40. ୪୦- ଜିସୁ କୁରୁସ୍ କାଟ୍ତିନ୍ କଟିଏନଣ୍ତ୍
ସନିୟତୁଲ୍ ଜିସୁଙ୍ଗ୍ ଲାଜ୍ କେନର୍, ଆୟ୍ଲକ୍ କୁର୍ସନ୍ କଟୁଙ୍ଗ୍ ପାୟିଟ୍ ଅଣ୍ତୁଙ୍ଗ୍ ଉନର୍। ଅଣ୍ତ୍ ଏରେ କୁର୍ସନ୍ ସାଦାଣ୍ତ୍ ଆୟ୍ କୁର୍ସନ୍ ଅଣ୍ତୁଙ୍ଗ୍ କାଞ୍ଜୁତର୍।
ସନିୟତୁଲ୍ “କାପାଲ୍ ପିଦିର୍ଟେ” ଉକୁଟ୍ ବାସେନ୍ ଇନ୍ଦ୍ରେର୍ ଆରେ କୁର୍ସନ୍ ଅଣ୍ତୁନେ କିଲ୍ଗିଲିଙ୍ଗ୍ ଆରେ କାଲ୍ଗିଲିଙ୍ଗ୍ କୁଟିଲ୍ କଟେର୍। ମାତର୍ ଜିସୁ ପକେଣ୍ତ୍ “ଆବା, ଆୟ୍ଲକୁଙ୍ଗ୍ କେମା କେ, ଆୟ୍ଲକ୍ ଏନା କେଗିଦାର୍ ଆଦ୍ ପୁନାର୍। ଜିଉଦିତିଲ୍ନେ ରାଜା ଲେକାସି କେରିନ୍ ଜିସୁନେ ତାଲ୍ ପୟ୍ତାନ୍ ଉଟୁକୁଙ୍ଗ୍ ପିଲାତ ଆୟ୍ଲକୁଙ୍ଗ୍ ପକେଣ୍ତ୍।
ସନିୟତୁଲ୍ ଜିସୁନେ ବସ୍ତରୁଙ୍ଗ୍ କୁଡ୍କୁଡି କେନର୍। ଆୟ୍ଲକ୍ ଏସେବେଲ୍ ଆଦ୍ କେନର୍, ପକିମାନଣ୍ତି ଭାବବାଣି ସପଲ୍ ଏନେ ଆୟ୍ଲକ୍ ଆନେ ବସ୍ତରୁଙ୍ଗ୍ ବାଗ୍ କେନର୍ ଆରେ ବସ୍ତରୁଙ୍ଗ୍ କୁଡ୍କୁଡି କେନର୍।
ଜିସୁଙ୍ଗ୍ ଜଡେକ୍ ଲକୁନ୍ ନେଣ୍ତିନ୍ କୁର୍ସନ୍ ଗାଡାତର୍। ଆୟ୍ଲକୁଙ୍ଗ୍ ପେଲ୍ଟୁକ୍ ଉକୁର୍ ଜିସୁଙ୍ଗ୍ ଲାଜ୍ କେନଣ୍ତ୍, ମାତର୍ ଆରେକୁର୍ ପକେଣ୍ତ୍ “ଇନୁଙ୍ଗ୍ ଏନା ମାପ୍ରୁଙ୍ଗ୍ ପର୍ତି ନାର୍ମାନା? ଆମ୍ଗୁଲ୍ ଦସି, ମାତର୍ ଇୟଣ୍ତ୍ ନିର୍ଦସି। ଆଦିଙ୍ଗ୍ କୁଣ୍ତେଲ୍ ଅଣ୍ତ୍ ଜିସୁଙ୍ଗ୍ ପକେଣ୍ତ୍ ଦୟା କେୟି ଆନୁଙ୍ଗ୍ ଇନେ ରାଜିନ୍ ଏତାପୁଟ୍। ଜିସୁ ଅଣ୍ତୁଙ୍ଗ୍ ପକେଣ୍ତ୍ “ଇନ୍ ଇନେନ୍ ଆନ୍ ନାଟ୍ ପାରଦୀଶତିନ୍ ସେୟ୍ଦାଟ୍।”
ଜିଉଦି ନେତାତିଲ୍ ଆରେ ଲକୁଙ୍ଗ୍ ପେଲ୍ଟୁକ୍ ପେଙ୍ଗୁର୍ତୁଲ୍ ଜିସୁଙ୍ଗ୍ ଲାଜ୍ କେନର୍। ଆୟ୍ଲକ୍ ଅଣ୍ତୁଙ୍ଗ୍ ପକେର୍ “ଜଦି ଇନ୍ ମାପ୍ରୁନେ ସେପାଲ୍, ଆଟେଲ୍ କୁର୍ସଟୁକ୍ ଇଡ୍ଗି ୱା ଆରେ ନିଜେନିଙ୍ଗ୍ ରକିୟା କେ। ଆଟେଲ୍ ଆମ୍ଗୁଲ୍ ଇନୁଙ୍ଗ୍ ବିସ୍ୱାସ୍ କେଦାମ୍।
ଆଦିଙ୍ଗ୍ କୁଣ୍ତେଲ୍ ପାଟିନ୍ ଦିଗାଲ୍ଟେ ମାନଣ୍ତି ଆକାସ୍ ପୁରାପୁରି ସିକାଟ୍ ଏରିସେଣ୍ତେ, ଆୟ୍ବେଲ୍ ପାକ୍ଟାଲ୍ ବେଲା ଏରିମାଟେ, ଆୟ୍ ପାକ୍ଟାଲ୍ବେଲ୍ ସିକାଟ୍ ଏରିସେଣ୍ତେ ମାତର୍ ତିନ୍ଗଟ୍ ଆରେକ୍ ସିକାଟ୍ ଏନେ।
ଆମାଟୁକ୍ ଜିସୁ ପେରିନ୍ ଆୱ୍ଲି ଏରିପକେଣ୍ତ୍, “ପଲିସେଣ୍ତେ! ଆବା, ଇନ୍ କିତିନ୍ ଆନେ ଆତ୍ମା ସର୍ପାକିଦାନ୍, ଆମାଟୁକ୍ ଅଣ୍ତ୍ ତାଲ୍ ମୁରୁଗ୍ତଣ୍ତ୍ ଆରେ ସାନଣ୍ତ୍, ଏରେବେଲ୍ ଅଣ୍ତ୍ ସାନଣ୍ତ୍, ଆୟ୍ବେଲ୍ ବାସେ ମେଲ୍ଗି ସେଣ୍ତେ ଆରେ ମନ୍ଦିର୍ଟେ ଏରେ ବେର୍ଟେ ପାର୍ଦା ମାପ୍ରୁନ୍ ପେଲ୍ଟୁକ୍ ଲକ୍ଗୁଲୁଙ୍ଗ୍ ୱେନେଲ୍ କେଇ ଇରିନେ ଆଦ୍ ପୟିତାଟୁକ୍ ମୁତୁଲ୍ ଆରେକ୍ ସାରି ଦୁୟ୍ ବାଗ୍ ଏରି ସେଣ୍ତେ।
ଜିସୁ ଅଣ୍ତୁନେ ସାୟଣ୍ତିନାଟ୍ ଲକ୍ଗୁଲୁଙ୍ଗ୍ ମାପ୍ରୁନ୍ କାକେଲ୍ ସେନିଙ୍ଗ୍ ପାଇଟ୍ ପାୱ୍ ତଟ୍ସି ସିନଣ୍ତ୍, ଜିସୁଙ୍ଗ୍ କାତାନ୍ ସନିୟ ଏରେବେଲ୍ ଇ ପାଟିନ୍ ଗଟ୍ଏରଣ୍ତିଙ୍ଗ୍ ସୁଡେର୍ ଆୟ୍ଲକ୍ ପକେର୍, ନିସୟ୍ ଅଣ୍ତ୍ ନିର୍ଦସ୍ ଟଣ୍ତ୍ ମାଟଣ୍ତ୍ ଅଣ୍ତ୍ ମାପ୍ରୁନେ ସେପାଲ୍ ମାଟଣ୍ତ୍।
ଆମାଟୁକ୍ ଜସେପ୍ ଆରେ ନିକଦିମ୍, ଜିସୁଙ୍ଗ୍ ବିସ୍ବାସ୍ କେଦାନ୍ ଇରୁଲୁଙ୍ଗ୍ ଜିଉଦି ନେତା ଜିସୁନେ ମେନିଙ୍ଗ୍ ଉଗୁଙ୍ଗ୍ ପାଇଟ୍ ପିଲାତିଙ୍ଗ୍ ଅନୁରଦ୍ କେନର୍, ଆୟ୍ଲକ୍ ଉକୁଟ୍ ବସ୍ତର୍ ଅଣ୍ତୁନେ ମେନ୍ତିନ୍ ଡାବାସି କାଣ୍ତିଙ୍ଗ୍ ବେଦାସି ତିୟାର୍ କେୟଣ୍ତି ଉକୁଟ୍ ସାୟ୍ତିନ୍ ଇରେର୍ ଆମାଟୁକ୍ ଆୟ୍ଲକ୍ ସାଇନ୍ ମୁଆଟ୍ତିନ୍ ଉକୁଟ୍ ବେର୍ଟେ କାଣ୍ତ୍ ଡାବାସି ସିନର୍ ଆରେ ଡେୱାଙ୍ଗ୍ ସୁଟାସିନର୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୨୨:୨୭-୬୧; ମାର୍କ ୧୫:୧୬-୪୭; ଲୁକ ୨୩:୨୬-୫୬; ଜଅନ୍ ୧୯:୧୭-୪୨
Free to use, adapt, and share under an open license (CC BY-SA 4.0).