24. યોહાન ઇસુલા બાપતીસમાં દેહે

ઝખારયા ની એલીસાબેથના પોસા યોહાન મોઠા હુયના ની પરબોદક બનના તો જંગલમાં રહ હતા, જંગલી મદ ની તીડ ખા હતા, ની ઊંટને બુરાકન બનવેલ ડગલાં પોવ હતા.

બુહું લોકાં યોહાનલા આયકુલા સાટી રાનામાં યે હતાંત. તેની તેહાલા ઉપદેશ દેતાં સાંગાં કાય, પસતાવા કરા, કાહા કાય દેવનાં રાજ્ય સુંબુર આહા!”

લોકાંહીં જદવ યોહાનનાં સંદેશ આયકા તદવ, તેમાંતલે બુહું જનાસી પસતાવા કરા, ની યોહાનની તેહાલા બાપતીસમાં દિદાં. બુહું ધરમ ગુરુસીં પન યોહાન પાસીંં બાપતીસમાં લેવલા આનેલ હતાત, પન તેહીં પસતાવા ની કરા અન માફી માંગી નિહી.

યોહાનની તે ધરમ ગુરુ સાહલા સાંગાં,“તુમી ઝેરી સાપ આહાસ! પસતાવા કરા ની તુમના વરતન બદલા. આખાંજ ઝાડ જી બેસ ફળ ની દે તેલા કાપી ટાક્જીલ ની તેલા ઇસતોમાં ટાકી દેવામાં યીલ.” યોહાનની પરબોદકસી જી સાંગેલ હતાં તી પૂરાં કરાં, “જ માં તુમને પુડ માને સંદેશ લીજાનારલા દવાડીન, તો તુમને સાટી મારગ તયેર કરીલ.

કોડાક યહુદીસી યોહાનલા સોદાં કાય તું મસીહ આહાસ. યોહાનની જવાબ દિદા, “માં મસીહ નિહી, પન જો માને માગુન યેનાર આહા તો આહા. તો બુહું મહાન આહા કાય માં તેને ચંપલ ઉતારુલા પન લાયક નીહી.

દુસરે દીસી, ઇસુ યોહાન પાસુન બાપતીસમાં લેવલા આના. જદવ યોહાનની તેલા હેરાં, તેની સાંગાં, “હેરા! યો દેવના પોસા આહા જો જગતને પાપલા દુર કરીલ.”

યોહાનની ઇસુલા સાંગાં કાય, માં તુલા બાપતીસમાં દેવલા લાયક નિહી આહાંવ. તૂને માલા બાપતીસમાં દેવલા પડ. “ઈસુની સાંગાં,” તું માલા બાપતીસમાં દે, કાહા કાય તી કરુલા બેસ આહા. તાહાં ઈસુની પાપ ની કરેલ તરી યોહાનની તેલા બાપતીસમાં દિદાં

ઇસુ બાપતીસમાં લીના માગુન પાનીમાહુન બાહેર આના, તદવ દેવના આતમા કબુતરને રુપમાં જીસા પરગટ હુયના ની તેને વર રહના. તેજ સમયમાં, દેવના અવાજ આબુટમાહુન આના “તો માના લાડકા પોસા આહા, ની માં તેક્ન બુહું પ્રસન્ન આહાંવ.”

દેવની યોહાનલા સાંગાં, “પવિતર આતમા બુટે યીલ ની કોની માનુસ જેલા તું બાપતીસમાં દેસી તે વર ઉતરીલ. તો માનુસ દેવના પોસા આહા.” ફક્ત એકજ દેવ આહા. યોહાનની ઇસુલા બાપતીસમાં દિદા તદવ, તેની બાહાસલા બોલતાં આયકાં, દેવના પોસા ઇસુલા હેરા, ની પવિતર આતમાલા હેરા.