37. ୩୭- ଜିସୁ ଲାଜାରିଙ୍ଗ୍ ସାଦାନ୍ ପେଲ୍ଟୁକ୍ ସିଣ୍ତୁପଣ୍ଡି
ଦିନେକ୍, ଜୁସୁ ଉକୁଟ୍ ପାଟେ ୱେଟଣ୍ତ୍ ଜେ ଲାଜାର୍ ପେରିନ୍ କାୟ୍କିର୍ ମାୟାଣ୍ତ୍। ଲାଜାର୍ ଆରେ ଅଣ୍ତୁନେ ଜଡେକ୍ ସେଲାସିଲ୍, ମରିୟମ୍ ଆରେ ମାର୍ତା ଜିସୁନେ ବେସି ସଙ୍ଗାରିଲ୍ ମାଟେୱ୍। ଜିସୁ ଏସେବେଲ୍ ଇ ପାଟେ ୱେଟଣ୍ତ୍, ଅଣ୍ତ୍ ପକେଣ୍ତ୍ ଇ କାୟାକିର୍ ସାଗଡ୍ ପଲି ସେନା, ମାତର୍ ଇଦ୍ ମାପ୍ରୁନେ ଗଉରବ ପାୟିଟ୍। ଜିସୁ ଅଣ୍ତୁନେ ସାଙ୍ଗତୁଲୁଙ୍ଗ୍ ଲାଡ୍ କେଗିନଣ୍ତ୍, ମାତର୍ ଆୟ୍ଲକ୍ ଏରେ ବାସେନ୍ ମାଟର୍ ଆମାନ୍ ଦୁୟ୍ଦିନ୍ ମାଞ୍ଜି ସେୟର୍।
ଦୁୟ୍ଦିନ୍ କୁଣ୍ତେଲ୍, ଜିସୁ ଅଣ୍ତୁନେ ସିସୁତୁଲୁଙ୍ଗ୍ ପକେଣ୍ତ୍, “ୱାରୁ, ଆମ୍ ଜିଉଦା ପର୍ଦେସ୍ ସେନିକାର୍। ସିସୁତୁଲ୍ ଉତର୍ ସିନର୍ “ଗୁରୁ, ଏନେତ୍ ପର୍ ଆଗାଡ଼଼ି ଇନୁଙ୍ଗ୍ ଲକ୍ଗୁଲ୍ ଆଟିଙ୍ଗ୍ ପାୟିଟ୍ ଇଚା କେଗିନର୍!” ଜିସୁ ପକେଣ୍ତ୍ ଆମ୍ଗୁଲ୍ନେ ଲାଜର୍ ଅଡିମାଣ୍ତ୍, ଆରେ ଆନ୍ ଅଣ୍ତୁଙ୍ଗ୍ ନିଚୟ୍ ଅଡ୍ଦାନ୍ ପେଲ୍ଟୁକ୍ ସିଣ୍ଡୁତାନ୍।
ଜିସୁନେ ସିସୁତୁଲ୍ ଉତର୍ ସିନର୍ “ଗୁରୁ, ଜଦି ଲାଜାର୍ ତୁୟ୍ଙ୍ଗି କାରିମାଣ୍ତ୍,ଆଟେକଡ୍ ଅଣ୍ତ୍ ସିଲ୍ତାଣ୍ତ୍। ଆଦିଙ୍ଗ୍ କୁଣ୍ତେଲ୍ ଜିସୁ ଆୟ୍ଲକୁଙ୍ଗ୍ ସରଲ୍ ବାବ୍ରେନ୍ ପକେଣ୍ତ୍ ଲାଜାର୍ ସାୟିସେଞ୍ଜିମାଣ୍ତ୍। ଆନ୍ କିର୍ଦେ ଜେ ଆନ୍ ଆମାନ୍ ମାନୁଟନ୍, ଏଟେନ୍ କି ଇମ୍ଗୁଲ୍ ଆନ୍ପେଲ୍ ବିସ୍ବାସ୍ କେଦାର୍।”
ଜିସୁ ଏସେବେଲ୍ ଲାଜାର୍ନେ ଗଡ୍ତୁନ୍ ୱାନଣ୍ତ୍, ଲାଜାର୍ ସାୟି ସାୟିନ୍ ତାନିର୍ ଚାର୍ଦିନ୍ ଏରିମାଟେ। ମାର୍ତା ଜିସୁଙ୍ଗ୍ ବେଟ୍ଏରିଙ୍ଗ୍ ସେଞ୍ଜି ପକେଟେ ପର୍ବୁ, ଜଦି ଇନ୍ ଇମାନ୍ ମାଙ୍ଗଡ୍ ଆନ୍ ବାଇ ସାୟୁଟଣ୍ତ୍ ମେନ୍। ମାତର୍ ଆନ୍ ବିସ୍ବାସ୍ କେଗିଦାନ୍ ଇନ୍ ମାପ୍ରୁଙ୍ଗ୍ ଏନାଦ୍ ପର୍ତାଟ୍ ଆଦ୍ ଅଣ୍ତ୍ ଇନୁଙ୍ଗ୍ ସିଦାଣ୍ତ୍।”
ଜିସୁ ଉତର୍ ସିନଣ୍ତ୍, “ଆନ୍ ସାଦାନ୍ପେଲ୍ଟୁକ୍ ଜିୱେ ଏରି ସିଲ୍ପାକ୍ ଆରେ ଜିୱେ। ଏଇଣ୍ତ୍ ଆନ୍ପେଲ୍ ବିସ୍ବାସ୍ କେଦାଣ୍ଡ୍, ଜଦି ଅଣ୍ତ୍ ସାଦାଣ୍ତ୍ ଏଙ୍ଗଡ୍ମେନ୍ ଅଣ୍ତ୍ ଜିୱେ ଏଦାଣ୍ତ୍। ଏଇର୍ମେନ୍ ଆନ୍ପେଲ୍ ବିସ୍ବାସ୍ କେଦାର୍ ଅଣ୍ତ୍ ଏସେଲ୍ମେନ୍ ସାୟାଣ୍ତ୍। ଇନ୍ ଇଦ୍ ବିସ୍ବାସ୍ କେଦାଟ୍ କି? ମାର୍ତା ଉତର୍ ସିନେ ଅଁ, ଗୁରୁ ଆନ୍ ବିସ୍ବାସ୍ କେଦାନ୍ ଜେ ଇନ୍ ମାପ୍ରୁନେ ସେପାଲ୍ କିସ୍ଟ।”
ଆଦିଙ୍ଗ୍ କୁଣ୍ତେଲ୍ ମରିୟମ୍ ୱାନେ। ଆଦ୍ ଜିସୁନେ କାଲ୍ଗିଲ୍ ପାତି ପକେଟେ “ପର୍ବୁ, ଜଦି ଇନ୍ ଇମାନ୍ ମାନ୍ଗଡ୍, ଆନ୍ ବାଇ ସାୟୁଟଣ୍ତ୍ ମେନ୍। “ଜିସୁ ଆୱୁଙ୍ଗ୍ ପାସାର୍ତଣ୍ତ୍ ଇମ୍ଗୁଲ୍ ଲାଜାରିଙ୍ଗ୍ ଏରେମାନ୍ ଇରିମାର୍?” ଆୱ୍ ପକେଟେୱ୍ ସାୟ୍କିଲ୍ ବାସେନ୍। ସାୟ୍ତିନ୍ ୱା ଆରେ ସୁଡ୍। ଆଦିଙ୍ଗ୍ କୁଣ୍ତେଲ୍ ଜିସୁ ଆଡେଣ୍ତ୍।
ସାୟ୍କିଲ୍ ଉକୁଟ୍ ବରାମାଟେ ଇଦିନ୍ ମୁଆଟ୍ତିନ୍ ଉକୁଟ୍ ବେର୍ଟେ ଉକୁଟ୍ କାଣ୍ତ୍ ଡାବାସି ମାଟର୍, ଜିସୁ ଏସେବେଲ୍ ସାୟ୍କିଲ୍ତିନ୍ ଏଦେଣ୍ତ୍ ଆୟ୍ଲକୁଙ୍ଗ୍ ପକେଣ୍ତ୍, କାଣ୍ତିଙ୍ଗ୍ ଡୁଲାସି ସିୟୁର୍, ମାତର୍ ମାର୍ତା ପକେଟେ ଅଣ୍ତ୍ ସାୟି ଚାର୍ଦିନ୍ ଏରିଦା ଆମାନ୍ ଗାନ୍ଦ୍ ସେୟ୍ଦା।”
ଜିସୁ ଉତର୍ ସିନଣ୍ତ୍ ଆନ୍ ଏନାଦ୍ ଇମ୍ଗୁଲୁଙ୍ଗ୍ ପକାନ୍ ଜେ ଇମ୍ଗୁଲ୍ ଆନ୍ପେଲ୍ ବିସ୍ବାସ୍ କେଗଡ୍ ମାପ୍ରୁନେ ମଇମା ସୁଡ୍ଦାର୍?” ଆଦିଙ୍ଗ୍ ଆୟ୍ଲକ୍ କାଣ୍ତିଙ୍ଗ୍ ପୁସ୍କି ସିନର୍।
ଆଦିଙ୍ଗ୍ କୁଣ୍ତେଲ୍ ଜିସୁ ସରଗ୍ ଦିଗାଲ୍ ସୁଡି କେରିନ୍ ପକେଣ୍ତ୍, “ଆବା, ଆନ୍ ପାର୍ତନା ୱେଞ୍ଜିମାନ୍ତାଲିନ୍ ଦନିୟବାଦ୍। ଆନ୍ ପୁୟାନ୍ ଇନ୍ ପାଟିନ୍ବେଲ୍ ଆନ୍ ପାଟେ ୱେୟାଟ୍, ମାତର୍ ଏରେ ପାଟିନ୍ ଲକ୍ ଇମାନ୍ ନିଲ୍ସି ମାୟାର୍ ଆୟ୍ଲକୁଙ୍ଗ୍ ପାୟିଟ୍ ଆନ୍ ପକୁଦାନ୍। ଆଦିଙ୍ଗ୍ କୁଣ୍ତେଲ୍ ଜିସୁ ପେରିନ୍ ଆଉଲିରେନ୍ ପକେଣ୍ତ୍, “ଲାଜାର୍, ପେସି ୱା!”
ଆଦିଙ୍ଗ୍ ଲାଜାର୍ ପେସି ୱାନଣ୍ତ୍, ଆୟ୍ବେଲ୍ ମେନ୍ ଅଣ୍ତ୍ ସେରିଙ୍ଗ୍ ଡାବାପଣ୍ଡି ବସ୍ତର୍ରେନ୍ ଗୁଡିୟା ଏରିମାଟଣ୍ତ୍। ଜିସୁ ଆୟ୍ଲକୁଙ୍ଗ୍ ପକେଣ୍ତ୍ ଇ ସେରିଙ୍ଗ୍ ଡାବାପଣ୍ଡି ବସ୍ତର୍ ଅଣ୍ତୁଙ୍ଗ୍ ପେଲ୍ଟୁକ୍ ପୁସ୍କି ଅଣ୍ତୁଙ୍ଗ୍ ମୁକ୍ତ କେୟୁର୍। ଜିସୁନେ ଇ କାବାଏରଣ୍ତି କାମେ ସୁଡି ପେଙ୍ଗୁର୍ତୁଲ୍ ଜିଉଦି ଲକ୍ ଜିସୁଙ୍ଗ୍ ପେଲ୍ ବିସ୍ବାସ୍ କେନର୍।
ମାତର୍ ଜିଉଦିଲକ୍ନେ ଦରମ୍ ନେତାଲକ୍ ରିସା ଏନର୍, ଆଦିଙ୍ଗ୍ ଆୟ୍ଲକ୍ ଏରେୱାଡିନ୍ ଜିସୁଙ୍ଗ୍ ଆରେ ଲାଜାରିଙ୍ଗ୍ ୱାଟ୍ତେନ୍ ଆଟ୍ଦାର୍ ଆଦ୍ ଉକୁଟ୍ ପେଲ୍ ରୁଣ୍ତ୍ ଏରି ଜଜନା କେନର୍।
ବାଇବଲ୍ଟେ ଉକୁଟ୍ କେରାଲ୍ : ଜଅନ୍ ୧୧:୧-୪୬
Free to use, adapt, and share under an open license (CC BY-SA 4.0).