46. ୪୬- ସାଉଲ୍ ଜିସୁନେ ସିସୁ ଏରଣ୍ଡି
ଅଣ୍ତ୍ ଜିସୁଙ୍ଗ୍ ପେଲ୍ ବିସ୍ବାସ୍ କେଉଟଣ୍ତ୍, ଆଦିଙ୍ଗ୍ ଅଣ୍ତ୍ ବିସ୍ବାସି ଲକୁଙ୍ଗ୍ ତାଡ୍ନା କେଗିନଣ୍ତ୍, ଆୟାଲ୍ ଆରେ ମାଗିଣ୍ଡିଙ୍ଗ୍ ଇରୁଲୁଙ୍ଗ୍ କାଟି ଇନ୍ଦିରିଙ୍ଗ୍ ଅଣ୍ତ୍ ଜିରୁସାଲାମ୍ତୁନ୍ ମାନଣ୍ତି ବିସ୍ବାସି ଉଲେକିଲିଙ୍ଗ୍ ନାନିନଣ୍ତ୍ ଆରେ ଜୟିଲ୍ ଉଲେନ୍ ବନ୍ଦିକେଗିନଣ୍ତ୍, ଦମେସ୍କତୁନ୍ ମାନଣ୍ତି କିରିସ୍ଟାନ୍ ଲକୁଙ୍ଗ୍ ସାଉଲ୍ ପାତି ଜିରୁସାଲାମ୍ତୁନ୍ ଇନ୍ଦିରିଙ୍ଗ୍ ଅଡ୍ତାର୍ ଆଦିଙ୍ଗ୍ ପାଇଟ୍ ଆୟ୍ ବେର୍ଜାଜକ୍ ଅଣ୍ତୁଙ୍ଗ୍ ଆଦେସ୍ ସିମାଟଣ୍ତ୍, ସାଉଲ୍ ଏରେବେଲ୍ ଦମେସ୍କ ସେୟାନ୍ ପାୱ୍ତୁନ୍ ଆକାସ୍ଟୁକ୍ ଉକୁଟ୍ ପେରିନ୍ ୱିଣ୍ତ୍ ଅଣ୍ତୁନ୍ ସାରିବେଡ୍ତେନ୍ ୱିଣ୍ତ୍ କେନେ ଆଟେଲ୍ ଅଣ୍ତ୍ ବାସେନ୍ ଇଲେଣ୍ତ୍।
ଏଇର୍ ଉକୁର୍ ସାଉଲୁଙ୍ଗ୍ ପକଣ୍ତି ୱେଟଣ୍ତ୍, ସାଉଲ୍ ସାଉଲ୍ ଇନ୍ ଏନାଦିଙ୍ଗ୍ ଆନୁଙ୍ଗ୍ ତାଡ୍ନା କେଗିଦାଟ୍?” ସାଉଲ୍ ପାସାର୍ତଣ୍ତ୍ “ପର୍ବୁ ଇନ୍ ଏଇର୍?” ଜିସୁ ଉତର୍ ସିନଣ୍ତ୍ “ଆନ୍ ଜିସୁ। ଇନ୍ ଆନୁଙ୍ଗ୍ ତାଡ୍ନା କେଗିଦାଟ୍ ସାଉଲ୍ ଏରେବେଲ୍ ସିଲ୍ତଣ୍ତ୍ ଆଟେଲ୍ ଅଣ୍ତ୍ ଏନାଦ୍ମେନ୍ ସୁଡୁଙ୍ଗ୍ ଅଡୁଟଣ୍ତ୍।
ଅଣ୍ତୁଙ୍ଗ୍ ତାମ୍ସାଙ୍ଗତୁଲ୍ ଦମେସ୍କସ୍ତୁନ୍ ପାତିସେୟର୍, ସାଉଲ୍ ତିନ୍ଦିନ୍ ଆରେକ୍ ଏନାଦ୍ ମେନ୍ ତିନୁଟଣ୍ତ୍ ଆରେ ଉନୁଟଣ୍ତ୍, ଅନନିୟ ପିଦିର୍ଟଣ୍ତ୍ ଉକୁର୍ ସିସ୍ୟ ଦମେସ୍କସ୍ତୁନ୍ ମାନଣ୍ତ୍।
ମାପ୍ରୁ ଅଣ୍ତୁଙ୍ଗ୍ ପକେଣ୍ଡ୍ “ସାଉଲ୍ ମାନଣ୍ତି ଉଲେନ୍ ସେନ୍, ଅଣ୍ତୁନ୍ ପୟିତାନ୍ କିଇ ଇର୍ ଅଣ୍ତ୍ ଏଟେନ୍ କାନୁଲ୍ ସୁଡୁଙ୍ଗ୍ ଅଡ୍ତାଣ୍ତ୍, ମାତର୍ ଅନନିୟା ପକେଣ୍ତ୍, “ପର୍ବୁ, ଇଲକ୍ ଏରେୱାଡିନ୍ ବିସ୍ବାସ୍ ଲକୁଙ୍ଗ୍ ତାଡ୍ନା କେଗିଦାଣ୍ତ୍ ଆନ୍ ପୁୟାନ୍, ମାପ୍ରୁ ଅଣ୍ତୁଙ୍ଗ୍ ଉତର୍ ସିନେ, ସେନ୍ ଜିଉଦି ଆରେ ୱେନ୍ଲକୁଙ୍ଗ୍ କାକେଲ୍ ଆନେ ପିଦିର୍ ୱେଣ୍ତୁକୁଙ୍ଗ୍ ପାଇଟ୍ ଆନ୍ ଅଣ୍ତୁଙ୍ଗ୍ ଆସ୍କିମାନ୍, ଅଣ୍ତ୍ ଆନ୍ ପିଦିର୍ନାଟ୍ ଅଣ୍ତ୍ ପେରିନ୍ ଦୁକ୍ କସଟ୍ ପାୟ୍ଏଦାଣ୍ତ୍, ଆଟେଲ୍ ଅନନିୟ ସାଉଲ୍ ମାନଣ୍ତି ଉଲେନ୍ ସେୟଣ୍ତ୍, ଅଣ୍ତୁନ୍ ପୟିତାନ୍ କିଇ ଇରେଣ୍ତ୍ ଆରେ ପକେଣ୍ତ୍, ଇନ୍ ଇମାନ୍ ୱାଦାନ୍ବେଲ୍ ଏରେ ଜିସୁ ଇନୁଙ୍ଗ୍ ଦର୍ସନ୍ ସିନଣ୍ତ୍, ଅଣ୍ତ୍ ଆନୁଙ୍ଗ୍ ଇନ୍କାକେଲ୍ ସୟ୍ସିମାଣ୍ତ୍ ଆରେତରେକ୍ ଏଟେନ୍ କାନୁଲ୍ ସୁଡୁଙ୍ଗ୍ ଅଡ୍ତାଟ୍ ଆରେ ପବିତ୍ର ଆତ୍ମାନ୍ ପୁରୁନ୍ ଏରିଙ୍ଗ୍ ଅଡ୍ତାଟ୍।
ସାଉଲ୍ ସାଙ୍ଗେନ୍ ସାଙ୍ଗେନ୍ ସୁଡୁଙ୍ଗ୍ ଅଡ୍ତଣ୍ତ୍, ଆରେ ଅନନିୟ ଅଣ୍ତୁଙ୍ଗ୍ ବାପ୍ତିସ୍ମ ସିନଣ୍ତ୍। ଆଦିଙ୍ଗ୍ କୁଣ୍ତେଲ୍ ସାଉଲ୍ କାଣ୍ଡେକ୍ କାଦି ତିୟଣ୍ତ୍ ଆରେ ସକ୍ତି ଏନଣ୍ତ୍। ଆମାଟୁକ୍ ସାଉଲ୍ ଦମେସ୍କସ୍ତୁନ୍ ମାନଣ୍ତି ଜିଉଦିତିଲିଙ୍ଗ୍ ପେଲ୍ ପର୍ସାର୍ କେଗିଙ୍ଗ୍ ଆରାମ୍ କେନଣ୍ତ୍ “ଜିସୁ ଇ ମାପ୍ରୁନେ ସେପାଲ୍।”
ଏରେ ଲକ୍ ବିସ୍ୱାସିଲକୁଙ୍ଗ୍ ବିନାସ୍ କେଗିଙ୍ଗ୍ ପାୟିଟ୍ ସେସ୍ଟା କେଗିନଣ୍ତ୍ ଆରେ ଅଣ୍ତ୍ ଜେ ଇଣ୍ତି ଜିସୁଙ୍ଗ୍ ପେଲ୍ ବିସ୍ବାସ୍ କେନଣ୍ତ୍ ଆୟ୍ ବିସୟରେନ୍ ଜିଉଦିତିଲ୍ ବକୁୱା ଏନର୍। ସାଉଲ୍ ଜିଉଦିଲକ୍ନା କିର୍ମାର୍ ଏରି ପାର୍ମାନ୍ କେନଣ୍ତ୍ ଜେ ଜିସୁ ଇ କିସ୍ଟ। ପେଙ୍ଗିଟ୍ ତର୍ ସାଉଲୁଙ୍ଗ୍ ୱାଟ୍ତେନ୍ ଆଟିଙ୍ଗ୍ ପାୟିଟ୍ ଜିଉଦିତିଲ୍ ଜଜ୍ନା କେନର୍।
ଆୟ୍ଲକ୍ ଅଣ୍ତୁଙ୍ଗ୍ ଆଟିଙ୍ଗ୍ ପାୟିଟ୍ ଗଡ୍ଟେ ଡେୱାନ୍ କାକିଙ୍ଗ୍ ପାୟିଟ୍ ଲକୁଙ୍ଗ୍ ସୟତର୍। ମାତର୍ ସାଉଲ୍ ଆୟ୍ ଜଜ୍ନା ବିସୟରେନ୍ ୱେନିଙ୍ଗ୍ ଅଡ୍ତଣ୍ତ୍, ଆରେ ଆମାଟୁକ୍ ସେନିଙ୍ଗ୍ ପାୟିଟ୍ ଅଣ୍ତୁନେ ସାଙ୍ଗତୁଲ୍ ସାଇଜ କେନର୍। ଉକୁଟ୍ ନାର୍କାମ୍ ଆୟ୍ଲକ୍ ଉକୁଟ୍ ସାଟ୍ନିନ୍ ଅଣ୍ତୁଙ୍ଗ୍ ପେୟ୍ପୁଲ୍ ପୟ୍ତାଟୁକ୍ କିଡିନ୍ ଇଡିଗ୍ସି ସିନର୍। ସାଉଲ୍ ଦମେସ୍କସ୍ଟୁକ୍ ସେୟାନ୍ କୁଣ୍ତେଲ୍, ଅଣ୍ତ୍ ଜିସୁନେ ବିସୟରେନ୍ ପର୍ସାର କେଗିଙ୍ଗ୍ ଉଣ୍ଡେଣ୍ଡ୍। ସାଉଲ୍ ସିସୁତୁଲ୍ନା ବେଟ୍ ଏରିଙ୍ଗ୍ ପାୟିଟ୍ ଜିରୁସାଲମ୍ ସେୟଣ୍ତ୍, ମାତର୍ ଆୟ୍ଲକ୍ ଅଣ୍ତୁଙ୍ଗ୍ ନାର୍ସିନର୍।
ଆଦିଙ୍ଗ୍ କୁଣ୍ତେଲ୍ ବର୍ନବା ପିଦିର୍ଟଣ୍ତ୍ ଉକୁର୍ ବିସ୍ୱାସି ସିସୁତୁଲୁଙ୍ଗ୍ କାକେଲ୍ ସାଉଲଙ୍ଗ୍ ଅର୍ଗି ଉନଣ୍ତ୍ ଆରେ ଆୟ୍ଲକୁଙ୍ଗ୍ ପକେଣ୍ତ୍ ଜେ ଅଣ୍ତ୍ ଏଟେନ୍ ଦମେସ୍କ ପେଲ୍ ସାଆସ୍ନା ପର୍ସାର୍ କେୟିମାଟଣ୍ଡ୍। ଆଦିଙ୍ଗ୍ କୁଣ୍ତେଲ୍, ସିସୁତୁଲ୍ ସାଉଲୁଙ୍ଗ୍ ଗରନ୍ କେନର୍। ଏରେ ବିସ୍ବାସିତିଲ୍ କି ତାଡନା ସୟ୍ଏରିଙ୍ଗ୍ ଅଡାଏଙ୍ଗ୍ ଜିରୁସାଲମ୍ ସାକାରି ୱେଟି ମାଟର୍, ଆୟ୍ଲକ୍ ଆନ୍ତିୟକିଆ ଆରେକ୍ ସେଞ୍ଜି ଜିସୁନେ ବିସୟ୍ରେନ୍ ପର୍ସାର୍ କେଗିଙ୍ଗ୍ ଉଣ୍ଡ୍ର୍।
ଆନ୍ତିୟକିଆତୁନ୍ ମାନଣ୍ତି ପେଙ୍ଗୁର୍ତୁଲ୍ ଲକ୍ ଜିଉଦି ଏରାର୍, ମାତର୍ ପର୍ତୁମ୍ ତର୍ ପାୟିଟ୍ ଆୟ୍ଲକୁଙ୍ଗ୍ ପେଲ୍ଟୁକ୍ ପେଙ୍ଗୁର୍ତୁଲ୍ ବିସ୍ୱାସି ଏନର୍। ବର୍ନବା ଆରେ ସାଉଲ ଆମାନ୍ ମାନଣ୍ତି ପୁନ୍ ବିୱାସିତିଲିଙ୍ଗ୍ ଜିସୁନେ ବିସୟ୍ରେନ୍ ଅଦିକ୍ ସିକିୟା ସିଗିଙ୍ଗ୍ ପାୟିଟ୍ ଆରେ ମଣ୍ତଲିଙ୍ଗ୍ ଡାଟ୍ନା ସାନ୍ଦୁକୁଙ୍ଗ୍ ପାୟିଟ୍ ସେୟର୍। ଆନ୍ତିୟକିଆ ମଣ୍ତଲିନ୍ ମାନଣ୍ତି ବିୱାସିତିଲିଙ୍ଗ୍ ପର୍ତୁମ୍ “କିରିସ୍ଟିୟାନ୍” ଏଞ୍ଜି ପକେର୍। ଦିନେକ୍, ଆନ୍ତିୟକିଆ ମଣ୍ତଲିନ୍ ମାନଣ୍ତି କିରିସ୍ଟିୟାନ୍ ଲକ୍ଗୁଲ୍ ଉପାସ୍ ପାର୍ତନା କେଦାନ୍ ବେଲେନ୍ ପବିତ୍ରଆତ୍ମା ଆୟ୍ଲକୁଙ୍ଗ୍ ପକେଣ୍ତ୍, ବର୍ନବା ଆରେ ସାଉଲୁଙ୍ଗ୍ ଏରେ କାମେ ପାୟିଟ୍ ଆନ୍ ଆସ୍କିମାନ୍ କି ଆର୍ଗିମାନ୍ ଆଦିଙ୍ଗ୍ ପାୟିଟ୍ ଆୟ୍ଲକୁଙ୍ଗ୍ ଆନ୍ ପାୟିଟ୍ ୱେନେଲ୍ କେୟୁର୍।”
ଆଦିଙ୍ଗ୍ ଆନ୍ତିୟକିଆ ମଣ୍ତଲି ବର୍ନବା ଆରେ ସାଉଲୁଙ୍ଗ୍ ପାୟିଟ୍ ପାର୍ତନା କେୟି ଆୟ୍ଲକୁଙ୍ଗ୍ ପେଲ୍ ସର୍ପାସିନର୍। ଆଦିଙ୍ଗ୍ କୁଣ୍ତେଲ୍ ଆୟ୍ଲକ୍ ପେଙ୍ଗିଟ୍ ବାସେଲ୍ତିନ୍ ସେଞ୍ଜି ଜିସୁନେ ବିସୟ୍ରେନ୍ ନିୟାଟେ କାବୁର୍ ୱେଣ୍ତୁକୁଙ୍ଗ୍ ପାୟିଟ୍ ଆୟ୍ଲକୁଙ୍ଗ୍ ସୟ୍ତର୍। ବର୍ନବା ଆରେ ସାଉଲ ପେଙ୍ଗିଟ୍ ୱେନ୍ ୱେନ୍ ଲକ୍ଦଲ୍ ପେଲ୍ ସେଞ୍ଜି ସିକିୟା ସିଗିଙ୍ଗ୍ ଉଣ୍ଡେର୍ ଆରେ ପେଙ୍ଗିଟ୍ ଲକ୍ଗୁଲ୍ ଜିସୁଙ୍ଗ୍ପେଲ୍ ବିସ୍ବାସ୍ କେଗିଙ୍ଗ୍ ଉଣ୍ତେର୍।
ବାଇବଲ୍ଟେ ଉକୁଟ୍ କେରାଲ୍ : ପେରିତ୍ ୮:୩; ୯:୧-୩୧;୧୧:୧୯-୨୬; ୧୩:୧-୩୪୭
Free to use, adapt, and share under an open license (CC BY-SA 4.0).