47. ୪୭- ପାଉଲ୍ ଆରେ ସିଲା ପିଲିପ୍ପି ଗଡ୍ତୁନ୍
ଦିନେକ୍ ପାଉଲ୍ ଆରେ ଅଣ୍ତୁନେ ସାଙ୍ଗ ସିଲା ପିଲିପ୍ ଗଡ୍ତୁନ୍ ଜିସୁନେ ପର୍ସାର୍ କେଗିଙ୍ଗ୍ ଉଣ୍ତେର୍, ଆୟ୍ଲକ୍ ଗଡ୍ଟେ ୱେନେଲ୍ଟେ ପେରେଟ୍ ପାଲିନ୍ ମାନଣ୍ତି ଉକୁଟ୍ ବାସେନ୍ ସେୟର୍ ଆମାନ୍ ଲକ୍ଗୁଲ୍ ପାର୍ତନା କେଗିଙ୍ଗ୍ ପାଇଟ୍ ରୁଣ୍ତ୍ଏନର୍, ଆମାନ୍ ଆୟ୍ଲକ୍ ଲୁଦିୟା ପିଦିର୍ଟେ ଉକୁଟ୍ ଆସ୍ମାଲିଙ୍ଗ୍ ବେପାର୍ କେୟଣ୍ତିଙ୍ଗ୍ ସୁଡେର୍, ଆଦ୍ ମାପ୍ରୁଙ୍ଗ୍ ଲାଡ୍ କେଗିନେ ଆରେ ଉପାସନା କେଗିନେ, ଜିସୁଙ୍ଗ୍ ବିସୟ୍ରେନ୍ ଏଟେନ୍ ଲୁଦିୟା ବିସ୍ବାସ୍ କେଦା, ଆଦିଙ୍ଗ୍ ମାପ୍ରୁ ଆଦିନେ ଗର୍ବେନ୍ କାମେ କେନେ, ଆରେ ଆଦ୍ ଆରେ ଆଦିନେ ପରିବାର୍ ବାପ୍ତିସ୍ମ ଉନର୍।
ଆଦ୍ ପାଉଲ୍ ଆରେ ସିଲାଙ୍ଗ୍ ଆଦିନେ ଉଲେନ୍ ମାନିଙ୍ଗ୍ ଅର୍ଗେଟେ, ଆଦିଙ୍ଗ୍ ଆୟ୍ଲକ୍ ଆଦିନାଟ୍ ଆରେ ଆଦିନେ ପରିବାନାଟ୍ ମାଟର୍, ପାଉଲ୍ ଆରେ ସିଲା ପାର୍ତନା ବାସେନ୍ ପେରିନ୍ପର୍ ଲକ୍ନାଟ୍ ମିସ୍ଏରିନର୍।
ପାଟିନ୍ଦିନ୍ ୱାଡିନ୍ ଆୟ୍ଲକ୍ ଏସେବେଲ୍ ଆୟ୍ ପାର୍ତନା ବାସେନ୍ ସେନ୍ନର୍, ଆସେବେଲ୍ ଅକାଲ୍ ବୁତ୍ ପାତଣ୍ଡି ମାଲ୍ ଆୟ୍ଲକ୍ନେ କୁଣ୍ତେଲ୍ କୁଣ୍ତେଲ୍ ସେନ୍ନେ। ଆୟ୍ ବୁତ୍ ଉନିଟ୍ ଆୟ୍ ମାଲ୍ ଭବିସତବିସୟରେନ୍ ଲକ୍ଗୁଲୁଙ୍ଗ୍ ପକୁଙ୍ଗ୍ ଅଡ୍କୁଙ୍ଗ୍ନେ, ଆଦିଙ୍ଗ୍ ଆଦ୍ ଆଦିନେ ମାଲିକିଙ୍ଗ୍ ପାୟିଟ୍ ଉକୁଟ୍ ଭବିସତ ପାଟେ ପକଣ୍ଡିନା ପେରିନ୍ ଡାବୁଲ୍ ଅରଜ୍ଏରି ସିଗିନେ। ଆୟ୍ଲକ୍ ସେୟାନ୍ ବେଲ୍ ଆୟ୍ ବୁତ୍ ପାତଣ୍ଡି ଦାସି ପେରିନ୍ ଆଉଲିଏରି ପକୁଙ୍ଗ୍ନେ ଇ ଲକ୍ଗୁଲ୍ ମାପ୍ରୁନେ ଦାସ୍ଲକ୍।
ଆୟ୍ଲକ୍ ଉଦାର୍ ପାୟ୍ଏରିଙ୍ଗ୍ ପାୟିଟ୍ ଉପାୟ୍ ପକୁଦାର୍, ଆଦ୍ ପେରିନ୍ ବେଲା ଆରେକ୍ ଇ ୱାଡିନ୍ ପକୁନେ ଜେ ପାଉଲ୍ ୱେଞ୍ଜି ୱେଞ୍ଜି ରିସା ଏରିସେୟଣ୍ତ୍। ଆରେତରେକ୍ ଆୟ୍ ଦାସି ଏସେବେଲ୍ ପେରିନ୍ ଆଉଲି ଏରି ପକୁଙ୍ଗ୍ ଉଣ୍ଡେଟେ, ପାଉଲ୍ ମାଣ୍ତିସୁଡି ଆୟ୍ ଦାସିପେଲ୍ ମାନଣ୍ତି ଆତ୍ମାଙ୍ଗ୍ ପକେଣ୍ତ୍ “ଜିସୁଙ୍ଗ୍ ପିଦିର୍ନା ଇଦିଙ୍ଗ୍ ପେଲ୍ଟୁକ୍ ପେସିସେନ୍।”
ଆୟ୍ ଦାପ୍ରେନ୍ ଆୟ୍ ବୁତ୍ ଆଦିଙ୍ଗ୍ ପେଲ୍ଟୁକ୍ ସାକାରି ପେସି ସେଣ୍ତେ। ଏରେ ଲକ୍ ଆୟ୍ ଦାସିଙ୍ଗ୍ ବୁତ୍ ପାତିମାଟେ, ଆଦ୍ ପେରିନ୍ ରିସା ଏନେ।
ଆୟ୍ଲକ୍ ଗର୍ବେଲିଙ୍ଗ୍ ଆଟ୍ୱା କେନର୍ ଜେ ବୁତ୍ ପାତାଏଙ୍ଗ୍ ଆୟ୍ ଦାସି ଲକ୍ଗୁଲ୍ନେ ଭବିସତ ପକୁଙ୍ଗ୍ ଅଡା। ଇଦିନେ ଅର୍ତ ଏରିଦା ଲକ୍ଗୁଲ୍ନେ ଭବିସତ ପକୁଙ୍ଗ୍ ପାୟିଟ୍ ଆୟ୍ଲକ୍ ଆୟ୍ ଦାସିନେ ମାଲିକିଙ୍ଗ୍ ଆରେ ଜିନିସ୍ ସିଆର୍। ଆଦିଙ୍ଗ୍ ଆୟ୍ ଦାସିନେ ମାଲିକ୍ତିଲ୍ ପାଉଲ୍ ଆରେ ସିଲାଙ୍ଗ୍ ରମିୟ କର୍ତୁପକିୟ କାକେଲ୍ ପାତି ସେୟର୍, ଏରେଲକ୍ ପାଉଲ୍ ଆରେ ସିଲାଙ୍ଗ୍ ମାଡ୍ ଆଟି ବନ୍ଦିସାଲେନ୍ କାରେର୍।
ଆୟ୍ଲକ୍ ପାଉଲ୍ ଆରେ ସିଲାଙ୍ଗ୍ ଜୟିଲ୍ତିନ୍ ନିୟା ସୁରକିତ୍ ବାସେନ୍ ଇରେର୍ ଆୟ୍ଲକ୍ନେ କାଲ୍ଗିଲିଙ୍ଗ୍ କାଟେର୍।
ଏଙ୍ଗଡ୍ମେନ୍ ଆୟ୍ ନାର୍କାମ୍ ଆୟ୍ଲକ୍ ମାପ୍ରୁଙ୍ଗ୍ କାକେଲ୍ ପର୍ସଙ୍ଗ୍ସା ପାଟେଲ୍ ପାରିଙ୍ଗ୍ ଉଣ୍ଡେର୍। ଅଟାତ୍, ବେର୍ଟେ ଭୂମିକମ୍ପ ଏନେ।
ଜୟିଲ୍ ଉଲେନ୍ ମାନଣ୍ତି ପାଟିନ୍ ୱାଲ୍ସାଟେଲ୍ ସାଣ୍ତ୍ସି ଏନେୱ୍, ଆରେ ପାଟିନ୍ କାଟିମାନଣ୍ତି ସିକ୍ଲିଲ୍ କୁସ୍ଲା ଏରିସେଣ୍ତେୱ୍, ଜୟିଲ୍ ଉଲେ କାପାକର୍ କୁର୍କାଲ୍ଟୁକ୍ ସିଲ୍ତର୍, ଆରେ ସୁଡେର୍ ଜେ ଜୟିଲ୍ ଉଲେ ୱାଲ୍ସାଟେଲ୍ ପାଟିନ୍ ସାଣ୍ତ୍ସି ଏରିମାୱ୍, ଅଣ୍ତ୍ ନାର୍ସି ସେୟଣ୍ତ୍।
ଅଣ୍ତ୍ ଏତାତଣ୍ତ୍ ଜେ ପାଟିନ୍ ଜୟିଲ୍ ଉଲେଟୁକ୍ ପେସି ସେଞ୍ଜିମାର୍, ଆଦିଙ୍ଗ୍ ଅଣ୍ତ୍ ନିଜେନ୍ ସାଗିଙ୍ଗ୍ ଜଜନା କେନଣ୍ତ୍, ଅଣ୍ତ୍ ପୁଞ୍ଜି ମାଟଣ୍ତ୍ ଜେ ରମିୟ ନେତା ଅଣ୍ତୁଙ୍ଗ୍ ୱାଟ୍ତେନ୍ ଆଟ୍ଦାଣ୍ତ୍ ଜଦି ଜୟିଲ୍ ଉଲେନ୍ ମାନ୍ଲକୁଙ୍ଗ୍ ସେନିଙ୍ଗ୍ ସିଗଡ୍, ମାତର୍ ପାଉଲ୍ ଅଣ୍ତୁଙ୍ଗ୍ ସୁଡି ଆୱ୍ଲି ଏରି ପକେଣ୍ତ୍, ମାନ୍ ନିଜେନ୍ ସାମେନ୍, ଆମ୍ ପାଟିନ୍ ଇମାନ୍ ମାମ୍, ଜୟିଲ୍ ଉଲେ କାପାକ୍ ଏରେବେଲ୍ ପାଉଲ୍ ଆରେ ସିଲାନ୍ କାକେଲ୍ ୱାନଣ୍ତ୍, ଅଣ୍ତ୍ ନାର୍ସି ତିର୍ଗିନଣ୍ତ୍, ଆରେ ପକେଣ୍ତ୍ “ଆନ୍ ଉଦାର୍ ପାୟ୍ଏରିଙ୍ଗ୍ ପାଇଟ୍ ଏନାଦ୍ କେଦାନ୍?”
ପାଉଲ୍ ଉତର୍ ସିନଣ୍ତ୍ ଜିସୁନ୍ପେଲ୍ ବିସ୍ବାସ୍ କେୟୁର୍ ଆଟେଲ୍ ଇନ୍ ଆରେ ଇନେ ପାଟିନ୍ ପରିବାର୍ ଉଦାର୍ ପାୟ୍ଏଦାର୍, ଆମାଟୁକ୍ ଆୟ୍ ଜୟିଲ୍ ଉଲେ କାପାକ୍ ଅଣ୍ତୁନେ ଉଲେନ୍ ପାଉଲୁଙ୍ଗ୍ ଆରେ ସିଲାଙ୍ଗ୍ ଅର୍ଗି ଉୟି ଆୟ୍ଲକ୍ନେ କାଣ୍ଡ୍ୟାକାବ୍ରା ନରିକାରେଣ୍ତ୍, ଆୟ୍ ଉଲେନ୍ ମାନ୍ ପାଟିନ୍ଲକୁଙ୍ଗ୍ ପାଉଲ୍ ଜିସୁନ୍ ବିସୟ୍ରେନ୍ ୱେଣ୍ତୁତଣ୍ତ୍, ଜୟିଲ୍ ଉଲେ କାପାକ୍ ଆରେ ଆୟ୍ଲକ୍ନେ ପରିବାର୍ ପାଟିନ୍ ବିସ୍ବାସ୍ କେୟି ବାପ୍ତିସ୍ମ ଉନର୍।
ଜୟିଲ୍ ଉଲେନ୍ କାପାକ୍ ପାଉଲ୍ ଆରେ ସିଲାଙ୍ଗ୍ ତିନିଙ୍ଗ୍ ସିନଣ୍ତ୍ ଆରେ ଆୟ୍ଲକ୍ ପାଟିନ୍ଲକ୍ ମିସ୍ତେନ୍ କିର୍ଦେ ଏନର୍। ଆରେକୁଟ୍ ସିରିସ୍ ଗଡ୍ଟେ ନେତାତିଲ୍ ପାଉଲ୍ ଆରେ ସିଲାଙ୍ଗ୍ ଜୟିଲ୍ ଉଲେଟୁକ୍ ମୁକ୍ଲାତର୍ ଆରେ ଆୟ୍ଲକୁଙ୍ଗ୍ ପିଲିପିୟଟୁକ୍ ସେନିଙ୍ଗ୍ ପାୟିଟ୍ ପକେର୍।
ପାଉଲ୍ ଆରେ ସିଲା, ଲୁଦିଆ ଆରେ ୱେନ୍ ଏଙ୍ଗୁର୍ତୁଲ୍ ସାଙ୍ଗତୁଲୁଙ୍ଗ୍ ବେଟ୍ଏରି ପଲ୍ଦାନ୍ କୁଣ୍ତେଲ୍ ଆୟ୍ଲକ୍ ଆୟ୍ ଗଡ୍ ସାକାରେର୍। ଜିସୁନେ ବିସୟରେନ୍ ନିୟାଟେ ପାଟେ ପର୍ସାର୍ ଏନେ, ଆରେ ମଣ୍ତଲିମେନ୍ ସାନ୍ଦିଙ୍ଗ୍ ଉଣ୍ଡେଟେ। ପାଉଲ୍ ଆରେ ୱେନ୍ କିସ୍ଟିୟ ନେତାତିଲ୍ ପେଙ୍ଗିଟ୍ ଗଡ୍ତୁନ୍ ସେୟର୍, ଆରେ ଜିସୁନେ ନିୟାଟେ ପାଟେ ପର୍ସାର୍ କେୟି ସିକିୟା ସିଗିଙ୍ଗ୍ ଉଣ୍ଡେର୍।
ଆୟ୍ଲକ୍ ମଣ୍ତଲିତିନ୍ ମାନଣ୍ତି ବିସ୍ୱାସିତିଲିଙ୍ଗ୍ ଉସାୟିତ୍ ଆରେ ସିକିୟା ସିଗିଙ୍ଗ୍ ପାଇଟ୍ ପେଙ୍ଗିଟ୍ ସିଟିଲ୍ ଲେକାତର୍, ଇ ସିଟିଲ୍ ଏଙ୍ଗିଟ୍ ବାୟ୍ବଲ୍ତୁନ୍ ଏରିମାୱ୍।
ବାଇବଲ୍ଟେ କେରାଲ୍: ପେରିତ୍ ୧୬:୧୧-୪୦.
Free to use, adapt, and share under an open license (CC BY-SA 4.0).