Nagna ni Jesus iti Rabaw ti Danum

Imbagana ni Jesus kadagiti adalanna nga agluganda iti bangka tapno bumallasiwda iti dan-aw, kabayatan a pagaw-awidenna dagiti adu a tattao. Kalpasan a napaawid ni Jesus dagiti adu a tattao, napan isuna iti igid ti maysa a bantay tapno agkararag. Nagkararag ni Jesus nga agmaymaysa idiay inggana rabii.

Kabayatan ti panagkarkararag ni Jesus ket aggagaud dagiti adalanna ti bangka. Rabiin ket addada pay laeng idiay tengnga ti dan-aw. Marigrigatanda nga aggaud gapu ta napigsa ti pul-oy ti angin a sumabsabat kadakuada.

kalpasan ti panagkararag ni Jesus, napan isuna kadagiti adalanna. Nagna isuna iti rabaw ti danum ti dan-aw tapno mapan idiay bangka dagiti adalanna.

Kasta unay ti buteng dagiti adalan idi makitada ni Jesus gapu ta impagarupda nga al-alya ti makitkitada. Ammo ni Jesus a mabutbutengda isunga impukkawna kadakuada, ”Saankayo nga agbuteng. Siak daytoy!”

Kinuna ni Pedro ken ni Jesus, “Apo, no pudno a sika dayta, ibaonak nga umay kenka.” Simmungbat ni Jesus, “Umayka!”

Dimsaag ni Pedro iti bangka ken nangrugi a magna iti rabaw ti danum a mapan kenni Jesus. Idi dam-damo, kitkitaen ni Pedro ni Jesus ngem nagtalyaw isuna ket nakitana dagiti dalluyon ken nariknana iti napigsa nga angin.

Nagbuteng ni Pedro ket nangrugi a lumned iti danum. Nagpukkaw isuna, “Apo, isalakannak!” Ginaw-at a dagus ni Jesus ni Pedro ket ginuyodna. Kinuna ni Jesus kenni Pedro, “Nagbassit ketdin ti pammatim Nagtalekka koma kaniak!”

Idi nakalugan ni Pedro ken Jesus idiay bangka, nagsardeng ti napigsa nga angin ken nagtalna ti danum. Nasdaaw dagiti adalan. Nagrukbabda kenni Jesus ket kinunada, “Pudno a sika ti Anak ti Dios.”