41. ୪୧- ଜିସୁ ମରନ୍‌ଟୁକ୍ ଜିୱେଏରି ସିଲ୍‌ପଣ୍ଡି

ସନିୟତୁଲ୍ ଜିସୁଙ୍ଗ୍ କୁର୍‌ସନ୍ କଟ୍‌ଦାନ୍ କୁଣ୍ତେଲ୍, ଅବିସ୍‌ୱାସି ଜିଉଦି ନେତାତିଲ୍ ପିଲାତଙ୍ଗ୍ ପକେର୍ “ଆୟ୍ ମିତିୟାବାଦି ଜିସୁ ପକିମାଣ୍ତ୍ ଜେ ଅଣ୍ତ୍ ତିନ୍‌ଦିନ୍‌ କୁଣ୍ତେଲ୍ ସିଲ୍‌ତାଣ୍ତ୍। ଏଇର୍ ଉକୁର୍ ସାୟ୍‌କିଲ୍ ବାସେନ୍ କାକିଙ୍ଗ୍ ପାର୍‌ଦା ଆରେ ଜାଗ୍‌ରତା ମାନିଙ୍ଗ୍ ପାର୍‌ଦା ଏଟେନ୍ କି ସିସୁତୁଲ୍ ଅଣ୍ତୁନେ ସାୟଣ୍ତି ସେରିଙ୍ଗ୍ ଚରାସି ଉଇ ପକୁଙ୍ଗ୍ ମାନ୍‌କାର୍ ଜେ ଅଣ୍ତ୍ ସାଦାନ୍ ପେଲ୍‌ଟୁକ୍ ସିଲ୍‌ସି ମାୟାଣ୍ତ୍।”

ପିଲାତ ପକେଣ୍ତ୍ “ସନିୟତୁଲୁଙ୍ଗ୍ ଉଇ ଇମ୍‌ଗୁଲ୍ ଅଡ୍‌ତାନ୍‌ ଆରେକ୍ ସାୟ୍‌କିଲ୍ ବାସେଙ୍ଗ୍ ସୁରକିତ୍ କେୟୁର୍। ଆଦିଙ୍ଗ୍ ଆୟ୍‌ଲକ୍ ସାୟକିଲ୍ ବାସେ ପାୱ୍‌ତୁନ୍ କାଣ୍ତିଙ୍ଗ୍ ଡାବାତର୍ ଆରେ ଆମାନ୍ ସନିୟତୁଲୁଙ୍ଗ୍ କାପୁତର୍ ଏଟେନ୍ କି ଅଣ୍ତୁନେ ମେନିଙ୍ଗ୍ ଚରାସି ଉଗୁଙ୍ଗ୍ ଅଡାର୍।

ଜିସୁଙ୍ଗ୍ ସାୟକିଲ୍‌ତିନ୍ ପେନ୍ଦୁପଣ୍ତି ଆରେକୁଟ୍ ସିରିସ୍ ବିସ୍‌ରାମ୍‌ବାର୍ ମାଟେ, ଆରେ ଆୟ୍ ସିରିସ୍ ସାୟ୍‌କିଲ୍‌ତିନ୍ ସେନିଙ୍ଗ୍ ପାୟିଟ୍ ଜିଉଦିଲକୁଙ୍ଗ୍ ଅନୁମତି ମାନୁଟେ। ଆଦିଙ୍ଗ୍, ବିସ୍‌ରାମ୍‌ବାର୍ ଆରେକୁଟ୍ ସିରିସ୍ ଆଡ୍‌ତଲି ଏଙ୍ଗିଟ୍ ଆସ୍‌ମାସ୍‌କିଲ୍ ଜିସୁନେ ମେନ୍‌ତିନ୍ ବାସ୍‌ନା ନେୟ୍ ମାରୁକୁଙ୍ଗ୍ ପାୟିଟ୍ ସାୟ୍‌ତିନ୍ ସେଣ୍ତେୱ୍।

ଅଟାତ୍ ଉକୁଟ୍ ବେର୍‌ଟେ ଭୁମିକମ୍ପ ଏନେ। ଜିଟ୍‌କି ୱିଣ୍ତ୍ ୱାଡିନ୍ ପାନ୍ଦେଟେ ଆରେ ଉକୁଟ୍ ସରଗ୍‌ଟୁକ୍ ତଟ୍‌ସି ଏନେ। ସାୟକିଲ୍‌ଟେ ପାୱ୍‌ତୁନ୍ ଡାବାପଣ୍ତି କାଣ୍ତିଙ୍ଗ୍ ପୁସ୍‌କି ଅଣ୍ତ୍ ଆମାନ୍ ଉଣ୍ଡେଣ୍ତ୍। ଏରେ ସନିୟତୁଲ୍ ସାୟକିଲ୍ ବାସେନ୍ କାକିଙ୍ଗ୍ ନର୍ ଆୟ୍‌ଲକ୍ ନାର୍‌ସିସେୟର୍ ଆରେ ସାଦାନ୍ ଲକୁଙ୍ଗ୍ ୱାଡିନ୍ ବାସେନ୍ ଇଲେର୍।

ଏସେବେଲ୍ ଆସ୍‌ମାସ୍‌କିଲ୍ ସାୟକିଲ୍‌ତିନ୍ ଏଦେଟେୱ୍, ଦୁତ୍ ଆୟ୍‌ଲକୁଙ୍ଗ୍ ପକେଟେ ନାରିସ୍‌ମେର୍। ଜିସୁ ଇମାନ୍ ମାନାଣ୍ତ୍। ଅଣ୍ତ୍ ଏଟେନ୍ ପକିମାଟଣ୍ଡ୍‌, ଆୟ୍‌ୱାଡିନ୍ ସାଦାନ୍ ଲକୁଙ୍ଗ୍ ପେଲ୍‌ଟୁକ୍ ଜିୱେ ଏରି ମାୟାଣ୍ତ୍,ୱାରୁର୍ ଆରେ ସାୟିନିଙ୍ଗ୍ ସୁଡୁର୍। ଏରେ ବାସେନ୍ ଜିସୁନେ ମେନିଙ୍ଗ୍ ଇରିମାଟର୍, ଆସ୍‌ମାସ୍‌କିଲ୍ ସାୟିନ୍‌ ତାନିର୍ ସେଞ୍ଜି ସୁଡେଟେୱ। ଅଣ୍ତୁନେ ମେନ୍ ଆମାନ୍ ମାନୁଟେ।

ଆଦିଙ୍ଗ୍ କୁଣ୍ତେଲ୍ ସରଗ୍‌ଦୁତ ଆୟ୍ ଆସ୍‌ମାସ୍‌କିଲିଙ୍ଗ୍ ପକେଟେ ସେଞ୍ଜି ସିସୁତୁଲୁଙ୍ଗ୍ ପକୁର୍,ଜିସୁ ଜିୱେଏରି ସିଲ୍‌ତଣ୍ତ୍ ଆରେ ଇମ୍‌ଗୁଲ୍‌ନେ ଆଗାଡ଼଼ି ଗାଲିଲିନ୍ ସେୟାଣ୍ତ୍।

ଆୟ୍ ଆସ୍‌ମାସ୍‌କିଲ୍ ପେରିନ୍ ନାର୍‌ସେଟେୱ୍ ଆରେ ପେରିନ୍ କିର୍‌ଦେ ଏନେୱ୍। ସିସୁତୁଲୁଙ୍ଗ୍ ନିୟାଟେ କାବୁର୍ ୱେଣ୍ତୁକୁଙ୍ଗ୍ ପାୟିଟ୍ ଆୱ୍‌ଗୁଲ୍ ୱେଟେଟେୱ୍।

ଏସେବେଲ୍ ଆୟ୍ ନିୟାଟେ କାବୁର୍ ୱେଣ୍ତୁକୁଙ୍ଗ୍ ପାୟିଟ୍ ଆଗୁଲ୍ ରାସ୍‌ତାନ୍ ମାଟେୱ୍, ଜିସୁ ଆୱ୍‌ଗୁଲୁଙ୍ଗ୍ ତଟ୍‌ସି ଏନଣ୍ତ୍ ଆରେ ଆୱ୍‌ଗୁଲ୍ ଅଣ୍ତୁଙ୍ଗ୍ ଜୁୟାର୍ କେନେୱ୍। ଜିସୁ ପକେଣ୍ତ୍ ନାରିସ୍‌ମେର୍। ସେଣ୍ତୁର୍ ଆରେ ଗାଲିଲିନ୍ ସେନିଙ୍ଗ୍ ପାୟିଟ୍ ଆନେ ସିସୁତୁଲୁଙ୍ଗ୍ ପକୁର୍। ଆମାନ୍ ଆୟ୍‌ଲକ୍ ଆନୁଙ୍ଗ୍ ସୁଡ୍‌ଦାର୍।