38. ୩୮- ଜିସୁଙ୍ଗ୍ ସତ୍ରୁତୁଲୁଙ୍ଗ୍ କିଇତିନ୍ ସର୍ପାପଣ୍ଡି
ପାଟିନ୍ ବର୍ସେନ୍ ଜିଉଦିତିଲ୍ ନିସ୍ତାର୍ ପାରୁବ୍ ପାଲନ୍ କେଗିନର୍। ଇଦ୍ ଏରିଦା ଆୟ୍ କିର୍ଦେଟେ ପାଲନ୍ ଏରେଦ୍ କି ପେଙ୍ଗିଟ୍ ବରସ୍ ଆଗାଡି ମାପ୍ରୁ ଏଟେନ୍ ଆୟ୍ଲକ୍ନେ ପୁର୍ବେଟେ ଦାଦିଆନି ଦାସ୍ ଅବସ୍ତା ଟୁକ୍ ଉଦାର୍ କେୟି ଇନ୍ଦ୍ରିମାଟଣ୍ତ୍। ଜିସୁ ସର୍ବସାଦାରନ୍ ବାବ୍ରେନ୍ ଆରେ ପର୍ସାର୍ ସିକିୟା କେୟଣ୍ତି ତିନ୍ ବରସ୍ କୁଣ୍ତେଲ୍ ଜିସୁ ଅଣ୍ତୁନେ ସିସୁତୁଲୁଙ୍ଗ୍ ପକେଣ୍ତ୍ ଜେ ଅଣ୍ତ୍ ଆୟ୍ଲକ୍ ନା ଜିରୁସାଲାମ୍ତିନ୍ ନିସ୍ତାର୍ ପାରୁବ୍ କେଗିଙ୍ଗ୍ ଇସା କେନଣ୍ତ୍, ଆରେ ଆମାନ୍ ଅଣ୍ତୁଙ୍ଗ୍ ୱାଟ୍ତେନ୍ ଆଟ୍ଦାର୍।
ଜିସୁନେ ସିସୁତୁଲୁଙ୍ଗ୍ ପେଲ୍ଟୁକ୍ ଜିଉଦା ପିଦିର୍ଟଣ୍ତ୍ ଉକୁର୍ ସିସୁ ମାଟଣ୍ତ୍। ଜିଉଦା ସିସୁତୁଲ୍ନେ ଡାବୁ ଆସାନାଟ୍ ମାଟଣ୍ତ୍ ମାତର୍ ଅଣ୍ତ୍ ଡାବୁଙ୍ଗ୍ ଲାଡ୍ କେନଣ୍ତ୍ ଆରେ ପେଙ୍ଗିଟ୍ ତର୍ ଆୟ୍ ମନାଟୁକ୍ ଡାବୁଲ୍ ସରାକିନଣ୍ତ୍। ଜିସୁ ଆରେ ଅଣ୍ତୁନେ ସିସୁତୁଲ୍ ଜିରୁସାଲାମ୍ତୁନ୍ ଏଦ୍ଦାନ୍ କୁଣ୍ତେଲ୍, ଜିଉଦା ଡାବୁଲ୍ ଉୟଣ୍ତି ବାଦୁଲ୍ନା ଜିସୁଙ୍ଗ୍ ସତ୍ରୁ କିତିନ୍ ପାତୁକୁଙ୍ଗ୍ ପାଇଟ୍ ଜିଉଦି ନେତାତିଲିଙ୍ଗ୍ କାକେଲ୍ ସେୟଣ୍ତ୍, ଅଣ୍ତ୍ ପୁଞ୍ଜି ମାଟଣ୍ତ୍ ଜେ ଜିସୁ ଉକୁର୍ କିସ୍ଟ, ଆଦିଙ୍ଗ୍ ଜିଉଦି ନେତାକିଲ୍ ବିସ୍ବାସ୍ କେୟାମାନର୍ ଆରେ ଆୟ୍ଲକ୍ ଜିସୁଙ୍ଗ୍ ଆଟିଙ୍ଗ୍ ପାଇଟ୍ ଜଜନା କେଗିନର୍।
ଜିଉଦି ନେତାକିଲ୍ ମୁକିୟା ଜାଜକ୍ନେ ଇସାନା ଜିସୁଙ୍ଗ୍ ସତ୍ରୁ କିତିନ୍ ସର୍ପାକିଙ୍ଗ୍ ପାଇଟ୍ ତିରିସ୍ ଗଟା ରୁପା ଡାବୁଲ୍ ସିନର୍, ବାବବାଦିକିଲ୍ ବାବବାନି କେଦାନ୍ ଅନୁସାର୍ନା ଇଦ୍ ଗଟ୍ଏନେ, ଜିଉଦା ଆମାନ୍ ରାଜିଏରି ଡାବୁଲ୍ ପାତି ସେୟଣ୍ତ୍, ଅଣ୍ତ୍ ଏଟେନ୍ ଜିସୁଙ୍ଗ୍ ପାତି ସତ୍ରୁ କିତିନ୍ ସର୍ପାତାଣ୍ତ୍ ଆଦିଙ୍ଗ୍ ପାଇଟ୍ ସୁଜଗ୍ କାଣ୍ତିକିନଣ୍ତ୍।
ଜିରୁସାଲାମ୍ତୁନ୍ ଜିସୁ ଅଣ୍ତୁନେ ସିସୁତୁଲ୍ନା ନିସ୍ତାର୍ ପାରୁବ୍ ପାଲନ୍ କେନର୍, ନିସ୍ତାର୍ ପାରୁବ୍ଟେ ବଜି ତିୟାନ୍ ବେଲ୍ ଜିସୁ ରୁଟି ପାତି ଆଦିଙ୍ଗ୍ ପୁନ୍ତଣ୍ତ୍, ଅଣ୍ତ୍ ପକେଣ୍ତ୍ ଇଦ୍ଉୟି ତିଣ୍ତୁର୍, ଇଦ୍ ଆନେ ମେନ୍ ଏରେଦ୍ ଇମ୍ପାଇଟ୍ ସି ଏରିମା, ଆନୁଙ୍ଗ୍ ଏତାକିଙ୍ଗ୍ ପାଇର୍ ଇପାଡ୍ କେୟୁର୍, ଇ ୱାଡିନ୍ ଜିସୁ ପକେଣ୍ତ୍, ଆୟ୍ଲକୁଙ୍ଗ୍ ପାଇଟ୍ ଅଣ୍ତୁନେ ମେନ୍ ବଲିଏନେ।
ଆମାଟୁକ୍ ଜିସୁ ଉକୁଟ୍ ଗିନାନ୍ ଅଙ୍ଗୁର୍ ରସ୍ ପାତି ପକେଣ୍ତ୍, ଇଦିଙ୍ଗ୍ ଉଣ୍ତୁର୍, ଇଦ୍ ଆନେ ପୁନ୍ନିୟମ୍ଟେ ନେତିର୍ ପାପ୍ କେମାପାଇଟ୍ ସର୍ସି ଏରିମା ଇମ୍ ପାଟିନ୍ ତର୍ ଇଦ୍ ଉଣ୍ତାନ୍ ବେଲ୍ ଆନୁଙ୍ଗ୍ ଏତାପୁର୍।
ଆଦିନ୍ କୁଣ୍ତେଲ୍ ଜିସୁ ଅଣ୍ତୁନେ ସିସୁ ତୁଲୁଙ୍ଗ୍ ପକେଣ୍ତ୍, ଇମ୍ଗୁଲୁଙ୍ଗ୍ ପେଲ୍ଟୁକ୍ ଉକୁର୍ ଆନୁଙ୍ଗ୍ ପାତୁସି ସିଦାଣ୍ତ୍, ସିସୁତୁଲ୍ କାବାଏରି ସେୟର୍ ଆରେ ଇ ୱାଡ଼଼ିଟେ କାମେ ଏଇର୍ କେଦାର୍ ଏଞ୍ଜି ପାସାର୍ତର୍, ଜିସୁ ପକେଣ୍ତ୍ ଜିସୁ ଆନ୍ ଏୟିରୁଙ୍ଗ୍ ଇ ରୁଟି ମୁକା ସିଦାନ୍ ଅଣ୍ତ୍ ଆନୁଙ୍ଗ୍ ପାତୁସି ସିଦାଣ୍ତ୍, ଆମାଟୁକ୍ ଆୟ୍ ମୁକା ରୁଟି ଜିଉଦାଙ୍ଗ୍ ସିନଣ୍ତ୍।
ଜିଉଦା ଆୟ୍ ରୁଟି ମୁକା ଉଦାନ୍ କୁଣ୍ତେଲ୍ ସୟ୍ତାନ୍ ଅଣ୍ତୁନ୍ ପେଲ୍ ନାନେଟେ, ଜିଉଦା ଆୟ୍ ବାସେଟୁକ୍ ପେସିସେଞ୍ଜି ଜିସୁଙ୍ଗ୍ ପାତୁସି ସିଗିଙ୍ଗ୍ ପାଇଟ୍ ଜିଉଦି ନେତାକିଲିଙ୍ଗ୍ ସାୟ୍ଜ କେଗିଙ୍ଗ୍ ପାଇଟ୍ ଆୟ୍ଲକୁନ୍ ପେଲ୍ ସେୟଣ୍ତ୍, ଆୟ୍ବେଲ୍ ନାର୍କାମ୍ ଏରିମାଟେ।
ତିଞ୍ଜି ପଲ୍ଦାନ୍ କୁଣ୍ତେଲ୍ ଜିସୁ ଆରେ ଅଣ୍ତୁନେ ସିସୁତୁଲ୍ ଜିତ୍ କପେଲ୍ ସେୟର୍, ଜିସୁ ପକେଣ୍ତ୍ “ଇମ୍ପାଟିନ୍ ଆନୁଙ୍ଗ୍ ସାକାରି ସିଦାର୍, ଲେକାମୟା ଆମ୍ ମେଣ୍ତା ପାପୁଙ୍ଗ୍ କର୍ଡା ଆଟ୍ଦାମ୍ ଆରେ ପାଟିନ୍ ମେଣ୍ତାଲିଙ୍ଗ୍ ସିନ୍ବିନ୍ କେଦାମ୍।”
ପିତର୍ ଉତର୍ ସିନଣ୍ତ୍, “ଜଦି ପାଟିନ୍ ଲକ୍ ସାକାର୍ଦାର୍, ମାତର୍ ଆନ୍ ସାକାରାନ୍ ଆଟେଲ୍ ଜିସୁ ପିତରୁଙ୍ଗ୍ ପକେଣ୍ତ୍, “ସୟ୍ତାନ୍ ଇମ୍ ପାଟିନ୍ ଲକୁନ୍ ପେଲ୍ ମାନିଙ୍ଗ୍ ଇସା କେଗିଦା, ମାତର୍ ପିତର୍ ଇନେ ବିସ୍ବାସ୍ ଏରେୱାଡିନ୍ ଦୁର୍ବଲ୍ ଏରିଙ୍ଗ୍ ମାନାପାଇଟ୍ ଆନ୍ ବିନତି କେଗିଦାନ୍, ଇୱାଡିନ୍ ଇନେନ୍ ନାର୍କାମ୍ କର୍ଗୁନେଲ୍ କର୍କୁୟ୍ଦାନ୍ ଆଗାଡି ଇନ୍ ଆନୁଙ୍ଗ୍ ତିନ୍ତର୍ ପୁନାନ୍ ଏଞ୍ଜି ପକ୍ଦାଟ୍।”
୦ ଆମାଟୁକ୍ ପିତର୍ ଜିସୁଙ୍ଗ୍ ପକେଣ୍ତ୍, “ଜଦି ଆନୁଙ୍ଗ୍ ସାଗିଙ୍ଗ୍ ଏଦା, ଏନ୍ଗଡ୍ମେନ୍ ଆନ୍ ଏସେଲ୍ ଇନୁଙ୍ଗ୍ ପୁନାନ୍ ଏଞ୍ଜି ପକାନ୍, ପାଟିନ୍ ସିସୁତୁଲ୍ ମେନ୍ ଆୟ୍ୱାଡିନ୍ ପକେର୍।
ଆମାଟୁକ୍ ଜିସୁ ଆରେ ଅଣ୍ତୁନେ ସିସୁତୁଲ୍ନା ଗେତ୍ସିମନ୍ ପିଦିର୍ଟେ ବାସେନ୍ ସେୟର୍, ସିସୁତୁଲ୍ ଏଟେନ୍ ପରିକିୟାନ୍ ଇଲିଙ୍ଗ୍ ମାନା ପାଇଟ୍ ଆଦିଙ୍ଗ୍ ପାଇଟ୍ ଜିସୁ ଅଣ୍ତୁନେ ସିସୁତୁଲୁଙ୍ଗ୍ ପାର୍ତନା କେଗିଙ୍ଗ୍ ପକେଣ୍ତ୍, ଆମାଟୁକ୍ ଜିସୁ ନିଜେନ୍ ପାର୍ତନା କେଗିଙ୍ଗ୍ ଉଣ୍ତେଣ୍ତ୍।
ଜିସୁ ତିନ୍ତର୍ ପାର୍ତନା କେନଣ୍ତ୍ ଆନ୍ ଆବା ଜଦି ଇସା କେଦାଣ୍ତ୍, ଆଟେକଡ୍ ଇ କସଟ୍ଟୁକ୍ ଆରେ ଦୁକ୍ଟୁକ୍ ଆନ୍ ପେଲ୍ଟୁକ୍ ଦୁର୍ କେଦାଣ୍ତ୍, ଜଦି ଲକ୍ପେଲ୍ଟୁ ପାପ୍କେମା କେଦାନ୍ ପେଲ୍ଟୁକ୍ ଆରେ ଉପାୟ୍ ମାନା, ଆଟେକଡ୍ ଇନେ ଇସା ସପଲ୍ ଏକା, ଜିସୁ ପେରିନ୍ ଦୁକ୍ଏରି ନିରାସ୍ ଏନଣ୍ତ୍, ଆରେ ଅଣ୍ତୁନ୍ ପେଲ୍ଟୁକ୍ ଉରୁସ୍କୁର୍ନା ନେତିର୍ ପେସିସେଣ୍ତେ, ମାପ୍ରୁ ଅଣ୍ତୁଙ୍ଗ୍ ଦରଜ୍ ପାତିଙ୍ଗ୍ ପାଇଟ୍ ଉକୁଟ୍ ଦୁତୁଙ୍ଗ୍ ଅଣ୍ତୁନ୍ କାକେଲ୍ ସୟ୍ତଣ୍ତ୍।
ପାଟିନ୍ବେଲ୍ ପାର୍ତନା କେଇପଲ୍ଦାନ୍ କୁଣ୍ତେଲ୍, ଜିସୁ ଅଣ୍ତୁନେ ସିସୁତୁଲୁନ୍ ପେଲ୍ ୱାନଣ୍ତ୍, ମାତର୍ ଆୟ୍ଲକ୍ କୁର୍କାଲ୍ତିନ୍ ଅଡିମାଟର୍, ଆରେ ଅଣ୍ତ୍ ତୁର୍ତିୟ ତର୍ ୱାନଣ୍ତ୍, ଜିସୁ ପକେଣ୍ତ୍ “ସିଲ୍ପୁର୍ ଆନେ ପାତୁସିୟାକ୍ ଇମାନ୍ ମାଣ୍ଡ୍।
ଜିଉଦି ନେତାକିଲ୍ ସନିୟଦଲ୍ନାଟ୍ ପେଙ୍ଗୁର୍ତୁଲ୍ ଲକ୍ନାଟ୍ ଜିଉଦାନ୍ ୱାନର୍, କାଣ୍ତାଲ୍ ଆରେ କିସ୍ ଅଲାଲ୍ ପାତିମାଟର୍, ଜିଉଦା ଜିସୁନ୍ କାକେଲ୍ ୱାରି ପକେଣ୍ତ୍, “ଏଗୁରୁ ନମସ୍କାର୍” କେଇ ଅଣ୍ତୁଙ୍ଗ୍ ସକ୍ କେନଣ୍ତ୍, ଜିଉଦି ନେତାକିଲ୍ ଏୟିରୁଙ୍ଗ୍ ପାଦାର୍ ଆଦ୍ଉକୁଟ୍ ସିନ୍ ମାଟେ, ଆମାଟୁକ୍ ଜିସୁ ପକେଣ୍ତ୍ ଜିଉଦା ସକ୍କେଇ ଇନ୍ ଆନୁଙ୍ଗ୍ ସତ୍ରୁ କିତିନ୍ ସର୍ପା କିଦାଟ୍?”
ଏରେବେଲ୍ ସନିୟକୁଲ୍ ଜିସୁଙ୍ଗ୍ ପାତେର୍ ପିତର୍ ଆୟ୍ଲକ୍ନେ କିୟୁବ୍ ପୁସ୍କି ବେର୍ଜାଜକ୍ନେ ଦାସ୍ନେ କେକଲ୍ କୁଇକାରେଣ୍ତ୍, ଜିସୁ ପକେଣ୍ତ୍ “କିୟୁବୁଙ୍ଗ୍ ଦୁରିଙ୍ଗ୍ ଇର୍ ଆନୁଙ୍ଗ୍ ରକିୟା କେଗିଙ୍ଗ୍ ପାଇଟ୍ ଆନ୍ ଆନେ ଆବାଙ୍ଗ୍ ଦୁତ୍ଗୁଲୁଙ୍ଗ୍ ଉକୁଟ୍ ସନିୟଦଲ୍ ପର୍ତାନ୍, ମାତର୍ ଆନ୍ ଆନେ ଆବାଙ୍ଗ୍ ଆଦେସ୍ ମାନ୍ଏଦାନ୍, ଆମାଟୁକ୍ ଜିସୁ ଅଣ୍ତୁନେ କେକଲୁଙ୍ଗ୍ ଜଡ଼଼ାତଣ୍ତ୍, ଜିସୁଙ୍ଗ୍ ପାତ୍ତାଲିନ୍ ପାଟିନ୍ ସିସୁତୁଲ୍ ସାକାରି ୱେଟେର୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୨୬:୧୪-୫୬; ମାର୍କ ୧୪:୧୦-୫୦; ଲୁକ ୨୨:୧-୫୩; ଜଅନ୍ ୧୨:୬;୧୮:୧-୧୧
Free to use, adapt, and share under an open license (CC BY-SA 4.0).