Dagiti Sangapulo a Didigra

Napanda Moises ken Aaron iti ayan iti Paraon, kinunada kenkuana, “Daytoy ti imbaga iti Dios iti Israel, ‘Palubusam dagiti tattaok.’” Saan a dimngeg ti Paraon kadakuada. Pinilitna pay ketdi a pinagtrabaho iti naririgat dagiti Israelita imbes a palubosanna ida!

Nagkedked ti Paraon a mangpalubos kadagiti tattao isunga nangted iti Dios iti sangapulo a nakabutbuteng a didigra idiay Egipto. Impakita iti Dios iti Paraon a babaen kadagitoy a didgra napigpigsa isuna ngem iti Paraon ken iti amin a dididiosen idiay Egipto.

Pinagbalin iti Dios a dara ti danum iti Karayan Nilo. Uray no kasta saan latta a pinalubusan iti Paraon dagiti Israelita.

Nangibaon ti Dios kadagiti tukak iti Egipto. Nagpakpakaasi ti Paraon kenni Moises nga ikkatenna dagitoy. Kalpasan a natay dagiti amin a tukak, impapilit iti Paraon a saanna a palubusan a pumanaw iti Egipto dagiti Israelita.

Nangibaon manen ti Dios iti timel ken kadagiti ngilaw. pinaayaban iti Paraon da Moises ken Aaron, imbagana a no ikkatenda dagiti dididgra ket palubusanna dagiti Israelita a pumanaw idiay Egipto. Inikkat iti Dios dagiti didigra manipud idiay Egipto idi nagkararag ni Moises. Nagkedked manen ti Paraon ket saanna a pinalubusan a pumanaw dagiti tattao.

Ti simmaruno, pinagsakit iti Dios amin dagiti dingwen dagiti Egipcio ket natayda. Nagkedked manen ti Paraon, saanna a pinalubusan dagiti Israelita.

Imbaga iti Dios ken ni Moises a mangipurwak iti dapo iti angin iti sanguanan iti Paraon. Idi inaramidna daytoy, naaddaan iti naut-ot a gaddil iti kudil dagiti taga Egipcio ngem saan kadagiti Israelita. Impalubos iti Dios nga agkedked ti Paraon ket saanna latta a pinalubusan dagiti Israelita.

Kalpasan dayta, pinagtudo iti Dios iti uraro a nangdadael kadagiti mulmula idiay Egipto ken nangpatay kadagiti tattao a rimmuar. Pinaayaban manen iti Paraon da Moises ken Aaron ket kinunana, “Nagbasolak. Mabalinyon ti mapan.” Gapu ta nagkararag ni Moises ket nagsardeng ti uraro.

Nagbasol manen ti Paraon, nagkedked ket saanna latta a pinalubusan dagiti Israelita a mawayawayaan.

Gapu iti daytoy, nangted ti Dios iti nakaad-adu a dudon iti intero nga Egipto. Kinnan dagiti dudon ti amin a mulmula a saan a naperdi idi nagtudo iti uraro.

Kalpasanna, nangibaon ti Dios iti kinasipnget a nagpaut iti tallo nga aldaw. Saan a makaruar dagiti Egipcio kadagiti babbalayda agsipud ta nasipnget unay. Ngem nalawag iti pagnanaedan dagiti Israelita.

Kaskasdi a saan a pinalubusan iti Paraon dagiti Israelita kalpasan dagitoy a siam a didigra. Gapu ta saan a dimngeg ti Paraon, pinanggep iti Dios a mangiyeg iti maysa pay a didigra. Daytoy timabalin a mangbaliw iti panunot iti Paraon.