13. ମାହାପୁରୁ ଇସ୍ରାଏଲ ତଲେ ମେରା

ମାହାପୁରୁ ଇସ୍ରାଏଲତାରାଇଁ ନିଲି ସାମଦୁର୍ଟି ଗେଣ୍ପି କିତି ଡାୟୁ, ଏୱାସି ର ବାଃଲିବୁମିଟି ସିନୟ ଦରୁଗାଟି ହରୁତା ତାତେସି ା ଇଦି ଏ ହରୁ ମାଚେ ଏମିନିତାଣା ମୋଶା ହୁଡିତି ବୁଟାତା ମେସାମାଚେସି । ହୋରୁ ତି ଡ଼ଏ ଲୋକୁୟାଁ ତାମି ଗୁଡ଼ାଇଁ କାଜାଣି କିତେରି ।

ମାହାପୁରୁ ମୋଶାଇଁ ଇସ୍ରାଏଲତି ଲୋକୁ ଇଁ ୱେସ୍ତେସି “ମିରୁ ନା ବୋଲୁ ନାମାଦୁ ଓଡ଼େ ନା ମେରା ଇଁ ନାମା ଇଟାଦୁ ଆତିହିଁ ମିରୁ ନା ଇଟିତି ଦନ, ଯାଜକଁ ୱାଇ ରଣ୍ଡି ରାଜାଗୋଚି ଅଡ଼େ ରଣ୍ଡି ଦାର୍ମୁ ଦେଶା ଆନେ ।”

ତିନି ଦିନା ଡାୟୁ , ଲୋକୁୟାଁ ଯାହାରାଇଁ ଦାର୍ମୁ ଲେହେଁ ସାକାତା ଆତି ଜେଚ, ମାହାପୁରୁ ହାଗୁ ଡ଼ିତେ, ବିଜା, ବୋଇଁ ଅଡ଼େ ର କାଜା ତିତ୍ରି ହାଡା ତଲେ ସିନୟ ହରୁ ଲାକ ରେଚା ୱାତେସି । ୱାର୍ଇ ମୋଶାଦେହେଁ ହରୁ ଲାକ ହାଜାଲି ହୁକୁମ୍ ବେଟା ଆତେସି ।

ଏଦାଆଁ ଜେଚ ମାହାପୁରୁ ଏୱାରାଇଁ ତାନି ମେରା ହିତେସି ଅଡ଼େ ଜଲିତେସି “ନାନୁ ମି ମାହାପୁରୁ କାଲା କାଲାତି ମାହାପୁରୁତେଏଁ, ଆମ୍ବାଃସି ମିଙ୍ଗ ମିଶରତି ହଲିଆଁଟିଏ ଗେଲ୍ପାତେସି । ଏଟ୍କା ପେଣ୍କାଇଁ ପୂଜା କିଃଆଦୁ ।”

“ଏନି ବୋମା ତିଆର୍ କେପାଃଦୁ ଅଡ଼େ ଏୱାଆଁ ପୂଜା କିଃଅତେରି, ଏନାଆ ତାକିଇଚିସାରେ, ନାନୁ ରିଞ୍ଜିନି ମାହାପୁରୁତେଏଁ । ନା ଦରୁ ଦାରା ହିଲାଃତିଲେହେଁ କିୟାଃଦୁ । ଜମିନି ଦିନାଇଁ ନାମିନି ଅର ଅର୍ତ, ୱାର୍ଇ ଶ ଦିନାତା ମି ବାରେ କାମା କିଦେରି, ମାତ୍ର ସାତାଦିନା ମି ତାକି ଜମିନି ଦିନା ଆନେ ଅଡ଼େ ମିମ୍ବୁ ନାଂଗେ ଅଣପିଦେରି ।”

“ମି ଆବା ଅଡ଼େ ଆୟାଇଁ ସନ୍ମାନ କିଦୁ । ନରଣୀ ପାୟାଃଦୁ । ଦାରି କିଃଆଦୁ । ଶରୁ କିଃଆଦୁ । ମିଚି ଜଲାଃଆଦୁ । ମି ପାଡ଼ି ଇଜତି ଡକ୍ରୀଇଁ, ତାନି ଇଲୁଇଁ ଅଡ଼େ ପାଡ଼ି ଇଜତି ଏନି ଦିଣ୍ସୁ ଏମିନାଇ ତାମିୱାଇ, ଲୋବୁ ଆଃଆଦୁ ।”

ଏଦାଆଁ ଜେଚ ମାହାପୁରୁ ରିଣ୍ଡି ୱାଲି ପାଟାତା ଇ ଦଶଗଟା ହୁକୁମ୍ କୁତିତେସି ଅଡ଼େ ମୋଶାଇଁ ହିତେସି । ମାହାପୁରୁ ଅଡ଼େ ହାରେକା ମେରା ଅଡ଼େ ନୀତି ତଲେ ତାକାଲି ହିତେସି । ମାହାପୁରୁ କାତା ହିହାଁ ଜଲିତେସି, ଅଡ଼େ ଲୋକୁ ଇ ମେରା ତଲେ ତାକିନେରି, ଆତିସାରେ ଏୱାସି ତାମ୍ଗେ ବର ହିନେସି ଅଡ଼େ ଗେଲ୍ପିନେସି । ଅଡ଼େ ଏୱାରି ଏଦାଆଁତି ମାନଆଃଆସାରେ, ମହାପୁରୁ ଏୱାରାଇଁ ବାକା ହିନେସି ।

ମାହାପୁରୁ ଅଡ଼େଜିକେଏ ଇସ୍ରାଏଲତାରାଇଁ ର ଗୁଡ଼ାତି ବାରେ ପାଣ୍ଡାତେସି ଏମିନାଣି ଏୱାରି କିପେରି ଇଞ୍ଜି ଏୱାସି ୱେସାମାଚେସି । ଏଦାଣି ସମାଗମତମ୍ବୁ ଇଞ୍ଜିମାଚେରି, ଅଡ଼େ ରିଣ୍ଡି ଗନ୍ଦି ମାଚେ ଏମିନାଣି ର କାଜା ପାର୍ଦା ବାଗା କିହିମାଚେ । ୱାର୍ଇ ମହାଜାଯକ ଏ ପାର୍ଦାତି ଡାୟୁୱାକି ମାନି ଗନ୍ଦିତା ହାଜାଲି ତାକି ହେଲ ବେଟା ଆହାମାଚେରି, ଏନାଆତାକି ଇଚିସାରେ ମାହାପୁରୁ ଏମ୍ବାଆଁ ଡ଼ଇମାଚେସି ।

ଏନାରି ଜିକେଏ ମାହାପୁରୁତି ମେରାତି ନାମାଃତେରି ଏୱାସି ମାହାପୁରୁ ତାକି ର ପୂଜା ଲେହେଁ ର ପଶୁଇଁ ସମାଗମତମ୍ବୁ ନକିତା ମାନି ବେଦି ଦାରି ଚାଚିମାଚେରି । ର ଯାଜକ ପଶୁଇଁ ପାୟାହାଁ ଏଦାଣି ବେଦିତା ପୁରା ହୁଡିମାଚେରି । ପୂଜା ହିହିମାନି ପଶୁତି କାସା ଏ ମାଣ୍ସିତି ପାପୁଇଁ ଡ଼ୁକ୍ହିମାଚେ ଅଡ଼େ ପ୍ଡ଼ି୍କ୍ହିମାଚେ ଅଡ଼େ ଏ ମାଣ୍ସି ମାହାପୁରୁ ନକିତା ଦାର୍ମୁ ଗାଟାସି ଆହିମାଚେସି । ମାହାପୁରୁ ମୋଶାତି ତାଇ ହାରଣ ଅଡ଼େ ହାରଣତି ଗଚି ତାମି ଯାଜକ ଆହାଲିତାକି ଆଚ୍‌ୱି ଆତେସି ।

ବାରେ ଲୋକୁ ମାହାପୁରୁ ଏୱାରାଇଁ ହିହାମାନି ମେରା ତଲେ ତାକାଲିତାକି, ୱାର୍ଇ ମାହାପୁରୁତି ପୂଜା କିହାଲିତାକି ଅଡ଼େ ତାନି ଆଚିତି ଲୋକୁ ଆହାଲି ତାକି ର ଅଣ୍ପୁ ଆତେସି । ମାତ୍ର ଏୱାରି ମାହାପୁରୁତି କାତା ତଲେ ତାକାଲି ତାକି କାତା ଇଟିନି ସାଣେକା ବେଲା ଡାୟୁ ଏୱାରି ହାରେକା ପାପୁ କିତେରି ।

ହାରେକା ଦିନା ଆସାହାଁ ମୋଶା ମାହାପୁରୁ ତଲେ ସିନୟ ହରୁ ଟିପୁତା କାତା ଆହିମାଚେସି । ମୋଶା ୱେଣ୍ଡିନାଣି କାଚି କାଚିହିଁ ଲୋକୁ ୱାହିତେରି ଅଡ଼େ କାଚାଲି ଆଡାଃତେରି । ଏଦାଆଁତାକି ଏୱାରି ହାରଣ ଡାଗେ ବାଂଗାରା ଚାଚାହାଁ ତାଂଗେ ତାମି ତାକି ର ବୋମା ତିଆର୍ କିହାଲି ଜଲିତେସି !

ହାରଣ ଏ ବାଙ୍ଗାରା ତଲେ ର ବାଚା ଡାଲୁତି ଲେହେଁତି ବୋମା ତିଆର୍ କେପିତେରି । ଲୋକୁ ହାରେକା ଲାଗେଃତି ଲେହେଁ ଏ ବୋମାଇଁ ପୂଜା କେପିତେରି ଅଡ଼େ ପୁଜାବଳୀ ହିତେରି ! ତାମି ପାପୁ ତାକି ଏୱାର୍ ତାଣା ମାହାପୁରୁ ଗାଡି ରିଞ୍ଜିତେସି ଅଡ଼େ ଏୱାରାଇଁ କ୍ଡ଼ୁପ୍ହାଲି ଆଣପିତେସି ।

ମାତ୍ର ମୋଶା ତାମି ତାକି ପାର୍ତନା କିତେସି, ଅଡ଼େ ମାହାପୁରୁ ତାମି ପାର୍ତନାଇଁ ୱେଚେସି ଅଡ଼େ ଏୱାରାଆଁ ପାୟାଃତେସି । ମୋଶା ଏଚେବେଲା ହରୁଟି ରେଚା ୱାତେସି ଅଡ଼େ ଏବୋମା ମେସ୍ତେସି, ଏୱାସି ଇଚେକା ରିଞ୍ଜିତେସି ଯେ ମାହାପୁରୁ ଏମିନି ୱାଲି ପାଟାତା ଦଶ ହୁକୁମ୍ କୁତାମାଚେସି ଏୱାସିଏଦାଣିଇଁ କୁତୁସାଁ ଗୁଣ୍ଡ୍ ଗୁଣ୍ଡା କିହାସ୍ତେସି ।

ଏଦାଆଁ ଜେଚ ମୋଶା ଏ ବୋମାଇଁ ୱେଚିହିଁ ଗୁଣ୍ଡ୍ ଗୁଣ୍ଡା କିହାସ୍ତେସି, ଅଡ଼େ ଏ ଗୁଣ୍ଡାଇଁ ରଚେକ ଏୟୁ କୁତୁସ୍ତେସି ଅଡ଼େ ଲୋକୁଣି ଏ ଏୟୁ ଗସାଲି ହିତେସି । ମାହାପୁରୁ ଲୋକୁତାଣା କାତାରା ପାଣ୍ଡିତେସି ଅଡ଼େ ଏ କାତାରାତା ହାରେକା ଲୋକୁ ହାତେରି । ମୋଶା ଏମିନି ନକେଏ ୱାଲିତି ପାଟା ଡିକ୍ହାମାଚେସି ତାନି ବାଟା ଏୱାସି ର ପୁଃନି ୱାଲିତି ପାଟାତା ଦଶ ଗଟା ହୁକୁମ୍ କୁତିତେସି ।

ଏଦାଆଁ ଜେଚ ଏୱାସି ୱେଣ୍ଡେଏ ଏ ହରୁତା ହତେସି ଅଡ଼େ ମାହାପୁରୁ ତାଣା, ଲୋକୁଣି କ୍ଷମା ହିହାଲିତାକି ପାର୍ତନା କିତେସି । ମାହାପୁରୁ ମୋଶାତି ପାର୍ତନା ୱେଞ୍ଜାହାଁ ଏୱାରାଇଁ କ୍ଷମା ହିତେସି । ମୋଶା ହରୁଟି ପୁଃନି ୱାଲି ପାଟାତା ଦଶଗଟା ହୁକୁମ୍ ତଲେ ରେଚା ୱାତେସି । ଏଦାଆଁ ଜେଚ ମାହାପୁରୁ ସିନୟ ହରୁ ଟିଏ କାତା ଇଟିତି ଦେଶା ୱାକି ଇସ୍ରାଏଲତାରାଇଁ ତାକି କିହା ଅତେସି ।