20. ବାସାକିନାଇ ଅଡ଼େ ୱେଣ୍ଡେ ୱାନାଇ

ରି ରାଜି ଜିକେଏ ଇସ୍ରାଏଲରାଜି ଅଡ଼େ ଯିହୁଦା ରାଜି ମାହାପୁରୁତି ବିରୁଦ୍ଦ ପାପୁ କିତେସି । ମାହାପୁରୁ ସିନୟ ହରୁତା ତାମି ତଲେ ଏମିନି ମେରା କିହାମାଚେସି ଏୱାରି ଏ ମେରାଇଁ ଡିକ୍ହାସ୍ତେରି । ଲୋକୁ ଏନିକି ମନ ୱେଟ୍ନେରି ଅଡ଼େ ୱେଣ୍ଡେଏ ତାନି ପୂଜା କିନେରି ଏଦାଆଁ ତାକି ମାହାପୁରୁ ତାନି ଭାବବାଦୀୟାଁଇଁ ପାଣ୍ଡାହାଁ ତେଲ୍ପିକିହାମାଚେସି, ମାତ୍ର ଏୱାରି ଏଦାଆଁ ନାମାଲି କୁତେରି ।

ଏଦାଆଁ ତାକି ମାହାପୁରୁ ରି ରାଜିଇଁ ଜିକେଏ ତାମି ଶାତ୍ରୁୟାଁଟି କ୍ଡ଼ୁପ୍ନାଶ୍ ଆହାଲିତାକି ହୁକୁମ୍ ହିତେସି । ର ବ୍ଡ଼ାୟୁଗାଟି ଅଡ଼େ ହିୟାଁ ହିଲାଃଗାଟି ଦେଶା ଆସିରୀୟ ଦେଶା ଇସ୍ରାଏଲ ଦେଶାଇଁ ନାଶ୍ କିତେରି । ଇସ୍ରାଏଲତା ମାନି ହାରେକା ଲୋକୁଣି ଆସିରୀୟତାରି ପାଇତେରି, ଦାରାଗାଟି ଜିନିଷଇଁ ଅହାସ୍ତେରି, ଅଡ଼େ ଦେଶାତି ହାରେକାଇଁ ହୁଡାସ୍ତେରି ।

ଆସିରୀୟତାରି ବାତ୍କୁଗାଟାରାଇଁ, ହକ୍ ମାନି ଲୋକୁଣି ଏଲେହେଁ ବାରେ ନେତାଣୀ କୁଡ଼ି କିତେରି ଅଡ଼େ ଏୱାରାଇଁ ଆସାହାଁ ଆସିରୀୟତା ହାତୁସ୍ତେରି । ୱାର୍ଇ ହିଲାଃଗାଟାରି ଇସ୍ରାଏଲତାରି ଏମିନିଗାଟାରାଇଁ ପାଇୱି ଆହାଲାଃତେ ଏୱାରି ଏ ଇସ୍ରାଏଲ ରାଜିତା ଡ଼ଇତେରି ।

ଏଦାଆଁ ଜେଚ ଆସିରୀୟତାରି ବିଦେଶତାରାଇଁ ତାମି ଦେଶାତା ବାସା କିହାଲିତାକି ତାତେରି ଏମିନିତାଣା ଇସ୍ରାଏଲତି ରାଜି ମାଚେ । ବିଦେଶତାରି ନାଶ୍ ଆହାମାନି ଗାଡ଼ାଁଣୀ ୱେଣ୍ଡେଏ ତିଆର୍ କେପିତେରି ଅଡ଼େ ଇସ୍ରାଏଲତାରାଇଁ ବିହା ଆତେରି ଏମିନିଗାଟାରି ଏମ୍ବାଆଁ ଡ଼ୟାହାଜାମାଚେରି । ଏମିନି ଇସ୍ରାଏଲତାରାତି ଗଚି ବିଦେଶତାରାଇଁ ବିହା ଆହା ମାଚେରି ଏାୱାରାଇଁ ଶମିରୋଣିୟ ୱେସ୍ପିଆତେ ।

ଯିହୁଦା ରାଜିତା ଲୋକୁ ମେସ୍ତେରି ଯେ ଇସ୍ରାଏଲ ରାଜିତି ଲୋକୁ ମାହାପୁରୁଇଁ ନାମିଲାଃତେରି ଅଡ଼େ ତାନି ବୋଲୁ ତଲେ ତାକାଃତି ତାକି ଏୱାରାଇଁ ବାକା ହିତେସି । ମାତ୍ର ଏୱାରି କିଣାନତି ପେଣ୍କା ତଲେ ବୋମାଣୀ ପୂଜା କିହି ମାଚେରି । ଏୱାରାଇଁ ତେଲ୍ପି କିହାଲିତାକି ମାହାପୁରୁ ଭାବବାଦୀଁଣୀ ପାଣ୍ଡା ମାଚେସି, ମାତ୍ର ଏୱାରି ୱେନାଃତେରି ।

ଆସିରୀୟତାରି ଇସ୍ରାଏଲ ରାଜି ନାଶ୍ କିତି ୧୦୦ ବାର୍ଷା ଡାୟୁ, ମାହାପୁରୁ ବାବିଲତି ରାଜା ନାବୁଖଦ୍ନିସ୍ଚର ଯିହୁଦା ରାଜି ଯୁଦ୍ଦୁ କିହାଲିତାକି ପାଣ୍ଡିତେସି । ବାବିଲୋନ ର ବ୍ଡ଼ାୟୁଗାଟି ରାଜି ମାଚେ । ଯିହୁଦାତି ରାଜା ନବୁଖେଦ୍ନିସ୍ଚରତି ହଲିଆ ଆହାଲି ତାକି ତଡ଼ୁ ଆତେସି ଅଡ଼େ ବାରେ ବାର୍ଷା ତାଂଗେ ହାରେକ ଡାବୁଁ ହିତେସି ।

ମାତ୍ର ସାଣେକା ବାର୍ଷା ଡାୟୁ, ଯିହୂଦାତି ରାଜା ବାବିଲୋନ ବିରୁଦ୍ଦ କାଲ ଆତେସି । ଏଦାଆଁତାକି, ବାବିଲୋନତାରି ୱେଣ୍ଡା ୱାହାଁ ଯିହୂଦା ରାଜିଇଁ ଯୁଦ୍ଦୁ କିତେରି । ଏୱାରି ଯିରୁଶାଲମ ଗାଡ଼ା ହିତେରି, ମନ୍ଦିରଇଁ ନାଶ୍ କିତେରି, ଅଡ଼େ ଗାଡ଼ାତି ଅଡ଼େ ମନ୍ଦିରତି ଦିଣ୍‌ସୁ ବାରେ ଅହାସ୍ତେରି ।

କାଲ ଆହାଲିଏ ଯିହୂଦାତି ରାଜାଇଁ ବାକା ହିହାଲି ତାକି ନବୁକଦନିସ୍ଚର ସୈନ୍ୟୟାଁ ରାଜାତି ମିର୍କାୟାଁ ନକିତା ପାଇତେସି ଅଡ଼େ ଏୱାଣାଇଁ କାଣା କିହାସ୍ତେରି । ଏଦାଆଁ ଜେଚ, ଏୱାସି ଏନିକି ବାବିଲୋନତି ଜେଲତା ହାନେସି ଏଦାଆଁତାକି ଏୱାରି ତାଂଗେ ଅହାସ୍ତେରି ।

ନବୁଖଦ୍ନିସ୍ଚର ଅଡ଼େ ତାନି ସୈନ୍ୟ ଯିହୁଦାତି ବାରେଇଁ ଯିହୁଦାତା ପିସା ହାଚେରି ଅଡ଼େ ସାରିଆତା କାମା କିହାଲି ୱାର୍ଇ ହିଲାଃଗାଟାରାଇଁ ଯିହୂଦାତା ପିସା ହାଚେରି । ମାହାପୁରୁ ଲୋକୁଣି କାତାହିତି ଦେଶାଟି ଆଡିନି ଏଚେକା ଅହାମାନି ବେଲାତିଇଁ ବାସା ଆନାଣୀଇଁ ୱେସ୍ପି ଆହାମାନେ ।

ଆତି ହିଁ ଜିକେଏ ପାପୁ ତାକି ମାହାପୁରୁ ଏୱାରାଇଁ ବାସାଟାୟୁ ଟି ଏଟ୍କା ଦେଶା ପାଣ୍ଡିତେସି, ଅଡ଼େ ଜିକେଏ ଏୱାସି ଏୱାରାଇଁ ଅଡ଼େ ତାମି ବୋଲୁଇଁ ବାଣା ଆହାଲାଃତେସି । ମାହାପୁରୁ ତାମି ଲୋକୁଇଁ ମେସି ମାଚେସି ଅଡ଼େ ତାମି ଭାବବାଣୀ ତଲେ ଏୱାରି ତାଣା କାତା ଜଲିତେସି । ଏୱାସି କାତା ଇଟା ମାଚେସି ଯେ, ସତୁରି ବାର୍ଷା ଯେଚ ଏୱାରି ଅଡ଼େ କାତା ଇଟା ମାଚି ଦେଶାତା ୱେଣ୍ଡା ୱାନେରି ।

ସତୁରି ବାର୍ଷା ଡାୟୁ, ପାର୍ସିୟାଁ ରାଜା ସାଇରସ ବାବିଲୋନ୍ ଇଁ ହାର କିତେରି, ଏଦାଆଁ ତାକି ପାରସ୍ୟ ଦେଶା ବାବିଲୋନିୟ ଦେଶା ଟାୟୁ ଅତେରି । ନେଏଁ ‌‌‌‍ ଇସ୍ରାଏଲ୍ ତାରାଇଁ ଯିହୂଦୀ ଇଞ୍ଜି ୱେଖ୍ ହେରି ଅଡ଼େ ଏୱାରି ଏୱାରାଇଁ ସବୁ ଦିନା ବାବିଲୋନ ତା ବାସା କିତେରି ଅଡ଼େ ଏଚର୍ ଜାଣା ଯିହୂଦୀ ବୁଡ଼ହାଁ ଯିହୁଦା ଟାୟୁ ଇଁ ଅଣପିତେରି ।

ପାରସ୍ୟ ଦେଶା ଆଣ୍ଟ୍ୱା ମାଚେ ଅଡ଼େ ଇଦି ହାର କିହାଁ ମାଚେରି ଏମ୍ବାଟିଏ ଲୋକୁଁ ତାକି କାର୍ମା ମେସ୍ତେସି । ସାଇରସ୍ ପାରୋସ୍ୟତି ରାଜା ଆନି ସାଣେକା ବିତ୍ରା, ଏୱାସି ର ହୁକୁମୀ ହିତେସି ଯେ ଆମ୍ବାଃରି ପାରସ୍ୟ ଦେଶା ପିସାହାଁ ଯିହୂଦା ଦେଶାତା ୱେଣ୍ଡା ହାଜାଲି ଅଣପିନାରି ଏୱାରି ଏମ୍ବାଆଁ ୱେଣ୍ଡାହାଜାଲି ଆଡିନେରି । ଏୱାଶି ଇଲେଃଏଁ ମନ୍ଦିର ପୁଃନି ତଲେ କେପାଲି ଡାବୁଁ ହିତେସି! ଅଡ଼େ ବାସାଟାୟୁତା ସତୁରି ବାର୍ଷା ଡ଼ୟିତି ଜେଚ, ଯିହୂଦୀୟାଁ ୱାଇ ର ଉଣା ଦଲ ଯିହୁଦାତା ମାଚାରି ଯିରୁଶାଲମ୍ ଗାଡ଼ାତା ହାଚେରି ।

ଲୋକୁୟାଁ ଏଚିବେଲା ଯିରୁଶାଲମ୍ ତା ଏତେରି, ଏୱାରି ମନ୍ଦିର ଅଡ଼େ ଗାଡ଼ା ସାରିୱାକି ମାନି ଗୁଡ୍ରା ପୁଃନି ତଲେ କିତେରି । ଆତିହିଁ ଜିକେ ଏୱାରି ନେଏ ପାତେକା ଏଟ୍କା ଲୋକୁ ଜେଚ ତାକି ମାଚେରି, ଅଡ଼େ ର ଦେବା ଏୱାରି କାତା ଇଟିତି ଦେଶାତା ବାସା କିତେରି ଅଡ଼େ ମନ୍ଦିରତା ପ୍ରାତନା କିତେରି ।