22. ଡୁବକ ଯୋହନ ଜାର୍ନା

ନକେଏ, ମାହାପୁରୁ ତାନି ଦୂତୁୟାଁ ଅଡ଼େ ଭାବବାଦୀଁଟିଏ ଜଲାମାଚେସି । ମାତ୍ର ୪୦୦ ବାର୍ଷା ହାଚେ ମାତ୍ର ଏ ପାତେକା ଏୱାରାଇଁ ଜଲା ଲାଃତେସି । ସାଣେକା ଟିଏ ର ଦୂତୁ ମାହାପୁରୁଟିଏ ର କାତା ଚାଚିହିଁ ଯିଖରିୟ ଦରୁଗାଟି ର ବୁଢ଼୍ହା ତାଣା ୱାତେ । ଯିଖରିୟଅଡ଼େ ତାନି ଡକ୍ରୀ ଇଲିଶାବେଥ ମାହାପୁରୁତି ଲୋକୁ ମାଚୁ, ମାତ୍ର ଏଦି ପାଟାଲି ଆଡାଃଗାଟାଇ ମାଚେ ।

ଦୂତୁ ଯିଖରିୟଇଁ ଜଲିତେ, “ନି ଡକ୍ରୀ ର କକାଣାଇଁ ଜାର୍ନା ହିନେ । ନିନୁ ଏୱାଣାଇଁ ଯୋହନ ଇଞ୍ଜି ଦରୁ ଇଟିଦି । ଏୱାସି ପବିତ୍ର ଆତ୍ମାତଲେ ଡ଼ଇନେସି ଅଡ଼େ ଖ୍ରୀଷ୍ଟତାକି ଲୋକୁଣି ତିଆର୍ କିନେସି । ଯିଖରିୟ ଜଲିତେସି “ନାନୁ ଅଡ଼େ ନା ଡକ୍ରୀ ତ ପାଟାଲି ତାକି ହାରେକା ବୁଢ଼୍ହା ବୁଢ଼୍ହି ଆତମିଏ ! ଇଦି ଆନେ ଇଞ୍ଜି ଏନିକି ନାନୁ ପୁଇଁ ?”

ଦୂତୁ ଯିଖରିୟଇଁ ଜଲିତେ “ଇ ନେହି କାବ୍ରୁ ନିଂଗ ହିହାଲିତାକି ମାହାପୁରୁ ପାଣ୍ଡାମାଞ୍ଜାନେସି । ଏନାଆତାକି ଇଚିସାରେ ନିନୁ ନା ତାଣା ନାମାଃତି ଲାକା ମିର୍ଏସି ଜାର୍ନା ଆନି ପାତେକା ନିନୁ କାତା ଆହାଲି ଆଡଃତି ।” ରେଟୁଲିଏ ଯିଖରିୟ କାତା ଜଲାଲି ଆଡାଃତେସିଦେହେଁ । ଏଦାଆଁ ଜେଚ ଏ ଦୂତୁ ତାଂଗେ ପିସା ହାଚେ । ଇଦାଆଁ ଜେଚ, ଯିଖରିୟ ଇଜ ୱେଣ୍ଡା ହାଚେସି ଅଡ଼େ ତାନି ଡକ୍ରୀ ବାଣ୍ଡିତା ଆତେ ।

ଇଲିଶାବେଥ ଏଚିବେଲା ଶ ଲେଞ୍ଜୁତାକି ବାଣ୍ଡିତା ଡାଲୁ ମାଚେ,ଏ ଦୂତୁ ଇଲିଶାବେଥତି ଲୋକୁଇଁ, ଚଞ୍ଜା ଆତେ ତାନି ଦରୁ ମରିୟମ ମାଚେ । ଏଦି ର ଦାଂଏଣୀ ମାଚେ ଅଡ଼େ ଯୋଷେଫ ଦରୁଗାଟାସି ରଅଣାଇଁ ବିହାତାକି ରିସ୍ପି ଆହାମାଚେ । ଦୂତୁ ଜଲିତେ “ନିନୁ ବାଣ୍ଡିତା ଆହାଁ ର ମିର୍ଏଣାଇଁ ଜାର୍ନାକିଦି । ନିନୁ ତାନି ଦରୁ ଯୀଶୁ ଇଟିଦି । ଏୱାସି ଲାକପୁରୁତି ମାହାପୁରୁତି ମିର୍ଏସି ଆନେସି ଅଡ଼େ କାଲାକାଲାତାକି ତାକି କିନେସି ।”

ମରିୟମ ଜଲିତେ “ଇଦି ଏନିକି ଆନେ, ଏନିକିଇଚିସାରେ ନାନୁ ର ଦାଂଏଣୀ ତେଏଁ ?” ଦୂତୁ ତେଲ୍ପିକିତେ “ପବିତ୍ର ଆତ୍ମା ନି ଲାକ ୱାନେ, ଅଡ଼େ ମାହାପୁରୁତି ବ୍ଡ଼ାୟୁ ନିଂଗ ପ୍ଡ଼ିକ୍ହାନେ । ଏଦାଆଁତାକି ଏ ଡାଲୁ ଦାର୍ମୁ ଅଡ଼େ ମାହାପୁରୁତି ମିର୍ଏସି ଆନେସି ।” ଦୁତୁ ଏଦାନୀ ଏନାଆଁ ଜଲାମାଚେ ମରିୟମ ଏଦାଆଁ ନାମିତେ ।

ଦୂତୁ ମରିୟମଇଁ ଜଲିତି ଜେଚ, ଏଦୀ ହାଜାହାଁ ଇଲିଶାବେଥ ତାଣା ହାଚେ । ଇଲିଶାବେଥ ମରିୟମଇଁ ଜହରା କିତେ ୱେଞ୍ଜିତି ରେଟୁଲିଏ ଇଲିଶାବେଥ ବାଣ୍ଡିତା ମାନି ଡାଲୁ ଡେଁୱିତେ । ତାମ୍ଗେ ମାହାପୁରୁ ଏନାଆଁ କିହାମାଚେସି ଏକାତାଇଁ ଅଣପିହିଁ ଆୟାସ୍କା କୁଡ଼ାଆହାଁ ରାହାଁ ଆତୁ । ମରିୟମ ଇଲିଶାବେଥଇଁ ଆଣ୍ଡିତି ତିନି ଲେଞ୍ଜୁ ଡାୟୁ ମରିୟମ ଇଜ ୱେଣ୍ଡିତେ ।

ଇଲିଶାବେଥ ତାନି ଡାଲୁଇଁ ଜାର୍ନା ହିତି ଡାୟୁ, ଯିଖରିୟ ଅଡ଼େ ଇଲିଶାବେଥ, ଦୂତୁ ହୁକୁମ ହିତି ଲେହେଁ ଯୋହନ ଦରୁ ହିତୁ । ତାନିଜେଚ ମାହାପୁରୁ ଯିଖରିୟଇଁ କାତା ଜଲିନି ତାକି ୱେଣ୍ଡେଏ ଆଣ୍ଟୱା କିତେସି । ଯିଖରିୟ ଜଲିତେସି “ମାହାପୁରୁତି ଗାଉରମି ଆପେ, ଏନାଆତାକିଇଚିସାରେ ଏୱାସି ତାମି ଲୋକୁଣି ଅଣପିମାନେସି !” ନା ମିର୍ଏତି, ନିଂଗ ଲାକପୁରୁତି ମାହାପୁରୁତି ଭାବବାଦୀ ଇଞ୍ଜି ହାଟ୍କି ଆନେ ଏମିନିଗାଟାସି ଏନିକି ଲୋକୁ ତାମି ପାପୁଟି କ୍ଷମା ବେଟା ଆନେରି ଏଦାଆଁ ଏୱାରାଇଁ ୱେହ୍ନେସି ।