43. ୪୩- କିସ୍ଟାନ୍ ମଣ୍ତଲି ଆରାମ୍
ଜିସୁ ସରଗ୍ତୁନ୍ ସେୟାନ୍ କୁଣ୍ତେଲ୍, ଜିସୁ ଏରେୱାଡିନ୍ ଆଦେସ୍ ସି ମାଟଣ୍ଡ୍ ଆୟ୍ ଅନୁସାରେନ୍ ସିସୁତୁଲ୍ ଜିରୁସାଲମ୍ତୁନ୍ ମାଟର୍। ବିସ୍ୱାସ୍ତିଲ୍ ଆମାନ୍ ପାର୍ତନା କେଗିଙ୍ଗ୍ ପାୟିଟ୍ ପାଟିନ୍ବେଲେନ୍ ରୁଣ୍ଡ୍ଏରି ମାଟର୍।
ନିସ୍ତାର୍ପାରୁବ୍ଟେ ୫୦ ଦିନ୍ କୁଣ୍ତେଲ୍, ବରସ୍କେନ୍ ଜିଉଦିତିଲ୍ ପେନ୍ଟିକସ୍ଟ ପିଦିର୍ଟେ ଉକୁଟ୍ ମୁକ୍ୟାମ୍ଟେ ଦିନ୍ ପାଲନ୍ କେଗିନର୍। ପେନ୍ଟିକସ୍ଟ ଏରିଦା ଆୟ୍ ସମୟ୍ ଏସେବେଲ୍ କି ଜିଉଦିତିଲ୍ ତାସ୍ କୟଣ୍ତି ବେଲେନ୍ ପାଲନ୍ କେଗିନର୍। ପେନ୍ଟିକସ୍ଟ ଉକୁଟ୍ପେଲ୍ ପାଲନ୍ କେଗିଙ୍ଗ୍ ପାୟିଟ୍ ସାରା ଜଗତ୍ଟୁକ୍ ଜିଉଦିତିଲ୍ ଜିରୁସାଲମ୍ତୁନ୍ ୱାନର୍। ଇ ବର୍ସ, ଜିସୁ ସରଗ୍ତୁନ୍ ସେଞ୍ଜି ଉକୁଟ୍ ସପ୍ତା କୁଣ୍ତେଲ୍ ପେନ୍ଟିକସ୍ଟ ଦିନ୍ ୱାନେ।
ବିସ୍ୱାସିତିଲ୍ ଏସେବେଲ୍ ଉକୁଟ୍ପେଲ୍ ମାଟର୍, ଏରେ ଉଲେନ୍ ଆୟ୍ଲକ୍ ମାଟର୍ ପେରିନ୍ ୱାଲ୍ଟେ ସବଦ୍ ୱାଡ଼଼ିନ୍ ସବଦ୍ ଆୟ୍ବାସେନ୍ ଏନେ, ଆରେ କିସ୍ ୱାଡିନ୍ ପାଟିନ୍ ବିସ୍ବାସି ଲକ୍ନେ ନାଙ୍ଗ୍ଗିଲ୍ ଏନେୱ୍, ପାଟିଲକ୍ ପବିତ୍ର ଆତ୍ମାନ୍ ପୁରୁନ୍ ଏନର୍ ଆରେ ୱେନ୍ ୱେନ୍ ବାସାନା ପାଟେ ପକୁଙ୍ଗ୍ ଉଣ୍ତେର୍।
ଏରେବେଲ୍ ଜିରୁସାଲାମ୍ତିନ୍ ମାନ୍ଲକ୍ ଇ ଆୱ୍ଲି ୱେଟର୍, ଆଟେଲ୍ ଏନାଦ୍ ଏନେ ଏଞ୍ଜି ସୁଡୁଙ୍ଗ୍ ୱାରି ପେଙ୍ଗୁର୍ତୁଲ୍ ଜମାଏନର୍, ମାପ୍ରୁନେ କାବା କାମେଙ୍ଗ୍ ବିସ୍ବାସିତିଲ୍ ପକ୍ଦାନ୍ ବେଲ୍ ଲକ୍ଗୁଲ୍ ୱେଟର୍, ଆୟ୍ଲକ୍ କାବାଏରି ସେୟର୍, ମାତର୍ ଆୟ୍ଲକ୍ ନିଜେଟେ ବାସାନାଟ୍ ପକାମାନର୍ ଇଦ୍ ଆୟ୍ଲକ୍ ୱେଟର୍।
ଏଙ୍ଗୁର୍ତୁଲ୍ ଲକ୍ ପକେର୍ ସିସୁତୁଲ୍ ସର୍ଙ୍ଗିମାର୍ ଏଟର୍, ମାତର୍ ପିତର୍ ନିଲ୍ସି ଆୟ୍ଲକୁଙ୍ଗ୍ ପକେଣ୍ତ୍ “ ଆନ୍ ପାଟେ ୱେଣ୍ତୁର୍, ଇପାଟିନ୍ ଲକ୍ ସର୍ଙ୍ଗାର୍, ଇଦ୍ ଜଏଲ୍ ବାବବାଦି ପକଣ୍ତି ବାବବାନି ସପଲ୍ ଏନେ। ଏରେମାନ୍କି ମାପ୍ରୁ ପକିମାଟଣ୍ତ୍, ସେସ୍ବେଲ୍ ଆମ୍ ନିଜେଟେ ଆତ୍ମା ଡାଲାସି ସିଦାମ୍।
ଏଇସ୍ରାଏଲ୍ ଲକ୍ଗୁଲ୍ ଜିସୁ ଉକୁର୍ ଲକ୍ମାଟଣ୍ତ୍ ଅଣ୍ତ୍ ମାପ୍ରୁନେ ସକ୍ତି ପାୟ୍ଏରି ପେଙ୍ଗିଟ୍ କାବା କାମେଲ୍ ପାଟିନ୍ କେନଣ୍ତ୍, ଏନାଦ୍ ସୁଡୁଦାର୍ ଆରେ ପୁଞ୍ଜିମାର୍ ମାତର୍ ଇମ୍ଗୁଲ୍ ଅଣ୍ତୁଙ୍ଗ୍ କୁର୍ସନ୍ କଟେର୍।
ଆରେ ଜିସୁ ସାନଣ୍ତ୍ ମାତର୍ ମାପ୍ରୁ ଅଣ୍ତୁଙ୍ଗ୍ ସାଦାନ୍ ପେଲ୍ଟୁକ୍ ସିଣ୍ତୁତଣ୍ତ୍, ଇଦ୍ ଉକୁଟ୍ ବାବବାନି ସପଲ୍ କେନଣ୍ତ୍, ଏରେଦ୍ କି ଇମେ ପବିତ୍ର ଲକୁଙ୍ଗ୍ ସାୟ୍ତିନ୍ ସାମୁଙ୍ଗ୍ ସିୟାଣ୍ଡ୍, ମାପ୍ରୁ ଜେ ଜିସୁଙ୍ଗ୍ ପୁନ୍ ଜିୱେ ସିମାଣ୍ତ୍, ଆମ୍ଗୁଲ୍ ସାକି ମାମ୍।
“ଇଣ୍ତି ଜିସୁ ଆବାନେ ତିୟାନ୍ ପାକା ଉଣ୍ତିମାଣ୍ତ୍, ଆରେ ଜିସୁ ଏରେୱାଡିନ୍ ପବିତ୍ର ଆତ୍ମା ସୟ୍ତାନ୍ ଏଞ୍ଜି ପକେଣ୍ତ୍, ଆୟ୍ ୱାଡିନ୍ ପବିତ୍ର ଆତ୍ମା ସୟ୍ତଣ୍ତ୍, ଇଣ୍ତି ଇମ୍ଗୁଲ୍ ଏରେ ବିସୟ୍ ସୁଡୁଦାର୍ ଆରେ ୱେନିଦାର୍ ଆୟ୍ ପାଟିନ୍ ପବିତ୍ର ଆତ୍ମା ଗଟାସିମା।
“ଇ ଜିସୁଙ୍ଗ୍ ଇମ୍ଗୁଲ୍ କୁର୍ସନ୍ ସସୁସି କଟୁସିମାର୍, ମାତର୍ ନିସୟ୍ ପୁଣ୍ତୁର୍ ଜେ ମାପ୍ରୁ ଜିସୁଙ୍ଗ୍ ଇରୁଲ୍ ପର୍ବୁ ଆରେ କିସ୍ଟ!”
ଲକ୍ଗୁଲ୍ ପିତର୍ନେ ପାଟେ ୱେଟର୍ ଆରେ ଅଣ୍ତ୍ ପକିମାନଣ୍ତି ପାଟେ ପେରିନ୍ ଦିୟାନ୍ନା ସିଏନେ, ଆଦିଙ୍ଗ୍ ଆୟ୍ଲକ୍ ପିତରୁଙ୍ଗ୍ ଆରେ ୱେନ୍ ସିସୁତୁଲୁଙ୍ଗ୍ ପାସାର୍ତର୍ “ବାଇଲକ୍ ଆମ୍ଗୁଲ୍ ଏନାଦ୍ କେଦାମ୍?”
ପିତର୍ ଆୟ୍ଲକୁଙ୍ଗ୍ ଉତର୍ ସିନଣ୍ତ୍ “ଇମ୍ଗୁଲ୍ ପାଟିନ୍ଲକ୍ ଜିସୁକିସ୍ଟନେ ପିଦିର୍ନା ବାପ୍ତିସ୍ମା ଉୟୁର୍ ଏଟେନ୍ କି ମାପ୍ରୁ ଇମ୍ଗୁଲୁଙ୍ଗ୍ ପାପ୍କେମା ସିଦାଣ୍ତ୍। ଆଦିଙ୍ଗ୍ କୁଣ୍ତେଲ୍ ଅଣ୍ତ୍ ପବିତ୍ରଆତ୍ମାନେ ଦାନ୍ ସିଦାଣ୍ତ୍।”
ପାକାପାକି ୩୦୦୦ ଲକ୍ଗୁଲ୍, ପିତର୍ ପକଣ୍ତି ପାଟେ ବିସ୍ବାସ୍ କେୟି ଜିସୁନେ ସିସୁ ଏନର୍। ଆୟ୍ଲକ୍ ବିସ୍ବାସ୍ କେୟି ଜିରୁସାଲମ୍ତୁନ୍ ମାନଣ୍ତି ମଣ୍ତଲିଟେ ଉକୁଟ୍ ବାଗ୍ ଏନର୍।
ସିସୁତୁଲ୍ କିର୍ଦେନା ପର୍ତୁମ୍ ସିସୁତୁଲ୍ନେ ସିକିୟା ୱେଟର୍, ଉକୁଟ୍ପେଲ୍ ମାଟର୍, ଉକୁଟ୍ପେଲ୍ ତିୟର୍, ଆରେ ଉକୁଟ୍ପେଲ୍ ପାର୍ତନା କେନର୍। ଆୟ୍ଲକ୍ ଉକୁଟ୍ପେଲ୍ ମାପ୍ରୁନେ ପର୍ସଙ୍ଗ୍ସା କେୟି କିର୍ଦେ କେନର୍ ଆରେ ଆୟ୍ଲକୁଙ୍ଗ୍ ପେଲ୍ ଏନାଦ୍ ଏନାଦ୍ ମାଟେ ଆଦ୍ ନିଜେନ୍ ନିଜେନ୍ ପାୟ୍ସି ଏନର୍। ପାଟିନ୍ ଲକ୍ ଆୟ୍ଲକ୍ନେ ମଙ୍ଗଲ୍ କାମନା କେଗିନର୍। ପାଟିନ୍ଦିନ୍ ଅଦିକ୍ ଅଦିକ୍ ଲକ୍ଗୁଲ୍ ବିସ୍ବାସ୍ କେଗିନର୍।
ବାଇବଲ୍ଟେ ଉକୁଟ୍ କେରାଲ୍ : ପେରିତ୍ ୨
Free to use, adapt, and share under an open license (CC BY-SA 4.0).