45. ୪୫- ସ୍ତିପାନ୍ ଆରେ ପିଲିପ
ଆୟ୍ବେଲ୍ଟେ ମଣ୍ତଲିନ୍ ନେତାକିଲିନ୍ ପେଲ୍ଟୁକ୍ ସ୍ତିପାନ୍ ପିଦିର୍ଟେ ଉକୁର୍ ଲକ୍ ମାଟଣ୍ତ୍, ଅଣ୍ତ୍ ନିୟାଟଣ୍ତ୍ ମାଟଣ୍ତ୍ ଆରେ ଅଣ୍ତ୍ ପୁରାପୁରି ପବିତ୍ର ଆତ୍ମାନ୍ ପୁରୁନ୍ ଏରିମାଟଣ୍ତ୍, ସ୍ତିପାନ୍ ପେଙ୍ଗିଟ୍ କାବା କାମେଲ୍ କେନଣ୍ତ୍ ଆରେ ସକ୍ତିସାଲିନା ବିସାର୍ କେନଣ୍ତ୍ ଏଟେନ୍ କି ଲକ୍ଗୁଲ୍ ଜିସୁନ୍ ପେଲ୍ ବିସ୍ବାସ୍ କେଦାର୍।
ଦିନେକ୍ ଉକୁଟ୍ପେଲ୍ ସ୍ତିପାନ୍ ଜିସୁନ୍ ବିସୟ୍ରେନ୍ ସିକିୟା ସିଗିନଣ୍ତ୍, ଆଟେଲ୍ ଜିସୁଙ୍ଗ୍ ପେଲ୍ ବିସ୍ବାସ୍ କେୟାଲକ୍ ଏଙ୍ଗୁର୍ତୁଲ୍ ଜିଉଦିତିଲ୍ ସ୍ତିପାନ୍ ନାଟ୍ ଜୁକ୍ତି କେଗିଙ୍ଗ୍ ଉଣ୍ତେର୍, ଆୟ୍ଲକ୍ ପେରିନ୍ ରିସାଏରି ମାଟର୍ ଆରେ ସ୍ତିପାନିଙ୍ଗ୍ ବିସୟ୍ରେନ୍ ଦରମ୍ ଗୁରୁତୁଲୁଙ୍ଗ୍ ପେଲ୍ ମିସ୍ ପାଟେ ପକେର୍, ଆୟ୍ଲକ୍ ପକେର୍ ଆମ୍ଗୁଲ୍ ଅଣ୍ତ୍ ମସାଙ୍ଗ୍ ଆରେ ମାପ୍ରୁନ୍ ବିରଦ୍ନା ପକଣ୍ତିଙ୍ଗ୍ ୱେଞ୍ଜିମାମ୍, ଆଟେଲ୍ ଦରମ୍ ଗୁରୁତୁଲ୍ ସ୍ତିପାନିଙ୍ଗ୍ ପାତେର୍ ଆରେ ବେର୍ଜାଜକ୍ ଆରେ ଜିଉଦି ନେତାକିଲ୍ କାକେଲ୍ ଅଣ୍ତୁଙ୍ଗ୍ ଇନ୍ଦ୍ରେର୍ ଆମାନ୍ ସ୍ତିପାନିଙ୍ଗ୍ ବିରଦ୍ନା ଅଦିକ୍ ମିସ୍ପାଟେ ପକେର୍।
ବେର୍ଜାଜକ୍ ସ୍ତିପାନିଙ୍ଗ୍ ପାସାର୍ତଣ୍ତ୍ “ଇପାଟିନ୍ ପାଟେ ଏନା ସତ୍?” ଅବ୍ରାମ୍ ପେଲ୍ଟୁକ୍ ଆରାମ୍ କେଇ ଜିସୁନେ ବେଲା ଆରେକ୍ ମାପ୍ରୁ ଏରେ ପାଟିନ୍ ବେର୍ବେର୍ କାମେଲ୍ କେଇମାଟେ ଆମାଟେ ପେଙ୍ଗିଟ୍ ଏତାସି ସିନଣ୍ତ୍, ଆୟ୍ଲକୁଙ୍ଗ୍ ଉତର୍ ସି ପକେଣ୍ତ୍ ଜେ ମାପ୍ରୁନ୍ ଲକ୍ ଏରେୱାଡିନ୍ ସାନ୍ତିନାଟ୍ ଆଗିୟା ସିଗିନର୍, ଆମାଟୁକ୍ ଅଣ୍ତ୍ ପକେଣ୍ତ୍ ଇୟଣ୍ତ୍ ଆଟ୍ୱା ଗର୍ବେ ଆରେ ମୁର୍କଲକ୍ ଇମ୍ଗୁଲ୍ ପାଟିନ୍ବେଲ୍ ପବିତ୍ର ଆତ୍ମାନେ ବିରଦ୍ କେଗିଦାର୍, ଏଟେନ୍କି ଇମ୍ଗୁଲ୍ନେ ଦାଦି ଆନିତିଲ୍ ପାଟିନ୍ବେଲ୍ ମାପ୍ରୁନ୍ ବିରଦ୍ କେଇ ଆୟ୍ଲକ୍ନେ ବାବବାଦି କିଲିଙ୍ଗ୍ ଆଟିକାରିନର୍, ମାତର୍ ଆୟ୍ଲକୁନ୍ ପେଲ୍ଟୁକ୍ ଅଦିକ୍ ଉୟାଟେ କାମେ କେଇମାୟାର୍! ଇମ୍ଗୁଲ୍ କିସ୍ଟଙ୍ଗ୍ ଆଟିକାରିମାର୍।
ଏସେବେଲ୍ ଦରମ୍ନେତାଲକ୍ ଇ ପାଟେ ୱେଟର୍, ଆୟ୍ଲକ୍ ପେରିନ୍ ରିସା ଏନର୍ ଜେ ଆୟ୍ଲକ୍ ଆୟ୍ଲକ୍ନେ କେକଲୁଙ୍ଗ୍ ସୁଟା ଏରି ପେରିନ୍ ଆୱ୍ଲି ଏନର୍। ଆୟ୍ଲକ୍ ସ୍ତିପାନିଙ୍ଗ୍ ଗଡ୍ ବାହାରେନ୍ ତିଣ୍ତି ଉନର୍ ଆରେ ଅଣ୍ତୁଙ୍ଗ୍ ଆଟିଙ୍ଗ୍ ପାୟିଟ୍ କାଣ୍ତ୍କିଲ୍ ଏୟ୍କେର୍।
ସ୍ତିପାନ ସାଦାନ୍ ସମୟ୍ରେନ୍ ପେରିନ୍ ପଲେନା ଆୱ୍ଲି ଏନଣ୍ତ୍ ଆରେ ପକେଣ୍ତ୍, “ହେ ଜିସୁ, ଆନ୍ ଆତ୍ମାଙ୍ଗ୍ ଗରନ୍ କେ। ଆଦିଙ୍ଗ୍ କୁଣ୍ତେଲ୍ ଅଣ୍ତ୍ ୱାଙ୍ଗୁସୁଲ୍ କୁଟି ଆରେତରେକ୍ ପେରିନ୍ ଆଉଲିରେନ୍ ପକେଣ୍ତ୍ “ହେ ପର୍ବୁ, ଇ ପାପ୍ ଆୟ୍ଲକ୍ନେ ବିରଦ୍ରେନ୍ ଏଜାମେନ୍।” ଆଦିଙ୍ଗ୍ କୁଣ୍ତେଲ୍ ଅଣ୍ତ୍ ସାୟିସେୟଣ୍ତ୍।
ସାଉଲ୍ ପିଦିର୍ଟଣ୍ତ୍ ଉକୁର୍ ସ୍ତିପାନିଙ୍ଗ୍ ଆଟିକାର୍ଦାନ୍ ଲକ୍ନାଟ୍ ମିସ୍ଏରି ମାଟଣ୍ତ୍, ଏଇଣ୍ତ୍ ଆଟିକାରାକ୍ ଆଟ୍ଦାନ୍ବେଲ୍ ଆୟ୍ଲକ୍ନେ ବସ୍ତର୍ଗୁଲ୍ କାକିନଣ୍ତ୍, ଆୟ୍ସିରିସ୍ ଜିରୁସାଲାମ୍ତୁନ୍ ମାନ୍ ଲକ୍ଗୁଲ୍ ଜିସୁନେ ଅନୁଗ୍ର ପାୟ୍ଏଦାନ୍ ଲକୁଙ୍ଗ୍ ନିନ୍ଦାକେଗିଙ୍ଗ୍ ଆରାମ୍ କେନର୍, ଆଦିଙ୍ଗ୍ ବିସ୍ବାସି ଲକ୍ ୱେନ୍ ୱେନ୍ ବାସେନ୍ ୱେଟେର୍, ମାତର୍ ଇ ପାଟିନ୍ ଲକ୍ ଏରେ ଏରେ ବାସେନ୍ ସେୟର୍ ଆୟ୍ବାସେନ୍ ଜିସୁଙ୍ଗ୍ ପର୍ସାର୍ କେଗିଙ୍ଗ୍ ଆରାମ୍ କେନର୍।
ଜିସୁନେ ଉକୁର୍ ସିସୁ ଅଣ୍ତୁନ୍ ପିଦିର୍ ପିଲିପ୍ ଜିରୁସାଲାମ୍ଟୁକ୍ ତାଡ୍ନା ଏଦାନ୍ ପାଇଟ୍ ୱେଟି ସେୟାନ୍ ବିସ୍ବାସି ଲକୁଙ୍ଗ୍ ପେଲ୍ଟୁ ଉକୁର୍ ମାଟଣ୍ତ୍, ଅଣ୍ତ୍ ସମରିୟାନ୍ ସେଞ୍ଜି ଆମାନ୍ ଜିସୁନ୍ ବିସୟ୍ରେନ୍ ପର୍ସାର୍ କେନଣ୍ତ୍ ଆରେ ପେଙ୍ଗୁର୍ତୁଲ୍ ଲକ୍ ଉଦାର୍ ପାୟ୍ଏନର୍, ଆମାଟୁକ୍ ଦିନେକ୍ ମାପ୍ରୁନେ ଦୁତ୍ ଉକୁଟ୍ ପିଲିପ୍ପୁନ୍ କାକେଲ୍ ୱାରି ମରୁବାସେ ସି ସେନିଙ୍ଗ୍ ପାଇଟ୍ ପକେଟଣ୍ଡ୍, ଅଣ୍ତ୍ ଏସେବେଲ୍ ଆୟ୍ପାୱ୍ସି ସେୟାନ୍ବେଲ୍ ପିଲିପ୍ ସୁଡେଣ୍ତ୍ ଜେ ଇତିପିୟ ପିୟାଟେ ରାଜା ପରିବାର୍ଟୁକ୍ ଉକୁର୍ ବେର୍ପଦ୍ ପାୟ୍ଏରାକ୍ ଆୟ୍ପାୱ୍ ସି ୱାରିନଣ୍ତ୍, ଅଣ୍ତୁନ୍ କାକେଲ୍ ସେଞ୍ଜି ଅଣ୍ତୁନାଟ୍ ପାର୍କିଙ୍ଗ୍ ପବିତ୍ର ଆତ୍ମା ପିଲିପ୍ପୁଙ୍ଗ୍ ପକେଟେ।
ଇତିଓପିୟା ଅଣ୍ତୁନେ ଉଲେନ୍ ସେନିଙ୍ଗ୍ ଉଣ୍ତେଣ୍ତ୍, ଅଣ୍ତ୍ କିର୍ଦେ ଏନଣ୍ତ୍ ଅଣ୍ତ୍ ଜିସୁଙ୍ଗ୍ ପୁଟଣ୍ତ୍।
ପିଲିପ୍ପ ଏରେବେଲ୍ ରତ୍ କାକେଲ୍ ସେୟଣ୍ତ୍, ଆୟ୍ ଇତିପିୟା ଲକ୍ ଜିସାୟ ବାବବାଦିନେ ପୁସ୍ତକ୍ ପଡ୍ଏରଣ୍ତିଙ୍ଗ୍ ୱେଟଣ୍ତ୍ ଆରେ ପଡ୍ଏରଣ୍ତିଙ୍ଗ୍ ସୁଡେଣ୍ତ୍, ଆୟ୍ଲକ୍ ମେଣ୍ତା ୱାଡିନ୍ ଅଣ୍ତୁଙ୍ଗ୍ କାତିଙ୍ଗ୍ ଉନର୍, ଆରେ କିଟ୍କେଏରି ମାନଣ୍ତି ମେଣ୍ତା ୱାଡିନ୍ ଏନାମେନ୍ ପାଟେ ପକୁଟଣ୍ତ୍, ଆୟ୍ଲକ୍ ଆଣ୍ତୁଙ୍ଗ୍ ଗୁର୍ନା କେନର୍ ଆରେ ଅଣ୍ତୁଙ୍ଗ୍ ସମାଦାନ୍ କେୟୁଟର୍, ଆୟ୍ଲକ୍ ଅଣ୍ତୁନ୍ ପେଲ୍ଟୁକ୍ ଅଣ୍ତୁନେ ଜିୱେ ଉନର୍।
ପିଲିପ୍ ଆୟ୍ ଇତିଓପିୟାଟଣ୍ଡୁଙ୍ଗ୍ ପାସାର୍ତଣ୍ତ୍ ଇନ୍ ଏନାଦ୍ ପଡ୍ଏରିଦାଟ୍ ଆଦ୍ଏନା ବୁଜ୍ଏରିଦାଟ୍? ଆୟ୍ ଇତିଓପିୟା ପକେଣ୍ତ୍, ମାନା ଆନୁଙ୍ଗ୍ ଏଇଣ୍ତ୍ ବୁଜାପା ଆରେକ୍ ଆନ୍ ବୁଜ୍ଏରାନ୍, ଦୟାକେଇ ଆନ୍ କାକେଲ୍ ୱାରି ଉଣ୍ତ୍, ଜିସାୟ୍ ନିଜେଟେ ବିସୟ୍ନା ଲେକାସିମାଣ୍ତ୍ କି ଆରେ ଏଇର୍ନେ ବିସୟ୍ନା ଇଦ୍ ଲେକାସିମାଣ୍ତ୍? ପିଲିପ୍ ଅଣ୍ତୁଙ୍ଗ୍ ବୁଜାସି ପକେଣ୍ତ୍ ଜିସାୟ୍ ଜିସୁନ୍ ବିସୟ୍ରେନ୍ ଇଦ୍ ଲେକାସିମାଣ୍ତ୍।
ଜିସୁନ୍ ବିସୟ୍ନା ମାନଣ୍ତି ନିୟାଟେ କାବୁର୍ ପକୁଙ୍ଗ୍ ପାଇଟ୍ ପିଲିପ୍ ୱେନ୍ ସାସ୍ତର୍ଟୁକ୍ ବୁଜାତଣ୍ତ୍, ଏରେବେଲ୍ ପିଲିପ୍ ଆରେ ଇତିଓପିୟାଟଣ୍ଡ୍ନା ସେନ୍ର୍ ଆୟ୍ଲକ୍ ଉକୁଟ୍ ନିର୍ ମାନଣ୍ତି ବାସେନ୍ ୱାନର୍।
ଇତିଓପିୟାଟଣ୍ଡ୍ ପକେଣ୍ତ୍ “ସୁଡ୍, ଇମାନ୍ ନିର୍ମାୟା ଆନ୍ ବାପ୍ତିସ୍ମ ଉଗୁଙ୍ଗ୍ ଅଡ୍ତାନ୍ କି?” ଆରେ ଅଣ୍ତ୍ ରତ୍ ସାଲାପାକିଙ୍ଗ୍ ନିଣ୍ତୁକୁଙ୍ଗ୍ ପକେଣ୍ତ୍, ଆଟେଲ୍ ଆୟ୍ଲକ୍ ନିର୍ କାକେଲ୍ ଇଡ୍ଗି ସେୟର୍, ପିଲିପ୍ ଆୟ୍ ଇତିଓପିୟାଟଣ୍ଡୁଙ୍ଗ୍ ବାପ୍ତିସ୍ମ ସିନଣ୍ତ୍।
ଆୟ୍ଲକ୍ ନିର୍ଟୁକ୍ ପେସି ୱାଦାନ୍ବେଲ୍ ପବିତ୍ର ଆତ୍ମା ପିଲିପ୍ପୁଙ୍ଗ୍ ୱେନ୍ ଉକୁଟ୍ ବାସେନ୍ ପାତିସେଣ୍ତେ, ଏରେମାନ୍ ଅଣ୍ତ୍ ଜିସୁଙ୍ଗ୍ ବିସୟ୍ରେନ୍ ଲକ୍ଗୁଲୁଙ୍ଗ୍ ସାନ୍ତିନା ମାନିଙ୍ଗ୍ ପକେଣ୍ଡ୍, ଇତିଓପିୟା ଅଣ୍ତୁନେ ଉଲେନ୍ ସେନିଙ୍ଗ୍ ଉଣ୍ତେଣ୍ତ୍, ଅଣ୍ତ୍ କିର୍ଦେ ଏନଣ୍ତ୍ ଅଣ୍ତ୍ ଜିସୁଙ୍ଗ୍ ପୁଟଣ୍ତ୍।
ବାଇବଲ୍ଟେ ଉକୁଟ୍ କେରାଲ୍ : ପେରିତ୍ ୬:୮-୮:୫; ୮:୨୬-୪୦,
Free to use, adapt, and share under an open license (CC BY-SA 4.0).