21. ମାହାପୁରୁ ଖ୍ରୀଷ୍ଟତି କାତା ଇଟିନେସି

ମାଟ୍ନିଟିଏ ମାହାପୁରୁ ଖ୍ରୀଷ୍ଟଇଁ ପଣ୍ଡାଲି ତାକି ଅଣପାମାଚେସି । ଖ୍ରୀଷ୍ଟତି କାତା ନକେଏ କାତା ହିତାଇ ଆଦମ ଅଡ଼େ ହବା ତାଣାଟି ୱାତେ । ମାହାପୁରୁ କାତା ହିତେସି ଯେ ହବାତି ଗଚିଟି ରଅସି ଜାର୍ନା ଆନେସି ଆମିନିଗାଟାସି ରାଚୁତି ତ୍ରାୟୁଁଇଁ ଗୁଣ୍ଡା କିନେସି । ହବାଇଁ ଏମିନି ରାଚୁ ସାକ୍ରି ୱେସାମାଚେ ଏଦି ଶୟତାନ ମାଚେ । କାତାହିତି ଅର୍ତ ମାଚେ ଯେ ଖ୍ରୀଷ୍ଟ ଶୟତାନଇଁ ହାର କିନେସି ।

ମାହାପୁରୁ ଏ ଅବ୍ରାହାମ କାତା ହିହାଁ ଜଲିତେସି ଯେ ତାନି ତାକି ଦାର୍ତିତି ବାରେ ଲୋକୁଦଲ ବର ବେଟା ଆତେରି । ଇ ବର ରାନେ ଏଚିବେଲା ଖ୍ରୀଷ୍ଟ ନକିତା ର ଦିନା ୱାନେସି । ଦାର୍ତିତା ମାନି ବାରେ ଲୋକୁଦଲ ଗେଲ୍ପି ଆହାଲି ତାକି ଏୱାସି କିନେସି ।

ମାହାପୁରୁ ମୋଶାଇଁ କାତା ହିହାଁ ଜଲିତେସି ଯେ ନକିତା ଏୱାସି ମୋଶାତି ଲେହେଁ ର ଭାବବାଦୀଇଁ ନିପ୍ନେସି । ଖ୍ରୀଷ୍ଟତି କାତା ଇଦି ଅର କାତାହିତାଇ ଏମିନିଗାଟାସି ଜେଚବେଲା ର ଦିନା ୱାନେସି ।

ମାହାପୁରୁ ରାଜା ଦାଉଦଇଁ କାତା ହିହାମାଚେସି ଯେ ତାନି ଗଚିଟିଏ ରଅସି ମାହାପୁରୁତି ଲୋକୁତାକି କାଲାକାଲାତାକି ରାଜା ଆନେସି । ଏଦି ଇଲେହେଁ ତେଲ୍ପି କିହିମାଞ୍ଜାନେ ଯେ ଖ୍ରୀଷ୍ଟ ରାଜା ଦାଉଦତି ଗଚି ବିତ୍ରା ରଅସି ଆନେସି ।

ଯିରିମିୟ ଭାବବାଦୀଟି ମାହାପୁରୁ କାତାହିତେସି ଯେ ଏୱାସି ର ପୁଃନି ମେରା କିନେସି, ମାତ୍ର ମାହାପୁରୁ ଇସ୍ରାଏଲତଲେ ସିନୟ ହରୁତା ଏମିନି ମେରା କିହା ମାଚେସି ଏଲେତି ମେରା ଆଃଏ । ପୁଃନି ମେରାତା, ମାହାପୁରୁ ଲୋକୁତି ହିୟାଁତା ତାନି ପାଣ୍ଇ ମେରା କୁତିନେସି, ଲୋକୁ ରଅ ରଅରି ମାହାପୁରୁଇଁ ପୁନେରି, ଏୱାରି ତାମି ଲୋକୁ ଆନେରି ଅଡ଼େ ମାହାପୁରୁ ତାମି ପାପୁଇଁ କ୍ଷମା କିନେସି । ଖ୍ରୀଷ୍ଟ ପୁଃନି ମେରା ମାଠ୍ନେସି ।

ମାହାପୁରୁତି ଭାବବାଦୀ ଅଡ଼େ ଜିକେଏ ଏଲେ ଇଚେରି ଯେ ଖ୍ରୀଷ୍ଟ ରଅସି ଭାବବାଦୀ, ଯାଜକ ଅଡ଼େ ରାଜା ଜିକେଏ ଆନେସି । ଭାବବାଦୀ ଆହିମାନେସି ଏମିନି ଗାଟାସି ମାହାପୁରୁତି ବୋଲୁ ୱେଞ୍ଜାହାଁ ଏ ବୋଲୁଇଁ ଲୋକୁତାଣା ୱେକ୍ ନେସି । ମାହାପୁରୁ ପାଣ୍ଡାଲି ତାକି କାତା ହିହାମାନି ଖ୍ରୀଷ୍ଟ ରଅସି ସାତାଗାଟି ଭାବବାଦୀ ଆନେସି ।

ଇସ୍ରାଏଲତାରି ଯାଜକୟାଁ ମାହାପୁରୁ ତାଣା ଲୋକୁତାକି ତାମି ପାପୁତି ବାକା ବାଟା ପୂଜା ହିହିମାଚେରି । ଯାଜକୟାଁ ଜିକେଏ ଲୋକୁ ତାକି ମାହାପୁରୁତାଣା ପାର୍ତନା କିହିମାଚେରି । ମସୀହ ଆହିମାନେସି ଏମିନିଗାଟାସି ସାତା ମହାଯାଜକ ଅଡ଼େ ଜାହାରାଇଁ ମାହାପୁରୁତି ର ସାତା ପୂଜା ହିତି ଲେହେଁ ପୂଜା ହିନେସି ।

ର ରାଜା ଏୱାସି ଏମିନିଗାଟାସି ର ରାଜିତିଇଁ ତାକି କିନେସି ଅଡ଼େ ତାନି ଲୋକୁଣି ବିଚାରା କିନେସି । ଖ୍ରୀଷ୍ଟ ରଅସି ନେହିଁ ରାଜା ଆନେସି ଏମିନିଗାଟାସି ପୁର୍ବେତିଆବାଁ ଦାଉଦତି ସିଂହାସାଣୀତା କୁଗିନେସୀ । ଏୱାସି ବାରେ ଦାର୍ତିଇଁ କାଲାକାଲାତାକି ତାକି କିନେସି, ଅଡ଼େ ସବୁବେଲା ସାତା ବିଚାରା କିନେସି ଅଡ଼େ ନେହିଁ ତାକି ତିରି କିନେସି ।

ମାହାପୁରୁ ଭାବବାଦୀଣୀଁ ହାରେକା ଏଟ୍କା କାତା ଖ୍ରୀଷ୍ଟତି କାତା ଭାବବାଣୀ କିହାମାଚେସି । ଭାବବାଦୀ ମଲାଖୀ ନକେଏ ଜଲାମାଚେସି ଯେ ମସୀହ ୱାନି ନକେଏ ର କାଜା ଭାବବାଦୀ ୱାନେସି । ଭାବବାଦୀ ଯିଶାଇୟ ଭାବବାଣୀ କିହାମାଚେସି ଯେ ଖ୍ରୀଷ୍ଟ ରଅସି ଦାଂଏଣୀ ପଦା ବାଣ୍ଡିତା ଜାର୍ନା ଆନେସି । ମୀଖା ଭାବବାଦୀ ଜଲିତେସି ଯେ ଏୱାସି ଗାଡ଼ାତା ଜାର୍ନା ଆନେସି ।

ଯିଶାଇୟ ଭାବବାଦୀ ଜଲିତେସି ଯେ ଖ୍ରୀଷ୍ଟ ଗାଲିଲୀତା ବାସା କିନେସି, ଡିତି ହିୟାଁଣୀ ହିତିଡ଼ିତି ବୋଲୁ ହିନେସି, ଅଡ଼େ ବନ୍ଦୀଗାଟାରିଇଁ ମୁକ୍ଲ ଆତି ବୋଲୁ ୱେକ୍ନେସି ଅଡ଼େ ବନ୍ଦୀଗାଟାରାଇଁ ମୁକ୍ଲ କିନେସି । ଏୱାସି ଅଡ଼େ ଜିକେଏ ଭାବବାଣୀ ଜଲିତେସି ଯେ ଏୱାସି ଆଡାଃଗାଟାରାଇଁ ଏମିନିଗାଟାରି ୱେନେରି, ମେହ୍ନେରି, ଜଲିନେରି ଅଡ଼େ ତାକାଲି ଆଡାଃଗାଟାରି ଏୱାରାଇଁ ନେହି କିନେସି ।

ଭାବବାଦୀ ଯିଶାଇୟ ଜିକେଏ ଭାବବାଣୀ ଜଲିତେସି ଯେ ଖ୍ରୀଷ୍ଟଇଁ ଅପଃରି ଅଡ଼େ ଉଜେଃନେଏ ୱେନେରି । ଏଟ୍କା ଭାବବାଦୀୟାଁ ଭାବବାଣୀ ଜଲିତେରି ଯେ ଏମିନିଗାଟାରି ଖ୍ରୀଷ୍ଟଇଁ ପାଇତେରି ଏୱାରି ତାନି ହେମ୍ବରୀ ତାକି ଗୁଲିବାଣ୍ଟ କିନେରି ଅଡ଼େ ର ତଡୁଗାଟାସି ନାମୁଡିକ୍ନେସି । ଯିଖରିୟ ଭାବବାଦୀ ଭାବବାଣୀ ଜଲିତେସି ଯେ ଖ୍ରୀଷ୍ଟଇଁ ନାମୁଡିକ୍ହାଲି ଏ ତଡୁଗାଟାଣାଇଁ ତିରିଶ୍ ଗଟା ଡାବୁ ହିନେରି ।

ଭାବବାଦୀୟାଁ ଅଡ଼େ ଜିକେଏ ଜଲାମାଚେରି ଖ୍ରୀଷ୍ଟ ଏନିକି ହାନେସି । ଯିଶାଇୟ ଭାବବାଣୀ ଜଲିତେସି ଯେ ଲୋକୁ ଖ୍ରୀଷ୍ଟଇଁ ହୁପିନେରି, ତାଂଗେ ଲାଜାକିହିଁ କାକ୍ନେରି ଅଡ଼େ ତାଂଗେ ବେଃନେରି ( ବିଦା, ଲାତା ) । ଏୱାରି ତାଂଗେ ବେଃନେରି ଅଡ଼େ ଏୱାସି ହାରେକା ତାଡ଼ନା ଅଡ଼େ କଷ୍ଟତା ହାନେସି ଏନି ଲାଗେଃତି କାମା କିଃଆନା ।

ଭାବବାଦୀୟାଁ ଅଡ଼େ ଜିକେଏ ଜଲିତେରି ଯେ ଖ୍ରୀଷ୍ଟ ସାତାଗାଟାସି ଆନେସି ଅଡ଼େ ଏମିନିଗାଟାଣା ୱାଇ ଏନି ପାପୁ ଜିକେଏ ଡ଼ୟେଏ । ଏୱାସି ଏଟ୍କା ଲୋକୁତି ପାପୁତି ବାକାଇଁ ତାନୁ ଅହାଲି ତାକି ହାନେସି । ତାମି ବାକା ମାହାପୁରୁ ଅଡ଼େ ଲୋକୁ ବିତ୍ରା ସୁକୁ ତାନେ । ଇଦାଆଁତାକି, ଖ୍ରୀଷ୍ଟ ହାହାଲି ତାକି ମାହାପୁରୁ ଅଣପିତେସି ।

ଭାବବାଦୀୟାଁ ଭାବବାଣୀତା ଜଲିତେରି ଯେ ଖ୍ରୀଷ୍ଟ ହାନେସି ଅଡ଼େ ମାହାପୁରୁ ତାଂଗେ ନିକ୍ନେସି । ଖ୍ରୀଷ୍ଟତି ହାକି ଅଡ଼େ ୱେଣ୍ଡେନିଂଗିନାଇ ପାପୁ ଲୋକୁଣି ଗେଲ୍ପିନ ଅଡ଼େ ପୁଃନି ମେରା ମାଠ୍ନି ତାକି ମାହାପୁରୁ ତାନି ଅଣପୁଇଁ ଆୱି କିନେସି ।

ମାହାପୁରୁ ଖ୍ରୀଷ୍ଟ କାତାତି ଭାବବାଦୀଣୀଁ ହାରେକା କାତା ୱେସ୍ତେସି, ମାତ୍ର ଖ୍ରୀଷ୍ଟ ଇ ବାରେ ଭାବବାଦୀଁଟିଏ ଆମ୍ବାଃରି ବେଲାତା ଜିକେଏ ୱାହା ହିଲାଃତେସି । ଇ ବାରେ ଭାବବାଣୀ ହିନି ୪୦୦ଟିଏ ଲାକ ବାର୍ଷା ଡାୟୁ, ବେଲାତାଏ, ମାହାପୁରୁ ଇ ଦାର୍ତିତା ଖ୍ରୀଷ୍ଟଇଁ ପାଣ୍ଡିତେସି ।