48. ୪୮- ଜିସୁ ଉଦାର୍ କେୟାକ୍
ଆଟେଲ୍ ଏନାମେନ୍ ପାପ୍ ମାନୁଟେ। ଆଦମ୍ ଆରେ ଅବା ନିଜେନ୍ ନିଜେନିଙ୍ଗ୍ ଲାଡ୍ କେଗିନର୍ ଆରେ ଆୟ୍ଲକ୍ ମାପ୍ରୁଙ୍ଗ୍ ଲାଡ୍ କେଗିନର୍। ଆସେବେଲ୍ ଏନାମେନ୍ ରଗ୍କସ୍ଟ ଆରେ ମରନ୍ ମାନୁଟେ। ପୁର୍ତିବି ଇପାଡି ଏକା ଏଞ୍ଜି ମାପ୍ରୁ ଇଚା କେଗିନଣ୍ତ୍। ଅବାଙ୍ଗ୍ ପରିକିୟା କେଗିଙ୍ଗ୍ ପାୟିଟ୍ ସୟତାନ୍ ଉକୁଟ୍ ବାମ୍ ରୁପ୍ନା ପାଟେ ପକେଟେ।
ଆଦିଙ୍ଗ୍ କୁଣ୍ତେଲ୍ ଆଦ୍ ଆରେ ଆଦମ୍ ମାପ୍ରୁଙ୍ଗ୍ ବିରଦ୍ରେନ୍ ପାପ୍ କେନର୍। ଆୟ୍ଲକ୍ ପାପ୍ କେନର୍, ଆଦିଙ୍ଗ୍ ପାୟିଟ୍ ପୁର୍ତିନ୍ ମାନଣ୍ତି ପାଟିନ୍ ଦୁର୍ବଲ୍ ଏରିସେୟାୱ୍ ଆରେ ପାଟିନ୍ ସାୟିସେୟାୱ୍। ଏସେଲ୍ଟୁକ୍ ଆଦମ୍ ଆରେ ଅବା ପାପ୍ କେନର୍ ଆମାଟୁକ୍ ବେର୍ଟେ ବିସୟ୍ ଗଟ୍ଏନେ।
ଆୟ୍ଲକ୍ ମାପ୍ରୁନେ ସତ୍ରୁ ଏନର୍। ଆୟ୍ ସିରିସ୍ଟୁକ୍ ଜନମ୍ ଏରଣ୍ତି ପାଟିନ୍ ନର୍ଜାତି ପାପ୍ କେୟି ଜନମ୍ ଏଦାର୍ ଆରେ ମାପ୍ନେ ସତ୍ରୁ ଏଦାର୍। ମାପ୍ରୁ ଆରେ ନର୍ଜାତି ପେଲ୍ ମାନଣ୍ତି ସମ୍ପର୍କ ପାପ୍ ଉନିଟ୍ ପୁଟି ସେଞ୍ଜିମାଟେ। ମାତର୍ ଆୟ୍ ସମ୍ପର୍କଙ୍ଗ୍ ଆରେତରେକ୍ କେଗିଙ୍ଗ୍ ପାୟିଟ୍ ମାପ୍ରୁ ଜଜ୍ନା କେନଣ୍ତ୍। ମାପ୍ରୁ ଜିଦ୍ କେୟି ପକିମାଟଣ୍ତ୍ ଜେ ଅବାନେ କୁଲ୍ଟୁକ୍ ଜନମ୍ ଏରଣ୍ତି ଉକୁର୍ ସୟତାନ୍ନେ ତାଲିଙ୍ଗ୍ ଚୁନ୍ଚୁନା କେଦାଣ୍ଡ୍, ଆରେ ସୟତାନ୍ ଆଣ୍ତୁଙ୍ଗ୍ କାଲିଙ୍ଗ୍ କଟ୍ଦା।
ଇଦିନେ ଅରତ୍ ଏରିଦା ଜେ ସୟତାନ୍ କିସ୍ଟଙ୍ଗ୍ ଆଟ୍ଦାଣ୍ତ୍, ମାତର୍ ମାପ୍ରୁ ଅଣ୍ଡୁଙ୍ଗ୍ ସାଦାନ୍ଲକୁଙ୍ଗ୍ ପେଲ୍ଟୁକ୍ ସିଣ୍ତୁଦାଣ୍ତ୍, ଆଦିଙ୍ଗ୍ କୁଣ୍ତେଲ୍ କିସ୍ଟ ପାଟିନ୍ଦିନ୍ ପାୟିଟ୍ ସୟତାନ୍ନେ ସକ୍ତିଙ୍ଗ୍ ସେସ୍ କେଦାଣ୍ତ୍। ପେଙ୍ଗିଟ୍ ବରସ୍ କୁଣ୍ତେଲ୍, ମାପ୍ରୁ ପର୍କାସ୍ କେନଣ୍ତ୍ ଜେ ଜିସୁ ଇ ଏରିଦାଣ୍ତ୍ ଆୟ୍ କିସ୍ଟ। ମାପ୍ରୁ ଏସେବେଲ୍ ଉକୁଟ୍ ବେର୍ଟେ ବାଗାଦି ଉନିଟ୍ ସାରା ପୁର୍ତିଙ୍ଗ୍ ବିନସ୍ଟ କେନଣ୍ତ୍,ଆସେବେଲ୍ ଏରେଲକ୍ ଅଣ୍ତୁଙ୍ଗ୍ ପେଲ୍ ବିସ୍ୱାସ୍ କେନର୍ ଆୟ୍ଲକୁଙ୍ଗ୍ ରକିୟା ପାୟିଟ୍ ଜାହାଜ୍ ଜଗାତଣ୍ତ୍।
ଟିକ୍ ଆୟ୍ୱାଡିନ୍, ପାଟିନ୍ ଲକ୍ ଆୟ୍ଲକ୍ନେ ନିଜେଟେ ନିଜେଟେ ପାପ୍ ପାୟିଟ୍ ବିନସ୍ଟ ଏରିଙ୍ଗ୍ ଜଗିୟ୍ ମାଟର୍, ମାତର୍ ଏରେଲକ୍ ଅଣ୍ତୁଙ୍ଗ୍ ପେଲ୍ ବିସ୍ବାସ୍ କେନର୍ ଆୟ୍ଲକୁଙ୍ଗ୍ ରକିୟା କେଗିଙ୍ଗ୍ ପାୟିଟ୍ ମାପ୍ରୁ ଜିସୁଙ୍ଗ୍ ଜାଗା ସିନଣ୍ତ୍। ବରସ୍ ବନ୍ଦନ୍ ପାତି ଲକ୍ଗୁଲ୍ ଆୟ୍ଲକ୍ନେ ପାପ୍ ପାୟିଟ୍ ଡଣ୍ତ୍ଟେ ଜଗିୟ୍ ମାଟର୍, ଆଦ୍ ତଟୁକୁଙ୍ଗ୍ ପାୟିଟ୍ ଜାଜକ୍ତୁଲ୍ ପାଟିନ୍ବେଲେନ୍ ମାପ୍ରୁଙ୍ଗ୍ କାକେଲ୍ ବଲି ଆନିସ୍କିନର୍।
ମାତର୍ ଆୟ୍ ପାଟିନ୍ ବଲିଦାନ୍ ଆୟ୍ଲକ୍ନେ ପାପୁଙ୍ଗ୍ ଦୁର୍ କେୟାମାନ୍ନେ। ଜିସୁ ଏରିଦାଣ୍ତ୍ ବେର୍ଜାଜକ୍। ୱେନ୍ ଜାଜକ୍ତିଲିଙ୍ଗ୍ ୱାଡିନ୍ ଏରାଣ୍ତ୍, ଏରେଦ୍ ଜିସୁ କେୟି ତଟ୍ତଣ୍ତ୍ ଉକୁଟ୍ମାତର୍ ବଲିଦାନ୍ ବାବ୍ରେନ୍ ଅଣ୍ତ୍ ନିଜେନିଙ୍ଗ୍ ବଲି ଉସର୍ଗ ଏନଣ୍ତ୍ ଏରେଦ୍ କି ଜଗତ୍ତୁନ୍ ମାନଣ୍ତି ପାଟିନ୍ଲକ୍ନେ ପାପୁଙ୍ଗ୍ ଦୁର୍ କେନଣ୍ତ୍। ଜିସୁ ଦରମ୍ଟେ ବେର୍ଜାଜକ୍ ଏନାଦିଙ୍ଗ୍ କି ଜଗତ୍ତୁନ୍ ମାନଣ୍ତି ଏରେମେନ୍ ଲକ୍ ଏରେବେଲାଙ୍ଗ୍ ମେନ୍ କେୟିମାନଣ୍ତି ପାଟିନ୍ ପାପ୍ଟେ ଡଣ୍ତୁଙ୍ଗ୍ ଅଣ୍ତ୍ ନିଜେନ୍ ପୟ୍ତାନ୍ ଉନଣ୍ତ୍। ମାପ୍ରୁ ଅବ୍ରାମୁଙ୍ଗ୍ ପକେଣ୍ତ୍ ପୁର୍ତିବିଟେ ପାଟିନ୍ ଲକ୍ଗୁଲ୍ ଇନ୍ ଉନିଟ୍ ଆସିର୍ବାଦ୍ ପାୟ୍ ଏଦାର୍।
ଜିସୁ ଅବ୍ରାମ୍ନେ ଉକୁର୍ କୁଲ୍ଟଣ୍ତ୍ ମାଟଣ୍ତ୍। ପାଟିନ୍ ଲକ୍ଦଲ୍ ଅଣ୍ତୁଙ୍ଗ୍ ଉନିଟ୍ ଆସିର୍ବାଦ୍ ପାୟ୍ ଏନର୍, ଜିସୁଙ୍ଗ୍ ପିଦିର୍ନା ବିସ୍ୱାସ୍ କେଦାନ୍ ପାଟିନ୍ଲକ୍ ପାପ୍ଟୁକ୍ ଉଦାର୍ ପାୟ୍ଏରିମାର୍, ଆରେ ଅବ୍ରାମ୍ନେ ଆତ୍ମିକ କୁଲ୍ଟୁକ୍ ପରିବର୍ତନ୍ ଏରିମାର୍।
ଅବ୍ରାମୁଙ୍ଗ୍ ଅଣ୍ତୁନେ ସେପାଲ୍ ଇସାକିଙ୍ଗ୍ ବଲିଦାନ୍ ସିଗିଙ୍ଗ୍ ପାୟିଟ୍ ମାପ୍ରୁ ଏସେବେଲ୍ ପକେଣ୍ତ୍, ଆସେବେଲ୍ ଅଣ୍ତୁନେ ସେପାଲ୍ ଇସାକିଙ୍ଗ୍ ବାଦୁଲ୍ରେନ୍ ବଲିଦାନ୍ ସିଗିଙ୍ଗ୍ ପାୟିଟ୍ ଉକୁଟ୍ ମେଣ୍ତାପାପ୍ ଜାଗାତଣ୍ତ୍। ଆମ୍ ପାଟିନ୍ଲକ୍ ଆମ୍ଗୁଲ୍ନେ ପାପ୍ ପାୟିଟ୍ ସାଗିଙ୍ଗ୍ ଜଗିୟ, ମାତର୍ ମାପ୍ରୁ ଅଣ୍ତୁନେ ମେଣ୍ତାପାପୁଙ୍ଗ୍ ୱାଡିନ୍ ଜିସୁଙ୍ଗ୍ ଆମ୍ଗୁଲୁଙ୍ଗ୍ ପାୟିଟ୍ ବଲିଦାନ୍ ବାବ୍ରେନ୍ ସାଗିଙ୍ଗ୍ ପାୟିଟ୍ ସୟତଣ୍ତ୍। ମାପ୍ରୁ ଏସେବେଲ୍ ମିସର୍ତୁନ୍ ସେସ୍ବେଲ୍ଟେ ବେମାରିଙ୍ଗ୍ ସୟତଣ୍ତ୍, ଅଣ୍ତ୍ ପାଟିନ୍ ଇସ୍ରାଏଲ୍ଟେ ପରିବାରିଙ୍ଗ୍ ଉକୁଟ୍ ଉକୁଟ୍ ନିୟାଟେ ମେଣ୍ତା ୱାଟ୍ତେନ୍ ଆଟି ଆୟ୍ଲକ୍ନେ ଉଲେ ଡେୱାଟେ ୱାଲ୍ସାଟେ ପୟତାନ୍ ଆୟ୍ ମେଣ୍ତାନେ ନେତିର୍ ମାରୁକୁଙ୍ଗ୍ ପକିମାଟଣ୍ତ୍।
ମାପ୍ରୁ ଏସେବେଲ୍ ନେତିର୍ ସୁଡେଣ୍ଡ୍, ଅଣ୍ତ୍ ଆୟ୍ଲକ୍ନେ ଉଲେଙ୍ଗ୍ ସାକାରେଣ୍ତ୍ ଆରେ ଆୟ୍ଲକ୍ନେ ପର୍ତୁମ୍ ଜାତ୍ ଏରଣ୍ତି ସେପାକିଲିଙ୍ଗ୍ ଆଟୁଟଣ୍ତ୍। ଇ ଗଟନାଙ୍ଗ୍ ନିସ୍ତାର୍ ପାରୁବ୍ ପକ୍ଦାର୍। ଜିସୁ ଏରିଦାଣ୍ତ୍ ଆମ୍ଗୁଲ୍ନେ ନିସ୍ତାର୍ ପାରୁବ୍ଟେ ମେଣ୍ତା।
ଅଣ୍ତ୍ ସୁକଲ୍ ଆରେ ପାପ୍ କେୟାଟଣ୍ତ୍ ମାଟଣ୍ତ୍ ଆରେ ନିସ୍ତାର୍ ପାରୁବ୍ ବେଲେନ୍ ଇ ଅଣ୍ତୁଙ୍ଗ୍ ଆଟି ମାଟର୍। ଆସେବେଲ୍ ଏରେମେନ୍ ଲକ୍ ଜିସୁଙ୍ଗ୍ ପେଲ୍ ବିସ୍ୱାସ୍ କେନର୍ ଆସେବେଲ୍ ଜିସୁନେ ନେତିର୍ ଆୟ୍ ଲକ୍ନେ ପାପୁଙ୍ଗ୍ ନରିକାରେଟେ, ଆରେ ମାପ୍ରୁନେ ଡଣ୍ତ୍ ଆୟ୍ ଲକୁଙ୍ଗ୍ ପେଲ୍ଟୁକ୍ ଦୁର୍ ଏନେ। ମାପ୍ରୁ ଇସ୍ରାଏଲ୍ ଲକ୍ନା ଉକୁଟ୍ ନିୟମ୍ କେନଣ୍ତ୍, ଏରେଲକ୍ ଅଣ୍ତୁନେ ମନନିତ୍ ଲକ୍ ମାଟର୍।
ମାତର୍ ମାପ୍ରୁ ଇଣ୍ତି ଉକୁଟ୍ ପୁନ୍ ନିୟମ୍ କେୟିମାଣ୍ତ୍ ଏରେଦ୍ କି ପାଟିନ୍ ଲକୁଙ୍ଗ୍ ପାୟିଟ୍ ଏରିମାୟା। ଇ ପୁନ୍ ନିୟମ୍ ଉନିଟ୍, ଏରେମେନ୍ ଲକ୍ଦଲ୍ଟେ ଲକ୍ ଜିସୁଙ୍ଗ୍ ବିସ୍ୱାସ୍ କେଦାନ୍ ଉନିଟ୍ ମାପ୍ରୁନେ ଲକ୍ଗୁଲୁଙ୍ଗ୍ ଉକୁଟ୍ ଅଙ୍ଗ୍ସବିସେସ୍ ଏରିଙ୍ଗ୍ ଅଡ୍ତାର୍। ମସା ଉକୁର୍ ମହାନ୍ ଭାବବାଦି ମାଟଣ୍ତ୍ ଅଣ୍ତ୍ ମାପ୍ରୁନେ ବାକିୟ ୱେଣ୍ଡୁସି ମାଟଣ୍ତ୍।
ମାତର୍ ଜିସୁ ପାଟିନ୍ ଭାବବାଦିତିଲିଙ୍ଗ୍ ପେଲ୍ଟୁକ୍ ବେର୍ଟଣ୍ତ୍ ମାଟଣ୍ତ୍। ଅଣ୍ତ୍ ମାପ୍ରୁ ମାଟଣ୍ତ୍, ଆଦିଙ୍ଗ୍ ଅଣ୍ତ୍ ଏନାଦ୍ ଏନାଦ୍ କେଗିନଣ୍ତ୍ ଆଦ୍ ମାପ୍ରୁନେ କାମେ ଆରେ ମାପ୍ରୁନେ ବାକିୟ ମାଟେ। ଆଦିଙ୍ଗ୍ ପାୟିଟ୍ ଜିସୁଙ୍ଗ୍ ମାପ୍ରୁନେ ବାକିୟ ଏଞ୍ଜି ପକୁନର୍। ମାପ୍ରୁ ରାଜା ଦାଉଦୁଙ୍ଗ୍ ଜିଦ୍ କେୟି ପକେଣ୍ତ୍ ଜେ ଅଣ୍ତୁନେ କୁଲ୍ଟୁକ୍ ଉକୁର୍ ମାପ୍ରୁନେ ଲକ୍ଗୁଲୁଙ୍ଗ୍ ପୟତାନ୍ ପାଟିନ୍ଦିନ୍ ସାସନ୍ କେଦାଣ୍ତ୍।
ଜିସୁ ମାପ୍ରୁଙ୍ଗ୍ ସେପାଲ୍ ଆରେ କିସ୍ଟ ମାଟଣ୍ତ୍, ଅଣ୍ତ୍ ଦାଉଦ୍ନେ କୁଲ୍ଟଣ୍ତ୍ ମାଟଣ୍ତ୍ ଅଣ୍ତ୍ ପାଟିନ୍ଦିନ୍ ପାୟିଟ୍ ସାସନ୍ କେଦାଣ୍ତ୍। ଦାଉଦ୍ ଇସ୍ରାଏଲ୍ଟେ ରାଜା ମାଟଣ୍ତ୍, ମାତର୍ ଜିସୁ ସାରା ପୁର୍ତିବିଟେ ରାଜା।
ଅଣ୍ତ୍ ଆରେତରେକ୍ ୱାଦାଣ୍ତ୍ ନିୟାୟ୍ ବିଚାର୍ଟେ ସାନ୍ତିରେନ୍ ପାଟିନ୍ଦିନ୍ ସାସନ୍ କେଦାଣ୍ତ୍।
ବାଇବଲ୍ଟେ ଉକୁଟ୍ କେରାଲ୍ : ଆଦି ୧-୩,୬,୧୪,୨୨; ଜାତ୍ରା୧୨,୨୦; ୨-ସାମୁୟେଲ୍ ୭; ଏବ୍ରି ୩:୧-୬, ୪:୧୪-୫:୧୦; ୭:୧-୮:୧୩; ୯:୧୧-୧୦:୧୮; ପର୍କାସିତ୍ ୨୧୪୯.
Free to use, adapt, and share under an open license (CC BY-SA 4.0).