50. ୫୦- ଜିସୁ ଆରେତରେକ୍ ମାଣ୍ଡି ୱାଦାଣ୍ଡ୍
୨୦୦୦ ବାରିସ୍ ଆଗାଡିଟୁକ୍ ପାଟିନ୍ ଜଗତ୍ଟେ ଲକ୍ ଅଦିକ୍ଟୁକ୍ ଅଦିକ୍ କିସ୍ଟ ଜିସୁନେ ନିୟାଟେ କାବୁର୍ ୱେଣ୍ତୁକିଦାର୍, ମଣ୍ତ୍ଲିଲ୍ ପେରିନ୍ ସାନ୍ଦି ସେନିଦାୱ୍, ଜିସୁ ଜିଦ୍ କେନଣ୍ତ୍ ଜେ ପଲଣ୍ତି ବେଲା ଜଗତ୍ତୁନ୍ ୱାରିଦା, ଜଦି ଅଣ୍ତ୍ ଇ ଆରେକ୍ ୱାରାଣ୍ତି, ଅଣ୍ତ୍ ଅଣ୍ତୁନେ ଜିଦ୍ ରକିୟା କେଦାଣ୍ତ୍।
ଆମ୍ ଜିସୁ ୱାରଣ୍ତି କାସି କାସି ମାପ୍ରୁ ଇସା କେଗିଦାଣ୍ତ୍ ଏଟେନ୍ କି ଆମ୍ ଉକୁଟ୍ ପବିତ୍ର ଆରେ ଗରବ୍ କେୟଣ୍ତି ଉକୁଟ୍ ଜିୱେନା ପିୟିଙ୍ଗ୍ କାର୍, ଅଣ୍ତ୍ ଇସା କେଗିଦାଣ୍ତ୍ ଆମ୍ ଅଣ୍ତୁନେ ରାଜି ବିସୟ୍ତୁନ୍ ଅମାନିୟ ଏରାଏଙ୍ଗ୍ ମାନିଙ୍ଗ୍, ଜିସୁ ପୁର୍ତିନ୍ ବାସେ ଏଦାନ୍ବେଲ୍ ପକେଣ୍ତ୍, ଆନ୍ ସିସୁତୁଲ୍ ମାପ୍ରୁନେ ରାଜିଟେ ନିୟାଟେ କାବୁର୍ ଜଗତ୍ତୁନ୍ ମାନଣ୍ତି ପାଟିନ୍ ଲକୁଙ୍ଗ୍ ପର୍ସାର୍ କେଦାର୍ ଆଟେଲ୍ ଜୁଗ୍ ପଲ୍ଦା।
ପେଙ୍ଗିଟ୍ ଲକ୍ନେ ଦଲ୍ ଇନେନ୍ ଆରେକ୍ ଜିସୁନେ ବିସୟ୍ ୱେନାରି, ଅଣ୍ତ୍ ସର୍ଗେନ୍ ମାଣ୍ତିସେୟାନ୍ ଆଗାଡି, ଏରେଲକ୍ ଏସେଲ୍ମେନ୍ ସୁସମାସାର୍ ୱେନାରି ଆୟ୍ଲକୁଙ୍ଗ୍ କାକେଲ୍ ସୁସମାସାର୍ ୱେଣ୍ତୁକୁଙ୍ଗ୍ ପାଇଟ୍ ଜିସୁ କିସ୍ଟାନ୍ ତିଲିଙ୍ଗ୍ ପକିମାଣ୍ତ୍, ଅଣ୍ତ୍ ପକେଣ୍ତ୍ “ଇମ୍ଗୁଲ୍ ସେଞ୍ଜି ପାଟିନ୍ଲକ୍ ଦଲୁଙ୍ଗ୍ ସିସ୍ୟ କେୟୁର୍, ଆରେ ତାସ୍ ପାଟିନ୍ ପାଡ୍ଙ୍ଗି ସେଞ୍ଜିମା।
ଜିସୁ ଆରେ ପକେଣ୍ତ୍, “ଦାସ୍ ସାୱ୍କାର୍ ପେଲ୍ଟୁକ୍ ବେର୍ଟଣ୍ତ୍ ଏରାଣ୍ତ୍। ଇ ଜଗତ୍ଟେ ନେତାକିଲ୍ ଏରେୱାଡିନ୍ ଆନୁଙ୍ଗ୍ ଗୁର୍ନା କେଦାର୍, ଆୟ୍ୱାଡିନ୍ ଆୟ୍ଲକ୍ ଆନ୍ନାଟ୍ ଇମ୍ଗୁଲୁଙ୍ଗ୍ ତାଡ୍ନା କେଇ ଆଟ୍ଦାର୍, ଜଦି ଇ ଜଗତ୍ତୁନ୍ ଦୁକ୍ ପାୟ୍ଏଦାର୍, କିର୍ଦେ ଏରୁର୍ ଏନାଦିଙ୍ଗ୍ କି ଜଗତୁଙ୍ଗ୍ ସାସନ୍ କେୟଣ୍ତି ସୟତାନିଙ୍ଗ୍ ପେଲ୍ଟୁକ୍ ଜିନ୍ସିମାନ୍, ଜଦି ଇମ୍ଗୁଲ୍ କୁଣ୍ତେଲ୍ ଆରେକ୍, ଆନ୍ କାକେଲ୍ ବିସ୍ବାସ୍ନା ସେୟ୍ଦାର୍, ଆଟେଲ୍ ମାପ୍ରୁ ଇମ୍ଗୁଲୁଙ୍ଗ୍ ରକିୟା କେଦାଣ୍ତ୍।
ଜଗତ୍ ସେସ୍ ଏଦାନ୍ବେଲ୍ ଲକ୍ଗୁଲୁଙ୍ଗ୍ ପେଲ୍ ଏନାଦ୍ ଗଟ୍ଏଦା ଆଦ୍ ବୁଜାକିଙ୍ଗ୍ ପାଇଟ୍ ଜିସୁ ଅଣ୍ତୁନେ ସିସୁତୁଲୁଙ୍ଗ୍ ଉକୁଟ୍ କେରାଲ୍ ପକେଣ୍ତ୍, ଅଣ୍ତ୍ ପକେଣ୍ତ୍ ଉକୁର୍ ଲକ୍ ଅଣ୍ତୁନେ ୱିଣ୍ତ୍ତିନ୍ ୱିତିଲ୍ ୱିତେଣ୍ତ୍, ଅଣ୍ତ୍ ଅଡିମାନ୍ବେଲ୍ ଅଣ୍ତୁନେ ସତ୍ରୁ ୱାରି ଗଙ୍ଗ୍ ୱିଦାନ୍ ପେଲ୍ ଲାଟା ୱିତେଣ୍ଡ୍ ଆରେ ପେସି ସେଣ୍ତେ।
ଆଟେଲ୍ ୱିତିଲ୍ ଗାଜାଏନେ, ଆୟ୍ଲକ୍ନେ ଦାସ୍ତିଲ୍ ୱାରି ପକେର୍,“ ଗୁରୁ ଇନ୍ଏନା ଆୟ୍ ବାସେନ୍ ନିୟାଟେ ୱିତିଲ୍ ୱିତେଟ୍। ଏନାଦିଙ୍ଗ୍ ଆମାନ୍ ଲାଟାମେନ୍ ତଣ୍ତୁଦା?” ‘ଗୁରୁ ଉତର୍ ସିନଣ୍ତ୍ ଉକୁଟ୍ ସତ୍ରୁ ଆଦ୍ କେଇମା।”
“ଦାସ୍ତିଲ୍ ଆୟ୍ଲକ୍ନେ ମାଲିକିଙ୍ଗ୍ ପକେର୍, ଆମ୍ ଆୟ୍ ଲାଟାଙ୍ଗ୍ ପାଇକାର୍ଦାମ୍?” ମାନା ଜଦି ଇମ୍ଗୁଲ୍ ଆଦ୍ କେଦାନ୍ବେଲ୍ ଗଙ୍ଗ୍ଗୁଲୁଙ୍ଗ୍ମେନ୍ ପାୟି କାର୍ଦାର୍, ଗଙ୍ଗ୍ ପାଡିଙ୍ଗ୍ଦାନ୍ ଆରେକ୍ କାପୁର୍, ଲାଟାଙ୍ଗ୍ ଉକୁଟ୍ପେଲ୍ ଜମାସି ସାଟି କାରୁର୍, ମାତର୍ ଗଙ୍ଗ୍ ୱିତିଲିଙ୍ଗ୍ ଆନେ ଗାର୍ସେନ୍ ଇନ୍ଦ୍ରେର୍।
ସିସୁତୁଲ୍ ଇ କେରାଲ୍ଟେ ଅରତ୍ ବୁଜ୍ଏରିଙ୍ଗ୍ ଅଡୁଟର୍, ଆଦିଙ୍ଗ୍ ଆୟ୍ଲକ୍ ଆଦ୍ ବୁଜାସି ସିଗିଙ୍ଗ୍ ଜିସୁଙ୍ଗ୍ ପକେର୍, ଜିସୁ ପକେଣ୍ତ୍ ଏରେଲକ୍ ନିୟାଟେ ୱିତିଲ୍ ୱିତି ମାଟଣ୍ତ୍ ଅଣ୍ତ୍ କିସ୍ଟ, ବାସେ ଏରିଦା ଜଗତ୍, ନିୟାଟେ ୱିତିଲ୍ ଏରିଦା ମାପ୍ରୁନେ ରାଜିଟେ ଲକ୍ଗୁଲୁଙ୍ଗ୍ ବୁଜାକିଦା।
“ଲାଟା ଏରିଦା ଆୟ୍ଲକୁଙ୍ଗ୍ ଏରେଲକ୍ କି ଉୟାଟେ କାମେ କେଦାନ୍ ଲକ୍, ଏରେସତ୍ରୁ କି ଲାଟା ୱିତି ସେଣ୍ତେ ଆଦ୍ ଏରିଦା ସୟତାନ୍, ଗଙ୍ଗ୍ ୱିତିଲ୍ ଏରିଦା ଜଗତ୍ଟେ ସେସ୍କାଲ୍, ଆରେ ଗଙ୍ଗ୍ କଦାନ୍ଲକ୍ ଏରିଦାର୍ ମାପ୍ରୁନେ ଦୁତ୍ଗୁଲ୍।”
ଏରେବେଲ୍ ଜଗତ୍ ସେସ୍ଏଦା ଆଟେଲ୍ ଦୁତ୍ଗୁଲ୍ ପାପିଲକୁଙ୍ଗ୍ ଉକୁଟ୍ପେଲ୍ କେଇ ପାନ୍ଦଣ୍ତି କିସ୍ତିନ୍ କାରିସିଦାୱ୍, ଆମାନ୍ ପାଲ୍କିଲ୍ କର୍କିଏରି ରଦନ୍ କେଦାର୍, ଆଟେଲ୍ ଦରମ୍ଲକ୍ ଆୟ୍ଲକ୍ନେ ଆବା ମାପ୍ରୁନ୍ପେଲ୍ ୱେଲେ ୱାଡିନ୍ ୱିଣ୍ତ୍ ସିଦାର୍।
ଜିସୁ ଆରେମେନ୍ ପକେଣ୍ତ୍ ଜଗତ୍ ସେସ୍ ଏଦାନ୍ବେଲ୍ ପୁର୍ତିନ୍ ମାଣ୍ତି ୱାଦାଣ୍ତ୍, ଅଣ୍ତ୍ ଏରେୱାଡିନ୍ ପୁର୍ତିଟୁକ୍ ସର୍ଗେନ୍ ସେଞ୍ଜିମାଟଣ୍ତ୍, ଟିକ୍ ଆୟ୍ୱାଡିନ୍ ପୁର୍ତିନ୍ ମାଣ୍ତି ୱାଦାଣ୍ତ୍, ଅଣ୍ତୁନେ ଉକୁଟ୍ ମେନ୍ ସେୟ୍ଦା ଆରେ ଅଣ୍ତ୍ ଆକାସ୍ତିନ୍ ମଗୁଲ୍ନାଟ୍ ୱାଦାଣ୍ତ୍, ଜିସୁ ଏରେବେଲ୍ ୱାଦାଣ୍ତ୍, ଏଙ୍ଗୁର୍ତୁଲ୍ ବିସ୍ବାସ୍କେ ସାଇମାର୍, ଆୟ୍ଲକ୍ ସାଦାନ୍ ପେଲ୍ଟୁକ୍ ସିଲ୍ତାର୍ ଆରେ ଅଣ୍ତୁଙ୍ଗ୍ ଆକାସ୍ତିନ୍ ବେଟ୍ଏଦାର୍।
ଆମାଟୁକ୍ ଏରେ ବିସ୍ବାସିତିଲ୍ ଜିୱେ ସେୟ୍ଦାର୍ ଆୟଲକ୍ ସାଦାନ୍ ପେଲ୍ଟୁକ୍ ସିଲ୍ତାନ୍ କିସ୍ଟାନ୍ଲକ୍ନା ମିସ୍ଏରି ସର୍ଗେନ୍ ସେୟାର୍ ଆୟ୍ଲକ୍ ପାଟିନ୍ ଆମାନ୍ ଜିସୁନା ସେୟ୍ଦାର୍, ଆମାଟୁକ୍ ଜିସୁ ଅଣ୍ତୁନେ ଲକ୍ନା ପାଟିନ୍ ବେଲ୍ ସାନ୍ତି ଆରେ କିର୍ଦେନା ସେୟ୍ଦାର୍।
ଏରେଲକ୍ ଜିସୁଙ୍ଗ୍ ପେଲ୍ ବିସ୍ବାସ୍ କେଦାର୍ ଆୟ୍ଲକୁଙ୍ଗ୍ ମୁକୁଟ୍ ସିଗିଙ୍ଗ୍ ପାଇଟ୍ ଜିସୁ ଜିଦ୍ କେୟିମାଣ୍ତ୍। ଆୟ୍ଲକ୍ ମାପ୍ରୁନାଟ୍ ପାଟିନ୍ବେଲ୍ ସାନ୍ତିରେନ୍ ବାସେଏରି ସେୟ୍ଦାର୍।
ମାତର୍ ଏରେଲକ୍ ଜିସୁଙ୍ଗ୍ପେଲ୍ ବିସ୍ବାସ୍ କେୟାର୍ ଆୟ୍ଲକୁଙ୍ଗ୍ ମାପ୍ରୁ ବିଚାର୍ କେଦାଣ୍ତ୍। ଅଣ୍ତ୍ ଆୟ୍ଲକୁଙ୍ଗ୍ ନର୍କନ୍ କାର୍ଦାଣ୍ତ୍, ଆମାନ୍ ପାଲ୍କିଲ୍ କର୍କି ଏରି ରଦନ୍ କେଦାର୍, ଆମାନ୍ କିସ୍ ଏସେଲ୍ମେନ୍ ସିଟା, ପୁଡୁତୁଲ୍ ଆୟ୍ଲକୁଙ୍ଗ୍ ତିନିଙ୍ଗ୍ ସାକାରାୱ୍।
ଜିସୁ ଏସେବେଲ୍ ୱାଦାଣ୍ତ୍, ଆସେବେଲ୍ ଅଣ୍ତ୍ ପାଟିନ୍ ସୟ୍ତାନ୍ ଆରେ ଅଣ୍ତୁନେ ରାଜିଙ୍ଗ୍ ବିନାସ୍ କେଦାଣ୍ତ୍। ଆୟ୍ ସୟ୍ତାନିଙ୍ଗ୍ ଆରେ ମାପ୍ରୁନେ ଆଦେସ୍ ମାନ୍ଏରା ଲକୁଙ୍ଗ୍ ନର୍କନ୍ କାରିସିଦାଣ୍ତ୍, ଆମାନ୍ ପାଟିନ୍ ବେଲ୍ କସ୍ଟ ପାୟ୍ଏଦାର୍।
ଆଦମ୍ ଆରେ ଅବା ମାପ୍ରୁନେ ଆଦେସ୍ ମାନ୍ ଏରୁଟର୍ ଆରେ ଇ ଜଗତୁଙ୍ଗ୍ ପାପ୍ ଇନ୍ଦ୍ରେର୍, ଆଦିଙ୍ଗ୍ ମାପ୍ରୁ ଜଗତୁଙ୍ଗ୍ ଅବିସାପ୍ ସିନଣ୍ତ୍ ଆରେ ବିନାସ୍ କେଗିଙ୍ଗ୍ ପାଇଟ୍ ଇଚା କେନଣ୍ତ୍। ମାତର୍ ଦିନେକ୍ ମାପ୍ରୁ ପୁନେଦ୍ଟେ ସରଗ୍ ଆରେ ପୁର୍ତିବି ସୁସ୍ଟି କେଦାଣ୍ତ୍ ଆରେ ନିୟାଟେ ସାନ୍ତି ସୁକଲ୍ଟେ ରାଜି ଏଦା।
ଜିସୁ ଆରେ ଅଣ୍ତୁନେ ଲକ୍ଗୁଲ୍ ପୁନେଦ୍ଟେ ପୁର୍ତିନ୍ ବାସେ ଏଦାର୍, ଆରେ ଏନାଦ୍ ଏନାଦ୍ ସେୟ୍ଦାୱ୍ ଆୟ୍ ପାଟିନ୍ ପୟ୍ତାନ୍ ଅଣ୍ତ୍ ସାସନ୍ କେଦାଣ୍ତ୍। ଅଣ୍ତ୍ ପାଟିନ୍ ଲକ୍ନେ କାନିର୍ ତୁର୍ସି ସିଦାଣ୍ତ୍ ଆରେ କେଲେସ୍ କି, ଦୁକ୍ କି, ଆଣ୍ତଣ୍ଡି କି, କସ୍ଟ କି, ସାଗିଙ୍ଗ୍ ଏରା। ଜିସୁ ସାନ୍ତି ଆରେ ନିୟାୟ୍ରେନ୍ ଅଣ୍ତୁନେ ରାଜିଙ୍ଗ୍ ସାସନ୍ କେଦାଣ୍ତ୍। ଆରେ ଅଣ୍ତ୍ ଅଣ୍ତୁନେ ଲକ୍ନା ପାଟିନ୍ଦିନ୍ ସେୟ୍ଦାଣ୍ତ୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୨୪:୨୪; ୨୮:୧୮; ଜଅନ୍ ୧୫:୨୦, ୧୬:୩୩; ପର୍କାସିତ୍ ୨:୧୦; ମାତିଉ ୧୩:୨୪-୩୦, ୩୬-୪୨; ୧-ତେସଲନିକିୟ ୪:୧୩-୫:୧୧; ଜାକୁବ୍ ୧:୧୨; ମାତିଉ ୨୨:୧୩; ପର୍କାସିତ୍ ୨୦:୧୦;୨୧:୧-୨୨:୨
Free to use, adapt, and share under an open license (CC BY-SA 4.0).