଗ୍ ପାୟିଟ୍ ଆୟ୍ଲକ୍ ୱାଦାନ୍ ଆଗାଡି ପେରେଟ୍ କାକେଲ୍ ସେୟର୍। ଆଦିଙ୍ଗ୍ ଜିସୁ ଆରେ ଅଣ୍ତୁନେ ସିସୁତୁଲ୍ ଏରେବେଲ୍ ଏଦେର୍, ପେଙ୍ଗୁର୍ତୁଲ୍ ଲକ୍ଗୁଲ୍ ଜମାଏରି ପେରେଟ୍ ଆୟଟ୍ ପାକା ଆୟ୍ଲକୁଙ୍ଗ୍ କାସି ମାଟର୍।
ଆୟ୍ଲକ୍ ୫୦୦୦ ମାଗିଣ୍ତ୍ ସିଣ୍ତ୍କିଲ୍ ମାଟର୍, ଆସ୍ମାସ୍କିଲ୍ ଆରେ ସିଣ୍ତିଲ୍ ମାସିଲିଙ୍ଗ୍ ଏଜାସି ଏରାମାଟେ। ଜିସୁ ଇ ଲକ୍ଗୁଲୁଙ୍ଗ୍ ସୁଡି ପେରିନ୍ କାନିକରମ୍ ଏନଣ୍ତ୍। ଜିସୁଙ୍ଗ୍ ପାୟିଟ୍ ଇ ଲକ୍ଗୁଲ୍ଗୁଲ୍ କଲାକ୍ମାନା ମେଣ୍ତାଲ୍ ୱାଡିନ୍ ମାଟର୍, ଆଦିଙ୍ଗ୍ ଅଣ୍ତ୍ ଆୟ୍ଲକୁଙ୍ଗ୍ ସିକିୟା ସିନଣ୍ତ୍ ଆରେ ଆୟ୍ଲକୁଙ୍ଗ୍ ପେଲ୍ଟୁକ୍ ଏରେଲକ୍ ଦୁକାସୁକା ମାଟର୍ ଆୟ୍ଲକୁଙ୍ଗ୍ ସୁସ୍ତ କେନଣ୍ତ୍।
ସିର୍ତାବେଲ୍ ସିସୁତୁଲ୍ ଜିସୁଙ୍ଗ୍ ପକେର୍ “ବେଲା ପେରିନ୍ ଏରିସେନିଦା ଆୟ୍ବେଲ୍ ଏରେମେନ୍ ଗଡ୍ମାନା, ଲକ୍ଗୁଲୁଙ୍ଗ୍ ସୟ୍ସି ସି ଏଟେନ୍କି ଆୟ୍ଲକ୍ ସେଞ୍ଜି ଏନାଦ୍ ଅଲେ ତିନିଙ୍ଗ୍ ଅଡ୍ତାର୍।”
ମାତର୍ ଜିସୁ ସିସୁତୁଲୁଙ୍ଗ୍ ପକେଣ୍ତ୍ “ଇମ୍ଗୁଲ୍ ଆୟ୍ଲକୁଙ୍ଗ୍ ଏନାଦ୍ ଅଲେ ତିନିଙ୍ଗ୍ ସିୟୁର୍, ଆୟ୍ଲକ୍ ଉତର୍ ସିନର୍ ଆମ୍ ଆଦ୍ ଏଟେନ୍ କେଗିଙ୍ଗ୍ ଅଡ୍ତାମ୍? ଆମ୍କାକେଲ୍ ପାସ୍ଗଟା ରୁଟିଲ୍ ଆରେ ଜଡେକ୍ ମିନିଲ୍ ମାୟାୱ୍।”
ଜିସୁ ଅଣ୍ତୁନେ ସିସୁତୁଲୁଙ୍ଗ୍ ପକେଣ୍ତ୍ “ଲକ୍ଗୁଲୁଙ୍ଗ୍ ପକୁର୍ ଲାଟା ପୟିତାନ୍ ପସାସ୍ ପସାସ୍ ଲକ୍ ଦଲ୍ଏରି ଉଣ୍ତ୍କାର୍।
ଆଦିନ୍ କୁଣ୍ତେଲ୍ ଜିସୁ ଆୟ୍ ପାସ୍ଗଟା ରୁଟି ଆରେ ଜଡେକ୍ ମିନିଲ୍ ପାତି ସର୍ଗେନ୍ ସୁଡି, ଆୟ୍ କାଡ୍ସେ ପାଇଟ୍ ମାପ୍ରୁନ୍ ପେଲ୍ ଦନିୟବାଦ୍ ସିନଣ୍ତ୍।
ଆମାଟୁକ୍ ଜିସୁ ରୁଟିଲ୍ ଆରେ ଆୟ୍ ମିନିଲିଙ୍ଗ୍ ମୁକା ମୁକା କେଇ ପୁନ୍ତଣ୍ତ୍ ଆୟ୍ ମୁକାଲିଙ୍ଗ୍ ଲକ୍ଗୁଲୁଙ୍ଗ୍ ସିଗିଙ୍ଗ୍ ପାଇଟ୍ ଅଣ୍ତୁନେ ସିସୁ ତୁଲୁଙ୍ଗ୍ ସିନଣ୍ତ୍, ସିସୁତୁଲ୍ ଆୟ୍ କାଦିଙ୍ଗ୍ ପାଇକିଙ୍ଗ୍ ଉଣ୍ତେର୍, ଆରେ ଆୱ୍ ଆରେ ପଲିସେନୁଟେୱ୍, ପାଟିନ୍ଲକ୍ ତିଞ୍ଜିକେରିନ୍ ପୁଡୁଗ୍ ପାଇଙ୍ଗ୍ ତର୍।
ଆମାଟୁକ୍ ସିସୁତୁଲ୍ ଲକ୍ଗୁଲ୍ ତିଞ୍ଜି ସାର୍ଙ୍ଗ୍ଣ୍ତି ମୁକାଲିଙ୍ଗ୍ ଉକୁଟ୍ପେଲ୍ ରୁଣ୍ତାତର୍ ଆରେ ବାରଡାଲା ଏନେୱ୍, ପାଟିନ୍ କାଦି ମାତର୍ ପାସ୍ରୁଟି ଆରେ ଜଡେକ୍ ମିନିଲ୍ନା ଏନେୱ୍।
ବାଇବଲ୍ଟେ ଉକୁଟ୍ କେରାଲ୍: ମାତିଉ ୧୪:୧୩-୨୧; ମାର୍କ ୬:୩୧-୪୪; ଲୁକ ୯:୧୦-୧୭; ଜହନ ୬:୫-୧୫
Free to use, adapt, and share under an open license (CC BY-SA 4.0).