29. ୨୯- ଦୟା ମାନାଟେ ଦାସ୍ନେ କେରାଲ୍
ଦିନେକ୍, ପିତର ଜିସୁଙ୍ଗ୍ ପାଚାର୍ତଣ୍ତ୍ “ଗୁରୁ, ଏସେଲ୍ ଆନ୍ ବାଇ ଆନ୍ ବିରଦ୍ରେନ୍ ପାପ୍ କେଦାଣ୍ତ୍ ଆଟେଲ୍ ଆନ୍ ଅଣ୍ତୁଙ୍ଗ୍ କେତେ ତର୍ କେମା ସିଦାନ୍? ଏନା ସାତ୍ ତର୍ ଆରେକ୍?” ଜିସୁ ପକେଣ୍ତ୍ ସାତ୍ ଏରା, ମାତର୍ ସତୁରି ତର୍ ଆରେକ୍!” ଇ ୱାଡ଼଼ିନ୍ ଜିସୁ ପକଣ୍ତି ଅରତ୍ ମାଟେ ଜେ ଆମ୍ ପାଟିନ୍ ବେଲ୍ କେମା ସିଗିଙ୍ଗ୍ ଦର୍କାର୍। ଆଦିଙ୍ଗ୍ କୁଣ୍ତେଲ୍ ଜିସୁ ଇ କେରାଲ୍ ପକେଣ୍ତ୍।
ଜିସୁ ପକେଣ୍ତ୍ “ମାପ୍ରୁନେ ରାଜି ଇ ୱାଡିନ୍ ଉକୁର୍ ରାଜାଙ୍ଗ୍ ୱାଡିନ୍ ଅଣ୍ତ୍ ଅଣ୍ତୁନେ ଦାସ୍ଲକ୍ନା ଉଣ୍ତି ହିସାବ୍ ପୁରା କେଗିଙ୍ଗ୍ ପାୟିଟ୍ ଇସା କେନଣ୍ତ୍। ଆୟ୍ଲକ୍ନେ ଦାସ୍ଲକୁଙ୍ଗ୍ ପେଲ୍ଟୁକ୍ ଉକୁର୍ ୨,୦୦,୦୦୦ ବରସ୍ଟେ ପେରିନ୍ ପାଉଣା ଜମାସି ଇରିମାଟଣ୍ତ୍।
ଆୟ୍ ଦାସ୍ ଆୟ୍ ପାଉଣା ମାଣ୍ତୁସି ସିଗିଙ୍ଗ୍ ଅଡୁଟଣ୍ତ୍, ଆଦିଙ୍ଗ୍ ରାଜା ପକେଣ୍ତ୍ “ଇୟ୍ଣ୍ତୁଙ୍ଗ୍ ଆରେ ଇୟ୍ଣ୍ତ୍ନେ ପରିବାରିଙ୍ଗ୍ ଦାସ୍ ୱାଡିନ୍ ୱିଡିକାରି ପାଉଣା ମାଣ୍ତୁସି ସିଗିଙ୍ଗ୍ ସିୟୁର୍।”
ଆୟ୍ ଦାସ୍ ରାଜାନେ ପାଦ୍ ମୁତୁଲ୍ ଇଲି ପକେଣ୍ତ୍ ଦୟାକେୟି ଆନ୍ ବିସୟ୍ରେନ୍ ଦରଜ୍ ପାତ୍, ଆରେ ଆନ୍ ଇନ୍ପେଲ୍ଟେ ରୁନ୍ ମାନଣ୍ତି ପାଟିନ୍ ରୁନ୍ ସୁଜାତାନ୍। ରାଜା ଆୟ୍ ଦାସ୍ସିଙ୍ଗ୍ ଦୟା କେନଣ୍ତ୍,ଆଦିଙ୍ଗ୍ ଅଣ୍ତ୍ ଅଣ୍ତୁନେ ପାଟିନ୍ ରୁନୁଙ୍ଗ୍ ସାକାରେଣ୍ତ୍।
ମାତର୍ ଆୟ୍ ଦାସ୍ ଏସେବେଲ୍ ରାଜାଙ୍ଗ୍ ପେଲ୍ଟୁକ୍ ସେୟ୍ଣ୍ତ୍, ଆସେବେଲ୍ ଅଣ୍ତ୍ ଆରେ ଉକୁର୍ ସଙ୍ଗାରିଙ୍ଗ୍ ପର୍କଣ୍ଡିଙ୍ଗ୍ ସୁଡେଣ୍ତ୍ ଏଇଣ୍ତ୍ କି ଅଣ୍ତୁଙ୍ଗ୍ ସାର୍ ମାସ୍ଟେ ରୁନ୍ ସିଗିଙ୍ଗ୍ ମାଟେ। ଆୟ୍ ଦାସ୍ ସଙ୍ଗାରିନେ କଟ୍ରଙ୍ଗ୍ ପାତେଣ୍ତ୍ ଆରେ ପକେଣ୍ତ୍ “ଆନ୍ ପେଲ୍ଟୁକ୍ ଉଦାର୍ ଉୟଣ୍ତି ରୁନ୍ ସୁଜାପୁଟ୍!”
“ସଙ୍ଗାରି ଆୟ୍ ଦାସ୍ନେ ପାଦ୍ ମୁତୁଲ୍ ଇଲି ପକେଣ୍ତ୍ “ଦୟାକେୟି ଆନ୍ ପର୍ତି ଦରଜ୍ ପାତ୍, ଆରେ ଆନ୍ ଉଦାର୍ ପର୍ପଣ୍ତି ପାଟିନ୍ ରୁନ୍ ଇନୁଙ୍ଗ୍ ମାଣ୍ତ୍ସି ସିଦାନ୍। ମାତର୍ ଆଦ୍ କେଦାନ୍ ବାଦୁଲ୍ରେନ୍ ଆଣ୍ତ୍ ରୁନ୍ ସୁଜାତାନ୍ ଆରେକ୍ ଅଣ୍ତୁଙ୍ଗ୍ ଜୟିଲ୍ତିନ୍ ଇରେଣ୍ତ୍।
ଏରେ ଦାସ୍ଲକ୍ ଇ ଗଟନା ସୁଡିମାଟର୍, ଆୟ୍ଲକ୍ ପେରିନ୍ ଦୁକ୍ କେନର୍। ଆୟ୍ଲକ୍ ରାଜାଙ୍ଗ୍ କାକେଲ୍ ସେୟର୍ ଆରେ ପାଟିନ୍ ପାଟେ ପକେର୍।
“ରାଜା ଆୟ୍ ଦାସିଙ୍ଗ୍ ଅର୍ଗି ପକେଣ୍ତ୍, ‘ଇନ୍ ଦୁସ୍ଟ ଦାସ୍!” ଇନ୍ ଆନିଙ୍ଗ୍ କେମା ବିକିୟା ପର୍ତାଲିନ୍ ଆନ୍ ଇନିଙ୍ଗ୍ ପାଟିନ୍ ରୁନ୍ ସାକାରେନ୍। ଇନ୍ମେନ୍ ଟିକ୍ ଇ ୱାଡିନ୍ କେଗିଙ୍ଗ୍ ଦର୍କାର୍। ରାଜା ପେରିନ୍ ରିସା ଏନଣ୍ତ୍ ଜେ ଆୟ୍ ଦୁସ୍ଟ ଦାସ୍ ପାଟିନ୍ ରୁନ୍ ସୁଜାତାନ୍ ଆରେକ୍ ଅଣ୍ତୁଙ୍ଗ୍ ଜୟିଲ୍ ଉଲେନ୍ ଇରେଣ୍ତ୍।
ଆଦିଙ୍ଗ୍ କୁଣ୍ତେଲ୍ ଜିସୁ ପକେଣ୍ତ୍, “ଏରେଲକ୍ ନିଜେଟେ ବାଇଲକୁଙ୍ଗ୍ କେମା ସିୟାର୍ ଆୟ୍ଲକୁଙ୍ଗ୍ ସର୍ଗେଟେ ଆବାମେନ୍ କେମା ସିୟାଣ୍ଡ୍ ଆନେ ସର୍ଗେଟେ ଆବା ମେନ୍ ଆୟ୍ଲକୁଙ୍ଗ୍ ପେଲ୍ ଆପାଡ଼଼ି କେଦାଣ୍ଡ୍।
ବାଇବଲ୍ଟେ ଉକୁଟ୍ କେରାଲ୍ :ମାତିଉ ୧୮:୨୧-୩୫
Free to use, adapt, and share under an open license (CC BY-SA 4.0).