23. ଯୀଶୁତି ଜାର୍ନା

ଯୋଶେଫ ଦରୁ ଗାଟାସି ର ଦାର୍ମୁ ଲୋକୁ ତଲେ ମରିୟମତି ବିହା ତାକି ରିସ୍ପି ଆହାମାଚେ । ମରିୟମ ବାଣ୍ଡିତା ଆହାମାନେ ଇଞ୍ଜି ଏୱାସି ପୁଚେସି, ଏୱାସି ପୁଞ୍ଜାମାଚେସି ଏ ଡାଲୁ ତାନିୱାଇ ଆଏ । ମରିୟମଇଁ ଲାଜା କିହାଲିତାକି ଅଣପାଃତେସି, ଏଦାଆଁତାକି ଏୱାସି ଡ଼ୁକ୍ହାଁ ତାଂଗେ ହେଲଟାକା ହିହାଁ ପିସାଲିତାକି ଅଣପିତେସି । ଏୱାସି ଏଲେହେଁ କିନି ନକେଏ ର ଦୂତୁ ତାନି ଡାଗେ ୱାହାଁ ହାପ୍ନାତା ତାଂଗେ ଜଲିତେ ।

ଦୂତୁ ଜଲିତେ “ଯୋଶେଫ, ନି ଡକ୍ରୀ ମରିୟମଇଁ ଅହାଲିତାକି ଆଜାଃନି । ତାନି ବାଣ୍ଡିତା ମାନି ଡାଲୁ ପବିତ୍ରଆତ୍ମାଟିଏ ଆହାମାନେ । ଏଦି ର ମିର୍ଏଣାଇଁ ଜାର୍ନା ହିନେ । ତାନି ଦରୁ ଯୀଶୁ ଇଟାଦୁ (ଏମିନି ଅର୍ତ “ମାହାପୁରୁ ଗେଲ୍ପିନାସି” ), ଏନାଃତାକି ଇଚିସାରେ ଏୱାସି ଲୋକୁଣି ତାମି ପାପୁଟିଏ ଗେଲ୍ପିନେସି ।”

ଏଦାଆଁତାକି ଯୋଶେଫ ମରିୟମଇଁ ବିହା ଆତେସି ଅଡ଼େ ତାଂଗେ ଡକ୍ରୀ ଲେହେଁ ଅତେସି ଅଡ଼େ ତାନି ଇଜ ଅତେସି ମାତ୍ର ଏୱାସି ମିର୍କାମାସ୍କା ଜାର୍ନା ଆନି ପାତେକା ତାନି ତଲେ ବାସା କିତେସି ।

ଏଚିବେଲା ମରିୟମତି ଜାର୍ନା କିନିବେଲା ୱାତେ, ରୋମିୟ ସରକାର ବାରେତିଇଁ ତାମି ଆବାଁ ଟାୟୁତା ହାଜାହାଁ ଲୋକୁଣି ଏଜିକିନିତାଣା ହାଜାଲିତାକି ଜଲିତେସି । ଯୋଶେଫ ଅଡ଼େ ମରିୟମ ବାସା କିହିମାନି ନାଜରିତଟିଏ ହେକ ହାଜାହାଁ ବେଥଲିହିମ ହାଜାଲି ଲାଗିତେ ଏନାଃକି ଇଚିସାରେ ତାମି ଆବାଁ ଗଚି ଦାଉଦତି ଗାଡ଼ା ବେଥଲିହିମ ମାଚେ ।

ଏୱା ଏଚିବେଲା ବେଥଲିହିମତା ଏତୁ, ତାମ୍ଗେ ଡ଼ୟାଲିତାକି ଟାୟୁ ହିଲାଃତେ । ପଶୁଁ ଡ଼ଇନି ଇଜ ତାମ୍ବୁ ଟାୟୁ ବେଟା ଆତୁ । ଡାଲୁ ଏମ୍ବାଆଁ ଜାର୍ନା ଆହା ମାଚେ ଅଡ଼େ ତାନି ଆୟା କଡିଁ ତିନି ଦନିତା ତ୍ରିପ୍ହାମାଚେ, ଏନାଆତାକି ଇଚିସାରେ ତାଂଗେ ତ୍ରିପ୍ହାଲିତାକି ତାମି ପାସ୍ପନି ଜିକେଏ ହିଲାଃତେ । ଏୱା ତାଙ୍ଗେ ଯୀଶୁ ଦରୁ ଇଟିତୁ ।

ଏ ଲାଆଁ ଟଟ ର ବାଡ଼ାତା କଚେକା ଗଡ୍କା ତାମି ପଶୁଁଣୀ କାଚି ମାଚେରି । ର ଉଜେଡ଼ି ଦୂତୁ ତାମି ଡାଗେ ନିତେ, ଏୱାରି ଆଜାହାଚେରି । ଦୂତୁ ଜଲିତେ “ଆଜାଃଦୁ, ନାନୁ ମି ତାକି ର ନେହି କାବ୍ରୁ ଚାଚା ମାଃଇଁ । ମାହାପୁରୁ ଖ୍ରୀଷ୍ଟ ବେଥଲିହିମତା ଜାର୍ନା ଆହାମାନେସି!”

“ଏ ଡାଲୁତିଇଁ ପାରାଦୁ, ଅଡ଼େ ମିରୁ ଏୱାଣାଇଁ ହାଃଲାତି ଦନିତା ହେମ୍ବରି ପ୍ଡ଼ିକ୍ୱି ଆହା ଡ଼ଇନେ ଅଡ଼େ ଡୁରାଣାଇଁ ମେହ୍ଦେରି । “ହାଗୁ ଦୂତୁୟାଁ ତଲେ ବର୍ତି ଆତୁ ଅଡ଼େ ମାହାପୁରୁତି ଗାଉରମି କିତୁ ଅଡ଼େ ଜଲିତୁ, “ଲାକମାନି ଲୋକୁତାଣା ମାହାପୁରୁତି ଗାଉରମି ଅଡ଼େ ଦାର୍ତିତା ତାନି ରାହାଁ ମାଣ୍ସି ତାଣା ହିତିଡ଼ି ୱାପେ !”

ଗଡ଼୍କାଁ ଜିକି ଜିକି ଯୀଶୁ ଏମିନିତାଣା ମାଚେସି ଏମ୍ବାଆଁ ଏତେରି ଅଡ଼େ ଏୱାରି ତାଂଗେ ଦୂତୁ ଜଲାମାନି ଲେହେଁ ହାଃଲାତା କଡିଁ ତିନି ଦନିତା ହୁଞ୍ଜାମାନାଣାଇଁ ମେସ୍ତେରି । ଏୱାରି ହାରେକା ରାହାଁ ଆହାମାଚେରି । ଗଡ଼୍କାଁ ବାଡ଼ାତା ଏତେରି ଏମିନିତାଣା ତାମି ମେଣ୍ଡାଁ ମାଚୁ ଅଡ଼େ ଏୱାରି ଏନାଆଁ ୱେଞ୍ଜାମାଚେରି ଅଡ଼େ ମେସାମାଚେରି ଏଦାଆଁ ତାକି ମାହାପୁରୁତି ଗାଉରମି କିହିମାଚେରି ।

ସାଣେକା ଡାୟୁ, ପୂର୍ବ ଦେଶାଟି ୱାହାମାନି ପଣ୍ଡିତୟାଁ ହାଗୁଟି ର ମସ୍ତରତି ହୁକା ମେସ୍ତେରି । ଏୱାରି ହିୟାଁତା ଇଟିତେରି ଅଡ଼େ ଯିହୁଦୀଁତି ପୁଃନି ରାଜା ଜାର୍ନା ଆନି କାତା ତେଲ୍ପି କିହି ମାଚେରି । ଏଦାଆଁତାକି, ଏୱାରି ଇ ରାଜାଇଁ ମେସାଲି ତାକି ହେକଟି ୱାହି ମାଚେରି । ଏୱାରି ବେଥଲିହିମତା ୱାତେରି ଅଡ଼େ ଯୀଶୁ ଅଡ଼େ ତାନି ଆୟା ଆବା ଏମିନି ଇଜ ଡ଼ଇ ମାଚେରି ଏ ଇଲୁ ବେଟା ଆତେରି ।

ପଣ୍ଡିତୟାଁ ଏଚିବେଲା ଯୀଶୁଇଁ ତାନି ଆୟାତଲେ ମେସ୍ତେରି, ଏୱାରି ବୁମିତା କୁତିକିହାଁ ତାଂଗେ ଜହରା କିତେରି । ଏୱାରି ଯୀଶୁଇଁ ଦାରାଗାଟି ଜିନିଷ ହିତେରି । ତାନି ଜେଚ ଏୱାରି ଯାହାର ଇଜ ୱେଣ୍ଡା ୱାତେରି ।