16. ଗେଲ୍ପିନାରି

ଯିହୋଶୂୟ ହାତି ଜେଚ, ଇସ୍ରାଏଲତାରି ମାହାପୁରୁତି ବୋଲୁ ମାନ ଆଆତେରି ଅଡ଼େ ଏୱାରି ବାକି ଡ଼ଇତାରାଇଁ କିଣାନତାରାଇଁ ପେର୍ଆତେରି କି ମାହାପୁରୁତି ମେରାତଲେ ତାକାଃତେରି । ଇସ୍ରାଏଲତାରି ସାତା ମାହାପୁରୁ ଯିହୋବାତି ପୂଜା କିନି ବାଟା କିଣାନତାରାତି ପେଣ୍କାୟାଁତି ପୂଜା କିହାଲି ମାଠ୍ହେରି । ଇସ୍ରାଏଲତାରାତି ରାଜା ହିଲାଃତେରି, ଏଦାଆଁ ତାକି ବାରେ ଜାଣା ତାନି କାନୁତା ଏମିନାଇ ନେହାଇ ଚଞ୍ଜା ଆତେ ଏୱାରି ଏଦାଆଁ କିତେରି ।

ଏନାଆତାକି ଇଚିସାରେ ଇସ୍ରାଏଲତାରି ମାହାପୁରୁତି କାତା ୱେନାଃନା ତାକିତେରି, ଏଦାଆଁ ତାକି ମାହାପୁରୁ ଶାତ୍ରୁଣୀ ୱେସାଲିଏ ଏୱାରାଇଁ ହାର କିହାଁ ଏୱାରାଇଁ ଦଣ୍ଡ ହିତେସି । ଇ ଶାତ୍ରୁୟାଁ ଇସ୍ରାଏଲତାରାତି ହାରେକା ଦିଣ୍ ସୁ ସରୁ କିହାଁ ଅତେରି, ତାମି ବୁମିବାଡ଼ା ନାଶା କିତେରି, ଅଡ଼େ ତାମି ବିତ୍ରା ହାରେକାଇଁ ପାଇତେରି । ହାରେକା ବାର୍ଷା ମାହାପୁରୁତି କାତା ମାନ ଆଆନା ଅଡ଼େ ତାମି ଶାତ୍ରୁଟିଏ କଷ୍ଟ ବେଟା ଆହାହାଁ ଅଣପିତେରି ଅଡ଼େ ଏୱାରାଇଁ ଗେଲ୍ପାଲିତାକି ମାହାପୁରୁ ତାଣା ପାର୍ତନା କିତେରି ।

ଏଦାଆଁଜେଚ ମାହାପୁରୁ ଏୱାରାଇଁ ର ଗେଲ୍ପିନାଣାଇଁ ହିତେସି ଏମିନିଗାଟାସି ଏୱାରାଇଁ ତାମି ଶାତ୍ରୁଁଟିଏ ଗେଲ୍ପିତେସି ଅଡ଼େ ଦେଶାତା ହିତିଡ଼ି ତାତେସି । ମାତ୍ର ଏଦାଆଁ ଜେଚ ଲୋକୁ ମାହାପୁରୁଇଁ ବାଣା ଅହାହାଚେରି ଅଡ଼େ ୱେଣ୍ଡେଏ ବୋମା ପୂଜା କିହାଲି ମାଠ୍ହେରି । ଏଦାଆଁତାକି ମାହାପୁରୁ ଡାଗେମାନି ଶାତ୍ରୁ ମିଦିୟୋନିୟ ତଲେ ଏୱାରଇଁ ହାର କିତେସି ।

ମିଦିୟୋନିୟୟାଁ ସାତା ବାର୍ଷା ପାତେକା ଇସ୍ରାଏଲତାରାତି କାଦି ଅତେରି । ଇସ୍ରାଏଲତାରି ହାରେକା ଆଜିତେରି; ମିଦିୟୋନତାରି ଏନିକି ଏୱାରାଇଁ ପାରାଲି ଆଡଃରି,ଏଦାଆଁତାକି ଏୱାରି ପାଉଣାଁ ଡ଼ୁଗିତେରି । ଶେଷାବେଲା, ଏୱାରାଇଁ ଗେଲ୍ପାଲି ତାକି ଏୱାରି ମାହାପୁରୁଇଁ ହାଟିତେରି ।

ର ଦିନା, ଗିଦିୟୋନ ଦରୁଗାଟାସି ରଅସି ଇସ୍ରାଏଲ ଡ଼ୁଗିହିଁ କାଦି ଇଟିମାଚେସି ଏନିକି କି ମିଦିୟୋନତାରି ଏଦାଆଁ ଅହାଲି ଆଡଃରି । ମାହାପୁରୁତି ଦୂତୁ ଗିଦିୟୋନତି ଡାଗେ ୱାହାଁ ଜଲିତେ, “ବ୍ଡ଼ାୟୁଗାଟି ଲୋକୁ, ମାହାପୁରୁ ନି ତଲେ ମାନେସି । ହାଲାମୁ ଅଡ଼େ ଇସ୍ରାଏଲଇଁ ମିଦିୟୋନତାରାଟିଏ ଗେଲ୍ପାମୁ ।”

ର ବୋମାଇଁ ପୂଜା ହିହାମାନି ବେରମାଣ୍ଡା ଗିଦିୟୋନତି ଆବା ତାଣା ମାଚେ । ଏ ବେରମାଣ୍ଡା କାଣ୍ଡା କାଣ୍ଡା କିହାଲି ମାହାପୁରୁ ଗିଦିୟୋନଇଁ ଜଲିତେସି । ମାତ୍ର ଗିଦିୟୋନ ଲୋକୁଣି ଆଜିତେସି, ଏଦାଆଁତାକି ଏୱାସି ଲାଆଁ ଆନି ଏପେ କାତେସି । ଏଦାଆଁତାକି ଏୱାସି ଏ ବେରମାଣ୍ଡାଇଁ କାଣ୍ଡା କାଣ୍ଡା କିତେସି ଅଡ଼େ ଗୁଣ୍ଡା କିହାସ୍ତେସି । ବୋମା ଡାଗେ ଏମିନି ବେରମାଣ୍ଡା ମାଚେ ଏ ବେରମାଣ୍ଡା ଡାଗେ ଏୱାସି ମାହାପୁରୁ ତାକି ର ବେରମାଣ୍ଡା କେପିତେସି ଅଡ଼େ ମାହାପୁରୁତାକି ପୂଜା ହିତେସି ।

ରନେଚୁ ଜେଚ ଲାଇ ଲୋକୁ ମେସ୍ତେରି ଯେ ଏମିନି ଗାଟାସି ଏ କି ବେରମାଣ୍ଡାଇଁ ଗେସାହାଁ ଡିକ୍ହାତୁସାମାନେସି, ଅଡ଼େ ଏୱାରି ହାରେକା କାର୍ବି ଆହାମାଚେରି । ଏୱାରି ଗିଦିୟୋନତି ଇଲୁଇଁ ତାଂଗେ ଟୁଣ୍ହାଲିତାକି ହାଚେରି। ମାତ୍ର ଗିଦିୟୋନତି ଆବା ଜଲିତେସି “ମିରୁ ଏନାଆତାକି ମି ପେଣ୍କାଇଁ ସାୟମି ଆହାଲି ଅଣପିମାଞ୍ଜେରି ? ଏଦି ର ମାହାପୁରୁ ଇଚିସାରେ, ଆତିସାରେ ଏଦି ଜାହାରା ଗେଲ୍ପା କଡାପେ!” ଏୱାସି ଇ କାତା ଜଲାଲିଏ ଲୋକୁ ଗିଦିୟୋନଇଁ ପାୟାଃତେରି ।

ତାନିଜେଚ ମିଦିୟୋନତାରି ଇସ୍ରାଏଲତାରାଁଟି ସରୁ କିହାଲି ୱେଣ୍ଡେଏ ୱାତେରି । ଏୱାରି ଇଚେକାଜାଣା ମାଚେରି ଯେ ଏଜି କିହାଲି ଆଡି ଲାଃତେରି । ତାମି ତଲେ ଯୁଦ୍ଦୁ କିହାଲିତାକି ଗିଦିୟୋନ ଇସ୍ରାଏଲତାରାଇଁ କୁଡ଼ି କିତେସି । ମାହାପୁରୁ ଇସ୍ରାଏଲଇଁ ଗେଲ୍‌ପିନି ତାକି ତାଙ୍ଗେ ନିପ୍ନେସି, ଇ କାତାଇଁ ସାତେଏକି ପୁଞ୍ଜାଲିତାକି ଗିଦିୟୋନ ମାହାପୁରୁଟିଏ ରିଣ୍ଡି ଚିନ୍ନା ରିସ୍ତେସି ।

ପର୍ତମ୍ ଚିନ୍ନା ଲେହେଁ, ଗିଦିୟୋନ ବୁମିତା ର ମେଣ୍ଡାତି ତଲୁ ପାସାହାଁ ଅଡ଼େ ମାହାପୁରୁଇଁ ଲାଇସେଏ ମାଚୁ ବୁମିତା ତ୍ରକ୍ଆନା ୱାର୍ଇ ତଲୁ ଲାକ ମେତ୍ହାଲି ଜଲିତେସି ।ମାହାପୁରୁ ଏଦାଣି କିତେସି । ଅର ଲାଆଁ, ଏୱାସି ମାହାପୁରୁଇଁ ୱେସ୍ତେସି ୱାର୍ଇ ବୁମି ଉଦାପେ ମାତ୍ର ତଲୁ ୱାଇତାଇ ମାଣ୍ବେ । ମାହାପୁରୁ ଏଦାଆଁ ଜିକେଏ କିତେସି । ଇ ରିଣ୍ଡି ଚିନ୍ନା ଗିଦିୟୋନଇଁ ସାତେଏ ଅଣପିକିତେ ଯେ ଇସ୍ରାଏଲତାରାଇଁ ମିଦିୟୋନତାରାଟିଏ ଗେଲ୍ପାଲିତାକି ମାହାପୁରୁ ତାଂଗେ ସାୟମି ଆନେସି ।

୩୨,୦୦୦ ଇସ୍ରାଏଲତି ସୈନ୍ୟୟାଁ ଗିଦିୟୋନତି ଡାଗେ ୱାତେରି, ମାତ୍ର ମାହାପୁରୁ ଜଲିତେସି ଯେ ଇୱାରି ହାରେକା ଗାଡି ଆତେରି । ଏଦାଆଁତାକି ଯୁଦ୍ଦୁ କିହାଲି ଆଜିନାରି ମାଚେରି ଇଲେହେଁ ୨୨,୦୦୦ ଜାଣାଇଁ ଏୱାସି ଇଜ ପାଣ୍ଡାସ୍ତେସି । ମହାପୁରୁ ଗିଦିୟୋନଇଁ ଜଲିତେସି ଯେ ଇ ସଂଖ୍ୟା ଜିକେଏ ଗାଡି ମାନେ । ଏଦାଆଁ ତାକି ୩୦୦ ଜାଣା ଟିଏ ଏଟ୍କା ବାରେଇଁ ଇଜ ପାଣ୍ଡାସ୍ତେସି ।

ଏ ଲାଆଁ ମାହାପୁରୁ ଗିଦିୟୋନଇଁ ଜଲିତେସି “ମିଦିୟୋନତି ଗୁଡ଼ାତା ହାଜୁ ଅଡ଼େ ଏଚିବେଲା ଏୱାରି କାତା ଆନାଣୀ ମିରୁ ୱେଞ୍ଜେରି, ମିରୁ ଅଡ଼େ ଆଜଃତେରି ।“ଏଦାଆଁତାକି ଏ ଲାଆଁ, ଗିଦିୟୋନ ଏ ଗୁଡ଼ାତା ହାଚେସି ଅଡ଼େ ରଅସି ମିଦିୟୋନତି ସୈନ୍ୟ ମେସାମାନି ହାପ୍ନାତି କାତା ତାନି ତଡ଼ୁଇଁ ୱେସିମାନାଣୀ ୱେଚେସି । ଏଲୋକୁତି ତଡ଼ୁ ଜଲିତେସି “ଇ ହାପ୍ନାତି ଅର୍ତ ଆହି ମାନେ ଗିଦିୟୋନତି ସୈନ୍ୟ ମିଦିୟୋନତି ସୈନ୍ୟଁଣୀ ହାର କିନେରି !” ଗିଦିୟୋନ ଏଚେତା ଇଦାଆଁ ୱେଚେସି, ଏୱାସି ମାହାପୁରୁତି ପୂଜା କିତେସି ।

ଏଚିବେଲା ଗିଦିୟୋନ ତାନି ସୈନ୍ୟଣୀ ଡାଗେ ୱେଣ୍ଡାୱାହାଁ ବାରେଜାଣାଇଁ ର ତିତ୍ରୀ, ର ଡକା ଅଡ଼େ ର ହିଚୁ କୁଡୁଲି ହିତେସି । ମିଦିୟୋନତି ସୈନ୍ୟୟାଁ ଏମିନିତାଣା ଡୁରାମାଚେରି ଏୱାରି ଏ ଗୁଡାତି ଶାରିୱାକି ଗୁର୍ତେରି । ଗିଦିୟୋନତି ୩୦୦ ସୈନ୍ୟ ଏମିନି ଡକାଁତି ତାମି ହିଚୁ କୁଡୁଲି ଇଟିତେରି ଏନିକିକୀ ମିଦିୟୋନତାରି ଏ ହିଚୁ କୁଡୁଲିତି ଉଜେଡ଼ିଇ ମେଶାଲି ଆଡଃତେରି ।

ଏଦାଆଁଜେଚ, ଗିଦିୟୋନଇଁ ବାରେ ସୈନ୍ୟୟାଁ ରଣ୍ଡିଏବେଲା ତାମି ଡକାଁ ଅସ୍ତେରି, ଏଦାଆଁ ତାକି ଡକାତା ବାରେ ହିଚୁ କୁଡୁଲିତି ହିଚୁ ଚଞ୍ଜା ଆତେ । ଏୱାରି ଆସାମାନି ତିତ୍ରିମଇରିୟାଁ ଉକି ଗାଡି ହାଡା ତଲେ ଏଲେଇଚେରି “ମାହାପୁରୁ ଅଡ଼େ ଗିଦିୟୋନତାରା ତାକି ର କାଣ୍ଡା !”

ମାହାପୁରୁ ମିଦିୟୋନତାରାଇଁ ଆକାବାକା କିହାସ୍ତେସି, ଏଦାଆଁତାକି ଏୱାରି ତାମ୍ବୁ ତାମ୍ବୁ ପାୟା କଡିତେରି । ସାଣେକା ତାକି, ବାକିତାରି ଇସ୍ରାଏଲତାରାଇଁ ତାମି ଇଲୁଟିଏ ହାଟ୍କି ଆହାଁ ମିଦିୟୋନତାରାଇଁ ପେର୍ହାଲି ସାୟମି ଆହାଲି ୱେସ୍ପିଆତେ । ଏୱାରି ତାମି ବିତ୍ରା ହାରେକାଇଁ ପାଇତେରି ଅଡ଼େ ବାକିତାରି ହାରେକାଇଁ ଇସ୍ରାଏଲ ଦେଶାତି ପାଂଗାତା ପେର୍ହା ଅତେରି । ଏ ଦିନା ୧,୨୦,୦୦୦ ମିଦିୟୋନତାରି ହାତେରି । ମାହାପୁରୁ ଇସ୍ରାଏଲତାରାଇଁ ଗେଲ୍ପିତେସି ।

ଲୋକୁ ଗିଦିୟୋନଇଁ ତାମି ଗୁରୁ କିହାଲି ଅଣପିତେରି । ଲୋକୁ ଏଲେକିଁ କିହାଲି ଗିଦିୟୋନ ହିଃଆତେସି, ମାତ୍ର ମିଦିୟୋନତାରାଟିଏ ଏୱାରି ଏମିନି ବାରେ ବାଂଗାରା ଡାବୁଁ ଅହାମାଚେରି, ଏୱା ରିସ୍ତେରି । ଲୋକୁ ଗିଦିୟୋନଇଁ ହାରେକା ବାଂଗାରା ହିତେରି ।

ଏଦାଆଁଜେଚ ମହାଯାଜକ ମେଦିନି ହେମ୍ବରୀ ଲେହେଁ ର ଏଟ୍କାତି ହେମ୍ବରୀ ଗିଦିୟୋନ ଏ ବାଂଗାରା ଡାବୁଁ ତଲେ ତିଆର୍ କିତେସି । ମାତ୍ର ଏଦାଆଁ ବୋମା ଲେହେଁ ଲୋକୁ ପୂଜା କିହାଲି ମାଠ୍ହେରି । ଏଦାଆଁତାକି ମାହାପୁରୁ ୱେଣ୍ଡେଏ ଏୱାରାଇଁ ବାକା ହିତେସି ଏନାଆତାକି ଇଚିସାରେ ଇସ୍ରାଏଲ ବୋମା ପୂଜା କିହିମାଚେରି । ଏୱାରାଇଁ ହାର କିହାଲିତାକି ମାହାପୁରୁ ୱେସ୍ତେସି । ଏୱାରି ଡାୟୁ ୱେଣ୍ଡେଏ ମାହାପୁରୁତି ସାୟମି ତାକି ପାର୍ତନା କିତେରି, ଅଡ଼େ ମାହାପୁରୁ ତାମି ତାକି ଅରଅଣାଇଁ ଗେଲ୍ପିନାଣାଇଁ ପାଣ୍ଡିତେସି ।

ଇ ଚିନ୍ନା ହାରେକା ବେଡ଼ା ୱେଣ୍ଡେ ୱେଣ୍ଡେଏ ଆତେ: ଇସ୍ରାଏଲତାରି ପାପୁ କିତେରି, ମାହାପରୁ ଏୱାରାଇଁ ବାକା ହିତେସି, ଏଦାଆଁଜେଚ ଏୱାରି ଅଣପିମାଚେରି ଅଡ଼େ ଏୱାରାଇଁ ଗେଲ୍ପାଲିତାକି ମାହାପୁରୁ ରଅଣାଇଁ ଗେଲ୍ପିନାଣାଇଁ ପାଣ୍ଡିତେସି, ଏମିନିଗାଟାରି ଇସ୍ରାଏଲତାରାଇଁ ତାମି ଶାତ୍ରୁଁଟିଏ ଗେଲ୍ପିମାଚେସି ।

ଶେଷାବେଲା, ବାରେ ଦେଶାତା ଏନିକି ରାଜା ମାଚେରି ଏଲେକିଁଏ ରାଜା କିହାଲିତାକି ଲୋକୁ ମାହାପୁରୁତାଣା ପାର୍ତନା କିତେରି । ଏୱାରି ଇଲେକି ରଅଣାଇଁ ରାଜା ଆଚିତେରି ଏମିନିଗାଟାସି ଲାମ୍ବା, ବ୍ଡ଼ାୟୁଗାଟାସି ଅଡ଼େ ଆମ୍ବାଃସି ଏୱାରାଇଁ ଯୁଦ୍ଦୁ ତାକି ତାକି କିହା ଅନେସି । ମାହାପୁରୁ ଇ ୱେସ୍ତାଣୀଇଁ ଅପାଃତେସି, ମାତ୍ର ଏୱାରି ଏନିକି ଅଣପିମାଚେରି ଏଲେକି ରଅଣାଇଁ ରାଜା ହିତେସି ।