44. ୪୪- ପିତର ଆରେ ଜଅନ୍ ଉକୁର୍ ବିକ୍ପର୍ପାକିଙ୍ଗ୍ ନିୟା କେନର୍
ଦିନେକ୍ ପିତର୍ ଆରେ ଜଅନ୍ ମନ୍ଦିର୍ତିନ୍ ସେନ୍ନର୍। ଆୟ୍ଲକ୍ ଏସେବେଲ୍ ମନ୍ଦିର୍ଟେ ଡେୱାନ୍ ସେୟର୍, ଆୟ୍ଲକ୍ ଉକୁର୍ ସଟାଙ୍ଗ୍ ବିକ୍ ପର୍ପଣ୍ତିଙ୍ଗ୍ ସୁଡେର୍।
ପିତର୍ ସଟା ଲକୁଙ୍ଗ୍ ସୁଡି ପକେଣ୍ତ୍ “ସିଗିଙ୍ଗ୍ ପାଇଟ୍ ଆନ୍ପେଲ୍ ଏନାମେନ୍ ଡାବୁଲ୍ ମାନାୱ୍, ମାତର୍ ଆନେ ଏନାଦ୍ ମାୟା ଆଦ୍ ଆନ୍ ଇନୁଙ୍ଗ୍ ସିଗିଦାନ୍, ନାଜ୍ରିତ୍ଟେ ଜିସୁନ୍ ପିଦିର୍ନା ସିଲ୍ସି ତାକ୍।”
ସାଙ୍ଗେନ୍ ସାଙ୍ଗେନ୍ ମାପ୍ରୁ ଅଣ୍ତୁଙ୍ଗ୍ ସୁସ୍ତ କେନଣ୍ତ୍, ଆରେ ଅଣ୍ତ୍ ସାରିବେଡ୍ତେନ୍ ୱାଲ୍କି ୱାଲ୍କି ତାକିଙ୍ଗ୍ ଉଣ୍ତେଣ୍ତ୍, ମନ୍ଦିର୍ଟେ ଡେୱାନ୍ ମାନ୍ଲକ୍ ପାଟିନ୍ କାବା ଏରିସେୟର୍।
ଏରେଲକ୍ ସୁସ୍ତ ଏରିମାଟଣ୍ତ୍ ଅଣ୍ତୁଙ୍ଗ୍ ସୁଡୁଙ୍ଗ୍ ପାଇଟ୍ ପେଙ୍ଗୁର୍ତୁଲ୍ ଲକ୍ ଜମା ଏନର୍, ପିତର୍ ଆୟ୍ଲକୁଙ୍ଗ୍ ପକେଣ୍ତ୍ “ଇୟଣ୍ତ୍ ସୁସ୍ତ ଏତାଲିନ୍ ଇମ୍ଗୁଲ୍ ଏନାଦିଙ୍ଗ୍ କାବା ଏରିଦାର୍? ଆମ୍ଗୁଲ୍ନେ ସକ୍ତିନା ଏରା କି ଆମ୍ଗୁଲ୍ନେ ନିୟାଟେ ପାଇଟ୍ ଏରା ଆମ୍ ସୁସ୍ତା କେୟାମ୍ ମାତର୍ ଇଦ୍ ଜିସୁନେ ସକ୍ତିନା ଆରେ ଜିସୁନେ ବେର୍ଟେ ବିସ୍ବାସ୍ ଉନିଟ୍ ଅଣ୍ତୁଙ୍ଗ୍ ସୁସ୍ତ କେନମ୍।
“ଇମ୍ଗୁଲ୍ଇ ଜିସୁଙ୍ଗ୍ ଆଟିଙ୍ଗ୍ ପାଇଟ୍ ରମିୟ ସର୍କାରିଙ୍ଗ୍ ପକେର୍, ଇମ୍ଗୁଲୁଙ୍ଗ୍ ଜିୱେ ସିୟାକିଙ୍ଗ୍ ୱାଟ୍ତେନ୍ ଆଟେର୍, ମାତର୍ ଆବା ମାପ୍ରୁ ସାଦାନ୍ ପେଲ୍ଟୁକ୍ ସିଣ୍ତୁସି ମାଣ୍ତ୍, ଇମ୍ଗୁଲ୍ ଏନାଦ୍ ଏନାଦ୍ କେଇମାର୍ ଆଦ୍ ଜଦି ବୁଜ୍ଏରି ମାଟର୍ମେନ୍ ଆଟେଲ୍ କିସ୍ଟ ଜେ ଦୁକ୍ ସୟ୍ଏରି ସାନଣ୍ତ୍ ଇ ବାବବାନିଲ୍ ସପଲ୍ କେଗିଙ୍ଗ୍ ପାଇଟ୍ ମାପ୍ରୁ ଇମ୍ଗୁଲ୍ନେ କାମେଙ୍ଗ୍ ବେବଆର୍ କେନଣ୍ତ୍, ଆଦିଙ୍ଗ୍ ଇଣ୍ତି ଏତାପୁର୍ ଆରେ ମାପ୍ରୁନ୍ ପେଲ୍ ମାଣ୍ତି ୱାର୍ ଏଟେନ୍ କି ଇମ୍ଗୁଲ୍ନେ ପାପ୍ କେମା କେଇଏଦା।”
ପିତର୍ ଆରେ ଜଅନ୍ ଏନାଦ୍ ପକୁନର୍ ଆଦ୍ ୱେଞ୍ଜି ମନ୍ଦିର୍ଟେ ନେତାକିଲ୍ କାବାଏରି ସେଞ୍ଜିମାଟର୍, ଆଦିଙ୍ଗ୍ ଆୟ୍ଲକ୍ ଆୟ୍ଲକୁଙ୍ଗ୍ ପାତି ଜୟିଲ୍ ଉଲେନ୍ ଇରେର୍, ମାତର୍ ପେଙ୍ଗୁର୍ତୁଲ୍ ଲକ୍ ପିତର୍ନେ ପାଟେ ୱେଞ୍ଜି ବିସ୍ବାସ୍ କେନର୍, ମାତର୍ ଜିସୁଙ୍ଗ୍ ବିସ୍ବାସ୍ କେଦାନ୍ ଲକ୍ନେ ସକିୟା ୫୦୦୦ ଲକ୍ ମାଟର୍।
ଆରେକୁଟ୍ ସିରିସ୍ ଜିଉଦି ନେତାକିଲ୍ ପିତର୍ ଆରେ ଜଅନ୍ନୁଙ୍ଗ୍ ବେର୍ଜାଜକ୍ ଆରେ ୱେନ୍ ଦରମ୍ଗୁରୁ ଲକୁନ୍ କାକେଲ୍ ଇନ୍ଦ୍ରେର୍, ଆୟ୍ଲକ୍ ପିତର୍ ଆରେ ଜଅନୁଙ୍ଗ୍ ପାସାର୍ତର୍, “ଏରେ ସକ୍ତିନା ଇମ୍ଗୁଲ୍ ଇ ମେଟା ଲକୁଙ୍ଗ୍ ସୁସ୍ତ କେନର୍?”
ପିତର୍ ଆୟ୍ଲକୁଙ୍ଗ୍ ଉତର୍ ସିନଣ୍ତ୍, “ଇୟଣ୍ତ୍ ଜିସୁ କିସ୍ଟନ୍ ସକ୍ତିନାଟ୍ ସୁସ୍ତ ଏରି ନିଲ୍ସି ମାଣ୍ତ୍, ଇମ୍ଗୁଲ୍ ଜିସୁଙ୍ଗ୍ କୁରୁସ୍ କାଟ୍ତିନ୍ କଟେର୍, ମାତର୍ ମାପ୍ରୁ ଅଣ୍ତୁଙ୍ଗ୍ ଆରେତରେକ୍ ଜିୱେସ କେୟି ସିଣ୍ତୁସିମା, ଇମ୍ଗୁଲ୍ ଅଣ୍ତୁଙ୍ଗ ଗୁର୍ନା କେଇମାର୍, ମାତର୍ ଉଦାର୍ ପାୟ୍ଏରିଙ୍ଗ୍ ଜିସୁଙ୍ଗ୍ ସାକାରି ଆରେ ଏୟିରୁଙ୍ଗ୍ ପେଲ୍ ସକ୍ତି ମାନା।
ପିତର୍ ଆରେ ଜଅନ୍ ପେରିନ୍ ସାସ୍ନା ପାଟେ ପକଣ୍ତି ସୁଡି ନେତାକିଲ୍ କାବା ଏରିସେୟର୍, ମାତର୍ ଆୟ୍ଲକ୍ ସୁଡେର୍ ଜେ ଇ ଲକ୍ ମାମୁଲିଟେ ଲକ୍ ଏରାର୍ ଅସିକିତ୍ ଲକ୍ମାନୁଟର୍, ମାତର୍ କୁଣ୍ତେଲ୍ ଆୟ୍ଲକ୍ ଏତାତର୍ ଜେ ଇ ଲକ୍ ଜିସୁନାଟ୍ ମାଟର୍, ଆୟ୍ଲକ୍ ପିତର୍ ଆରେ ଜଅନୁଙ୍ଗ୍ ଦାମ୍କାସି ପକି ସାକାରି ସିନର୍।
ବାଇବଲ୍ଟେ ଉକୁଟ୍ କେରାଲ୍ : ପିତର୍ ୩:୧-୪:୨୨
Free to use, adapt, and share under an open license (CC BY-SA 4.0).