28. ୨୮- ଜୁବାଟେ ସାସନ୍‌କାର୍‌ୟା

ଦିନେକ୍, ଉକୁର୍ ବେଣ୍ତିୟା ସାୱ୍‌କାର୍ ଜିସୁଙ୍ଗ୍ କାକେଲ୍ ୱାନଣ୍ତ୍ ଆରେ ପାଚାର୍‌ତଣ୍ତ୍, “ନିୟାଟେ ଗୁରୁ, ପଲାଟେ ଜିୱେ ପାୟ୍‌ଏରିଙ୍ଗ୍ ପାୟିଟ୍ ଆନ୍ ଏନା କେଦାନ୍?” ଜିସୁ ଅଣ୍ତୁଙ୍ଗ୍ ପକେଣ୍ତ୍, “ଆନିଙ୍ଗ୍ ଏନାଦିଙ୍ଗ୍ ନିୟାଟଣ୍ତ୍ ଏନ୍‌ଦାଣ୍ତ୍?” ଉକୁର୍ ଇ ନିୟାଟଣ୍ତ୍ ମାୟାଣ୍ତ୍ ଅଣ୍ତ୍ ଏରିଦାଣ୍ତ୍ ମାପ୍‌ରୁ। ମାତର୍ ଇନ୍ ଜଦି ପଲାଟେ ଜିୱେ ପାୟ୍‌ଏରିଙ୍ଗ୍ ଇସା କେଗିଦାଟ୍‌ ଆଟେକଡ୍ ମାପ୍‌ରୁନେ ବେବସ୍‌ତାଲିଙ୍ଗ୍ ପାଲନ୍ କେ।”

ଅଣ୍ତ୍ ପାଚାର୍‌ତଣ୍ତ୍ “ଏନା ଏନା ବେବସ୍‌ତାଲିଙ୍ଗ୍ ଆନ୍ ପାଲନ୍ କେଗିଙ୍ଗ୍ ଦର୍‌କାର୍?” ଜିସୁ ଉତର୍ ସିନଣ୍ତ୍ “ଲକୁଙ୍ଗ୍ ୱାଟ୍‌ତେନ୍ ଆଟ୍‌ମେନ୍। ବେବିଚାର୍ କେମେନ୍। ଚରି କେମେନ୍। ମିଚ୍ ପକ୍‌ମେନ୍। ଇନେ ଆବା ଆରେ ଆୟାଙ୍ଗ୍ ସନ୍‌ମାନ୍ କେ, ଆରେ ଇନେ ସାୟ୍‌ପଡିସାଟେ ଲକୁଙ୍ଗ୍ ମନ୍‌ଗର୍‌ବେ ଟୁକ୍ ଲାଡ୍ କେ।”

ମାତର୍ ଆୟ୍ ବେଣ୍ତିୟା ସାୱ୍‌କାର୍ ଅଣ୍ତୁଙ୍ଗ୍ ପକେଣ୍ତ୍ “ଆନ୍ ଇ ପାଟିନ୍ ବିସୟ୍ ନିନିବେଲ୍ ଟୁକ୍ ପାଲନ୍ କେୟି ୱାରିମାନ୍। ପଲାଟେ ଜିୱେ ପାୟ୍‌ଏରିଙ୍ଗ୍ ପାୟିଟ୍ ଆନିଙ୍ଗ୍ ଆରେ ଏନା କେଗିଙ୍ଗ୍ ଏଦା?” ଜିସୁ ଅଣ୍ତୁଙ୍ଗ୍ ପର୍‌ତି ସୁଡି ଅଣ୍ତୁଙ୍ଗ୍ ଲାଡ୍ କେନଣ୍ତ୍।

ଜିସୁ ଉତର୍ ସିନଣ୍ତ୍ “ଜଦି ଇନ୍ ନିୟାଟଣ୍ତ୍ ଏରିଙ୍ଗ୍ ଇସା କେଦାଟ୍‌ ଆଟେକଡ୍ ସେନ୍ ଆରେ ଇନେ ପାଟିନ୍ ଦନ୍ ସମ୍‌ପତିଙ୍ଗ୍ ୱିଡିକାର୍ ଆରେ ମାନାଲକୁଙ୍ଗ୍ ଦନ୍ ଦାନ୍ କେ, ଆରେ ଇନ୍ ସରଗ୍ ରାଜିନ୍ ଦନ୍ ପାୟ୍‌ଏଦାଟ୍‌। ଆଦିଙ୍ଗ୍ କୁଣ୍ତେଲ୍ ୱାରି ଆନ୍ କୁଣ୍ଡୁନକ ତାକ୍‌।”

ଜିସୁ ପକଣ୍ତି ବିସୟ୍ ଏସେବେଲ୍ ବେଣ୍ତିୟା ସାୱ୍‌କାର୍ ୱେଟଣ୍ତ୍, ଅଣ୍ତ୍ ପେରିନ୍ ଦୁକ୍ କେନଣ୍ତ୍, ଏନାଦିଙ୍ଗ୍ କି ଅଣ୍ତ୍ ପେରିନ୍ ଦନି ମାଟଣ୍ତ୍ ଆରେ ଅଣ୍ତ୍ ଜମାସି ଇରଣ୍ତି ପାଟିନ୍ ଦନ୍ ସମ୍‌ପତିଙ୍ଗ୍ ସିଗିଙ୍ଗ୍ ଇସା କେୟୁଟଣ୍ତ୍। ଅଣ୍ତ୍ ପନ୍ଦୁଙ୍ଗ୍ ମାଣ୍ଡ୍‌ସି ଜିସୁଙ୍ଗ୍ କାକେଲ୍ ଟୁକ୍ ପେସି ସେୟ୍‌ଣ୍ତ୍।

ଆଦିଙ୍ଗ୍ କୁଣ୍ତେଲ୍ ଜିସୁ ଅଣ୍ତୁନେ ସିସୁତୁଲୁଙ୍ଗ୍ ପକେଣ୍ତ୍ “ଦନି ଲକ୍ ମାପ୍‌ରୁଙ୍ଗ୍ ରାଜିନ୍ ସେନିଙ୍ଗ୍ ପେରିନ୍ କସ୍‌ଟ, ଦନି ଲକ୍ ସର୍‌ଗ ରାଜିନ୍ ସେନଣ୍ତି ପେଲ୍‌ଟୁକ୍ ସୁଜାଟେ କାନାସି ଉଟ୍‌ ନାନିଙ୍ଗ୍ ସଜ୍ ଏଦା।”

ଜିସୁ ପକଣ୍ତି ବିସୟୁଙ୍ଗ୍ ଏସେବେଲ୍ ସିସୁତୁଲ୍ ୱେଟର୍ ଆୟ୍‌ଲକ୍ କାବାଏରି ପକେର୍ “ଆଟେକଡ୍ ଏଇର୍ ଉଦାର୍ ପାୟ୍‌ଏଦାର୍ ଆରେ ପରିତ୍‌ରାନ୍ ପାୟ୍‌ଏଦାର୍?”

ଜିସୁ ସିସୁତୁଲୁଙ୍ଗ୍ ସୁଡି ପକେଣ୍ତ୍, ଲକ୍‌ନେ କାନୁଲ୍‌ତୁନ୍ ଇଦ୍ ଏରିଙ୍ଗ୍ ଅଡ଼଼ା ମାତର୍ ମାପ୍‌ରୁନ୍ କାନୁଲ୍‌ତୁନ୍ ପାଟିନ୍ ବିସୟ୍ ଏରିଙ୍ଗ୍ ଅଡ୍‌ତା।

ପିତର୍ ଜିସୁଙ୍ଗ୍ ପକେଣ୍ତ୍ “ଆମ୍ ପାଟିନ୍ ବିସୟ୍ ସାକାରି ଇନ୍ କୁଣ୍ତୁନି ୱାରିମାମ୍, ଆମ୍ ପାଇଟ୍ ଏନା ପୁରସ୍‌କାର୍‌ ମାୟା?”

ଜିସୁ ଉତର୍ ସିନଣ୍ତ୍ “ଏରେଲକ୍ ଆନ୍ ପାଇଟ୍ ଉଲେ, ବାଇତିଲିଙ୍ଗ୍, ଆୟାଲିଙ୍ଗ୍, ଆବାଙ୍ଗ୍, ଆୟାଙ୍ଗ୍, ସିଣ୍ତିଲ୍ ମାସିଲିଙ୍ଗ୍ ଆରେ ଦନ୍ ସମ୍‌ପତିଙ୍ଗ୍ ସାକାରି ଆରେ ଅଣ୍ତୁନେ ସଏ୧୦୦ ଗୁନ୍ ଇଜଗତ୍‌ତୁନ୍ ପଲାଟେ ଜିୱେ ପାୟ୍‌ଏଦାଣ୍ତ୍। ମାତର୍ ଆଗାଡି ମାନ୍‌ଲକ୍‌ କୁଣ୍ତେଲ୍ ଏଦାର୍, କୁଣ୍ତେଲ୍ ମାନ୍‌ଲକ୍‌ ଆଗାଡି ଏଦାର୍।”