14. ବାଃଲିବୁମି ପାକା ହରୁତି ତାକୁ

ମାହାପୁରୁ ଇସ୍ରାଏଲତାରାଇଁ ମେରା, ଏମିନାଣି ଏୱାସି ତାମି ତଲେ କାତା ହିହାଁ ର ବାଗା ଅହାଁ ଅଣପୁତା ନାମାଲି ତାକି ଅଣପିମାଚେରି, ୱେସ୍ତି ରେଟୁଏ ଏୱାରି ସିନୟ ହରୁଟି ହତେରି । ମାହାପୁରୁ ଏୱାରାଇଁ କାତାହିତି ଦେଶା ୱାକି ନକି କିହାଁ ତାକି କିତେସି, ଏମିନି ଦେଶାଇଁ କିଣାନ ୱେସ୍ପି ଆହିମାଚେ । ହାଗୁତି ମୁଣ୍ଡା ତାମି ନକିତା କିଣାନ ୱାକି ହାଜିମାଚେ ଅଡ଼େ ଏୱାରି ତାମି ଜେଚ ଜେଚ ତାକିମାଚେରି ।

ମାହାପୁରୁ ଅବ୍ରାହାମ, ଇସାହାକ ଅଡ଼େ ଯାକୁବଇଁ କାତା ହିହା ମାଚେସି, ଯେ ଏୱାସି କାତା ହିତି ଦେଶା ତାମି ଗଚିତାରାଇଁ ହିନେସି, ମାତ୍ର ନେଏ ଏ ଟାୟୁତା ହାରେକା ଲୋକୁତି ଦଲ ବାସା କିହିମାଚେରି । ତାମ୍ଗେ କିଣାନତାରି ୱେସ୍ପି ଆହିମାଚେ । କିଣାନତାରି ମାହାପୁରୁଇଁ ପୂଜା କିହିଲାଃତେରି ଅଡ଼େ ତାନି କାତା ନାମିଲାଃତେରି । ଏୱାରି ଉଜେଃତି ପେଣ୍କାଇଁ ପୂଜା କିହିମାଚେରି ଅଡ଼େ ହାରେକା ଲାଗେଃତି କାମା କିହିମାେଚରି ।

ମାହାପୁରୁ ଇସ୍ରାଏଲତାରାଇଁ ଜଲିତେସି “ କାତାହିତି ଦେଶାତା ମିରୁ ବାରେ କିଣାନତାରାଟି ଗେଲ୍ପି ଆନାଇ ମାନେ । ତାମି ତଲେ ସୁକୁ କେପାଃଦୁ ଅଡ଼େ ତାମ୍ଗେ ବିହା ଆଆଦୁ । ମିରୁ ଏ ବାରେତି ବୋମାଣୀ ନଷ୍ଟ କିଦେରି । ଅଡ଼େ ମିରୁ ନା କାତା ତଲେ ତାକାଃସାରେ, ନା ବାଦ୍ଲି ମିରୁ ଏୱାରି ବୋମାଇଁ ପୂଜା କିଅଃତେରି ।”

ଇସ୍ରାଏଲତାରି ଏଚେବେଲା କିଣାନତାରାତି ଇଡ଼ିତା ଏଦେରି, ଏଚିବେଲା ମୋଶା ବାରେ ଜାତିଟି ରଅ ରଅରି କିହାଁ ବାରା ଜାଣା ଆବାଟିଇଁ ଆଚିତେସି । ଏୱାସି ଲୋକୁଣି ଏ ଦେଶା ହାଜାହାଁ ଏଦାଆଁ ସିନିକିହାଁ ଏନିକି ମାନେ ଏଦାଆଁ ଡ଼ୁଗାହାଁ ସିନି କିହାଁ ୱାହାଲିତାକି ୱେସାମାଚେସି । କିଣାନତାରି ବ୍ଡ଼ାୟୁ ଜିକେଏ ଅଡ଼େ ଆଡାଃଗାଟାରି ମାଚେରି ଏଦାଆଁ ଜିକେଏ ପୁଞ୍ଜାଲିତାକି ୱେସ୍ପି ଆହାମାଚେ ।

ଏ ବାରଜାଣା କିଣାନ ବାରେ ଚାଳିଶ ଦିନା ରେଚାହଁ ୱେଣ୍ଡା ୱାତେରି । ଏୱାରି ଲୋକୁଣି ୱେସ୍ତେରି” ଏଦେଶା ହାରେକା ନେହି ବୁମି ଅଡ଼େ ଏମ୍ବାଆଁ ହାରେକା ପାଡ଼େଇ ଆନେ! “ମାତ୍ର ଏ ପୁଞ୍ଜାଲି ତାକି ହାଚି ବିତ୍ରା ଦଶ ଜାଣା ଏଲେଇଚେରି” ଏମ୍ବାତି ଗାଡ଼ାୟାଁ ହାରେକା ଆଁଣ୍ଟ୍ୱା ଅଡ଼େ ଏମ୍ବାତି ଲୋକୁ କାଜା କାଜାରି ! ଅଡ଼େ ମାର ଏୱାରାଇଁ ୱେତିସାରେ, ଏୱାରି ସାତେଏ ମାଂଗ ହାର କିୟାନେରି ମାଂଗ ପାୟାନେରି!”

ଏଚିବେଲାଏ ଅର ରି ଜାଣା ଡ଼ୁଗିତାରି କାଲେବା ଅଡ଼େ ଯିହୋଶୁୟ ଜଲିତେରି “ଇଦି ସାତେଏ ଯେ କିଣାନତି ଲୋକୁ କାଜା କାଜାରି ଅଡ଼େ ବ୍ଡ଼ାୟୁଗାଟାରି, ମାତ୍ର ମାର ଏୱାରାଇଁ ସାତେଏ ହାର କିନାଇ! ମାହାପୁରୁ ମା ୱାକିଟି ଯୁଦ୍ଦ କିନେସି !”

ମାତ୍ର ଲୋକୁ କାଲେବ ଅଡ଼େ ଯିହୋଶୁୟ କାତା ୱେନାଃତେରି । ଏୱାରି ମୋଶା ଅଡ଼େ ହାରଣଇଁ କାର୍ବି ଆହାଁ ଜଲିତେରି “ନିଁନୁ ଏନାଆଁ ତାକି ମାଂଗ ଇଲେକି ଲାଗେଃତି ଟାୟୁତା ଚାଚାମାଞ୍ଜି ? ମାମ୍ବୁ ଯୁଦ୍ଦୁତା ହାନି ଟିଏ ଅଡ଼େ ମିଶରତା ଡ଼ଇନାଇ ମାଚେ ଅଡ଼େ ମା ଡକ୍ରୀସ୍କା ଅଡ଼େ କକାରି ପଦାଁ ହଲିଆଣୀ ଲେହେଁ ଡ଼ଇତୁମା ।“ଲୋକୁ ତାମି ତାକି ଅ ରଅସି ଗୁରୁ ଆଚାଲିତାକି ଆଣପିତେରି ଏମିନିଗାଟାସି ଏୱାରାଇଁ ମିଶରତା ଅନେସି ।

ମାହାପୁରୁ ହାରେକା କାର୍ବି ଆତେସି ଅଡ଼େ କୁଡ଼ାଆତି ଗୁଡ଼ାତା ୱାତେରି । ମାହାପୁରୁ ଜଲିତେସି “ଏନାଃତାକି ଇଚିସାରେ ମିରୁ ନା ବିରୁଦ୍ଦ କାଲିକାମ୍ବା କିହାମାଞ୍ଜେରି, ଏଦାଆଁତାକି ବାରେ ଲୋକୁ ପାକା ହରୁତା ଜିରୁ ବାଣ୍ବି ଆହାଁ ତାକିଦେରି । ଯିହୋଶୁୟ ଅଡ଼େ କାଲେବଇଁ ପିସାହାଁ ବାରେ କୋଡ଼େ ବାର୍ଷା ଅଡ଼େ ଏଦାଆଁଟି ଲାକ ବାରେ ଏମ୍ବାଆଁ ହାନେରି ଅଡ଼େ ଏୱାରି କାତା ହିତି ଦେଶାତା ଏଚେଲା ଜିକେଏ ହଡାଲି ଆଡଃରି ।

ଲୋକୁ ଏଚିବେଲା ଇଦାଆଁ ୱେଚେରି, ଏଚିବେଲା ଏୱାରି ଯେ ପାପୁ କିହାମାନେରି ଏଦାଆଁ ତାକି ଦୁକୁ ଆତେସି । ଏୱାରି ତାମି କଣ୍ଡାୟାଁ ଅହାଁ କିଣାନତା ମାନି ଲୋକୁଣି ୱେଚାଲି ହଚା ୱାତେରି । ମୋଶା ଏୱାରାଇଁ ହାଜାଲି ହିଆଃତେସି ଏନାଃତାକିଇଚିସାରେ ମାହାପୁରୁ ତାମି ତଲେ ହିଲାଃତେସି, ମାତ୍ର ଏୱାରି ତାମି କାତା ୱେନାଃତେରି ।

ମାହାପୁରୁ ଏ ଯୁଦ୍ଦୁ ଟାୟୁତା ତାମି ତଲେ ହାଲାଃତେସି, ଏଦାଆଁ ତାକି ଏୱାରି ହାର ଆତେରି ଅଡ଼େ ତାମି ବିତ୍ରା ହାରେକା ହାତେରି । ଏଦାଆଁ ଜେଚ ଇସ୍ରାଏଲତାରି କିଣାନତି ମୁମ୍ବୁ ତିର୍ୱିକିହାଁ ଚାଳିଶ ବାର୍ଷା ପାତେକା ରେତେରି ।

ଇସ୍ରାଏଲତି ଲୋକୁ ପାକାହରୁତା ରେଜାହାଁ ଚାଳିଶ ବାର୍ଷା ବେଲାତା ମାହାପୁରୁ ଏୱାରାଇଁ ବାରେ ଦରକାର ବିଷୟ ହିତେସି । ଏ “ମାନ୍ନା” ଦରୁତା ୱେଂଗିତି ଲେକପୁରୁ କାଦି ହିତେସି । ଅଡ଼େ ଏୱାସି ତାମି ବାସା ଟାୟୁଇଁ ଜିରୁ ପଟା ପାଣ୍ଡିତେସି (ଏମିନିଗାଟାଇ ମାଦିତି ପଟା ମାଚେ ) ଏନିକିକି ତାମି ତିନିତାକି ଉଂଗା ବେଟାଆନେରି । ଇ ବାରେବେଲା ବିତ୍ରା, ମାହାପୁରୁ ତାମିୱାଇ ମେଦିନି ହେମ୍ବରି ଅଡ଼େ ପାଣ୍ଡେଇ ରାୟାଲି ହିଃଆତେସି ।

ମାହାପୁରୁ ଇଲେହେଁକି କାବା ଆନି ଲେହେଁ ୱାଲିଟି ଏୱାରାଇଁ ଏୟୁ ହିତେସି । ମାତ୍ର ଇ ବାରେତି କାମା ଆତି ଜିକେଏ, ଇସ୍ରାଏଲତି ଲୋକୁ ଅଡ଼େ ମୋଶାତି ବିରୁଦ୍ଦଇଁ ୱେସ୍ତେରି ହିଆଁତା ଲାଗିତେରି । ଇଲେକି ଆତି ଜିକେଏ ମାହାପୁରୁ ଅବ୍ରାହାମ, ଇସାହାକ ଅଡ଼େ ଯାକୁବ ତଲେ କିହାମାନି କାତାତା ନାମୁ ଇଟିତେସି ।

ଅର ବେଲାତା, ଲୋକୁ ଏଚିବେଲା ଏୟୁ ବେଟା ଆଆତେରି, ମାହାପୁରୁ ମୋଶାଇଁ ଜଲିତେସି “ଏ ୱାଲିଇଁ କାତା ଆମୁ ଅଡ଼େ ଏମ୍ବାଟି ଏୟୁ ହନେ ।“ ମାତ୍ର ମୋଶା ୱାଲିଇଁ ଜଲିନି ବାଟା ରିଦେବା ବାଡ଼୍ଗା ତଲେ କୁତିତି ତାକି ବାରେ ଲୋକୁ ନକିତା ମାହାପୁରୁଇଁ ସମ୍ମାନ ହିଃଆତେସି । ବାରେ ଏନିକି ଏୟୁ ଗହ୍ନେରି ଏଦାଆଁ ତାକି ଏୟୁ ହଚା ୱାତେ, ମାତ୍ର ମାହାପୁରୁ ମୋଶାଇଁ କାର୍ବି ଆହାମାଚେସି ଅଡ଼େ ଜଲିତେସି “ମିରୁ କାତାହିତି ଦେଶାତା ହଡାଲି ଆଡଃତେରି ।“

ଇସ୍ରାଏଲତାରି ଚାଲିଶ ବାର୍ଷା ପାକାହରୁତା ତାକିତି ଡାୟୁ, ମାହାପୁରୁ ବିରୁଦ୍ଦତା ଏଚେକା ଲୋକୁ ଏଟ୍କା ଜଲା ମାଚେରି, ବାରେ ହାତେରି । ଏଦାଆଁ ଜେଚ ମାହାପୁରୁ ୱେଣ୍ଡେଏ କାତାହିତି ଦେଶାତି ହରୁତା ଏୱାରାଇଁ ଅହାମାଚେସି । ମୋଶା ନେଏଁ ହାରେକା ବୁଢ଼୍ହା ଆହା ହାଜାମାଚେସି, ଏଦାଆଁ ତାକି ଲୋକୁଣି ଜିରୁତସାଲି ତାକି ତାଙ୍ଗେ ସାୟମୀ ଆହାଲିତାକି ଏୱାସି ଜିହୋଶିୟଇଁ ଆଚି ତେସି । ମାହାପୁରୁ ମୋଶାଇଁ ଅଡ଼େ ର କାତା ହିତେସି , ଏୱାସି ମୋଶା ଲେହେଁ ଅର ଭାବବାଦୀ ପାଣ୍ଡାନେସି ।

ଏଦାଆଁ ଜେଚ ମାହାପୁରୁ ମୋଶାଇଁ ର ହରୁଲାକ ହଚାଲିତାକି ଜଲିତେସି ଏନିକିକି ଏୱାସି ଏମ୍ବାଟିଏ ଜଲିତି ଦେଶାଇଁ ମେଶାଲି ଆଡିନେସି । ମୋଶା ଜଲିତି ଦେଶା ମେଶାଲି ଆଡିତେସି ମାତ୍ର ଏୱାସି ଏମ୍ବାଆଁ ହଡାଲି ତାକି ମାହାପୁରୁ ବୋଲୁ ହିଆତେସି । ଏଦାଆଁ ଜେଚ ମୋଶା ହାତେସି, ଅଡ଼େ ଇସ୍ରାଏଲତିଲୋକୁ ତିରିଶ୍ ଦିନା ତାନିତାକି ଦୁକୁ କିତେରି । ଯିହୋଶୂୟ ତାମି ପୁଃନି ଗୁରୁ ଆତେସି । ଯିହୋଶୂୟ ର ନେହି ଗୁରୁ ମାଚେସି ଏନାଃତାକି ଇଚିସାରେ ଏୱାସି ମାହାପୁରୁତାଣା ନାମୁ ଇଟାମାଚେସି ଅଡ଼େ ତାନି କାତା ନାମି ମାଚେରି ।