42. ୪୨-ଜିସୁ ସର୍ଗେନ୍ ସେନଣ୍ଡି
ଜିସୁ ଏରେସିରିସ୍ ସାଦାନ୍ ପେଲ୍ଟୁକ୍ ସିଲ୍ତଣ୍ତ୍, ଇରୁଲ୍ ସିସୁତୁଲ୍ କାକେଲ୍ଟେ ମନ୍ଦିର୍ତିନ୍ ସେନ୍ନର୍, ଆୟ୍ଲକ୍ ସେୟାନ୍ ବେଲ୍ ଜିସୁନାଟ୍ ଏନାଦ୍ ଗଟ୍ଏରିମାଟେ ଆୟ୍ ବିସୟ୍ ପାର୍କିନର୍, ଆୟ୍ଲକ୍ ଏତାକିନର୍ ଜେ ଅଣ୍ତ୍ କିସ୍ଟ ମାଟଣ୍ତ୍, ମାତର୍ ଅଣ୍ତୁଙ୍ଗ୍ ଆଟିକାରେର୍, ମାତର୍ ଆସ୍ମାଲ୍ ପକେଟେ ନିସୟ୍ ଅଣ୍ତ୍ ଜିୱେମାଣ୍ତ୍, ଆୟ୍ଲକ୍ ପୁନୁଙ୍ଗ୍ ଅଡୁଟର୍ ଏରୁଙ୍ଗ୍ ବିସ୍ବାସ୍ କେଦାର୍।
ଜିସୁ ଆୟ୍ଲକୁଙ୍ଗ୍ କାକେଲ୍ ବେଟ୍ ଏନଣ୍ତ୍ ଆରେ ଆୟ୍ଲକ୍ନା ତାକିଙ୍ଗ୍ ଉଣ୍ଡ୍ଣ୍ତ୍, ମାତର୍ ଆୟ୍ଲକ୍ ଅଣ୍ତୁଙ୍ଗ୍ ଚିନାକିଙ୍ଗ୍ ଅଡୁଟର୍। ଆୟ୍ଲକ୍ ଏରେ ବିସୟରେନ୍ ପାର୍କିନର୍ ଅଣ୍ତ୍ ଆୟ୍ ବିସୟ ଆୟ୍ଲକୁଙ୍ଗ୍ ପାସାର୍ତଣ୍ତ୍, ଆରେ ଏଙ୍ଗିର୍ ଦିନାମ୍ କୁଣ୍ତେଲ୍ ଜିସୁନା ଏରେଦ୍ ପାଟିନ୍ ଗଟ୍ ଏରିମାଟେ ଆୟ୍ ମୁକିୟ ଗଟନା ଆଦ୍ ଆୟ୍ଲକ୍ ଅଣ୍ତୁଙ୍ଗ୍ ପକେର୍। ଆୟ୍ଲକ୍ ଏତାତର୍ ଜେ ଆୟ୍ଲକ୍ ଉକୁର୍ ଲକ୍ନାଟ୍ ପାର୍କିଦାର୍ ଏରେଦ୍ କି ଜିରୁସାଲାମ୍ତୁନ୍ ଗଟ୍ଏରଣ୍ତି ବିସୟରେନ୍।
ଆଦିଙ୍ଗ୍ କୁଣ୍ତେଲ୍ ଜିସୁ ଆୟ୍ଲକୁଙ୍ଗ୍ ବୁଜାସିକେରିନ୍ ପକୁଙ୍ଗ୍ ଉଣ୍ଡେଣ୍ତ୍ ଜେ ମାପ୍ରୁ କିସ୍ଟନେ ବିସୟରେନ୍ ଏନା ଏଞ୍ଜି ମାଟଣ୍ଡ୍। ଅଣ୍ତ୍ ଆୟ୍ଲକୁଙ୍ଗ୍ ଭବିସତ୍ବାଣି ଏତାସି ସି ପକେଣ୍ତ୍ ଜେ କିସ୍ଟ ଦୁକ୍ ଏଦାଣ୍ତ୍ ଆରେ ୱାଟ୍ତେନ୍ ଆଟ୍ଦାର୍ ଆରେ ତିନ୍ଦିନ୍ କୁଣ୍ତେଲ୍ ଆରେତରେକ୍ ସିଲ୍ତାଣ୍ତ୍। ଆୟ୍ ଜଡେକ୍ ଲକ୍ ଏରେ ଗଡ୍ତୁନ୍ ମାନିଙ୍ଗ୍ ଜଜ୍ନା କେୟିମାଟର୍, ଆୟ୍ଲକ୍ ଏସେବେଲ୍ ଆମାନ୍ ଏଦେର୍, ଆସେବେଲ୍ ସିର୍ତାଲ୍ ଏନେ।
ଆୟ୍ ଜଡେକ୍ ଲକ୍ ଆୟ୍ଲକ୍ନା ମାନିଙ୍ଗ୍ ପାୟିଟ୍ ଜିସୁଙ୍ଗ୍ ଅର୍ଗେର୍, ଆଦିଙ୍ଗ୍ ଅଣ୍ତ୍ ଆୟ୍ଲକ୍ନା ସେୟଣ୍ତ୍। ଆୟ୍ଲକ୍ ଏସେବେଲ୍ ସିର୍ତାଲ୍ଟେ କାଦି ତିନିଙ୍ଗ୍ ପାୟିଟ୍ ତିୟାର୍ ଏନର୍ ଆସେବେଲ୍ ଜିସୁ ଉକୁଟ୍ ରୁଟି ପିକି ମାପ୍ରୁଙ୍ଗ୍ ଦନିୟବାଦ୍ ସିନଣ୍ତ୍ ଆରେ ଆଦିଙ୍ଗ୍ ମୁକା କେନଣ୍ତ୍। ସାଙ୍ଗେନ୍ ସାଙ୍ଗେନ୍ ଅଣ୍ତ୍ ଜେ ଜିସୁ ଏଞ୍ଜି ଚିନାତର୍। ମାତର୍ ଆୟ୍ ବେଲାଙ୍ଗ୍ ଅଣ୍ତ୍ ଆୟ୍ଲକ୍ନେ କାନୁଲ୍ତୁନ୍ ମାୟା ଏରି ସେୟଣ୍ତ୍।
ଆୟ୍ ଜଡେକ୍ଲକ୍ ନିଜେନ୍ ନିଜେନିଙ୍ଗ୍ ପକାପକି ଏନର୍ ଅଣ୍ତ୍ ଜିସୁ ମାଟଣ୍ଡ୍, ଆଦିଙ୍ଗ୍ ପାୟିଟ୍ ଅଣ୍ତ୍ ଆମ୍ଗୁଲୁଙ୍ଗ୍ ମାପ୍ରୁନେ ବାକିୟ ବୁଜାତାନ୍ବେଲ୍ ଆମ୍ଗୁଲ୍ନେ ଗର୍ବେ ପର୍ଜଲିତ୍ ଏରିନେ। ସାଙ୍ଗେ ସାଙ୍ଗେନ୍ ଆୟ୍ଲକ୍ ଜିରୁସାଲମ୍ତୁନ୍ ମାଣ୍ତି ୱାନର୍। ଆୟ୍ଲକ୍ ଏସେବେଲ୍ ଏଦେର୍, ଆସେବେଲ୍ ଆୟ୍ଲକ୍ ସିସୁତୁଲୁଙ୍ଗ୍ ପକେର୍ ଜିସୁ ଜିୱେ ମାୟାଣ୍ତ୍, ଆମ୍ଗୁଲ୍ ଅଣ୍ତୁଙ୍ଗ୍ ସୁଡି ମାୟାମ୍।
ସିସୁତୁଲ୍ ଏସେବେଲ୍ ପାର୍କିନର୍, ଜିସୁ ଆୟ୍ଲକ୍ ମାନଣ୍ତି ବାକ୍ରାନ୍ ଆୟ୍ଲକୁଙ୍ଗ୍ କାକେଲ୍ ତଟ୍ସି ଏନଣ୍ତ୍ ଆରେ ପକେଣ୍ତ୍ “ଇମ୍ଗୁଲୁଙ୍ଗ୍ ପର୍ତି ସାନ୍ତି ଏକା!” ସିସୁତୁଲ୍ ଏତାତର୍ ଜେ ଅଣ୍ତ୍ ଉକୁର୍ ବୁତ୍, ମାତର୍ ଜିସୁ ପକେଣ୍ତ୍ ଜେ ଇମ୍ଗୁଲ୍ ଏନାଦିଙ୍ଗ୍ ନାର୍ସିଦାର୍ ଆରେ ସନ୍ଦେହ କେଗିଦାର୍? ଆନ୍ କି ଆରେ କାଲ୍ଗିଲିଙ୍ଗ୍ ସୁଡୁର୍। ଆନୁଙ୍ଗ୍ ଏରେୱାଡିନ୍ ମେନ୍ ମାୟା ବୁତ୍ଗୁଲୁଙ୍ଗ୍ ଆୟ୍ୱାଡିନ୍ ମେନ୍ ମାନା। ଅଣ୍ତ୍ ଜେ ବୁତ୍ ଏରାଣ୍ତ୍ ଆଦ୍ ତଟୁକ୍ ପାୟିଟ୍, ଅଣ୍ତ୍ ତିନିଙ୍ଗ୍ ପାୟଟ୍ ପର୍ତଣ୍ତ୍। ଆୟ୍ଲକ୍ ଅଣ୍ତୁଙ୍ଗ୍ ୱାଣ୍ତଣ୍ତି ମିନିଲ୍ ସିନର୍,ଅଣ୍ତ୍ ଆଦିଙ୍ଗ୍ ତିୟଣ୍ତ୍।
ଜିସୁ ପକେଣ୍ତ୍ “ଆନ୍ ଇମ୍ଗୁଲୁଙ୍ଗ୍ ପକିମାଟନ୍ ଜେ ଆନ୍ ବିସୟ୍ରେନ୍ ମାପ୍ରୁନେ ବାକିୟନ୍ ଲେକାମାନଣ୍ତି ପାଟିନ୍ ବିସୟ୍ ସପଲ୍ କେଗିଙ୍ଗ୍ ଏଦା। ଆଦିଙ୍ଗ୍ କୁଣ୍ତେଲ୍ ଅଣ୍ତ୍ ଆୟ୍ଲକ୍ନେ ମନୁଙ୍ଗ୍ ବାଦ୍ଲାତଣ୍ତ୍ ଏଟେନ୍ କି ଆୟ୍ଲକ୍ ମାପ୍ରୁନେ ବାକିୟ ବୁଜ୍ଏରିଙ୍ଗ୍ ଅଡ୍ତାର୍। ଅଣ୍ତ୍ ପକେଣ୍ତ୍ ଆଗାଡିଟୁକ୍ ଲେକାମାୟା ଜେ କିସ୍ଟ ଦୁକ୍ ପାୟ୍ଏରି ସାଦାଣ୍ତ୍ ଆରେ ତିନ୍ଦିନ୍ କୁଣ୍ତେଲ୍ ସିଲ୍ତାଣ୍ତ୍।
ସାସ୍ତର୍ତୁନ୍ ଆରେମେନ୍ ଲେକାମାୟା ଜେ ପାଟିନ୍ଲକ୍ ପାପ୍ଟୁକ୍ କେମା ପାୟ୍ଏରିଙ୍ଗ୍ ପାୟିଟ୍ ଅନୁତାପ୍ କେଦାର୍ ଏରେଦ୍ କି ସିସୁତୁଲ୍ ପକି ୱେଣ୍ଡୁତାର୍। ଆୟ୍ଲକ୍ ଇଦିଙ୍ଗ୍ ଜିରୁସାଲମ୍ଟୁକ୍ ଆରାମ୍ କେୟି ପାଟିନ୍ ବାସେନ୍ ମାନଣ୍ତି ଲକ୍ ଦଲୁଙ୍ଗ୍ କାକେଲ୍ ସେୟାର୍। ଇମ୍ଗୁଲ୍ ଇ ପାଟିନ୍ ବିସୟ୍ରେନ୍ ସାକି ଏଦାର୍।
ଜିସୁ ସିସୁତୁଲ୍ନା ୪୦ ଦିନ୍ ଆରେକ୍ ମାଟଣ୍ଡ୍। ତରେକ୍, ଅଣ୍ତ୍ ଏକାତରେକିଙ୍ଗ୍ ୫୦୦ ଟୁକ୍ ପେଙ୍ଗୁର୍ତୁଲ୍ ଲକୁଙ୍ଗ୍ ତଟ୍ସି ଏନଣ୍ତ୍, ଅଣ୍ତ୍ ଜେ ଜିୱେ ମାୟାଣ୍ତ୍ ଇ ବିସୟ୍ରେନ୍ ଅଣ୍ତ୍ ପେଙ୍ଗିଟ୍ତର୍ ଅଣ୍ତୁନେ ସିସୁତୁଲୁଙ୍ଗ୍ ପେଲ୍ ତଟ୍ସି ଏନଣ୍ତ୍, ଆରେ ଅଣ୍ତ୍ ମାପ୍ରୁନେ ରାଜି ବିସୟରେନ୍ ସିକିୟା ସିନଣ୍ତ୍।
ଜିସୁ ଅଣ୍ତୁନେ ସିସୁତୁଲୁଙ୍ଗ୍ ପକେଣ୍ତ୍ “ସର୍ଗ୍ ଆରେ ପୁର୍ତିଟେ ପାଟିନ୍ ଅଦିକାର୍ ଆନୁଙ୍ଗ୍ ସି ଏରିମା। ଇଣ୍ତି ସେଣ୍ତୁର୍, ପାଟିନ୍ ଲକ୍ଗୁଲୁଙ୍ଗ୍ କାକେଲ୍ ସେଞ୍ଜି ପିତା, ପୁତ୍ର ଆରେ ପବିତ୍ର ଆତ୍ମାନେ ପିଦିର୍ନା ଆୟ୍ଲକୁଙ୍ଗ୍ ବାପ୍ତିସ୍ମ ସିୟୁର୍ ଆରେ ଆନ୍ ଇମ୍ଗୁଲୁଙ୍ଗ୍ ଏରେ ଏରେ ଆଦେସ୍ ସିମାନ୍ ଆଦ୍ ପାଟିନ୍ ପାଲନ୍ କେଗିଙ୍ଗ୍ ସିକିୟା ସି ସିସୁ କେୟୁର୍। ଏତାସିମାଣ୍ତୁର୍, ଆନ୍ ପାଟିନ୍ବେଲ୍ ଇମ୍ଗୁଲ୍ନା ସାଙ୍ଗେନ୍ ସାଙ୍ଗେନ୍ ମାୟାନ୍।”
ଜିସୁ ସାଦାନ୍ପେଲ୍ଟୁକ୍ ସିଲ୍ସି ୪୦ ଦିନ୍ କୁଣ୍ତେଲ୍, ଅଣ୍ତ୍ ଅଣ୍ତୁନେ ସିସୁତୁଲୁଙ୍ଗ୍ ପକେଣ୍ତ୍ ପବିତ୍ର ଆତ୍ମା ଇମ୍ଗୁଲୁଙ୍ଗ୍ ପେଲ୍ ୱାଦା ଆୟ୍ବେଲ୍ ଆନ୍ ଆବା ଇମ୍ଗୁଲୁଙ୍ଗ୍ ଏରେ ଆରେକ୍ ସକ୍ତି ସିୟାଣ୍ତ୍ ଆୟ୍ ଆରେକ୍ ଜିରୁସାଲାମ୍ତୁନ୍ ମାଣ୍ତୁର୍, ଆରେ ଜିସୁ ସର୍ଗେନ୍ ସେୟଣ୍ତ୍, ଆରେ କାଣ୍ତେକ୍ ମଗୁଲ୍ ଆୟ୍ ଲକୁନ୍ ପେଲ୍ଟୁକ୍ ଜିସୁଙ୍ଗ୍ ପାକୁତେ, ଜିସୁ ପାଟିନ୍ ବିସୟ୍ ତୁନ୍ ଅଦିକାର୍ ଏରିଙ୍ଗ୍ ପାଇଟ୍ ମାପ୍ରୁନ୍ ତିୟାନ୍ ପାକା ଉଣ୍ତେଣ୍ତ୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୨୮:୧୬-୨୦; ମାର୍କ ୧୬:୧୨-୨୦; ଲୁକ ୨୪:୧୩-୫୩; ଜଅନ୍ ୨୦:୧୯-୨୩; ପେରିତ୍ ୧:୧-୧୧
Free to use, adapt, and share under an open license (CC BY-SA 4.0).