Ti Istorya iti Naimbag a Samaritano

Maysa nga aldaw, napan ti maysa a nalaing iti linteg iti Judio kenni Jesus. Kayatna a padasen ni Jesus babaen iti maysa a saludsod. Kinunana, "Manursuro, ania ti rumbeng nga aramidek tapno magun-od ko ti biag nga agnanayon?" Simmungbat ni Jesus, "Ania aya ti nakasurat iti linteg iti Dios?"

Simmungbat ti nalaing iti linteg, kinunana, "Nakasurat iti linteg iti Dios, ayatem ti Apo a Diosmo iti amin a pusom, kararua, pigsa ken panunotmo. Imbagana pay nga ayatem ti karrubam a kas panagayat mo iti bagim."Simmungbat ni Jesus, "Agpayso dayta! Aramidem ngarud dagita ket agbiagka."

Kayat iti nalaing iti linteg a paneknekan a nalinteg isuna. Gapu iti dayta, dinamag na manen kenni Jesus, "Siasino kadi ti karrubak?"

Sinungbatan ni Jesus ti nalaing iti linteg iti maysa nga istorya. Kinunana, "Maysa a lalaki a Judio ti agdaldaliasat iti dalan nga aggapu iti Jerusalem a mapan idiay Jerico."

"Kabayatan iti panagdaliasatna, dinarup isuna dagiti agtatakaw. Innalada amin nga adda kenkuana. Dinangran dagiti agtatakaw ti lalaki agingga a dandanin isuna a matay sada pinanawan."

"Kalpasanna, maysa a Judio a padi ti agdaldaliasat iti dayta a dalan. Nakita iti panguloen iti relihion ti natakawan ken nadangran a lalaki. Uray no kasta, linabsanna daytoy ken napan iti bangir iti dalan. Saanna a tinulungan ti lalaki ket intuloyna ti panagdaliasatna."

“Saan a nagbayag, limmabas met ti maysa a Levita. (Maysa a tribu iti Judio dagiti Levita a tumultulong kadagiti padi idiay Templo). Bimmallasiw met laeng ti Levita iti bangir iti dalan. Binaybay-anna laeng ti lalaki a natakawan ken nadangran.”

“Maysa a Samaritano ti simmaruno a simmalog iti dalan. (Dagiti Samaritano ket kaputotan dagiti Judio a nakiasawa kadagiti gangannaet. Kabusor dagiti Samaritano dagiti Judio.) Nakita iti Samaritano ti lalaki a Judio. Naasyan isuna iti lalaki. Gapu iti dayta, tinulonganna ti lalaki ken binedbedanna dagiti sugsugatna.”

"Impalugan iti Samaritano ti lalaki iti asnona. Inpanna daytoy iti maysa a pagdagdagusan iti asideg. Intuloyna nga inaywanan ti lalaki."

“Kabigatanna, kasapulanen iti Samaritano nga ituloy ti panagdaliasatna. Nangibati daytoy iti kuarta iti agbanbantay iti pagdagdagusan. Imbagana, ‘Aywanam ti lalaki, no agkurang ti kuarta nga ibatik ket bayadakto amin a nagastosmo no agsubliak.’”

Kalpasan nga imbaga ni Jesus dayta nga istorya, dinamagna ti nalaing iti linteg, "Ania ti panagkunam? Siasino kadagiti tallo a lallaki ti pudno a karruba iti lalaki a natakawan ken nadangran?" Simmungbat ti nalaing iti linteg, "Ti lalaki a naasi kenkuana ti pudno a karrubana." Imbaga ni Jesus, "Tatta ngarud aramidem met dayta."