12. କାଜାତାକୁ

ମିଶର ପିସିନି ତାକି ଇସ୍ରାଏଲଲୋକୁ ହାରେକା ରହାଁ ମାଚେରି । ଏୱାରି ଅଡ଼େ ହଲିଆ ଆହାଁ ଡ଼ୟାଃତେରି, ଅଡ଼େ ଏୱାରି କାତାଇଟାମାଚି ଦେଶାତା ହାଜିମାଚେରି । ଇସ୍ରାଏଲତିଲୋକୁ ମିଶରତି ଲୋକୁଣି ରିସ୍ତେରି, ଏୱାରି ଏ ବାରେ ହିତେରି, ଇଲେହେଁକି ବାଂଗାରା ଅଡ଼େ ଅର ଦାରାଗାଟି ଜିନିଷ ହିତେରି । ଏଟ୍କାତି କଚେକା ଲୋକୁ ମାହାପୁରୁ ତାଣା ନାମିତେରି ଅଡ଼େ ଏୱାରି ମିଶର ପିସ୍ତିବେଲା ଇସ୍ରାଏଲତିଲୋକୁ ତଲେ ହାଚେରି ।

ମାଦେନା ମାହାପୁରୁ ତାମି ନକିତା ର କାଜା ହାଗୁମୁଣ୍ଡା ତଲେ ଏୱାରାଇଁ ଜିରୁ ତାକି କିହାଁ ଅହିମାଚେସି, ଏଦି ଲାଆଁ ବେଲା କାଜା ହିଚୁମୁଣ୍ଡା ଆହିମାଚେ । ମାହାପୁରୁ ତାମିତଲେ ସବୁବେଲା ଡ଼ଇମାଚେସି ଅଡ଼େ ଏୱାରି ତାକିନିବେଲା ତାମ୍ଗେ ଜିରୁ ତସିମାଚେସି । ଏୱାରି ତାମି ଜେଚ ତାକିନାଇ ମାଚେ ।

ର ସାଣେକା ଜେଚ ଫାରୋ ଅଡ଼େ ତାମି ଲୋକୁ ତାମି ହିୟାଁ ବାଦ୍ଲି କିତେରି ଅଡ଼େ ଇସ୍ରାଏଲତିଲୋକୁଣି ତାମି ହଲିଆ ଆହାଲିତାକି ୱେଣ୍ଡେଏ ଆଣପିତେରି । ମାହାପୁରୁ ଫାରୋଇଁ ଡାଣ୍ଟା ହିୟାଁ କେପିତେସି, ଏନିକି ଲୋକୁ ରଣ୍ଡିଏ ସାତା ମାହାପୁରୁ ଇଞ୍ଜି ପୁଞ୍ଜା କଡିନେରି, ଅଡ଼େ ତେଲ୍ହିନେରି ଯେ ଏୱାସି, ମାହାପୁରୁ ଫାରୋ ଅଡ଼େ ଫାରୋତି ପେଣ୍କାଁଟିଏ ହାରେକା ବ୍ଡ଼ାୟୁଗାଟାସି ।

ଏଦାଆଁତାକି ଏୱାରାଇଁ ୱେଣ୍ଡେଏ ହଲିଆ କିହାଲି ଇସ୍ରାଏଲଲୋକୁତି ଜେଚ ଜେଚ ଫାରୋ ଅଡ଼େ ତାନି ସୈନ୍ୟୟାଁ ଜେଚ ପେର୍ହେରି । ମିଶରତି ସୈନ୍ୟୟାଁ ୱାନାଣି ଏଚିବେଲା ଇସ୍ରାଏଲଲୋକୁଣି ମେସ୍ତେସି, ଏୱାରି ହିୟାଁତା ଅତେରି ଅଡ଼େ ଏୱାରି ଫାରୋତି ସୈନ୍ୟ ଅଡ଼େ ନିଲି ସାମଦୁର୍ ବିତ୍ରା ହଡା ହାଚେରି । ଏୱାରି ହାରେକା ଆଜା ହାଚେରି ଅଡ଼େ ଏୱାରି କାଚ୍ଡ଼ ଆହାଁ ଏଲେ ଇଚେରି “ ମାମ୍ବୁ ଏନାଆତାକି ମିଶର ପିସ୍ତମି ? ମାମ୍ବୁ ହାହାଲି ହାଜିନମି !”

ମୋଶା ଇସ୍ରାଏଲତିଲୋକୁଣି ଏଲେଇଚେସି, ”ଆଜାଃଦୁ ! ମାହାପୁରୁ ନିଞ୍ଜୁ ମି ତାକି ଯୁଦ୍ଦ କିନେସି ମିଂଗ ଗେଲ୍ପାନେସି । “ଏଦାଆଁ ଜେଚ ମାହାପୁରୁ ମୋଶାଇଁ ଜଲିତେସି “ ଲୋକୁଣି ନିଲିକାଡା ୱାକି ହାଜାଲି ଏଲେଇନାମୁ ।”

ଏଦାଆଁ ଜେଚ ମାହାପୁରୁ ହାଗୁମୁଣ୍ଡା ଅହାଁ ଇସ୍ରାଏଲ ଅଡ଼େ ମିଶରତାରା ବିତ୍ରା ଇଟିତେସି ଏନିକିକି ମିଶରତାରି ଇସ୍ରାଏଲଲୋକୁଣି ମେଶାଲି ଆଡଃରି ।

ମାହାପୁରୁ ମୋଶାଇଁ ତାନି କେୟୁ ପେର୍ହାଁ ସାମଦୁରଇଁ ରି ବାଗା କିହାଲି ଜଲିତେସି । ଏଦାଆଁଜେଚ ମାହାପୁରୁ ସାମଦୁରଇଁ ଗାଲି ତଲେ ଟେବ୍ରି ଅଡ଼େ ଟିଃନି ଟଟ ଏୟୁଇଁ ନାବ୍ଗାଲି କିତେସି, ଏନିକିକି ସାମଦୁର୍ ବିତ୍ରା ର ଜିରୁ ଆତେ ।

ଇସ୍ରାଏଲତିଲୋକୁ ସାମଦୁର୍ ବିତ୍ରା ୱାଇତି ବୁମିତା ତାକିତେରି ଅଡ଼େ ତାମି ରିକୱାକି ଏୟୁତି କୁଡୁ ମାଚେ ।

ଏଦାଆଁଜେଚ ମାହାପୁରୁ ହାଗୁଇଁ ଏ ଟାୟୁଟି ଲାକ ଅହାସ୍ତେସି ଏନିକିକି ଇସ୍ରାଏଲତିଲୋକୁ ହାଜିମାନାଣି ମିଶରତିଲୋକୁ ମେସାଲି ଆଡି ନେରି । ମିଶରତିଲୋକୁ ଏୱାରାଇଁ ଜେଚ ପେର୍ହାଲି ଅଣପିତେରି ।

ଏଦାଆଁ ତାକି ଏୱାରି ସାମଦୁର୍ ବିତ୍ରାଟି ଆହାମାନି ଜିରୁଟି ଇସ୍ରାଏଲତିଲୋକୁଣି ଜେଚ ପେର୍ହେରି,ଅଡ଼େ ମାହାପୁରୁ ମିଶରତାରାଇଁ କଷ୍ଟ ହିତେସି ଅଡ଼େ ତାମି ରତଁ ବିତ୍ରା ନେସ୍ତେରି । ଏୱାରି କାଲଆହାଁ ଏଲେଇଚେରି “ହାତୁଃଦୁ ! ମାହାପୁରୁ ଇସ୍ରାଏଲତାରା ୱାକି ଯୁଦ୍ଦ କିହିମାଚେସି !”

ଇସ୍ରାଏଲତାରି ସାମଦୁର୍ ଆତାଲା ନେହିକି ଏତି ଡାୟୁ ମାହାପୁରୁ ମୋଶାଇଁ ତାନି ବମି ୱେଣ୍ଡେଏ ପେର୍ହାଲି ଜଲିତେସି । ଏଚିବେଲା ଏୱାସି ମାହାପୁରୁତି କାତା ନାମିତେସି, ଏୟୁ ମିଶରତାରା ଲେକ ୱାହାସ୍ତେ ଅଡ଼େ ସାମଦୁର୍ ନକେଏତି ଲେହେଁ ଆତେ । ବାରେ ମିଶରତାରି ସୈନ୍ୟ ସାମଦୁର୍ ତା ମେଦାହାଁ ହାତେରି ।

ଇସ୍ରାଏଲତାରି ଏଚିବେଲା ମେସ୍ତେରି ମିଶରତାରି ହାହା ହାଚେରି, ଏୱାରି ମାହାପୁରୁତାଣା ନାମିତେରି ଅଡ଼େ ମୋଶା ମାହାପୁରୁତାଣା ର ଭାବବାଦୀ ଏଦାଆଁ ନାମିତେରି ।

ଇସ୍ରାଏଲତାରି ଜିକେଏ ଗାଡି ରାହାଁ ଆତେରି ଏନାଆ ତାକି ଇଚିସାରେ ମାହାପୁରୁ ହାକି ଅଡ଼େ ହଲିଆଟି ଗେଲ୍ପିତେସି ! ନେଏ ଏୱାରି ମାହାପୁରୁତି ସେବା କିହାଲି ନେହିବେଲା ମାଚେ । ଇସ୍ରାଏଲତାରି ତାମି ପୁଃନି ସ୍ବାଧିନଇଁ କେପାଲି ଅଡ଼େ ମାହାପୁରୁତି ଗୌରମି କିହାଲି ହାରେକା ପାଚୁୟାଁ ପାଚିତେରି ଏନାଆତାକିଇଚିସାରେ ଏ ମିଶରତି ସୈନ୍ୟଟିଏ ତାମ୍ଗେ ଗେଲ୍ପାମାଚେସି ।

ମାହାପୁରୁ ଇସ୍ରାଏଲତାରାଇଁ ମିଶରତାରା ତାଣା ଏନିକି ଜିଣା କିତେସି ଅଡ଼େ ଏୱାରାଇଁ ହଲିଆଟିଏ ଏନିକି ଗେଲ୍ପିତେସି, ଏଦାଆଁ ଆଣପାଲି ତାକି ଇସ୍ରାଏଲତାରାଇଁ ନିସ୍ତାରପାର୍ବୁ ନାମାଲି ତାକି ହୁକୁମ୍ ହିତେସି । ଏୱାରି ର ମେଣ୍ଡା ଡାଲୁଇଁ ପୁଜା କିତାକି ଅଡ଼େ ରୁଟି ତଲେ ଏଦାଣି ଚିଞ୍ଜାହାଁ ନାମିତେରି ।