18. ବାଗା ଆତି ରାଜି

ହାରେକା ବାର୍ଷା ଡାୟୁ ଦାଉଦ ହାତେସି, ଅଡ଼େ ତାନି ମିର୍ଏସି ଶଲୋମୋନ ଇସ୍ରାଏଲଇଁ ତାକି କିହାଲିତାକି ମାଠ୍ହେସି । ମାହାପୁରୁ ଶଲୋମୋନଇଁ, ଅଡ଼େ ଏୱାସି ଏମିନିକାତାଇଁ ହାରେକା ଅଣପିମାଞ୍ଜି ୱେଚେସି । ଏଚିବେଲା ଶଲୋମୋନ ଜ୍ଞାନ ତାକି ପାର୍ତନା କିତେସି, ମାହାପୁରୁ ଏମ୍ବାଆଁ ନେହାସି ଅଣପିତେସି ଅଡ଼େ ତାଂଗେ ଦାର୍ତିତି ବାରେତି କିହାଁ ଗାଡି ଜ୍ଞାନୀ କିତେସି । ଅଡ଼େଜିକେଏ ମାହାପୁରୁ ତାଂଗେ ହାରେକା ବାତ୍କୁଗାଟାସି କିତେସି ।

ଯିରୁଶାଲମତା, ଶଲୋମୋନ ମନ୍ଦିର ତିଆର୍ କିତେସି ଏନାଇ ତାନି ଆବାତି ଅଣପୁମାଚେ ଅଡ଼େ ସାୟମି ଆନାଣିଇଁ କୁଡ଼ି କିହାମାଚେସି । ଲୋକୁ ମାହାପୁରୁତି ପୂଜା ଅଡ଼େ ଦାନା ସମାଗମ ଗୁଡ଼ାତା ହିନି ବାଟା ମନ୍ଦିରତା କିହାଲି ମାଠ୍ହେରି । ମାହାପୁରୁ ୱାତେସି ଅଡ଼େ ମନ୍ଦିରତା ଡ଼ଇତେସି, ଅଡ଼େ ଏୱାସି ତାମି ଲୋକୁତଲେ ବାସା କିତେସି ।

ମାତ୍ର ଶଲୋମୋନ ଏଟ୍କାଦେଶାତି ଆୟାଟିଁଇଁ ଜୀୱୁ ନତେସି । ଏୱାସି ୧୦୦୦ ବିଦେଶା ପଦାଣୀ ବିହା ଆହାଁ ମାହାପୁରୁତି ବିରଦ୍ଦ ହାଚେସି । ଇ ପଦାୟାଁ ବିତ୍ରା ହାରେକା ବିଦେଶାଟି ୱାହାମାଚୁ ଅଡ଼େ ତାମି ତଲେ ତାମି ପେଣ୍କାଇଁ ଚାଚାମାଚୁ ଅଡ଼େ ସବୁବେଲା ଏୱାସ୍କାଣୀଇଁ ପୂଜା କିତୁ । ଶଲୋମୋନ ଏଚିବେଲା ବୁଢ଼୍ହା ଆତେସି, ଏୱାସି ଜିକେଏ ତାମି ପେଣ୍କାଁଣୀ ପୂଜା କିତେସି ।

ମାହାପୁରୁ ଶଲୋମୋନଇଁ କାର୍ବି ଆହାମାଚେସି, ଅଡ଼େ ଶଲୋମୋନତି ନାମାଃତି ବାକା ଲେହେଁ ଶଲୋମୋନ ହାତି ଡାୟୁ ଏୱାସି ଇସ୍ରାଏଲଦେଶାଇଁ ରି ରାଜିତା ବାଗା କିହାଲିତାକି ତିରି କିତେସି ।

ଶଲୋମୋନ ହାତି ଡାୟୁ, ତାନି ମିର୍ଏସି ରିହବିୟାମ ରାଜା ଆତେସି । ରିହବିୟାମ ର ଲାଗେଃତାସି ମାଚେସି । ଇସ୍ରାଏଲଦେଶାତି ବାରେ ଲୋକୁ କୁଡ଼ା ଆହାଁ ତାଙ୍ଗେ ର ରାଜାଲେହେଁ ଆଚିତେରି । ଏୱାରି ରିହବିୟାମଇଁ ଏଲେଇଚେରି ଯେ ଶଲୋମୋନ ତାମ୍ଗେ ଆଣ୍ଟ୍ୱା କାମା କିହାଲି ଅଡ଼େ ହାରେକା ଡାବୁ(କର) ହିହିମାଚେରି ।

ରିହବିୟାମ ଏୱାରାଇଁ ଜଲିତେସି “ମିରୁ ଅଣପିମାଞ୍ଜେରି ମାବା ଶଲୋମୋନ ମିଂଗ ଆଣ୍ଟ୍ୱା କାମା କେୱି କିହାମାଞ୍ଜାନେସି, ମାତ୍ର ତାନିଟିଏ ନାନୁ ହାରେକା ଆଣ୍ଟ୍ୱା କାମା କିହାଲି ହିୟାଇଁ, ତାନିଟିଏ ହାରେକା ଗାଡି ମିଂଗ ଆଡାଃଗାଟି ଦଣ୍ଡ ହିୟାଇଁ ।”

ଇସ୍ରାଏଲଦେଶାତି ଦଶ ଦଲ ରିହାବିୟାମ ବିରୁଦ୍ଦତି ବିରଦ କିତେରି । ୱାର୍ଇ ରି ଦଲ ତାନି ତଲେ ନାମୁ ଡ଼ଇତୁ । ଇ ରି ଦଲ ଯିହୁଦା ରାଜି ଆତେ ।

ଇସ୍ରାଏଲ ଦେଶାତି ଏଟ୍କା ଦଶ ଗଟା ଗଚି ରିହବିୟାମତି ବିରୁଦ୍ଦ କାଲ ଆତେରି ଅଡ଼େ ଯାରବିୟାମ ଦରୁଗାଟାଣାଇଁ ତାମି ରାଜା ଆହାଲିତାକି ଆଚିତେରି । ଏୱାରି ଟେବ୍‌ରି ଟଟ ୱାକି ତାମି ରାଜି ତିଆର୍ କିତେରି ଅଡ଼େ ଏୱାରାଇଁ ଇସ୍ରାଏଲ ରାଜି ଅଡ଼େ ଦେଶା ୱେସ୍ପିଆତେ ।

ଯାରବିୟାମ ଇସ୍ରାଏଲତି ବିରୁଦ୍ଦ କାଲ ଆତେସି ଅଡ଼େ ଲୋକୁଣି ପାପୁ କିୱିକିତେସି । ଯିହୁଦା ରାଜିତା ମାନି ମନ୍ଦିରତା ମାହାପୁରୁତି ପୂଜା କିନି ବାଟା ଏୱାରି ବୋମାପୂଜା କିହାଲିତାକି ତାମି ଲୋକୁ ତାକି ରିଣ୍ଡି ବୋମା ତିଆର୍ କେପିତେସି ।

ଯିହୁଦା ରାଜି ଅଡ଼େ ଇସ୍ରାଏଲ ରାଜି ଶାତ୍ରୁ ଆହାହାଚେରି ଅଡ଼େ ହାରେକା ଦେବା ତାମି ବିତ୍ରା ବିରୁଦ୍ଦ ଆହାଁ ଯୁଦ୍ଦୁ କିହିମାଚେରି ।

ପୁଃନି ରାଜି ଇସ୍ରାଏଲତା ବାରେ ରାଜା ଲାଗେଃତାରି ମାଚେରି । ଇବାରେ ରାଜାୟାଁ ବିତ୍ରା ହାରେକା ରାଜା ଏଟ୍କା ଇସ୍ରାଏଲତାରାଟି ପାଇୱି ଆହାମାଚେରି ଏମିନିଗାଟାରି ତାମି ତାଣା ରାଜା ଆହାଲି ଅଣପିତେରି ।

ବାରେ ରାଜାୟାଁ ଅଡ଼େ ଇସ୍ରାଏଲ ରାଜିତି ବାରେ ଲୋକୁ ବୋମାପୂଜା କିହିମାଚେରି । ତାମି ବୋମାପୂଜାତା ର ର ବେଲା ଲାଗେଃତି କାମା ଅଡ଼େ ଇଲେହେଁକି ର ର ଦେବା ଡାଲ୍ କାଣୀ ପୂଜା ହିହିମାଚେରି ।

ଯିହୂଦାତି ରାଜାୟାଁ ଦାଉଦତି ଗଚିମାଚେରି । ଇ ବାରେତି ରାଜାଁ ବିତ୍ରା ହାରେକା ନେହିଁ ଲୋକୁ ମାଚେରି ଏମିନାରିକି ସାତା ତଲେ ତାକି କିହି ମାଚେରି ଅଡ଼େ ମାହାପୁରୁତି ପୂଜା କିହିମାଚେରି । ମାତ୍ର ଯିହୁଦାତି ହାରେକା ରାଜାୟାଁ ଲାଗେଃତି କାମା ଅଡ଼େ ଲାଗେଃ କିନାରି ମାଚେରି ଅଡ଼େ ଏୱାରି ବୋମାଁଣୀ ପୂଜା କିହିମାଚେରି । କଚେକା ରାଜାୟାଁ ଇଲେହେଁ ତାମି ମିର୍କାମାସ୍କାଣୀ ପୁନାଃଗାଟି ପେଣ୍କାଁଣୀ ପୂଜା ହିହିମାଚେରି । ଯିହୁଦାତି ହାରେକା ଲୋକୁ ଜିକେଏ ମାହାପୁରୁତି ବିରୁଦ୍ଦ କାଲ ଆତେରି ଅଡ଼େ ଏଟ୍କା ପେଣ୍କାଁଣୀ ପୂଜା କିହି ମାଚେରି ।