Ti Istorya maipapan iti Manangaasi nga Ama

Maysa nga aldaw, Nangisursuro ni Jesus kadagiti adu nga agsingsingir iti buwis ken dadduma pay a managbasol nga immay tapno dumngeg kenkuana.

Dinillaw dagiti panguloen iti relihiyon ni Jesus idi nakitada a makigaygayyem isuna kadagiti managbasol. Gapu iti daytoy, imbaga ni Jesus kadakuada daytoy nga istorya.

“Adda maysa a tao nga addaan iti dua nga annak a lallaki. Kinuna ti ub-ubing nga anak iti amana, “Ama, kayatkon nga alaen ti tawidko kenka.”Gapuna, biningay ngarud iti ama ti sanikuana ket intedna kadagiti dua nga annakna.

Innala ngarud ti ub-ubing nga anak dagiti amin a tawidna ket pimmanaw. Napan daytoy iti adayo a lugar. Binusbosna amin ti kuartana iti dakes a wagas.

Iti saan a nagbayag, dimteng ti nakaro a panagbisin iti lugar a napanan ti ub-ubing nga anak a lalaki. Awanen ti kuartana nga igatangna iti kanenna. Gapu iti daytoy, nangbiruk iti trabaho a mabalinna a sumrekan. Agpakpakan iti baboy ti nagbalin a trabahona gapu ta isu laeng iti nabirukanna a pagtrabahoan. Nakakaasi ken nabisbisinan isuna ket kayatna payen ti mangan iti kanen dagiti baboy.

Kamaudiananna, kinuna iti ub-ubing nga anak a lalaki iti bagina. “Ania ti ar-aramidek? Aglaplapusanan ti taraon dagiti amin nga agserserbi ken amak, ngem siak, addaak ditoy a mabisbisinan. Agsubliak ngarud ken amak ket ibagak kenkuana nga ibilangnak a maysa kadagiti agserserbi.”

Nagsubli ngarud ti ub-ubing nga anak iti balayda. Adayo pay laeng isuna, nakita iti Ama ti anakna ket naasian unay kenkuana. Nagtaray a simmabat daytoy ket inarakup ken inagkanna ti anakna.

Kinuna iti anak iti amana, “Ama, nagbasolak iti Dios uray pay kenka. Saanakon a maikari kas anakmo.”

“Kinuna iti ama iti maysa kadagiti agserserbi, "darasem ti mapan mangala kadagiti kasayaatan a bado ket isuotmo iti anakko! Ikkam pay iti singsing ken sapatosna. Partienyo diay kalulukmegan nga urbon iti baka ta agrambaktayo. Gapu ta kayariganna a natay ti anakko ngem nagbiag! Napukaw ti anakko ngem itan ket nasarakan!”

“Nangrugi ngarud nga nagrambak dagiti tattao. Saan nga agbayag, simmangpet ti inauna nga anak manipud idiay taltalon a pagub-ubraanna. Nangngegna ti tokar ken nakitana dagiti agsasala. Nasdaaw ti inauna nga anak agsipud ta saanna nga ammo ti mapaspasamak.”

Idi natakuatan iti inauna nga anak a ti ramrambakanda ket ti panagsubli iti kabsatna, kasta unay ti pungtotna. Saanna payen a kayat ti sumrek iti balayda. Rimuar ti ama ket nagpakaasi kenkuana nga umuneg ta makipagrambak kadakuada ngem nagkedked daytoy.

Kinuna iti inauna nga anak iti amana, “Simamatalekak a nagtrabtrabaho kenka iti adu a tawen! Saanak a nagsuksukir, dinak man laeng inikkan iti uray bassit a kalding tapno makipagrambakak met koma kadagiti gagayyemko. Idi nagawid ti anakmo a nangbusbos iti kuartam iti dakes a wagas, pinapartim diay kalulukmegan a baka maipaay kenkuana!”

Simmungbat ti ama ket kinunana, “anakko, kaduaka a kankanayon, amin a sanikuak ket kukuam. Rumbeng nga agrambaktayo ngamin ti kabsatmo ket kayariganna a natay ngem itan ket nabiag, napukaw ti kabsatmo ngem itan ket nasarakan!"