49. ୪୯- ପର୍ବୁନେ ପୁନ୍ ନିୟମ୍
ଏରେବେଲ୍ ଆଦ୍ ଜୁବାମାଟେ, ପବିତ୍ର ଆତ୍ମା ଆଦିଙ୍ଗ୍ ପାତେଟେ ଆରେ ଆଦ୍ ଅଙ୍ଗେନ୍ ଏନେ, ଆଦ୍ ଉକୁଟ୍ ସେପାଲିଙ୍ଗ୍ ଜନମ୍ ସିନେ ଆରେ ଅଣ୍ତୁନେ ପିଦିର୍ ଜିସୁ ସିନର୍, ଜିସୁ ଏରିଦାଣ୍ତ୍ ମାପ୍ରୁ ମେନ୍ ଆରେ ନର୍ଲକ୍ମେନ୍।
ଜିସୁ ପେଙ୍ଗିଟ୍ କାବା କାମେଲ୍ କେନଣ୍ତ୍ ଏଟେନ୍ କି ଅଣ୍ତ୍ ମାପ୍ରୁନ୍ ସେପାଲ୍ ଏଞ୍ଜି ତଟୁକ୍ ପାଇଟ୍, ଅଣ୍ତ୍ ନିର୍ ପୟ୍ତାନ୍ ତାକେଣ୍ତ୍, ନିରିଙ୍ଗ୍ ସାନ୍ତି କେନଣ୍ତ୍, ପେଙ୍ଗିଟ୍ ଲକ୍ନେ ରଗ୍ଟୁକ୍ ସୁସ୍ତ କେନଣ୍ତ୍, ବୁତ୍ଗୁଲୁଙ୍ଗ୍ ସାର୍ତଣ୍ତ୍, ସାଦାନ୍ ଲକୁଙ୍ଗ୍ ଜିୱେ ସିନଣ୍ତ୍, ଆରେ ପାସ୍ ଅଜାର୍ଟୁକ୍ ଅଦିକ୍ ଲକୁଙ୍ଗ୍ ପାସ୍ଗଟା ରୁଟିଲ୍ ଆରେ ଜଡେକ୍ ମିନିଲ୍ନା ତିଣ୍ତୁତଣ୍ତ୍।
ଜିସୁ ଉକୁର୍ ବେର୍ଟେ ଗୁରୁ ଆରେ ମାଇର୍ପାକ୍ ମାଟଣ୍ତ୍, ଆରେ ଅଣ୍ତ୍ ଅଦିକାର୍ନାଟ୍ ପାଟେ ପକୁନଣ୍ତ୍ ଆରେ ଅଣ୍ତ୍ ମାପ୍ରୁନ୍ ସେପାଲ୍ ମାଟଣ୍ତ୍, ଅଣ୍ତ୍ ସିକିୟା ସିମାଟଣ୍ତ୍ ଜେ ଇମ୍ଗୁଲ୍ ନିଜେନ୍ ଲାଡ୍ କେୟୁର୍ ଆରେ ୱେନ୍ଲକୁଙ୍ଗ୍ ପାଇଟ୍ ମେନ୍ ଲାଡ୍ କେଗିଙ୍ଗ୍ ଏଦା।
ଅଣ୍ତ୍ ଆରେମେନ୍ ସିକିୟା ସିନଣ୍ତ୍ ଜେ ଇନ୍ ଏରେମେନ୍ ବିସୟୁଙ୍ଗ୍ ଆରେ ଇନେ ଦନ୍ ସମ୍ପତିଙ୍ଗ୍ ଲାଡ୍ କେଦାନ୍ ବାଦୁଲ୍ରେନ୍ ମାପ୍ରୁଙ୍ଗ୍ ପେରିନ୍ ଲାଡ୍ କେଗିଙ୍ଗ୍ ଏଦା।
ଜିସୁ ପକେଣ୍ତ୍ ଜେ ଜଗତ୍ତୁନ୍ ମାନଣ୍ତି ଏରେମେନ୍ ମୁଲିକାଟେ ବିସୟ୍ ପେଲ୍ଟୁକ୍ ମାପ୍ରୁନେ ରାଜି ଅଦିକ୍ ଅଦିକ୍ ମୁଲିକାଟେ, ଏରେମେନ୍ ଲକୁଙ୍ଗ୍ ପାଇଟ୍ ପାଟିଟୁକ୍ ଗୁରୁସ୍ତାଟେ ବିସୟ୍ ଏରିଦା ଜେ, ଅଣ୍ତ୍ ମାପ୍ରୁନେ ରାଜିନ୍ ସେନିଙ୍ଗ୍ ଏଦା, ମାପ୍ରୁନେ ରାଜିନ୍ ନାନିଙ୍ଗ୍ ପାଇଟ୍, ନିଜେଟେ ପାପ୍ଟୁକ୍ ଉଦାର୍ ପାୟ୍ଏରିଙ୍ଗ୍ ଏଦା।
ଜିସୁ ପକେଣ୍ତ୍ ଏଙ୍ଗୁର୍ତୁଲ୍ ଲକ୍ ଅଣ୍ତୁଙ୍ଗ୍ ଗରନ୍ କେଇ ଉଦାର୍ ପାୟ୍ଏଦାର୍, ମାତର୍ ଏଙ୍ଗୁର୍ତୁଲ୍ ଗରନ୍ କେଗିଙ୍ଗ୍ ପାଣ୍ତାର୍, ଅଣ୍ତ୍ ପକେଣ୍ତ୍ ଏଙ୍ଗୁର୍ତୁଲ୍ ଲକ୍ ନିୟାଟେ ବାସେ ୱାଡିନ୍, ଆୟ୍ଲକ୍ ମାପ୍ରୁନେ ନିୟାଟେ ପାଟେ ୱେଞ୍ଜି ଉଦାର୍ ପାୟ୍ଏଦାର୍, ଏଙ୍ଗୁର୍ତୁଲ୍ ରାସ୍ତାନ୍ ମାନଣ୍ତି ଆଟ୍ୱାଟେ ବାସେ ୱାଡିନ୍, ଆମାନ୍ ମାପ୍ରୁନେ ବାକିୟଟେ ୱିତିଲ୍ ନାନିଙ୍ଗ୍ ଅଡା ଆରେ ନିୟାଟେ ୱିତିଲ୍ ଏରିଙ୍ଗ୍ ଅଡା, ଏରେଲକ୍ଗୁଲ୍ ଜିସୁନେ ନିୟାଟେ ପାଟେଙ୍ଗ୍ ୱେନାର୍ ଆୟ୍ଲକ୍ ଅଣ୍ତୁନେ ରାଜିନ୍ ନାନିଙ୍ଗ୍ ଅଡାର୍।
ଜିସୁ ସିକିୟା ସିମାଟଣ୍ତ୍ ଜେ ମାପ୍ରୁ ପାପିଲକୁଙ୍ଗ୍ ଅଦିକ୍ ଲାଡ୍ କେଦାଣ୍ତ୍, ଅଣ୍ତ୍ ଆୟ୍ଲକୁଙ୍ଗ୍ କେମାକେଇ ଅଣ୍ତୁନେ ସେପାକିଲ୍ କେଗିଙ୍ଗ୍ ଇସା କେଦାଣ୍ତ୍।
ଜିସୁ ଆୟ୍ଲକୁଙ୍ଗ୍ ଆରେମେନ୍ ପକେଣ୍ତ୍ ମାପ୍ରୁ ପାପୁଙ୍ଗ୍ ଗୁର୍ନା କେଦାଣ୍ତ୍। ଏରେବେଲ୍ ଆଦମ୍ ଆରେ ଅବା ପାପ୍ କେନର୍, ଆଦ୍ ଆୟ୍ଲକ୍ନେ ପାଟିନ୍ ଜାତିଟେ ଲକୁଙ୍ଗ୍ ପାତେଟେ, ଇଦିନେ ପଲ୍ ଜଗତ୍ତୁନ୍ ମାନଣ୍ତି ପାଟିନ୍ ଲକ୍ ପାପ୍ କେଦାର୍ ଆରେ ମାପ୍ରୁନ୍ ପେଲ୍ଟୁକ୍ ୱେନେଲ୍ ଏଦାର୍, ଆରେ ପାଟିନ୍ଲକ୍ ମାପ୍ରୁନେ ସତ୍ରୁ ଏରିମାର୍।
ମାତର୍ ମାପ୍ରୁ ଜଗତ୍ତୁନ୍ ମାନଣ୍ତି ପାଟିନ୍ ଲକୁଙ୍ଗ୍ ଇ ୱାଡିନ୍ ଲାଡ୍ କେନଣ୍ତ୍ ଜେ ଅଣ୍ତୁନେ ନିଜେଟେ ଉକୁର୍ ସେପାଲିଙ୍ଗ୍ ସିନଣ୍ତ୍ ଏଇର୍ କି ଅଣ୍ତୁନ୍ପେଲ୍ ବିସ୍ବାସ୍ କେଦାର୍, ଅଣ୍ତ୍ ଅଣ୍ତୁନେ ପାପ୍ଟେ ଡଣ୍ତ୍ ପାୟ୍ଏରାଏଙ୍ଗ୍ ମାପ୍ରୁନାଟ୍ ପାଟିନ୍ ଦିନ୍ ବାସେଏଦାଣ୍ତ୍।
ନିଜେଟେ ପାପ୍ ପାଇଟ୍ ଇନ୍ ଦସି ଏରି ସାଗିଙ୍ଗ୍ ଜଗିୟ, ମାପ୍ରୁ ଇନ୍ ପାଇଟ୍ ରିସାଏରି ପକଣ୍ତି ପାଟେ, ମାତର୍ ଅଣ୍ତ୍ ଇନ୍ ପୟ୍ତାନ୍ ଆୟ୍ ରିସା କେୟାଏଙ୍ଗ୍ ଜିସୁଙ୍ଗ୍ ପୟ୍ତାନ୍ ଆୟ୍ ସିରା କେନଣ୍ତ୍, ଜିସୁ ଏରେବେଲ୍ କୁରୁସ୍ କାଟ୍ତିନ୍ ସାନଣ୍ତ୍ ଆଟେଲ୍ ଅଣ୍ତ୍ ଇନେ ଡଣ୍ତ୍ ପାୟ୍ଏନଣ୍ତ୍।
ଜିସୁ ଏସେଲ୍ ପାପ୍ କେୟାଣ୍ତ୍, ମାତର୍ ଇନ୍ ପାଇଟ୍ ଆରେ ଜଗତ୍ଟେ ମାନଣ୍ଡି ପାଟିନ୍ ଲକ୍ନେ ପାପ୍ବଜ୍ କାଞ୍ଜି ଉଗୁଙ୍ଗ୍ ପାଇଟ୍ ଉକୁଟ୍ ସିଦ୍ଟେ ବଲିଦାନ୍ ୱାଡିନ୍ ଡଣ୍ତ୍ ପାୟ୍ଏରଣ୍ତି ଲକ୍ ୱାଡିନ୍, ଆଦିଙ୍ଗ୍ ଜିସୁ ନିଜେନିଙ୍ଗ୍ ବଲି ଏନଣ୍ତ୍, ଆଦିଙ୍ଗ୍ ମାପ୍ରୁ ଏରେମେନ୍ ପାପ୍ ଆରେ ଏରେୱାଡ଼଼ିଟେ ବୟକାର୍ଟେ ପାପ୍ ମେନ୍ କେମା ଏଦା।
ନିୟାଟେ କାମେ ଇନୁଙ୍ଗ୍ ଉଦାର୍ କେଗିଙ୍ଗ୍ ଅଡା, ମାପ୍ରୁନା ସାଙ୍ଗ୍ ଏରିଙ୍ଗ୍ ପାଇଟ୍ ଇ ୱାଟେ ବିସୟ୍ ଏନାଦ୍ମେନ୍ ମାନା, ମାତର୍ ଜିସୁଇ ଇନେ ପାପୁଙ୍ଗ୍ ନରିକାର୍ଦାଣ୍ତ୍, ଜିସୁ ଏରିଦାଣ୍ତ୍ ମାପ୍ରୁନେ ସିଣ୍ଡ୍ ଆରେ ଇନେ ବାଦୁଲ୍ ଜିସୁୟି କୁରୁସ୍ କାଟ୍ତିନ୍ ସାନଣ୍ତ୍ ଆରେ ମାପ୍ରୁ ଇ ଅଣ୍ତୁଙ୍ଗ୍ ସାଦାନ୍ପେଲ୍ଟୁକ୍ ସିଣ୍ତୁସି ଜିୱେ କେନଣ୍ଡ୍ ଇ ପାଟେ ଇନୁଙ୍ଗ୍ ନିସୟ୍ ବାବ୍ରେନ୍ ବିସ୍ବାସ୍ କେଗିଙ୍ଗ୍ ଏଦା।
ଏରେମେନ୍ ଲକ୍ ଜିସୁଙ୍ଗ୍ କାକେଲ୍ ବିସ୍ବାସ୍ କେଦାଣ୍ତ୍ ଆରେ ନିଜେଟେ ମାପ୍ରୁ ଏଞ୍ଜି ଗରନ୍ କେଦାଣ୍ତ୍, ମାପ୍ରୁ ଆୟ୍ ପାଟିନ୍ ଲକୁଙ୍ଗ୍ ଉଦାର୍ କେଦାଣ୍ତ୍। ମାତର୍ ଅଣ୍ତୁନ୍ପେଲ୍ ଏଇର୍ ବିସ୍ବାସ୍ କେୟାଣ୍ତ୍ ଅଣ୍ତ୍ ଅଣ୍ତୁଙ୍ଗ୍ ଉଦାର୍ କେୟାଣ୍ତ୍। ଇମ୍ ଦନି କି ଗରିବ୍ ଲକ୍, କି ଆସ୍ମାଲ୍ କି ମୁତାକ୍ ମୁର୍ତାଲ୍, କି ସେପାଲ୍ କି ମାଲ୍ ଆରେ ଏରେମାନ୍ ମାନ୍ଗଡ୍ମେନ୍ ଏନାଏରା। ମାପ୍ରୁ ଇମୁଙ୍ଗ୍ ଲାଡ୍ କେଗିଦାଣ୍ତ୍, ଆରେ ଇମ୍ଏରେ ୱାଡିନ୍ ଜିସୁଙ୍ଗ୍ କାକେଲ୍ ବିସ୍ବାସ୍ କେଦାର୍ ଆଦ୍ ଇସା କେଗିଦାଣ୍ତ୍ ଏଟେନ୍ ଅଣ୍ତୁନାଟ୍ ପେରିନ୍ ସାଙ୍ଗ୍ ଏଦାର୍।
ଜିସୁ ଇନୁଙ୍ଗ୍ ଅଣ୍ତୁନ୍ ପେଲ୍ ବିସ୍ବାସ୍ କେଇମାନ୍ ଲକୁଙ୍ଗ୍ ବାପ୍ତିସ୍ମ ଏରିଙ୍ଗ୍ ପାଇଟ୍ ପକ୍ଦାଣ୍ତ୍। ଆରେ ଜିସୁ ଜେ କିସ୍ଟ ମାପ୍ରୁନେ ଉକୁଟ୍ ମାତର୍ ସେପାଲ୍ ଆଦ୍ଏନା ବିସ୍ବାସ୍ କେଗିଦାଟ୍ କି? ଇନ୍ ଜେ ଉକୁର୍ ପାପି ଆରେ ମାପ୍ରୁନ୍ ପେଲ୍ ଇନ୍ ଡଣ୍ତ୍ ପାୟ୍ଏଦାଟ୍? ଇନ୍ ଏନା ବିସ୍ବାସ୍ କେଗିଦାଟ୍ ଆନେ ପାପ୍ କାଞ୍ଜି ଉଗୁଙ୍ଗ୍ ପାଇଟ୍ ଜିସୁ କୁରୁସ୍କାଟ୍ତିନ୍ ସାନଣ୍ତ୍?
ଜିସୁ ଇନ୍ପାଇଟ୍ ଏନାଦ୍ କେଇମାଣ୍ତ୍ ଆଦ୍ ପାଇଟ୍ ବିସ୍ବାସ୍ କେଗିଦାଟ୍, ଇନ୍ ଉକୁର୍ କିରିସ୍ଟାନ୍, ମାପ୍ରୁ ଇନୁଙ୍ଗ୍ ସୟ୍ତାନ୍ନେ ସିକାଟ୍ଟେ ରାଜିଟୁକ୍ ପେପ୍ସି ମାୟାଣ୍ତ୍ ଆରେ ମାପ୍ରୁନେ ରାଜିନ୍ ବାତି ୱାଡିନ୍ କେଇମାଣ୍ତ୍, ମାପ୍ରୁ ଆଗାଡି ପାପ୍ଟେ କାମେ ପାଟିନ୍ ପାତିସେଞ୍ଜିମାଣ୍ଡ୍ ଆରେ ଅଣ୍ତ୍ ଇନୁଙ୍ଗ୍ ପୁନେଦ୍ ଆରେ ଦରମ୍ଟେ ପାୱ୍ ସିମାଣ୍ତ୍।
ଜଦି ଇନ୍ କିରିସ୍ଟାନ୍, ଆଟେଲ୍ ଜିସୁ ଏନାଦ୍ କେୟିମାଣ୍ତ୍ ଆଦିଙ୍ଗ୍ ପାଇଟ୍ ମାପ୍ରୁ ଇନେ ପାପ୍ ପାଟିନ୍ କେମା କେଇମାଣ୍ତ୍। ଇଣ୍ତି, ଇନ୍ ମାପ୍ରୁନେ ଉକୁର୍ ସତ୍ରୁ ଏରାଏଙ୍ଗ୍ ଅଣ୍ତୁନେ ଉକୁର୍ ନିୟାଟେ ସାଙ୍ଗ ଏରିଙ୍ଗ୍ ମାପ୍ରୁ ଏତାତଣ୍ତ୍।
ଜଦି ଇନ୍ ମାପ୍ରୁନେ ଉକୁର୍ ସାଙ୍ଗ ଆରେ ପର୍ବୁ ଜିସୁନେ ସେବକ୍, ଆଟେଲ୍ ଜିସୁ ଏନାଦ୍ ଏନାଦ୍ ସିକିୟା ସିନଣ୍ତ୍ ଆଦ୍ ପାଲନ୍ କେଗିଙ୍ଗ୍ ପାଇଟ୍ ଇନ୍ ଇଚା କେଦାଟ୍। ଜଦି ଇନ୍ ଉକୁର୍ କିରିସ୍ଟାନ୍, ଏଗଡ୍ମେନ୍ ଇନ୍ ପାପ୍ କେଗିଙ୍ଗ୍ ପାଇଟ୍ ପର୍ଲବନ୍ ଏଦାଟ୍। ମାତର୍ ମାପ୍ରୁ ବିସ୍ବାସ୍ଟଣ୍ଡ୍ ଆରେ ଅଣ୍ତ୍ ପକ୍ଦାଣ୍ତ୍ ଜେ ଜଦି ଇନ୍ ଇନେ ପାପ୍ ପାଟିନ୍ ମାନ୍ ଏଦାଟ୍, ଅଣ୍ତ୍ ଇନୁଙ୍ଗ୍ କେମା ସିଦାଣ୍ତ୍। ପାପ୍ ବିରଦ୍ରେନ୍ ଜୁଦ୍ କେଗିଙ୍ଗ୍ ପାଇଟ୍ ଅଣ୍ତ୍ ଇନୁଙ୍ଗ୍ ସକ୍ତି ଜାଗାତାଣ୍ତ୍।
ଇନ୍ ଏଟେନ୍ ପାର୍ତନା କେଦାଟ୍, ଅଣ୍ତୁନେ ବାକିୟ ପଡେଏଦାଟ୍, ୱେନ୍ କିରିସ୍ଟାନ୍ ଲକ୍ନା ଅଣ୍ତୁନେ ଉପାସନା କେଦାଟ୍ ଆରେ ଅଣ୍ତ୍ ଇନ୍ ପର୍ତି ଏନାଦ୍ ଏନାଦ୍ କେଇମାୟାଣ୍ତ୍ ଆଦ୍ ୱେନ୍ ଲକୁଙ୍ଗ୍ ପକ୍ଦାଟ୍, ଇଦ୍ ମାପ୍ରୁ ଇନୁଙ୍ଗ୍ ପକେଣ୍ତ୍। ଇଦ୍ ପାଟିନ୍ ଇନୁଙ୍ଗ୍ ଅଣ୍ତୁନା ନିୟାରେନ୍ ସମ୍ପର୍କ ତିୟାର୍ କେଗିଙ୍ଗ୍ ପାଇଟ୍ ସାଇଜ କେଦାଣ୍ତ୍।
ବାଇବଲ୍ଟେ ଉକୁଟ୍ କେରାଲ୍ : ରମିୟ ୩:୨୧-୨୬; ୫:୧-୧୧; ଜଅନ୍ ୩:୧୬; ମାର୍କ ୧୬:୧୬; କଲସିୟ ୧:୧୩-୧୪; ୨-କରନ୍ତିୟ ୫:୧୭-୨୧; ଜଅନ୍ ୧:୫-୧୦
Free to use, adapt, and share under an open license (CC BY-SA 4.0).