35. ୩୫- ଦୟାଟେ ଆବାନେ କେରାଲ୍
ଦିନେକ୍, ଜିସୁ ପେଙ୍ଗୁର୍ତୁଲ୍ ସିସ୍ତୁପାଦାନ୍ ଲକୁଙ୍ଗ୍ ଆରେ ୱେନ୍ ପାପି ଲକୁଙ୍ଗ୍ ଏରେଲକ୍ ସବାନ୍ ରୁଣ୍ତ୍ଏରିମାଟର୍, ସିକିୟା ସିଗିନଣ୍ତ୍।
ଆମାନ୍ ମାନଣ୍ତି ଏଙ୍ଗୁର୍ତୁଲ୍ ଦରମ୍ ନେତାଲକ୍ ଜିସୁଙ୍ଗ୍ ପାପିତିଲ୍ନା ସାଙ୍ଗ ଏରଣ୍ତି ସୁଡେର୍, ଆରେ ଆୟ୍ଲକ୍ ନିଜେନ୍ନିଜେନିଙ୍ଗ୍ ଅଣ୍ତୁଙ୍ଗ୍ ବିରଦ୍ରେନ୍ ଜୁକ୍ତିତର୍କ କେଗିଙ୍ଗ୍ ଉଣ୍ତେର୍। ଆଦିଙ୍ଗ୍ ଜିସୁ ଆୟ୍ଲକୁଙ୍ଗ୍ ଇ କେରାଲ୍ ପକେଣ୍ତ୍।
“ଉକୁର୍ ଲକ୍ନେ ଜଡେକ୍ ସେପାକିଲ୍ ମାଟର୍। ପୁଟି ସେପାଲ୍ ତାମ୍ ଆବାଙ୍ଗ୍ ପକେଣ୍ତ୍, ‘ଆବା, ଆନେ ସମ୍ପତ୍ ଟେ ବାଗ୍ ଆନୁଙ୍ଗ୍ ଇନ୍ଦେ, ଆଦିଙ୍ଗ୍ ତାମ୍ବା ଆୟ୍ ଉରୁଲ୍ ସେପାକିଲିଙ୍ଗ୍ ସମ୍ପତି ବାଗ୍ କେଇ ସିନଣ୍ତ୍।”
“ଅଣ୍ତୁନେ ନିନିଟେ ସେପାଲ୍ ଅଣ୍ତୁଙ୍ଗ୍ ପେଲ୍ ମାନଣ୍ତି ପାଟିନିଙ୍ଗ୍ ଉକୁଟ୍ପେଲ୍ କେୟି ପେରାଦୁରିଙ୍ଗ୍ ପେସି ସେୟ୍ଣ୍ତ୍ ଆରେ ଉୟାଟେ କାମେନା ପିୟିଙ୍ଗ୍ ପାଟିନ୍ ଡାବୁଲ୍ ଉଡାସି କାରେଣ୍ତ୍।”
ଆଦିଙ୍ଗ୍ କୁଣ୍ତେଲ୍, ନିନିଟେ ସେପାଲ୍ ଏରେ ଦେସ୍ତିନ୍ ମାନ୍ନଣ୍ତ୍ ଆୟ୍ଦେସ୍ତିନ୍ ଦୁର୍ବିକ୍ୟ ଏନେ, ଆରେ କାଦି ୱିଡିଙ୍ଗ୍ ପାୟିଟ୍ ଅଣ୍ତୁଙ୍ଗ୍ କାକେଲ୍ ମୁଲ୍କେନ୍ ଡାବୁଲ୍ ମାନୁଟେ। ମାତର୍ ପାଣ୍ତ୍କିଲିଙ୍ଗ୍ ତିଣ୍ତୁପଣ୍ତି କାମେ ଅଣ୍ତୁଙ୍ଗ୍ ତଣ୍ତେଟେ। ଅଣ୍ତ୍ ପେରିନ୍ କାୟ୍ତାର୍ ଆରେ ଆଣ୍ତ୍କିର୍ ମାଟଣ୍ତ୍ ଜେ ଅଣ୍ତ୍ ପାଣ୍ତ୍କିଲ୍ ତିନଣ୍ତି କାଦି ତିନିଙ୍ଗ୍ ଇସା କେନଣ୍ତ୍।”
“ସାରାସାରି କୁଣ୍ତେଲ୍, ପୁଟି ସେପାଲ୍ ନିଜେନିଙ୍ଗ୍ ନିଜେନ୍ ପକେଣ୍ତ୍ ଆନ୍ ଏନା କେଗିଦାନ୍? ଆମ୍ବାନେ ପାଟିନ୍ କୁଲିୟାରିତିଲିଙ୍ଗ୍ ପାୟିଟ୍ ପେରିନ୍ କାଦି ମାୟା, ଆରେ ଆନ୍ ଇମାନ୍ ଆଣ୍ତ୍କିର୍ ସାଗିଦାନ୍। ଆନ୍ ଆମ୍ବାନ୍ କାକେଲ୍ ମାଣ୍ଡି ସେୟାନ୍ ଆରେ ଆନିଙ୍ଗ୍ ଅଣ୍ତୁନେ କୁଲ୍ୟାରି ୱାଡିନ୍ ଇରିଙ୍ଗ୍ ପକ୍ଦାନ୍।”
“ଆଦିଙ୍ଗ୍ ପୁଟିଟେ ସେପାଲ୍ ତାମ୍ବାଙ୍ଗ୍ କାକେଲ୍ ଉଲେନ୍ ସେନିଙ୍ଗ୍ ପାୟିଟ୍ ପେତଣ୍ତ୍। ଅଣ୍ତ୍ ଏସେବେଲ୍ ଦୁରିଙ୍ଗ୍ ମାଟଣ୍ତ୍, ତାମ୍ବା ଦୁରିଟୁକ୍ ସୁଡି ଦୟାନା କିଲିବିଲି ଏନଣ୍ତ୍। ଅଣ୍ତ୍ ଅଣ୍ତୁନେ ସେପାଲିଙ୍ଗ୍ କାକେଲ୍ ୱେଟିସେଞ୍ଜି ଅଲ୍ଗି ଏନଣ୍ତ୍ ଆରେ ଅଣ୍ତୁଙ୍ଗ୍ ସକ୍ କେନଣ୍ତ୍।”
“ସେପାଲ୍ ପକେଣ୍ତ୍, ‘ଆବା, ଆନ୍ ମାପ୍ରୁଙ୍ଗ୍ ବିରଦ୍ରେନ୍ ଆରେ ଇନ୍ ବିରଦ୍ରେ ପାପ୍ କେୟିମାନ୍। ଇନ୍ ସେପାଲ୍ ଏଞ୍ଜି ଅର୍ଗିଏରିଙ୍ଗ୍ ଆନ୍ ଜଗିୟ୍ ଏରାନ୍।”
“ମାତର୍ ଅଣ୍ତୁନେ ତାମ୍ବା ଅଣ୍ତୁନେ ଦାସ୍ଲକୁଙ୍ଗ୍ ପେଲ୍ଟୁକ୍ ଉକୁରୁଙ୍ଗ୍ ପକେଣ୍ତ୍, ‘ଦାପ୍ରେନ୍ ସେନ୍ ପାଟିନ୍ପେଲ୍ଟୁକ୍ ନିୟାଟେ ବସ୍ତର୍ ଇନ୍ଦ୍ରେ ଆରେ ଆଦ୍ ଆନ୍ ସେପାଲିଙ୍ଗ୍ ଜଗ୍ଡାପୁଟ୍। ୱାନ୍ଦେନ୍ ୱାତ୍ ଆରେ କାଲ୍ଗିଲ୍ତିନ୍ ପଣ୍ଡୟ୍। ଆଦିଙ୍ଗ୍ କୁଣ୍ତେଲ୍ ପାଟିନ୍ ପେଲ୍ଟୁକ୍ ନିୟାଟେ ବାସିପିଲା କାତୁର୍ ଆରେ ଆମ୍ ବଜି କେୟି କିର୍ଦେ କେଗିକାର୍। ଏନାଦିଙ୍ଗ୍ କି ଆନ୍ ସେପାଲ୍ ସାୟି ସେଞ୍ଜି ମାଟଣ୍ତ୍, ମାତର୍ ଇଣ୍ତି ଅଣ୍ତ୍ ଜିୱେ ମାୟାଣ୍ତ୍। ଅଣ୍ତ୍ ମାୟ୍ଙ୍ଗି ମାଟଣ୍ତ୍, ମାତର୍ ଇଣ୍ତି ତଣ୍ତେଣ୍ତ୍!”
“ଆଦିଙ୍ଗ୍ ଲକ୍ଗୁଲ୍ କିର୍ଦେ କେଗିଙ୍ଗ୍ ଉଣ୍ତେର୍। ପେରିନ୍ ବେଲା ଏଦାନ୍ କୁଣ୍ତେଲ୍, ୱିଣ୍ତ୍ଟୁକ୍ କାମେକେୟି ବେର୍ସେପାଲ୍ ଉଲେନ୍ ୱାନଣ୍ତ୍। ଅଣ୍ତ୍ ପାଟେ ପାରଣ୍ତି ଆରେ ଏନ୍ଦଣ୍ତି ୱେନିଙ୍ଗ୍ ଅଡ୍ତଣ୍ତ୍ ଏନାଏରିମାୟା ଏଞ୍ଜି ନାର୍ସି ସେୟଣ୍ତ୍।”
ତାମ୍ ପୁଟିଟେ ବାଇ ୱାରଣ୍ତି ଇ ପାଟିନ୍ କିର୍ଦେଟେ ବଜି ତିୟାର୍ ଏରିମାୟା ଏଞ୍ଜି ଏସେବେଲ୍ ବେର୍ସେପାଲ୍ ସୁଡେଣ୍ତ୍, ଆସେବେଲ୍ ଅଣ୍ତ୍ ପେରିନ୍ ରିସା ଏରିସେୟଣ୍ତ୍ ଆରେ ଉଲେନ୍ ସେନୁଟଣ୍ତ୍। ତାମ୍ବା ୱାନଣ୍ତ୍ ଆରେ ଆୟ୍ଲକ୍ ନା କିର୍ଦେ କେଗିଙ୍ଗ୍ ପାୟିଟ୍ ଅନୁରଦ୍ କେନଣ୍ତ୍, ମାତର୍ ଅଣ୍ତ୍ ପାଣ୍ତୁଟଣ୍ତ୍।“
ବେର୍ସେପାଲ୍ ତାମ୍ବାଙ୍ଗ୍ ପକେଣ୍ତ୍, “ପେଙ୍ଗିଟ୍ ବରସ୍ ପାତି ଆନ୍ ବିସ୍ବାସ୍ରେନ୍ ଇନେ କାମେ କେୟି ୱାରିମାନ୍। ଆନ୍ ପାଟିନ୍ବେଲ୍ ଇନେ ପାଟେ ମାନ୍ ଏନନ୍, ଏଗଡ୍ମେନ୍ ଇନ୍ ଆନ୍ ପାୟିଟ୍ ଉକୁଟ୍ ନିନିଟେ ମେଣ୍ତାପିଲା ସିୟୁଟଟ୍ ଏଟେନ୍ କି ଆନ୍ ଆନେ ସାଙ୍ଗତୁଲ୍ ନା କିର୍ଦେ କେଗିଙ୍ଗ୍ ଅଡ୍ତାନ୍। ମାତର୍ ଇନେ ଇ ସେପାଲ୍ ପାଟିନ୍ ଦନ୍ସମ୍ପତିଙ୍ଗ୍ ପଲିକାରି ଉଲେନ୍ ୱାନଣ୍ତ୍, ଇନ୍ ଅଣ୍ତୁଙ୍ଗ୍ ପାୟିଟ୍ ପାଟିନ୍ପେଲ୍ଟୁକ୍ ନିୟାଟେ ବାସିପିଲା କାତେଟ୍।
“ତାମ୍ବା ଉତର୍ ସିନଣ୍ତ୍, ‘ବାଇ, ଇନ୍ ଆନ୍ନାଟ୍ ପାଟିନ୍ ବେଲ୍ ମାୟାଟ୍, ଏରେଦ୍ ପାଟିନ୍ ଆନେ ଆଦ୍ ପାଟିନ୍ ଇନେ। ମାତର୍ ଆମ୍ ପାୟିଟ୍ କିର୍ଦେ କେଗିଙ୍ଗ୍ ଉଚିତ୍ ମାଟେ, ଏନାଦିଙ୍ଗ୍ କି ଇନେ ପୁଟି ତଡ଼ଣ୍ଡ୍ ସାୟିମାଟଣ୍ତ୍, ମାତର୍ ଇଣ୍ତି ଜିୱେ ମାୟାଣ୍ତ୍। ଅଣ୍ତ୍ ମାୟ୍ଙ୍ଗି ମାଟଣ୍ତ୍, ମାତର୍ ଇଣ୍ତି ତଣ୍ତେଣ୍ତ୍ !”
ବାଇବଲ୍ଟେ ଉକୁଟ୍ କେରାଲ୍ : ଲୁକ ୧୫:୧୧-୩୨
Free to use, adapt, and share under an open license (CC BY-SA 4.0).