24. ଯୋହନ ଯୀଶୁଇଁ ଡୁବନ ହିନେସି

ଯିଖରିୟ ଅଡ଼େ ଇଲିଶାବେଥତି ମିର୍ଏସି ଯୋହନ କାଜାସି ଆହାଁ ର ଭାବବାଦୀ ଆତେସି । ଏୱାସି ପାକା ହରୁତା ବାସା କିତେସି, କ୍ରିୟାଁ ଅଡ଼େ ପ୍ଡିକା ଚିଞ୍ଜି ମାଚେସି, ଅଡ଼େ ଉଣ୍ଟୁତି ତଲୁଇଁ ହେମ୍ବରୀ କିହାଁ ତୁର୍ହି ମାଚେସି ।

ହାରେକା ଲୋକୁ ଯୋହନତି କାତା ୱେଞ୍ଜାଲି ତାକି ପାକା ହରୁଟି ୱାହାମାଚେରି । ଏୱାସି ଏୱାରାଇଁ ୱେକ୍ହେସି “ହିୟାଁ ବାଦ୍ଲି କିଦୁ, ଏନାଆ ତାକି ଇଚିସାରେ ମାହାପୁରୁତି ରାଜି ଡାଗେ ୱାହି ମାନେ !”

ଲୋକୁ ଏଚିବେଲା ଯୋହନତି ବୋଲୁ ୱେଚେରି, ତାମି ବିତ୍ରା ହାରେକା ତାମି ପାପୁଟି ବାଦ୍ଲି ଆତେରି, ଅଡ଼େ ଯୋହନ ତାମ୍ଗେ ଡୁବନ ହିତେସି । ହାରେକା ଦାର୍ମୁ ନେତାଁ ଜିକେଏ ଯୋହନଟିଏ ଡୁବନ ଅହାଲିତାକି ୱାତେରି, ମାତ୍ର ଏୱାରି ହିୟାଁ ବାଦ୍ଲି କିଃଆନା ଅଡ଼େ ଏୱାରି ତାମି ପାପୁଇଁ ତେଲ୍ହାଲାଃତେରି ।

ଯୋହନ ଏ ଦାର୍ମୁ ନେତାଁଣୀ ଏଲିଇଚେସି “ହେ କାଡ଼ାହାଚି ରାଚୁତି ଗଚିତାତେରି! ତେଲ୍ହା କଡାଦୁ ଅଡ଼େ ମି ଜଲାଜକଡ଼ି ବାଦ୍ଲିକିଦୁ । ଏମିନିଗାଟି ମାର୍ନୁ ନେହି ପାଡ଼େଇ ହିଃଏ ଏଦାଣୀ ଟୁଣ୍ପି ଆନେ ଅଡ଼େ ହିଚୁତା କୁତୁସ୍ପି ଆନେ ।” ଭାବବାଦୀୟାଁ ଏନାଏନାଆଁ ତାମି କାତା ୱେସାମାଞ୍ଜାତେରି ଯୋହନ ଏଦାଣୀ କିତେସି “ମେହ୍‌ଦୁ, ନାନୁ ମି ନକିତା ନା ଦୂତୁଁଣୀ ପାଣ୍ଡିମାଞ୍ଜାଇଁ ଏମିନିଗାଟାଇ ମି ଜିରୁ ତିଆର୍ କିନୁ ।”

କଚେକା ଯିହୁଦୀୟାଁ ଯୋହନଇଁ ଇୱାସିଏ ଖ୍ରୀଷ୍ଟ କି ଇଞ୍ଜି ୱେଚେରି । ଯୋହନ ଏଲେଇଚେସି, “ନାନୁ ଖ୍ରୀଷ୍ଟ ଆଃଏ, ମାତ୍ର ନା ଜେଚ ରଅସି ୱାହି ମାନେସି । ଏୱାସି ଇଚେକା କାଜାସି ଯେ ତାନି ପାଣ୍ଡେଇ ଦସ୍ପିଆତି ଡରି ଜିକେଏ ହୁକ୍ହାଲି ତାକି ନାନୁ ଯୋଗ୍ୟ ଆଃଏ ।”

ଜେଚଦିନା ଯୋହନଟିଏ ଡୁବନ ଅହାଲି ତାକି ଯୀଶୁ ୱାତେସି । ଯୋହନ ଏଚିବେଲା ତାଂଗେ ମେସ୍ତେସି, ଏୱାସି ଜଲିତେସି “ଇୱାସି ମେହ୍‌ଦୁ ! ମାହାପୁରୁତି ମିର୍ଏସି ଏମିନିଗାଟାସି ଦାର୍ତିତି ପାପୁତି ବୋଜୁ ଡେକା ଅନେସି ।”

ଯୋହନ ଯୀଶୁଇଁ ଜଲିତେସି” ନିଙ୍ଗ ଡୁବନ ହିହାଲିତାକି ନାନୁ ଯୋଗ୍ୟ ଆଏ । ଅଡ଼େ ନିନୁ ନାଂଗ ଡୁବନ ହିନି କାତା ।” ମାତ୍ର ଯୀଶୁ ଜଲିତେସି “ନିନୁ ନାଂଗେ ଡୁବନ ହିହାଲି ଲାଗିନେ, ଏନାଃତାକିଇଚିସାରେ ଇଲେହେଁଏ ବାରେ ଦାର୍ମୁ ପୁରାଆନେ ଏଦାଆଁ ତାକି ଯୋହନ ତାଂଗେ ଡୁବନ ହିତେସି, ଯୀଶୁ ଏଚେଲା ପାପୁ କିଃଆତିହିଁ ଜିକେଃଏ ।

ଡୁବନ ଅତି ଜେଚ ଏଚିବେଲା ଯୀଶୁ ଏୟୁଟି ହଚା ୱାତେସି, ମାହାପୁରୁତି ଆତ୍ମା ର ପାର୍ୱା ଲେହେଁ ଚଞ୍ଜା ଆତେ ଅଡ଼େ ଏଦୀ ଡ଼କି ରେଚା ୱାହାଁ ତାନି ଲାକ କୁଗିତେ । ଏଚିବେଲାତା, ମାହାପୁରୁତି ବୋଲୁ ହାଗୁଟି ୱେଂଗି ୱାତେ ଅଡ଼େ ଜଲିତେସି, “ନିନୁ ନା ମିର୍ଏତି ଆମ୍ବାର୍ ତାଣା ନାନୁ ହାରେକା ରାହାଁ ଆତେଏଁ ।”

ମାହାପୁରୁ ଯୋହନଇଁ ଜଲାମାଚେସି “ନିନୁ ଆମ୍ବାରାଇଁ ଡୁବନ ହିଦି ତାନି ଲାକ ପବିତ୍ର ଆତ୍ମା ୱାନେ ଅଡ଼େ ଡ଼ଇନେ । ଏୱାସି ମାହାପୁରୁତି ମିର୍ଏସି ।” ୱାର୍ଇ ରଅସି ମାହାପୁରୁ ମାନେସି । ମାତ୍ର ଯୋହନ ଏଚିବେଲା ଯୀଶୁଇଁ ଡୁବନ ହିତେସି, ଏ ଆବା କାତା ଆହିମାନାଣୀ ୱେଚେସି, ମାହାପୁରୁ ମିର୍ଏସି ଯୀଶୁଇଁ ମେସ୍ତେସି, ଅଡ଼େ ପବିତ୍ର ଆତ୍ମାଇଁ ମେସ୍ତେସି ।