17. ମାହାପୁରୁତି ମେରା ଦାଉଦ ତଲେ

ଶାଉଲ ଇସ୍ରାଏଲତି ପର୍ତମ ରାଜା ମାଚେସି । ଏୱାସି ଲାମ୍ବା ଅଡ଼େ ଅଜିତାସି ମାଚେସି, ଏନିକି ରାଜାଇଁ ଲୋକୁ ଅଣପିମାଚେରି । ପର୍ତମ ସାଣେକା ବାର୍ଷାତାକି ଶାଉଲ ର ନେହାସି ମାଚେସି ଏଚିବେଲା ଏୱାସି ଇସ୍ରାଏଲଇଁ ତାକି କିହାଁ ଅତେସି । ମାତ୍ର ଏଦି ଡାୟୁ ଏୱାସି ର ଲାଗେଃତାସି ଆତେସି ଏମିନିଗାଟାସି କି ମାହାପୁରୁତି କାତା ଲେମ୍ଵାଃଗାଟାସି, ଏଦାଆଁତାକି ମାହାପୁରୁ ର ଏଟ୍କା ଲୋକୁଇଁ ଆଚିତେସି ଏମିନିଗାଟାସି ତାନି ଟାୟୁତା ରାଜା ଆତେସି ।

ଶାଉଲ ଡାୟୁ ମାହାପୁରୁ ର ଦାଂଣେଃସି ଇସ୍ରାଏଲତି ରାଜା ଆହାଲିତାକି ଆଚିତେସି । ବେଥଲିହିମ ଗାଡ଼ାଟି ୱାହାମାନି ଦାଉଦ ଗୋଡୁ ମାଚେସି । ର ର ବେଲାତା ଏୱାସି ଏଚିବେଲା ତାନି ଆବାତି ମେଣ୍ଡାୟାଁ କାଚିମାଚେସି, ଏଚିବେଲା ଦାଉଦ ତାନି ମେଣ୍ଡାଣୀ କାଚିନି ର ସିଂହ ଅଡ଼େ ର ଅଅ୍ଡ଼ିଇଁ ହାୟେ ପାୟାମାଚେସି । ଦାଉଦ ର ନାମୁ ଅଡ଼େ ଦାର୍ମୁଗାଟାସି ମାଚେସି ଏମିନିଗାଟାସି ମାହାପୁରୁତାଣା ନାମାହାଁ ତାନି ବୋଲୁ ତଲେ ତାକିମାଚେସି ।

ଦାଉଦ ର ସୈନ୍ୟ ଅଡ଼େ ନେତା ଆତେସି । ଏଚିବେଲା ଦାଉଦ ଦାଂଣେଃସି ମାଚେସି, ଏୱାସି ଗୋଲିୟାତ ଦରୁଗାଟି କାଜା ଲୋକୁ ତଲେ ଯୁଦ୍ଦୁ କିହାମାଚେସି । ଗୋଲିୟାତ ର ଜାପିତାସି, ହାରେକା ବପୁଗାଟି ସୈନ୍ୟ ଏମିନିଗାଟାସି ତିନିମିଟର ଲାମ୍ବା ମାଚେସି । ମାତ୍ର ମାହାପୁରୁ ଗୋଲିୟାତଇଁ ପାୟାସୁଆଁ ଇସ୍ରାଏଲଇଁ ଗେଲ୍ପାଲିତାକି ଦାଉଦଇଁ ସାୟମି ଆହାମାଚେସି, ଏମିନିଗାଟିତାକି ତାନି ପ୍ରଶାଂସା କିତେରି ।

ଦାଉଦଇଁ ଲୋକୁ ଜୀୱୁ ନନାଣୀଇଁ ଶାଉଲ ସହ ଆହାଲି ଆଡାଃତେସି । ଶାଉଲ ହାରେକା ବେଲାତା ଦାଉଦଇଁ ପାୟାଲି ଅଣପିମାଚେସି, ଏଦାଆଁ ତାକି ଦାଉଦ ଶାଉଲଟିଏ ଡ଼ୁଗିତେସି । ର ଦିନା, ଦାଉଦଇଁ ପାୟାଲିତାକି ଶାଉଲ ପାରିମାଚେସି । ଶାଉଲ ଏ ପାଉତା ହାଚେସି ଏମିନିତାଣା ଦାଉଦ ଶାଉଲଟିଏ ଜାହାରାଇଁ ଡ଼ୁକ୍ହିମାଚେସି, ମାତ୍ର ଶାଉଲ ତାଂଗେ ମେଶାଲି ଆଡାଃତେସି । ଦାଉଦ ନେଏ ଶାଉଲତି ହାରେକା ଡାଗେ ମାଚେସି ଅଡ଼େ ଏୱାସି ଶାଉଲଇଁ ପାୟାଲି ଆଡିତେସିମା, ମାତ୍ର ଏୱାସି ଏଲେ କିଆତେସି । ମାତ୍ର ଦାଉଦ ଶାଉଲଇଁ ପାର୍ମାଣା କିହାଲିତାକି ଶାଉଲ ହେମ୍ବରୀତି ର କାଣ୍ଡା ଦାତେସି ଏନିକିକି ଏୱାସି ରାଜା ଆହାଲିତାକି ତାଂଗେ ପାୟାଃତେସି ।

ଡାୟୁ, ଶାଉଲ ଯୁଦ୍ଦୁତା ଜୀୱୁ ହିତେସି, ଅଡ଼େ ଦାଉଦ ଇସ୍ରାଏଲତି ରାଜା ଆତେସି । ଏୱାସି ର ନେହିଁ ରାଜାମାଚେସି, ଅଡ଼େ ଲୋକୁ ତାଂଗେ ଜୀୱୁ ନହିମାଚେରି ମାହାପୁରୁ ଦାଉଦଇଁ ବର ହିତେସି ଅଡ଼େ ଜିଣା କିତେସି । ଦାଉଦ ହାରେକା ଯୁଦ୍ଦୁ କିହାମାଚେସି ଅଡ଼େ ମାହାପୁରୁ ଇସ୍ରାଏଲତି ଶାତ୍ରୁଗାଟାରିଇଁ ହାର କିହାଲି ତାକି ତାଂଗେ ସାୟମି ଆତେସି । ଦାଉଦ ଯିରୁଶାଲମଇଁ ଜିଣା କିତେସି ଅଡ଼େ ଇଦାଆଁ ଦେଶାତି କାଜାଗାଡ଼ା କିତେସି । ଦାଉଦ ତାକିକିନିବେଲାତା, ଇସ୍ରାଏଲ ବ୍ଡ଼ାୟୁଗାଟି ଅଡ଼େ ବାତ୍ କୁ ଆତେ ।

ଦାଉଦ ର ମନ୍ଦିର ତିଆର୍ କିହାଲି ଇଚାକିତେସି ଆମ୍ବିୟାକି ବାରେ ଇସ୍ରାଏଲମାହାପୁରୁତି ପୂଜା କିହାଲି ଆଡିନେରି ଅଡ଼େ ତାନି ତାକି ପୂଜା ହିହାଲି ଆଡିନେରି । ୪୦୦ବାର୍ଷା ତାକି, ଲୋକୁ ମାହାପୁରୁତି ପୂଜା କିହିମାଚେରି ଅଡ଼େ ମୋଶା ତିଆର୍ କିହାମାନି ବାରେ ଗୁଡ଼ାତା ପୂଜାହିହିମାଚେରି ।

ମାତ୍ର ମାହାପୁରୁ ନାଥନ ଭବିଷ୍ୟତବକ୍ତାଇଁ ଦାଉଦତି ଡାଗେ ଇଚି କାତା ପାଣ୍ଡିତେସି “ ଏନାଆତାକି ଇଚିସାରେ ନିନୁ ଯୁଦ୍ଦୁତି ର ମାଣ୍ସିତି, ଏଦାଆଁତାକି ନିନୁ ନାତାକି ଇ ମନ୍ଦିର ତିଆର୍ କିଃଅତି ।“ ନି ମିର୍ଏସି ଏଦାଆଁ ତିଆର୍ କିନେସି । ମାତ୍ର ନାନୁ ନିଂଗେ ହାରେକା ବର ହିଆଇଁ । ନି ଗଚିତାରାଟିଏ ରଅସି ନା ଲୋକୁତି ରାଜା ଲେହେଁ ବାରେଦିନା ତାକି ତାକି କିହା ଅୟାନେସି !”କାଲାକାଲାତାକି ତାକି କିହା ଅହାଲି ଆଡିନି ଦାଉଦତି ରଣ୍ଡିଏ ରଅସି ଗଚିତାସି ଆହିମାନେସି ଖ୍ରୀଷ୍ଟ । ଖ୍ରୀଷ୍ଟ ମାହାପୁରୁତି ଆଚିତାସି ଆମିନି ଗାଟାସି ଦାର୍ତିତି ଲୋକୁଣି ତାମି ବାରେ ପାପୁଟି ଗେଲ୍ପିନେସି ।

ଏଚିବେଲା ଦାଉଦ ଇ ବାରେ ବୋଲୁ ୱେଚେସି, ଏୱାସି ରେଟୁଏ ମାହାପୁରୁଇଁ ଧନ୍ୟବାଦ ହିତେସି ଅଡ଼େ ତାନି ପ୍ରଶଂସା କିତେସି ଏନାଆତାକି ଇଚିସାରେ ଏୱାସି ଦାଉଦଇଁ ଇ କାଜା ସମ୍ମାନ ଅଡ଼େ ହାରେକା ବର ହିହାଲିତାକି କାତା ହିହାମାଚେସି । ମାହାପୁରୁ ଏଚିବେଲା ଇ ବାରେ କାତା କିନେସି ଏଦାଆଁ ଦାଉଦ ପୁଞ୍ଜା ହିଲାଃତେସି । ମାତ୍ର ଇଲେକି ଆତେ, ଇସ୍ରାଏଲତାରାଇଁ ଖ୍ରୀଷ୍ଟ ୱାହାଲିତାକି ୧୦୦୦ ବାର୍ଷା କାଚାଲି ଲାଗିତେ ।

ହାରେକା ବାର୍ଷା ତାକି ସାତା ଅଡ଼େ ନାମୁତଲେ ତାକି କିତେସି ଅଡ଼େ ମାହାପୁରୁ ତାଂଗେ ବର ହିତେସି । ଆତି ଜିକେଏ, ତାନି ଜୀୱୁ ରାନି ବେଲା ଏୱାସି ମାହାପୁରୁ ବିରଦ କାଜା ପାପୁ କିହାମାଚେସି ।

ର ଦିନା, ଏଚିବେଲା ଦାଉଦତି ସୈନ୍ୟୟାଁ ଯୁଦ୍ଦୁ କିହାଲି ତାକି ଇଜଟି ହେକ ମାଚେରି, ଏୱାସି ତାନି ରାଜମହଲଟିଏ ପାଂଗାତା ସିନିକିତେସି ର ଅଜାହାଚି ଆୟାଟି ଏୟୁ ମିହିମାଚେ । ଏ ଆୟାଟି ଦରୁ ବେଥଶିବା ମାଚେ ।

ମେହ୍ନାଣିଇଁ ଏଟ୍କା କିନି ବାଟା ଦାଉଦ ଏଦାଣୀ ଚାଚାଲି ର ଲୋକୁଇଁ ପାଣ୍ଡିତେସି । ଦାଉଦ ତାନି ତଲେ ହୁଞ୍ଜିତେସି ଅଡ଼େ ଏଦାଣୀ ତାନି ଇଜ ପାଣ୍ଡାସ୍ତେସି । ଏଚର ଦିନା ଡାୟୁ ବେଥଶିବା ଦାଉଦଇଁ ର କାତାଇଁ ୱେସା ପାଣ୍ଡିତେ ଯେ ଏଦୀ ବାଣ୍ଡିତା ଆହାମାନେ ।

ଉରିୟ ଦରୁଗାଟାସି ର ଲୋକୁ ଦାଉଦଇଁ ସୈନ୍ୟ ବିତ୍ରା ର ନେହାସି ସୈନ୍ୟ, ବେଥଶିବାତି ଡକ୍ରା ମାଚେସି । ଦାଉଦ ଉରିୟଇଁ ଯୁଦ୍ଦୁଟି ହାଟାହାଁ ତାନି ଡକ୍ରୀ ତାଣା ହାଜାଲି ଜଲିତେସି । ମାତ୍ର ଏଟ୍କା ସୈନ୍ୟୟାଁ ଯୁଦ୍ଦୁତା ମାଚିବେଲା ଉରିୟ ଇଜ ହାଜାଲି ହିଃଆତେସି । ଏଦାଆଁତାକି ଦାଉଦ ୱେଣ୍ଡେଏ ଯୁଦ୍ଦ ହାଜାଲି ପାଣ୍ଡିତେସି ଅଡ଼େ କାଜା ସୈନ୍ୟଇଁ ୱେସା ପାଣ୍ଡିତେସି ଯେ ଏ ଉରିୟଇଁ ଇଲେତି ଟାୟୁତା ଇଟାମୁ ଏମିନିତାଣା ଶାତ୍ରୁଁ ଗାଡି ବ୍ଡ଼ାୟୁ ମାନିତାଣା ଏନିକିକି ଉରିୟ ଶାତ୍ରୁଁ ତାଣାଟି ହାନେସି ।

ଉରିୟ ହାତି ଡାୟୁ, ଦାଉଦ ବେଥଶିବାଇଁ ବିହା ଆତେସି । ଜେଚ, ଏଦି ଦାଉଦତି ମିର୍ଏଣାଇଁ ଜାର୍ନା ହିତେ । ଦାଉଦ ଏନାଆଁ କିହାମାଚେସି ଏଦାଆଁତାକି ମାହାପୁରୁ ହାରେକା କାର୍ବି ଆହାମାଚେସି, ଏଦାଆଁତାକି ଏୱାସି ତାନି ତାଣା ନାଥନ ଭବିଷ୍ୟତବକ୍ତାଇଁ ପାଣ୍ଡାହାଁ ତାନି ପାପୁ ଏନିକି ଲାଗେଃତାଇ ମାଚେ ତେଲ୍ପିକିହା ମାଚେସି । ଦାଉଦ ତାନି ପାପୁତି ତେଲ୍ହା କଡିତେସି ଅଡ଼େ ମାହାପୁରୁ ତାଂଗେ କ୍ଷମା ହିତେସି । ଦାଉଦ ତାନି ବାକି ମାନି ଜୀୱୁତା, ଇଲେହେଁକି ତାନି ଦୁକୁ ବେଲାତା ଜିକେଏ ମାହାପୁରୁ ଜେଚ ତାକିହିଁ ତାନି ବୋଲୁ ତଲେ ତାକିତେସି ।

ମାତ୍ର ଦାଉଦ ପାପୁତି ବାକା ଲେହେଁ ତାନି ମିର୍ଏଗାଟାସି ହାହା ହାଚେସି । ଦାଉଦତି ବାକିମାନି ଜୀୱୁ ହାନି ବିତ୍ରା ତାମି ଇଜ ଲାଗ୍ୱି ଆନାଇ ଡ଼ୟାମାଚେ, ଅଡ଼େ ଦାଉଦତି ବ୍ଡ଼ାୟୁ ହାରେକା ରାହା ହାଜାମାଚେ । ଦାଉଦ ମାହାପୁରୁତାଣା ନାମୁ ହିଲାଃତେ, ଆତିହିଁ ଜିକେଏ ମାହାପୁରୁ ତାନି ଜଲିତି ବୋଲୁ କିହାଲି ତାକି ନାମୁ ଇଟାମାଚେସି । ଡାୟୁ ଦାଉଦ ଅଡ଼େ ବେଥଶିବାଟିଏ ୱେଣ୍ଡେଏ ର କକାସି ଜାର୍ନା ଆତେସି, ଅଡ଼େ ଏୱା ତାନି ଦରୁ ଶଲୋମୋନ ଇଟିତୁ ।