Ti Naikari nga Daga

Kalpasan ti atiddog a panawen, dimteng iti tiempo ti panagsirrek dagiti Israelita idiay Canaan, iti Naikari a Daga. Nangibaon ni Josue iti dua nga espiya idiay Jerico. Maysa a siudad ti Canaan a napalikmutan iti natibker a padpader ti Jerico. Ni Rahab ket maysa a balangkantis nga agnanaed iti dayta a lugar. Inlemmeng ken tinulonganna dagiti espiya tapno makalibasda. Inaramidna daytoy gapu ta mamati isuna iti Dios. Inkari dagiti espiya a salaknibandanto ni Rahab ken ti pamilyana inton tiempo ti panangdadaelda iti Jerico.

Masapul a bumallasiw dagiti Israelita ti karayan Jordan tapno makastrekda iti Naikari a Daga. Kinuna ti Dios ken ni Josue, "Paunaem dagiti padi a bumallasiw". Idi inrugi dagiti padi ti bumallasiw, simmardeng a nagayos ti danum ti karayan. Nakaballasiw dagiti Israelita iti namaga a daga.

Kalpasan a nakaballasiw dagiti tattao iti Karayan Jordan, imbaga ti Dios ken ni Josue no kasano ti panangdarupda iti nabileg a siudad ti Jericho. Nagtulnog dagiti tattao iti Dios. Inaldaw a nagmartsa dagiti suldado ken dagiti padi iti aglawlaw ti Jericho kas imbaga iti Dios. Inaramidda daytoy iti naminsan a daras iti innem nga aldaw .

Iti maikapito nga aldaw, naminpito a daras a nagmartsa dagiti Israelita iti aglawlaw iti siudad. Nagpukkaw dagiti soldado ken pinuyutan met dagiti padi ti trumpetada bayat ti panagmartsada iti aglawlaw ti siudad iti maudi a daras.

Narba dagiti pader a nakapalikmut iti Jerico. Dinadael dagiti Israelita amin nga adda iti siudad kas imbilin iti Dios. Ni Rahab laeng ken ti pamilyana iti insalakanda ta nakikadwada kadagiti Israelita. Nagbuteng dagiti dadduma nga agnanaed idiay Canaan kadagiti Israelita ta naamoanda a dinadaelda iti Jericho. Nagbutengda ta amangan no rauten met ida dagiti Israelita.

Imbilin iti Dios kadagiti Israelita a saanda a makitulag iti panagkappia kadagiti aniaman a puli iti tattao idiay Canaan. Nagulbod ken ni Josue ti maysa a puli iti tattao ti Canaan a maawawagan a Gibeonita. Imbagada a naggapuda iti lugar nga adayu manipud idiay Canaan. Nakitungtongda ken ni Josue nga agaramidda iti tulag a pannakikappia kadakuada. Saanen a nagdamagda Josue ken dagiti Israelita iti Dios no sadinno ti naggapuan dagitoy a Gibeonita. Isunga nangaramid ngarud ni Joshua iti tulag a pannakikappia kadakuada.

Nakaunget dagiti Israelita idi naamoanda nga inallilaw ida dagiti Gibeonita. Uray no kasta, sinurotda latta ti tulag a pannakikappia kadakuada agsipud ta kari daytoy a naaramid iti sanguanan iti Dios. Kalpasanna, nadamag dagiti ari iti Amorita a nangaramid dagiti Gibeonita iti katulagan a pannakikappia kadagiti Israelita. Dagiti Amorita ket maysa pay a puli iti tattao nga agnanaed iti Canaan. Pinagmaymaysada dagiti suldadoda ket nagbalin a dakkel nga armada. Dinarupda dagiti Gibeonita. Nangipatulod iti mensahe a dumawdawat iti tulong kenni Josue dagiti Gibeonita.

Gapu iti dayta, inurnong ni Josue dagiti soldado iti Israel ket nagpatpatnagda a nagdaliasat tapno makadanunda iti ayan dagiti Gibeonita. Kabigatanna, dinarupda a kellaat dagiti Amorita.

Iti dayta nga aldaw, limmaban ti Dios para kadagiti Israelita. Binuriborna dagiti Amorita. Pinagtudona pay iti dadakkel nga uraro a nangpatay iti kaaduan kadakuada.

Pinagsardeng pay iti Dios ti init iti maysa a lugar tapno maaddan dagiti Israelita iti umdas nga oras a mangparmek kadagiti Amorita. Tinulungan iti Dios nga agballigi dagiti Israelita iti dayta nga aldaw.

Kalpasan a naparmek iti Dios amin a kabusor ti Israel, nagmaymaysa ti adu a puli iti tattao iti Canaan tapno rautenda ti Israel. Indauloan ni Josue dagiti Isrelita iti panangrautda kadagiti kabusorda.

Kalpasan daytoy a gubat, inikkan iti Dios ti amin a puli iti tattao iti Israel iti bukodda a daga idiay Naikari a Daga. Inaramid iti Dios a natalna ti biagda agraman dagiti dadduma a puli iti tattao nga agnanaed iti asidegda.

Idi lakayen ni Josue, inayabanna amin nga Israelita. Impalagipna kadagiti tattao nga agtultuloy nga agtulnogda iti katulagan nga inaramid iti Dios kadakuada idiay Sinai. Inkari dagiti tattao nga agtalinaedda a napudno iti Dios ken surotenda dagiti linlintegna.