39. ୩୯- ଜିସୁନେ ବିସାର୍ କେୟଣ୍ଡି
ଆଟେଲ୍ ନେଣ୍ଡ୍ଗାପ୍ ଏରିମାଟେ। ବେର୍ଜାଜକ୍ ଏରେୱାଡିନ୍ ଜିସୁଙ୍ଗ୍ ପରସ୍ନ ପାସାର୍ତାଣ୍ତ୍ ଆଦିଙ୍ଗ୍ ପାୟିଟ୍ ସନିୟ୍ତୁଲ୍ ଅଣ୍ତୁଙ୍ଗ୍ ବେର୍ଜାଜକ୍ନେ ଉଲେନ୍ ଉନର୍। ପିତର୍ ଦୁରିନ୍ ମାଞ୍ଜି ଆୟ୍ଲକ୍ନେ କୁଣ୍ତୁନ୍ କୁଣ୍ତୁନ୍ ସେନିନଣ୍ତ୍। ଜିସୁଙ୍ଗ୍ ଏସେବେଲ୍ ଆୟ୍ ଉଲେନ୍ ପିତର୍ ୱାଲ୍ତିନ୍ ମାଞ୍ଜି କିସ୍ ଆଇଙ୍ଗ୍ନଣ୍ତ୍।
ଉଲେ ତାନିର୍, ଜିଉଦି ନେତାତିଲ୍ ଜିସୁନେ ବିଚାର୍ କେନର୍। ଆୟ୍ଲକ୍ ପେଙ୍ଗୁତୁଲ୍ ମିସ୍ପକ୍ଦାନ୍ ଲକୁଙ୍ଗ୍ ମିସାତର୍ ଏରେ ଲକ୍ କି ମିସ୍ ପକ୍ଦାର୍, ମାତର୍ ଆୟ୍ଲକ୍ନେ ପାଟେ ପାଟିନ୍ ଅଣ୍ତୁଙ୍ଗ୍ ପେଲ୍ ମିସ୍ଏରା ମାନ୍ନେ, ଆଦିଙ୍ଗ୍ ଜିଉଦି ନେତାକିଲ୍ ପାର୍ମାନ୍ କେଗିଙ୍ଗ୍ ଅଡୁଟର୍, ଅଣ୍ତ୍ ଏନାମେନ୍ ବୁଲ୍ କେୟାଣ୍ତ୍, ଜିସୁ ଏନାଦ୍ ମେନ୍ ପକୁଟଣ୍ତ୍।
ଆମାଟୁକ୍ ବେର୍ଜାଜକ୍ ଜିସୁଙ୍ଗ୍ ପେଲ୍ ସିଦାସୁଡି ଅଣ୍ତୁଙ୍ଗ୍ ପକେଣ୍ତ୍, “ଆମୁଙ୍ଗ୍ ପକ୍ ଇନ୍ ଏନା ଜିୱେଟେ ମାପ୍ରୁନ୍ ସେପାଲ୍ କିସ୍ଟ?”
ଜିସୁ ପକେଣ୍ତ୍ “ଆନ୍ ଅଣ୍ତି, ଆରେ ଇମ୍ଗୁଲ୍ ଆନୁଙ୍ଗ୍ ମାପ୍ରୁନ୍ ସିଙ୍ଗାସାନ୍ତିନ୍ ଉଣ୍ତଣ୍ତିଙ୍ଗ୍ ଆରେ ସର୍ଗେଟୁକ୍ ଇଡ୍ଗି ୱାରଣ୍ତିଙ୍ଗ୍ ସୁଡ୍ଦାର୍, ବେର୍ଜାଜକ୍ ରିସାଏରି ନିଜେଟେ ସକା ଆକ୍ସି ୱେନ୍ ଦରମ୍ଟେ ନେତାକିଲିଙ୍ଗ୍ ଆୱ୍ଲି ଏରି ପକେଣ୍ତ୍, “ଆମ୍ଗୁଲୁଙ୍ଗ୍ ଆରେ ସାକି ଦର୍କାର୍ ମାନା, ଇମ୍ଗୁଲ୍ ୱେଟର୍ ଅଣ୍ତ୍ ମାପ୍ରୁନେ ସେପାଲ୍ ଏଞ୍ଜି ପକିମାଣ୍ତ୍, ଇମ୍ଗୁଲ୍ନେ ବିସାର୍ ଏନାଦ୍?”
ଜିଉଦି ନେତାକିଲ୍ ବେର୍ଜାଜକୁଙ୍ଗ୍ ଉତର୍ ସିନର୍, ଅଣ୍ତ୍ ସାଗିଙ୍ଗ୍ ଦର୍କାର୍, ଆମାଟୁକ୍ ଆୟ୍ଲକ୍ ଜିସୁନେ କାନୁଲ୍ତୁନ୍ ଗେର୍ଲ କାଟେର୍, ଆରେ ଅଣ୍ତୁଙ୍ଗ୍ ଆଟେର୍ ଅଣ୍ତୁନ୍ ପୟିତାନ୍ ନେଉଡ୍ ଉସେର୍ ଆରେ ଅଣ୍ତୁଙ୍ଗ୍ ନାଗେର୍।
ପିତର୍ ଉଲେ ଡେୱାନ୍ କାତାନ୍ ବେଲ୍, ଉକୁଟ୍ ମାଲ୍ ଅଣ୍ତୁଙ୍ଗ୍ ସୁଡେଟେ, ଆରେ ପକେଟେ ଇନ୍ମେନ୍ ଜିସୁନାଟ୍ ମାଟଟ୍, ପିତର୍ ଇ ପାଟେଙ୍ଗ୍ ଅସିକାର୍ କେନଣ୍ତ୍, ଆୟ୍ୱାଡିନ୍ ଆରେକୁଟ୍ ମାଲ୍ମେନ୍ ପକେଟେ, ମାତର୍ ପିତର୍ ଆଟେଲ୍ମେନ୍ ଅସିକାର୍ କେନଣ୍ତ୍, ଆମାଟୁକ୍ ଲକ୍ଗୁଲ୍ ପକେର୍ ଆମ୍ ପୁୟାମ୍ ଇନ୍ମେନ୍ ଜିସୁନାଟ୍ ମାଟଟ୍ ମାତର୍ ଇନ୍ ନାର୍ସି ଗାଲିଲିନ୍ ୱାନଟ୍।
ଆଦିଙ୍ଗ୍ କୁଣ୍ତେଲ୍ ପିତର୍ ପାର୍ମାନ୍ କେନଣ୍ତ୍, ପକେଣ୍ତ୍ ମାପ୍ରୁ ଆନୁଙ୍ଗ୍ ଅବିସାପ୍ ଇନ୍ଦେ ଜଦି ଇ ଲକୁଙ୍ଗ୍ ପୁଞ୍ଜିସେୟ୍ଦାନ୍। ସାଙ୍ଗେନ୍ ସାଙ୍ଗେନ୍ ଉକୁଟ୍ କର୍ କିୟେଟେ, ଆରେ ଜିସୁ ପିତରୁଙ୍ଗ୍ ମାଣ୍ତି ସୁଡେଣ୍ତ୍।
ପିତର୍ ପେସିସେୟଣ୍ତ୍ ଆରେ ପେରିନ୍ ଆଉଲିଏରି ଆଡେଣ୍ତ୍। ଇମାନ୍, ଅବିସ୍ୱାସ୍ କେୟାକ୍ ଜିଉଦି ସୁଡେଣ୍ତ୍ ଜେ ଜିଉଦି ନେତାତିଲ୍ ଜିସୁଙ୍ଗ୍ ସାଦାନ୍ ପାୟିଟ୍ ଦସି କେଗିଦାର୍। ଜିଉଦା ପେରିନ୍ ଦୁକ୍ କେନଣ୍ତ୍ ଆରେ ପେସିସେଞ୍ଜି ନିଜେନିଙ୍ଗ୍ ଉସ୍କା ଏନଣ୍ତ୍।
ଆରେକୁଟ୍ ଆଡ୍ତଲ୍, ଜିଉଦି ନେତାତିଲ୍ ଜିସୁଙ୍ଗ୍ ପିଲାତଙ୍ଗ୍ କାକେଲ୍ ଇନ୍ଦ୍ରେର୍ ଅଣ୍ତ୍ ରମିୟ ସାସକ୍ ମାଟଣ୍ଡ୍। ଆୟ୍ଲକ୍ ଆସା କେନର୍ ଜେ ପିଲାତ ଜିସୁଙ୍ଗ୍ ଦସି କାଟି ସାଗିଙ୍ଗ୍ ପାୟିଟ୍ ବିସାର୍ କେଦାଣ୍ଡ୍। ଆଟେଲ୍ ପିଲାତ ଜିସୁଙ୍ଗ୍ ପାସାର୍ତଣ୍ତ୍ “ଇନ୍ ଏନା ଜିଉଦିତିଲ୍ନେ ରାଜା?”
ଜିସୁ ଉତର୍ ସିନଣ୍ତ୍ “ଇନ୍ ପକୁଦାଟ୍, ମାତର୍ ଆନେ ରାଜି ଇ ଜଗତ୍ ଏରା। ଜଦି ଇ ୱାଡିନ୍ ଏଗଡ୍, ଆନ୍ ଦାସଲକ୍ ଆନ୍ ପାୟିଟ୍ ଜୁଦ୍ କେନର୍ମେନ୍। ମାପ୍ରୁନେ ବିସୟ୍ରେନ୍ ସତ୍ ପାଟେ ପକୁଙ୍ଗ୍ ଆନ୍ ଇ ପୁର୍ତିନ୍ ୱାରିମାନ୍। ଏଇର୍ମେନ୍ ସତୁଙ୍ଗ୍ ଲାଡ୍ କେଦାର୍ ଆୟ୍ଲକ୍ ଆନ୍ ପାଟେ ୱେୟାର୍।” ପିଲାତ ପକେଣ୍ତ୍ “ସତ୍ ଏନାଦ୍?”
ପିଲାତ ଜିସୁନା ପାର୍କି ପଲ୍ଦାନ୍ କୁଣ୍ତେଲ୍ ମାନ୍ଦାଲକୁନ୍ କାକେଲ୍ ସେଞ୍ଜି ପକେଣ୍ତ୍, ଇୟଣ୍ତ୍ନ୍ପେଲ୍ ଆନ୍ ଏନାମେନ୍ ଦସ୍ ପାୟ୍ଏରାନ୍, ମାତର୍ ଜିଉଦିନେତାକିଲ୍ ଆରେ ରୁଣ୍ତ୍ଏଦାନ୍ ଲକ୍ ଆୱ୍ଲି ଏରି ପକେର୍ ଅଣ୍ତୁଙ୍ଗ୍ କୁର୍ସନ୍ ସସୁସି କୁଟିଲ୍ କଟୁର୍, ପିଲାତ ଉତର୍ ସିନଣ୍ତ୍ ଅଣ୍ତ୍ ଦସି ଏରାଣ୍ତ୍, ମାତର୍ ଆୟ୍ଲକ୍ ଅଦିକ୍ ଆୱ୍ଲି ଏରି ପକୁଙ୍ଗ୍ ଉଣ୍ତେର୍, ମାତର୍ ପିଲାତ ଆରେ ତରେକ୍ ପକେଣ୍ତ୍ ଅଣ୍ତ୍ ଦସି ଏରାଣ୍ତ୍।
ପିଲାତ ନାର୍ସି ସେଞ୍ଜିମାଟଣ୍ତ୍ ଏସେବେଲ୍ ଲକ୍ଗୁଲ୍ କିରମାର କେଦାର୍, ଆଦିଙ୍ଗ୍ ଜିସୁଙ୍ଗ୍ କୁରୁସ୍ କାଟ୍ତିନ୍ କଟୁଙ୍ଗ୍ ପାଇଟ୍ ଅଣ୍ତ୍ ଅଣ୍ତୁନେ ସନିୟ ତୁଲୁଙ୍ଗ୍ ଆଦେସ୍ ସିନଣ୍ତ୍, ରମିୟ ସନିୟତୁଲ୍ ଜିସୁଙ୍ଗ୍ କର୍ଡା ଆଟେର୍ ଆରେ ଉକୁଟ୍ ରାଜାନେ ବସ୍ତର୍ ଆରେ ତାଲ୍ତିନ୍ ସାପୁଲ୍ ମୁକୁଟ୍ ଜଗ୍ଡା ସି ସିନର୍, ଆମାଟୁକ୍ ଆୟ୍ଲକ୍ ଜିଉଦି ରାଜାଙ୍ଗ୍ ତଟ୍ତର୍, ଲାଜ୍କେନର୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୨୬:୫୭-୨୭; ମାର୍କ ୧୪: ୫୩-୧୫:୧୫; ଲୁକ ୨୨:୫୪-୨୩:୨୫; ଜଅନ୍ ୧୮:୧୨-୧୯:୧୬
Free to use, adapt, and share under an open license (CC BY-SA 4.0).