19. ଭବିଷ୍ୟତବକ୍ତାୟାଁ (ଭାବବାଦୀୟାଁ)

ଇସ୍ରାଏଲତାରାତି ପୁର୍ବେତା, ମାହାପୁରୁ ତାମି ଡାଗେ ଭାବବାଦୀଣୀ ପାଣ୍ଡାମାଚେସି । ଭାବବାଦୀୟାଁ ମାହାପୁରୁ ଟିଏ କାବ୍ରୁ ୱେଞ୍ଜାହାଁ ଅଡ଼େ ଏଦାଆଁଜେଚ ମାହାପୁରୁତି କାବ୍ରୁୟାଁ ଲୋକୁଣି ୱେସିମାଚେରି ।

ଆହାବ ଏଚିବେଲା ଇସ୍ରାଏଲ ରାଜିତି ରାଜା ମାଚେସି ଏଚିବେଲା ଏଲୀୟ ରଅସି ଭାବବାଦୀ ମାଚେସି । ଆହାବ ର ଲାଗେଃତାସି ମାଚେସି ଏମିନିଗାଟାସି ବାଲ୍ ଦରୁଗାଟି ର ପୁନାଃତି ପେଣ୍କାଇଁ ପୂଜା କିହାଲି ତାକି ଲୋକୁଣି ୱେସି ମାଚେସି । ଏଲୀୟ ଆହବଇଁ ଜଲିତେସି, “ନାନୁ ଜଲାଃ ପାତେକା ଇସ୍ରାଏଲ ଦେଶାତା ଏନିକି ଜିକେ ଏ ପିୟୁ ଅଡ଼େ ମାଚୁ ରିଏ ।” ଇଦାଆଁ ତାକି ଆହବ ଗାଡି କାର୍ବି ଆତେସି ।

ଏଲୀୟଇଁ ପାୟାଲିତାକି ଅଣପିନି ଆହବଟିଏ ଯାହାରାଇଁ ପାକାହରୁତାମାନି ର ହୁଟାତା ଡ଼ୁକ୍ହାଲି ତାକି ମାହାପୁରୁ ଏଲୀୟଇଁ ଜଲାମାଚେସି । ସବୁଦିନା ଲାଇ ଅଡ଼େ ଲାଆଁ ପଟାୟାଁ ରୁଟି ଅଡ଼େ ଉଂଗା ଚାଚା ହିହିମାଚୁ । ଆହବ ତାନି ସୈନ୍ୟ ଏଲୀୟଇଁ ପାରିତେରି, ମାତ୍ର ଏୱାରି ତାମ୍ଗେ ବେଟା ଆଆତେରି । କାତାରା ଇଲେକି ମାଚେ ଯେ ହୁଟା ଦିରେ ଦିରେ ୱାୟା ହାଚେ ।

ଏଦାଆଁତାକି ଏଲୀୟ ର ପାଡ଼ି ଦେଶାତା ହାତୁସ୍ତେସି । କାତାରା ୱାହାଲିଏ ଏ ଦେଶାତା ର ରାଣ୍ଡେଣୀ ଅଡ଼େ ତାନି ମିର୍ଏଣା ୱାଇ କାଦି ରାହାହାଜାମାଚେ । ଏନାଆତାକିଇଚିସାରେ ହିଲାଃତାକି କାତାରା ଆହାମାଚେ ମାତ୍ର ଏୱା ଏଲୀୟଇଁ ସେବା କିତୁ, ଅଡ଼େ ମାହାପୁରୁ ତାମ୍ଗେ କାଦି ହିତେସି ଏନିକିହିଁ ତାମି ଗହଁ ଗୁଣ୍ଡା ଡକା ଅଡ଼େ ନିୟୁଁ ଇଟିନାଇ ଏଚେଲା ରାହାହିଲାଃତେ । ଏ କାତାରା ରାନି ଏପେ ତାମି କାଦି ମାଚେ । ଏଲୀୟ ଏମ୍ବାଆଁ ହାରେକା ବାର୍ଷା ପାତେକା ଡ଼ଇତେସି ।

ତିନି ବାର୍ଷା ଡାୟୁ, ମାହାପୁରୁ ଏଲୀୟଇଁ ଇସ୍ରାଏଲ ଦେଶାତା ୱେଣ୍ଡା ହାଜାଲିତାକି ଜଲିତେସି, ଅଡ଼େ ଆହାବଇଁ ୱେସାଲି ଯେ ଏୱାସି ୱେଣ୍ଡେଏ ପିୟୁ ପାଣ୍ଡାଲି ହାଜିମାନେସି, ଏଚିବେଲା ଆହାବ ଏଲୀୟଇଁ ମେସ୍ତେସି, ଏୱାସି ଜଲିତେସି “ ଇଦି କି ନିନୁ ଦୁକୁ ଗାଡିକିନାତି!” ଏଲୀୟ ତାଂଗେ ଜଲିତେସି “ନିନୁ ଦୁକୁ ଗାଡି କିନାତି! ନିନୁ ସାତା ମାହାପୁରୁଇଁ ନାମାଃତି ଅଡ଼େ ବାଲ୍ ପେଣ୍କାଇଁ ପୂଜା କିହାମାଞ୍ଜି । ଇସ୍ରାଏଲରାଜିତା ବାରେ ଲୋକୁଣି କର୍ମିଲ ହରୁ ଡାଗେ ତାମୁ ।”

୪୫୦ ବାଲ୍ ଭବିଷ୍ୟତବକ୍ତା ତଲେ ଇସ୍ରାଏଲ ରାଜିତି ବାରେ ଲୋକୁ କର୍ମିଲ ହରୁତା ୱାତେରି । ଏଲୀୟ ଲୋକୁଣି ଜଲିତେସି, “ମିରୁ ଏଚିବେଲା ମି ମନଇଁ ବାଦ୍ଲି କିହାଁ ତାକିମାଞ୍ଜେରି ? କାଲାକାଲାତିମାହାପୁରୁ ମାହାପୁରୁ ଇଚିସାରେ, ଆତିସାରେ ତାନି ସେବା କିଦୁ ! ଅଡ଼େ ବାଲ୍ ଦେବ ମାହାପୁରୁ ଇଚିସାରେ, ତାନି ସେବା କିଦୁ!”

ଏଦାଆଁଜେଚ ଏଲୀୟ ବାଲ୍ ଭାବବାଦୀୟାଁଇଁ ଜଲିତେସି “ର କଡିଇଁ ପାୟାଦୁ ଅଡ଼େ ଏଦାଣୀ ପୂଜା ତାକି ତିଆର୍ କିଦୁ, ମାତ୍ର ଏମ୍ବାଆଁ ହିଚୁ ଆଟ୍ଆଦୁ । ନାନୁ ଜିକେଏ ଏଲେଁ କିଇଁ । ଏମିନି ମାହାପୁରୁ ହିଚୁ ତଲେ କାତା ଆନେସି ଏୱାସି ସାତା ମାହାପୁରୁ ଆନେସି ।” ଏଦାଆଁ ତାକି ବାଲ୍ ଭବିଷ୍ୟତବକ୍ତାୟାଁ ର ପୂଜା ହିନି (ବେରମାଣ୍ଡା ) ତିଆର୍ କେପିତେରି ମାତ୍ର ଏତାଣା ହିଚୁ ହିଃଆ ତେରି ।

ଏଦାଆଁ ଜେଚ ବାଲ୍ ଭବିଷ୍ୟବକ୍ତାୟାଁ ବାଲ୍ ଦେବଇଁ ପାର୍ତନା କିତେରି “ବାଲ୍, ମା ପାର୍ତନା ୱେନାମୁ!” ଦିନା ୱେୟେ ଏୱାରି ପାର୍ତନା କିତେରି ଅଡ଼େ କାଜା ହାଡା ତଲେ କାଲ ଆତେରି ଅଡ଼େ ତାମ୍ବୁ ତାମ୍ବୁ ଏ ପିପେଲି ତଲେ ଦାପା କଡିତେରି, ମାତ୍ର ଏନି ହାଡା ୱାଆତେ ।

ଦିନା ରାନିବେଲାତା, ଏଲୀୟ ମାହାପୁରୁତାଣା ର ପୂଜା ତିଆର୍ କିତେସି । ଏଦାଆଁ ଜେଚ ଏୱାସି ଲୋକୁଣି ଏଲେଇଚେସି, ପୂଜା କିତି ଉଂଗା, ୱେସ୍କା ଇଲେହେଁକି ବେରମାଣ୍ଡା ଶାରିୱାକିତି ବୁମି ଏୟୁତା ବାରେ ଉଦିନି ପାତେକା ବାର ଗଟା ଡକାତା ଏୟୁ ଅହାଁ ୱାକ୍ହାଲି ୱେସ୍ତେସି ।

ଏଦାଆଁଜେଚ ଏଲୀୟ ପାର୍ତନା କିତେସି “ହେ ଅବ୍ରାହାମତି,ଇସାହାକତି ଅଡ଼େ ଯାକୁବତି ମାହାପୁରୁ, ନିଞ୍ଜୁ ମାଂଗ ତସ୍ତାମୁ ଅଡ଼େ ନିନୁ ଇସ୍ରାଏଲତି ମାହାପୁରୁ ଅଡ଼େ ନାନୁ ନି ହଲିଆ ତେଏଁ । ନାଂଗେ ଜଲାମୁ ଏନିକିକି ଇ ବାରେ ଲୋକୁ ପୁଞ୍ଜାନେରି ଯେ ନିନୁ ସାତା ମାହାପୁରୁତି ।”

ରେଟୁଏ, ହାଗୁଟି ହିଚୁ ତର୍ଗାହାଁ ପୂଜା ବେଦିତା ମାନି ଉଂଗା, ୱେସ୍କା, ପୁନାଦି, ଦୁଡ଼ି ଅଡ଼େ ଇଲେହେଁକି ପୂଜାବେଦୀ ଶାରିୱାକି ମାନି ଏୟୁଇଁ ଗୁସ୍ତେ । ଲୋକୁ ଏଚିବେଲା ଇଦାଆଁ ମେସ୍ତେରି, ଏୱାରି ବୁମିତା ମାର୍ହିଁ ତର୍ଗାହାଁ ଏଲେଇଚେରି “କାଲାକାଲାତିମାହାପୁରୁ ଏ ମାହାପୁରୁ ! କାଲାକାଲାତିମାହାପୁରୁ ଏ ମାହାପୁରୁ !”

ଏଦାଆଁଜେଚ ଏଲୀୟ ଜଲିତେସି, “ବାଲ୍ ତି ଆମିନି ଭବିଷ୍ୟତବକ୍ତାଇଁ ପିସ୍ଲ ଆହାଁ ହାଜାଲି ହିଃଆଦୁ !” ଏଦାଆଁତାକି ଲୋକୁ ବାଲ୍ ତି ଭବିଷ୍ୟତବକ୍ତାଣୀ ଆସାହାଁ ଏୱାରାଇଁ ପାଇତେରି ।

ଏଦାଆଁଜେଚ ଏଲୀୟ ଏଲେଇଚେସି, “ଗାଡ଼ାତା ଜିକି ୱେଣ୍ଡା ହାଜୁ, ଏନାଆତାକି ଇଚିସାରେ ପିୟୁ ୱାହିମାନେ ।” ଜିକି ହାଗୁ କାଡ଼ିନାଇ ଚଞ୍ଜା ଆହାଲି ମାଠ୍ହେ । ଯିହୋବା ମର୍ଡିଇଁ ରାପ୍ହାମାଚେସି ଅଡ଼େ ଏୱାସି ର ସାତା ମାହାପୁରୁ ଏଦାଆଁ ଏୱାସି ପାର୍ମାଣା କିତେସି ।

ଏଲୀୟତି ବେଲାତା, ମାହାପୁରୁ ଇଲିଶାୟ ଦରୁ ଗାଟାଣାଇଁ ତାନି ଭାବବାଦୀ ଆହାଲି ତାକି ଆଚିତେସି । ମାହାପୁରୁ ଇଲିଶାୟତାଣାଟି ହାରେକା କାବାଆନି କାମା କିତେସି । ନାମାନ୍ଇଁ ର କାବା ଆନି କାମା ଆହାମାଚେ, ଆମିନିଗାଟାସି ର ଶାତ୍ରୁ କାଜା ସୈନ୍ୟ ମାଚେସି, ଆମ୍ବାରାଇଁ ହରେକା ତଲୁ ରୋଗ ଆହାମାଚେ । ଏୱାସି ଇଲିଶାୟତି କାତା ୱେଞ୍ଜି ମାଚେସି ଏଦାଆଁତାକି ହାଜାହାଁ ତାଂଗେ ନେହି କିହାଲି ତାକି ଇଲିଶାୟଇଁ ୱେସ୍ତେସି । ଇଲିଶାୟ ନାମାନ୍ଇଁ ଯର୍ଦ୍ଦନ କାଡାତା ସାତାଦେବା ମୁଞ୍ଜାଲି ୱେସାମାଚେସି ।

ନକେଏ ନାମାନ୍ କାର୍ବି ଆହାମାଚେସି ଅଡ଼େ ଇଦାଆଁ କିଃଆତେସି ଏନାଆତାକିଇଚିସାରେ ଇଦି ମୂର୍ଖତି କାତାଲେହେଁ ଅଣପାକଡିତେସି । ମାତ୍ର ଡାୟୁବେଲାତା ଏୱାସି ତାନି ମନ ବାଦ୍ଲି କିହାଁ ଯର୍ଦ୍ଦନତା ସାତାଦେବା ମୁଞ୍ଜା କଡିତେସି । ଏୱାସି ଏଚିବେଲା ରାନିବେଲାତା ଏୟୁଟି ମୁଞ୍ଜାହାଁ ପାଂଗାତା ହତେସି ତାନି ତଲୁ ବାରେ ନେହି ଆତେସି! ମାହାପୁରୁ ଏୱାଣାଇଁ ନେହି କିତେସି ।

ମାହାପୁରୁ ଅଡ଼େ ଏଟ୍କାତି ଭାବବାଦୀୟାଁଇଁ ପାଣ୍ଡାମାଚେସି । ଏୱାରି ବାରେ ଲୋକୁଁଇଁ ବୋମା ପୂଜା କିଃଆଦୁ ଇଞ୍ଜି ୱେସ୍ତେସି ଅଡ଼େ ଏଟ୍କାତାରାଇଁ ସାତା ଅଡ଼େ କାର୍ମା ତସାଲିତାକି ୱେସାମାଚେରି । ଭାବବାଦୀୟାଁ ଲୋକୁଣି ତେଲ୍ପାଲି ତାକି ଜଲିତେରି ଯେ ଏୱାରି ଲାଗେଃତି କାମା କିତିସାରେ ଅଡ଼େ ମାହାପୁରୁତି ବୋଲୁ ତଲେ ତାକାଃସାରେ, ମାହାପୁରୁ ଏୱାରାଇଁ ଦୋହ ଡେକାହାଁ ବିଚାରା କିନେସି ଅଡ଼େ ଏୱାରାଇଁ ବାକା ହିନେସି ।

ହାରେକା ବେଲାତା ଲୋକୁ ମାହାପୁରୁତି ବୋଲୁ ତଲେ ତାକାଃତେରି । ଏୱାରି ହାରେକା ବେଲାତା ଭାବବାଦୀଁ ତଲେ ଲାଗେଃ ଲେମ୍ବୀ ମାଚେରି ଅଡ଼େ ର ର ବେଲାତା ଇଲେହେଁକି ତାମ୍ଗେ ପାଇ ମାଚେରି । ର ଦେବା, ଯିରିମିୟ ଭାବବାଦୀଇଁ ର ୱାଇତି କୁହିତା ମେତ୍ୱି ଆହାମାଚେ ଅଡ଼େ ଏୱାରି ହାହାଲି ତାକି ତାଂଗେ ଏମ୍ବାଆଁ ରଅଣାଇଁ ପିସ୍ପି ଆହାମାଚେ । ଏ କୁହି ବିତ୍ରା ମାନି ଲାଦିତା ମେଦା ହାଜାମାଚେସି, ମାତ୍ର ରାଜା ତାଂଗେ କାର୍ମା ମେସ୍ତେସି ଅଡ଼େ ଯିରିମିୟ ହାନି ନକେଏ ତାଂଗେ କୁହିଟି ପାଂଗାତା ଚାଚାଲି ତାକି ଏୱାସି ତାନି ହଲିଆଇଁ ହୁକୁମ୍ ହିତେସି ।

ଭାବବାଦୀୟାଁଇଁ ଲୋକୁ ଅପାଃତିହିଁ ଜିକେଏ ଏୱାରି ମାହାପୁରୁତାକି କାତା ଆହାଲି ମାଠ୍ହେରି । ଏୱାରି ଲୋକୁଣି ତେଲ୍ପି କିହାଁ ୱେସାମାଚେରି ଯେ ଏୱାରି ମନ ୱେଟ୍ଆସାରେ ମାହାପୁରୁ ଏୱାରାଇଁ କ୍ଡ଼ୁପ୍ହାତୁଃନେସି । ମାହାପୁରୁ ପାଣ୍ଡିନି ଖ୍ରୀଷ୍ଟ ଯେ ୱାନେସି ଏ କାତାତି ଜିକେଏ ଏୱାରି ଲୋକୁଣି ଅଣପି କିହାମାଚେରି ।