15. କାତା ହିହାଁ ଜଲିତି ଦେଶା

ଡାୟୁ ବେଲାତା କାତା ହିତି ଦେଶା କିଣାନତା ଇସ୍ରାଏଲତାରି ହାନି ର ନେହି ବେଲା ମାଚେ । ଆଁଣ୍ଟ୍ୱା କୁଡୁ ତଲେ ଗୁର୍ପ୍ୱି ଆତି କିଣାନ ଗାଡ଼ା ଯିରିହୋ ଗାଡ଼ାତି କାତାତି ପୁଞ୍ଜାଲିତାକି ଯିହୋଶୁୟ ରି ଜାଣାଇଁ ଡ଼ୁକ୍ହାଁ ପାଣ୍ଡିତେସି । ଏ ଦେଶାତି ରାହବ ଦରୁ ରଅସି ଦାରି କାମାକିନାସି ମାଚେସି ଏମିନି ଗାଟାସି ଏ ଡ଼ୁଗାହାଁ କାତା ଅନାରି ଏୱାରାଇଁ ଡ଼ୁକ୍ହାଁ ଡାୟୁ ଏୱାରାଇଁ ଡ଼ୁଗାଁ ହାତୁସାଲି ସାୟମୀ ଆତେସି । ଏୱାସି ଇଲେହେଁ କିତେସି, ଏନାଆଁ ତାକି ଇଚିସାରେ ଏୱାସି ମାହାପୁରୁ ତାଣା ନାମି ତେସି । ଏୱାରି ରାହବ ଅଡ଼େ ତାନି ଇଜତି ଲୋକୁଣି କାତେସି । ଇସ୍ରାଏଲତାରାଇଁ ଏଚିବେଲା ଯିରିହୋଇଁ ନାସ୍ କିନେସି ଇଞ୍ଜି ଇଦାଆଁ କାତା ହିତେସି ।

ଇସ୍ରାଏଲତାରି ଜଲିତି ଦେଶାତା ହଡାଲି ତାକି ଜର୍ଦନ କାଡାଇଁ ଗାଣ୍ଚା ହାଜାଲି ଲାଗିତେ । ମାହାପୁରୁ ଯିହୋଶୁୟଇଁ ଜଲିତେସି “ଯାଜକୟାଁ ନକେଏ ହାଲ୍‌ବେରି। “ଯାଜକୟାଁ ଏଚିବେଲା ଜର୍ଦନ କାଡା କଡା ହିହାଲି ମାଠ୍ହେରି, ଏଚିବେଲା ଲାକମାନି ଏୟୁ ୱାହାଲି ବନ୍ଦ ଆତେ ଏନିକିକି ଇସ୍ରାଏଲତାରି ୱାୟିତି ବୁମିତା ତାକି ତାକି ଜର୍ଦନ କାଡା ଗାଣ୍ ତେରି ।

ଲୋକୁ ଜର୍ଦନ କାଡା ଗାଣ୍ ତି ଡାୟୁ, ବ୍ଡ଼ାୟୁଗାଟି ଗାଡ଼ା ଏନିକି ଯୁଦ୍ଦୁ କିନାଇ ଏଦାଆଁ ମାହାପୁରୁ ଯିହୋଶୁୟଇଁ ଜଲାମାଚେସି । ଲୋକୁ ମାହାପୁରୁତି କାତା ନାମାଃତେରି । ମାହାପୁରୁ ଏନିକି ଜଲିତେସି, ଏଲେକିଁଏ ସୈନ୍ୟୟାଁ ଅଡ଼େ ଯାଜକୟାଁ ଦିନାତାକି ର ଦେବା ଇଲେହେଁ ଶ ଦିନା ଯିରିହୋ ଗାଡ଼ା ଶାରିୱାକି ତିର୍ୱିତେରି ।

ଏଦାଆଁ ଜେଚ ସାତା ଦିନାତା, ଇସ୍ରାଏଲତାରି ସାତାବେଡ଼ା ତିର୍ୱିତେରି । ଏଚିବେଲା ଏୱାରି ଗାଡ଼ାତି ଶାରିୱାକି ଶେଷା ବେଡ଼ାତାକି ତିର୍ୱିତେରି, ଏଚିବେଲା ସୈନ୍ୟୟାଁ ଜିତ ଆତି କାଲ କାଲଆତେରି ଅଡ଼େ ଯାଜକୟାଁ ତାମି ତିତ୍ରିମୟିରି ଉକିତେରି ।

ଏଚିବେଲା ଯିରିହୋ ବେଇଁ ତର୍ଗା ହାଚେ !ମାହାପୁରୁତି ବୋଲୁ ତଲେ ଇସ୍ରାଏଲତାରି ଗାଡ଼ାତା ବାରେ ଦିଣ୍ ସୁଇଁ ନଷ୍ଟ କିତେସି । ଏୱାରି ୱାର୍ଇ ରାହାବ ଅଡ଼େ ତାନି ଇଲୁକୁଟମିଇଁ ଗେଲ୍ପିତେସି, ଏମିନିଗାଟାରି ଇସ୍ରାଏଲ ୱାକି ଆତେରି । କିଣାନତା ଏଟ୍କାତି ଲୋକୁ ଏଚିବେଲା ୱେଚେରି ଯେ ଇସ୍ରାଏଲତାରି ଯିରିହୋଇଁ ନାଶା କିହାମାନେରି, ଏୱାରି ଆଜା ହାଚେରି ଯେ ଇସ୍ରାଏଲତାରି ଏୱାରାଇଁ ଜିକେଏ ନାଶ କିନେରି ।

କିଣାନତି ଏମ୍ବାଃସି ଜିକେଏ ଲୋକୁ ଦଲ ତଲେ ସୁକୁତି କାତା କିଃଆତାକି ମାହାପୁରୁ ଇସ୍ରାଏଲତାରାଇଁ ବୋଲୁ ହିହାମାଚେସି । ମାତ୍ର ଗିବିୟୋନ ଦରୁଗାଟାସି ର କିଣାନତାସି ଲୋକୁଦଲ ଯିହୋଶୁୟଇଁ ମିଚି ଜଲାମାଚେରି ଅଡ଼େ ଏୱାରି କିଣାନଟିଏ ହାରେକା ହେକ ମାନି ର ଟାୟୁଟି ୱାହାମାନେରି । ଏୱାରି ଯିହୋଶୁୟଇଁ ତାମି ତଲେ ର ସୁକୁତି ହାଡା ଆହାଲିତାକି ୱେସ୍ତେରି ।

ଗିବିୟୋନତାରି ଏମ୍ବିଟି ୱାହାମାଚେରି ଏଦାଆଁ ଯିହୋଶୂୟ ଅଡ଼େ ଇସ୍ରାଏଲତାରି ମାହାପୁରୁଇଁ ୱେଞ୍ଜା ହିଲାଃତେରି । ଏଦାଆଁତାକି ଯିହୋଶୂୟ ତାମିତଲେ ର ସୁକୁତି କାତା ତିଆର୍ କେପିତସି । ଗିବିୟୋନତାରି ଏୱାରାଇଁ ଦୁକୁ ହିହାଲି କିହାମାନେରି ଇଞ୍ଜି ଇସ୍ରାଏଲତାରି ଏଚିବେଲା ପୁଞ୍ଜାଲି ଆଡିତେରି ଏୱାରି କାର୍ବି ଆତେରି, ମାତ୍ର ଏୱାରି ତାମିତଲେ କିହାମାନି ସୁକୁତି କାତା ଇଟାଲି କିହାମାଚେରି ଏନଃତାକି ଇଚିସାରେ ଇଦି ମାହାପୁରୁତି ର କାତା ହିତି ବୋଲୁ ମାଚେ । ସାଣେକା ଡାୟୁ, କିଣାନତା ମାନି ଅମୋରୀୟ ଦରୁ ଗାଟାସି ଅର ର ଲୋକୁଦଲତି ରାଜାୟାଁ ୱେଞ୍ଜାଲି ଆଡିତେରି ଯେ ଏୱାରି ଇସ୍ରାଏଲତାରା ତଲେ ର ସୁକୁତି କାତା ତିଆର୍ କେପାମାନେରି, ଏଦାଆଁ ତାକି ଏୱାରି ତାମି ସୈନ୍ୟୟାଁଣୀ କୁଡ଼ି କିହାଁ କାଜା ସୈନ୍ୟ କେପାଲି ଗିବିୟୋନଇଁ ଯୁଦ୍ଦୁ କିତେରି । ଗିବିୟୋନତାରି ଯିହୋଶୂୟତି ଡାଗେ ସାୟମି ଆହାଲିତାକି ର ବୋଲୁ ପାଣ୍ଡିତେରି ।

ଏଦାଆଁତାକି ଯିହୋଶୂୟ ଇସ୍ରାଏଲତି ସୈନ୍ୟଣୀଇଁ କୁଡ଼ି କିହାଁ ଗିବିୟୋନତାରା ଡାଗେ ଏଗା ହାଜାଲି ତାକି ଲାଆଁ ୱୈୟେ ତାକିତେରି । ଲାଇସେଏ ଏୱାରି ଅମୋରୀୟ ସୈନ୍ୟଣୀ କାବାକିହାଁ ଏୱାରାଇଁ ଯୁଦ୍ଦୁ କିତେରି ।

ମାହାପୁରୁ ଏ ଦିନା ଇସ୍ରାଏଲତାରାଟି ଯୁଦ୍ଦୁ କିତେସି । ଏ ଅମୋରୀୟତି ସୈନ୍ୟୟାଁ ଆକାବାକା କିୱିକିତେରି ଅଡ଼େ ଆଜିଁ ପାଣ୍ଡିତେସି ଏମିନାଇ ହାରେକା ଅମୋରୀୟତି ଜୀୱୁ ଅହାମାଚେସି ।

ମାହାପୁରୁ ହାଗୁତା ୱେଡ଼ାଇଁ ରଣ୍ଡିଏ ତାଣା ଆଂଗିତେସି ଏନିକିକି ଇସ୍ରାଏଲ ଅମୋରୀୟତାରାଇଁ ହାର କିନେରି । ଏ ଦିନା ମାହାପୁରୁ ଇସ୍ରାଏଲ ତାକି ର କାଜା ଜିତୁ ବେଟା ଆତେସି ।

ମାହାପୁରୁ ଇ ବାରେ ସୈନ୍ୟଣୀ ହାରକିତି ଡାୟୁ, ଅଡ଼େ ହାରେକା କିଣାନତି ଲୋକୁଦଲ ଇସ୍ରାଏଲତାରାଇଁ ୱେଚାଲି ତାକି କୁଡ଼ା ଆତେରି । ଯିହୋଶୂୟ ଅଡ଼େ ଇସ୍ରାଏଲତାରି ଏୱାରାଇଁ ଯୁଦ୍ଦୁ କିତେରି ଅଡ଼େ ନାଶା କିତେରି ।

ଇ ଯୁଦ୍ଦୁ ଡାୟୁ, ମାହାପୁରୁ ବାରେ ଗଚିଇଁ କାତାହିତି ଦେଶାତା ଜାହାର୍ ଜାହାର୍ ବାଗା ହିତେସି । ଇଦାଆଁ ଜେଚ ମାହାପୁରୁ ଇସ୍ରାଏଲତି ଇଡ଼ିତା ମାନି ବାରେ ଦେଶାଇଁ ସୁକୁ ହିତେସି ।

ଯିହୋଶୂୟ ଏଚିବେଲା ବୁଢ଼୍ହା ଆତେସି, ଏୱାସି ଇସ୍ରାଏଲତି ବାରେ ଲୋକୁଣି କୁଡ଼ି କିହାଁ ହାଟିତେସି । ଡାୟୁ ମାହାପୁରୁ ଇସ୍ରାଏଲତାରା ତଲେ ଏମିନି ସିନୟ ହରୁତା ଏମିନି ମେରା ତିଆର୍ କେପା ମାଚେସି ଏ ମେରାତି ଲୋକୁଣି ଏ କାତା ଅଣପିକିତେସି । ଲୋକୁ ମାହାପୁରୁ ତାଣା ନାମୁତଲେ ଡ଼ୟାଲି ଅଡ଼େ ତାନି ମେରା ତଲେ ତାକାଲି ତାକି ବୋଲୁ ହିତେସି ।