26. ଯୀଶୁ ତାନି ସେବା କାମା ମାଟ୍ନେସି

ଶୟତାନତି ଲୋବୁତା ଜିଣା ଆତି ଜେଚ, ଯୀଶୁ ପବିତ୍ରଆତ୍ମାତି ବ୍ଡ଼ାୟୁ ତଲେ ଏୱାସି ସେବା କିହିମାନି ଗାଲିଲୀ ୱାକି ୱାତେସି । ଯୀଶୁ ଜାପ୍ହାହାଁ ର ର ଟାୟୁତା ରେଚେସି । ବାରେ ଜାଣା ତାନି କାତାଇଁତି ନେହି କାତା ଇଚେରି ।

ଯୀଶୁ ଏମିନି ନାଜରିତତା ତାନି ଉଣାୱେଡ଼ାଟିଏ ଡ଼ଇମାଚେସି, ଏ ଗାଡ଼ାତା ହାଚେସି । ଜମିନିଦିନାତା ଏୱାସି ପାର୍ତନା କିନି ତାଣା ହାଚେସି । ତାନି କେୟୁତା ଗୁର୍ତି ଆତି ର ବହି (ଏ ବେଲା ମାଚେ ପାଣ୍ଇ ମେରା) ହିପ୍କି ଆତେ ଏନିକିକି ଏୱାସି ଯିଶାଇୟ ଭାବବାଦୀତି ବହି ପଡ଼ ଆନେସି । ଯୀଶୁ ଗୁର୍ଞ୍ଜିତି ବହିଇଁ ଦେତେସି ଏମ୍ବାତାଇଇଁ ରଚାଇଁ ଲୋକୁ ନକିତା ପଡ଼ ଆତେସି ।

ଯୀଶୁ ପଡ଼ ଆତେସି “ମାହାପୁରୁ ତାନି ଆତ୍ମା ନାଙ୍ଗେ ହିହାମାଞ୍ଜାନେସି ଏନିକିକି ହିଲାଃଗାଟାରି ତାଣା ମାହାପୁରୁତି ବୋଲୁ ୱେକ୍ହାଲି, ବନ୍ଦୀଗାଟାରିଇଁ ମୁକ୍ଲ ଆନି ବୋଲୁ, କାଣାଇଁ ମେହ୍ନି କାତା, ଅଡ଼େ ହାଡାଚିଚି ଲୋକୁଣି ମୁକ୍ଲ କିନି କାତା ୱେକ୍ଇଁ । ଇଦି କାଲାକାଲା ମାହାପୁରୁତି ହିୟାତି ବାର୍ଷା ।”

ତାନିଜେଚ ଯୀଶୁ କୁଗିତେସି । ବାରେ ଜାଣା ତାମ୍ଗେ ନେହିକି ସିନିକିତେରି । ଯୀଶୁ ଶାସ୍ତ୍ରତି ଏମିନିଗାଟି ପାଟା ପଡ଼ ଆହାମାଚେସି ଏଦି ଖ୍ରୀଷ୍ଟଇଁ ତସିମାନାଣି ଏୱାରି ତେଲ୍ହା କଡିତେରି । ଯୀଶୁ ଏଲେଇଚେସି “ନାନୁ ଏମିନି ବୋଲୁ ପଡ଼ ଆତେଏଁ ଏଦି ନେଏଁ ଘଟ ଆହି ମାନେ । ଏୱାରି ଏଲେଇଚେରି “ଇୱାସି ଏନାଆଁ ଯୋଷେଫତି ମିର୍ଏସି ଆଃଏ ?”

ଏଦାଆଁ ଜେଚ ଯୀଶୁ ଏଲେଇଚେସି “ଇଦି ସାତା ଯେ ଏମିନି ଭାବବାଦୀ ଜିକେଏ ତାମି ଗାଡ଼ାତ ଅପ୍‌ୱି ଆଃଅରି । ଏଲୀୟ ଭାବବାଦୀବେଲା ଜିକେଏ ହାରେକା ରାଣ୍ଡେଣୀସ୍କା ମାଚୁ । ମାତ୍ର ଏଚିବେଲା ତିନି ବାର୍ଷା ଆଦା ଆଃଆତେ ଏଚିବେଲା ମାହାପୁରୁ ଏଲୀୟଇଁ ଇସ୍ରାଏଲତା ମାନି ଏ ରାଣ୍ଡେଣୀତାଣା ପାଣ୍ଡାଃନା ଏଟ୍କା ଦେଶାତା ମାନି ରାଣ୍ଡେଣୀ ତାଣା ପାଣ୍ଡାମାଚେସି ।”

ଯୀଶୁ ୱେସିମାଚେସି “ଅଡ଼େ ଇଲିଶାୟ ଭାବବାଦୀ ବେଲାତି ତଲୁ ରୋଗ ହାରେକା ଇସ୍ରାଏଲତା ମାଚେରି । ମାତ୍ର ଇଲିଶାୟ ତାମି ବିତ୍ରା ଏମ୍ବାରାଇଁ ନେହି କିହାଲାଃତେସି । ଏୱାସି ଇସ୍ରାଏଲତି ଶାତ୍ରୁ ଦେଶାତା ର ସେନାପତି ନାମାନ୍ଇଁ ତଲୁ ରୋଗଟି ୱାର୍ଇ ନେହି କିହାମାଚେସି । ଏମିନି ଲୋକୁ ଯୀଶୁତି କାତା ୱେଞ୍ଜି ମାଚେରି ଏୱାରି ବାରେ ଯିହୁଦୀ ମାଚେରି । ଏଦାଆଁ ତାକି ଏୱାରି ଏଚିବେଲା ଇ ୱେହ୍ନାଣୀଇଁ ୱେଚେରି, ଏୱାରି ତାଂଗେ ହାରେକା କାର୍ବି ଆତେରି ।

ନାଜରିତତା ମାନି ଲୋକୁ ପାର୍ତନା କିନି ଟାୟୁ ଟିଏ ଯୀଶୁଇଁ ପାଂଗାତା ଚାଚାହାଁ ପାୟାଲି ତାକି ର ଲାକଟି କୁତୁସାଲି ତାକି ଏମ୍ବାଆଁ ତାତେରି । ମାତ୍ର ଯୀଶୁ ଲୋକୁ ମାନ୍ଦାଟି ହାତୁସ୍ତେସି ଅଡ଼େ ନାଜରିତ ଗାଡ଼ା ପିସ୍ତୁସ୍ତେସି ।

ଏଦାଆଁଜେଚ ଯୀଶୁ ଗାଲିଲୀ ୱାକି ହାଚେସି, ହାରେକା ଲୋକୁ ମାନ୍ଦା ତାନି ଡାଗେ ୱାତେରି । ଏମିନି ଲୋକୁ ମେସାଲି ଆଡିଃଲାଃତେରି, ତାକାଲି ଆଡିଲାଃତେରି, ୱେଞ୍ଜାଲି ଆଡିଲାଃତେରି ଏୱାରା ତଲେ ବାରେ ହାରେକା ରୋଗ ଅଡ଼େ ଆଂଗା ଆଡିଲାଃ ଗାଟାରି ବାରେ ଲୋକୁଣି ତାତେରି ।

ଡୁମ୍ବା ଆଟିତି ଲୋକୁଣି ଯୀଶୁ ତାଣା ତାପ୍ୱି ଆହିମାଚେ । ଯୀଶୁତି ହୁକୁମ୍ ତଲେ ଡୁମ୍ବାୟାଁ ଲୋକୁଁଟିଏ ହଚା ୱାହିମାଚୁ, ଅଡ଼େ ହାରେକା ବେଲାତା ଏୱା କାଲ ଆହି ମାଚୁ, “ନିନୁ ମାହାପୁରୁତି ମିର୍ଏତି !” ହାରେକା ଜାଣା କାବା ଆହିମାଚେରି ଅଡ଼େ ମାହାପୁରୁଇଁ ପାର୍ତନା କିହିମାଚେରି ।

ଏଦାଆଁ ଜେଚ ଯୀଶୁ ବାର ଜାଣା ଲୋକୁଇଁ ଆଚିତେସି ଏମିନିଗାଟାରି ପ୍ରେରିତ ଶିଷ୍ୟ ଇଣ୍ବି ଆହିମାଚେ । ଶିଷ୍ୟୟାଁ ଯୀଶୁ ତଲେ ରେଜିମାଚେରି ଅଡ଼େ ତାନି ତାଣାଟିଏ ଜାପିମାଚେରି ।