50. ଯୀଶୁ ୱେଣ୍ଡେ ଏ ୱାନାସି

୨୦୦୦ବାର୍ଷାଟିଏ ଲାକ ବାରେ ଦାର୍ତିଟି ହାରେକା ଲୋକୁ ଖ୍ରୀଷ୍ଟ ଯୀଶୁତି କାତା ନେହି କାବ୍ରୁ ୱେଞ୍ଜିମାନେରି । ମଣ୍ଡଳୀ ପାଡା ଆହିମାନେ । ଯୀଶୁ କାତା ହିହାମାନେସି ଯେ ଏୱାସି ଶେଷା ବେଲାତା ଦାର୍ତିତା ୱେଣ୍ଡା ୱାନେସି । ଏୱାସି ନିଏ ପାତେକା ୱାହାଲାଃତିଁ ଜିକେଏ, ଏୱାସି ତାନି କାତା ହିତାଣୀ କିନେସି ।

ମାର ଯୀଶୁଇଁ ୱାନାଣୀ କାଚି କାଚିହିଁ, ମାହାପୁରୁ ଅଣପିନେସି ଏନିକିକି ମାର ର ପବିତ୍ର ଅଡ଼େ ତାଙ୍ଗେ ଗାଉରମି ହିନି ର ଜୀୱୁ ଲେମ୍ବିନ । ଏୱାସି ଅଣପିନେସି ଯେ ଏନିକି ମାର ତାନି ରାଜିତି କାତା ଏଟ୍କାତାରାଇଁ ୱେହ୍ନ । ଯୀଶୁ ପୁର୍ତିତା ଡ଼ଇନିବେଲାତା ଏଲେଇଚେସି “ନା ଶିଷ୍ୟୟାଁ ମାହାପୁରୁତା ରାଜିତି ନେହି କାବ୍ରୁ ଦାର୍ତିତା ମାନି ବାରେ ଲୋକୁଇଁ ୱେକ୍ନେରି, ଏଦାଆଁ ଜେଚ ଦେହେଁ ଯୁଗୁ ରାନେ ।”

ହାରେକା ଲୋକୁଦଲ ନେଏ ପାତେକା ଯୀଶୁତି କାତା ୱେଞ୍ଜା ହିଲଃରି । ଏୱାସି ଲାକପୁରୁ ୱେଣ୍ଡା ହାନି ନକେଏ, ଏମିନିଗାଟାରି ଏଚେଲା ଜିକଏ ସୁସମାଚାର ୱେଞ୍ଜା ହିଲଃରି ଏୱାରି ତାଣା ସୁସମାଚାର ୱେକ୍‌ହାଲି ତାକି ଯୀଶୁ ଖ୍ରୀଷ୍ଟିୟାନଗାଟାରାଇଁ ଜଲାମାନେସି । ଏୱାସି ଏଲେଇଚେସି “ମିରୁ ହାଜାହାଁ ବାରେ ଲୋକୁଦଲଇଁ ଶିଷ୍ୟ କିଦୁ !” ଅଡ଼େ “ଦାଚାଲି ଆର୍ନା କାମ୍ବା ହାଜାମାନେ!”

ଯୀଶୁ ଅଡ଼େ ଏଲେଇଚେସି “ହଲିଆ ମାଲିକ୍ ଟିଏ କାଜାସି ଆଏ । ଇ ଦାର୍ତିତା ଅଦିକାରା ବେଟାଆତି ଲୋକୁୟାଁ ଏନିକି ନାଙ୍ଗେ ଅପଃରି, ଏଲେକିଏଁ ଏୱାରି ନା ତାକି ମିଙ୍ଗ କଷ୍ଟ ହିହାଁ ପାୟାନେରି । ଇ ଦାର୍ତିତା ମିରୁ ଦୁକୁ ବେଟା ଆତିସାରେ, ରାହାଁ ଆଦୁ ଏନାଆଁତାକି ଇଚିସାରେ ଦାର୍ତିଇଁ ତାକି କିହିମାନି ଶୟତାନଇଁ ନାନୁ ଜିଣା ଆହାମାଇଁ । ମିରୁ ଶେଷା ପାତେକା ନା ତାଣା ନାମୁତଲେ ଡ଼ୟାଦୁ, ଆତିସାରେ ମାହାପୁରୁ ମିଙ୍ଗ ଗେଲ୍ପାନେସି !”

ଦାର୍ତି ଶେଷା ଆନି ବେଲାତା ଲୋକୁତାକି ଏନାଆଁ ଆନେ ଏଦାଆଁ ତେଲ୍‌ପିକିହାଲି ତାକି ଯୀଶୁ ଶିଷ୍ୟଣୀ ର ପୁସ୍ପନି ୱେସ୍ତେସି । ଏୱାସି ଏଲେଇଚେସି “ର ଲକୁ ତାନି ବାଡ଼ାତା ନେହି ବିଚା ମାଟା ମାଚେସି । ଏୱାସି ହୁଂଜାମାନି ବେଲାତା ତାନି ଶାତ୍ରୁ ୱାହାଁ ଗହମ ତଲେ ଜାଡ଼ା ବିଚା ମାଟିତେ ଅଡ଼େ ଏଦି ହାତୁସ୍ତେ ।”

ଏଚେବେଲା ବିଚା ଗଜା ଆତେ, ଏ ଲକୁତି ହଲିଆଁ ୱାହାଁ ଏଲେଇଚେରି ‘ମାଲିକ, ନିନୁ ଏ ବାଡ଼ାତା ନେହି ବିଚା ମାଟା ମାଚି । ଅଡ଼େ ଏମ୍ବାଆଁ ଏନାଆଁ ତାକି ଜାଡ଼ା ଚଞ୍ଜା ଆତୁ ?” ମାଲିକ୍ ଏଲେଇଚେସି,’ର ଶାତ୍ରୁ ଏଦାଆଁ କିହାମାନେ ।”

“ହଲିଆୟାଁ ତାମି ମାଲିକ୍ ଇଁ ଏଲେଇଚେରି, ’ମାର ଏନାଆଁ ଇ ଜାଡ଼ାଇଁ ରେନମି ?” ମାଲିକ୍ ଏଲେଇଚେସି, ’ଆଃଏ, ମିରୁ ଏଲେ କିତିସାରେ, ତାନି ତଲେ ମିରୁ ଗହଁ ଜିକେଏ ରେତୁହ୍‌ଦେରି । ଆର୍ନା ଦାନି ପାତେକା କାଦୁ, ଜାଡ଼ା କୁଡ଼ି କିହାଁ ହୁଡ଼ାତୁହ୍‌ଦୁ, ମାତ୍ର ଗହମ ଆର୍ନାଇଁ ଟୁଡିତା ତାଦୁ ।”

ଶିଷ୍ୟୟାଁ ଏ ପୁସ୍ପନିତି ଅର୍ତ ତେଲ୍ହାଲି ଆଡାଃତେରି, ଏଦାଆଁ ତାକି ଏୱାରି ଏଦାଆଁ ତେଲ୍ପି କିହାଲି ଯୀଶୁଇଁ ଏଲେଇଚେରି । ଯୀଶୁ ଏଲେଇଚେସି “ଏମିନିଗାଟାସି ନେହି ବିଚା ମାଟିତେସି ଏୱାସି ଖ୍ରୀଷ୍ଟତି ଚିନ୍ନା । ବାଡା ଆହିମାନେ ଦାର୍ତି । ନେହି ବିଚା ମାହାପୁରୁତି ରାଜିତି ଲୋକୁ ।

“ଜାଡ଼ା ଏ ଲୋକୁ ଏମିନିଗାଟାରି ଲାଗେଃତାରି । ଏମିନି ଶାତ୍ରୁ ଜାଡ଼ା ମାଟାହାଁ ହାତୁସ୍ତେ ଏଦି ଆହିମାନେ ଶୟତାନ । ଆର୍‌ନା ଦାନାଇ ଆହିମାନେ ଦାର୍ତିତି ଶେଷା ଅଡ଼େ ଦାନା ଇ ଆହିମାନୁ ଦୂତୁୟାଁ ।”

ଏଚିବେଲା ଦାର୍ତି ଶେଷା ଆନେ, ଏଚିବେଲା ଦୁତୁୟାଁ ପାପୁତି ମିର୍କାଇଁ କୁଡ଼ି କିହାହାଁ ଡ଼ିଞ୍ଜିମାନି ହିଚୁତା ମେତ୍‌ନୁ, ଏମିନିତାଣା ଡ଼ିକି ଅଡ଼େ ପାଲୁ କାର୍କିନାଇ ଆନେ । ଏଚିବେଲା ଦାର୍ମୁଗାଟାରି ତାମି ଆବା ମାହାପୁରୁତି ରାଜିତା ୱେଡ଼ା ଲେହେଁ ଉଜେଡ଼ି ଆନେରି ।

ଯୀଶୁ ଅଡ଼େ ଜିକେଏ ଏଲେଇଚେସି ଦାର୍ତି ରାନି ଟିକ୍ ନକେଏ ଏୱାସି ଦାର୍ତିତା ୱେଣ୍ଡେ ୱାନେସି । ଏୱାସି ଏନିକି ଦାର୍ତିଟିଏ ଲାକପୁରୁ ହାଜାମାଚେସି, ଏୱାସି ଏଲେକିଁଏ ଦାର୍ତିତା ୱେଣ୍ଡେ ୱାନେସି । ତାନି ର ଆଙ୍ଗା ଡ଼ଇନେ ଅଡ଼େ ଏୱାସି ହାଗୁତଲେ ୱାନେସି । ଯୀଶୁ ଏଚିବେଲା ୱେଣ୍ଡିନେସି, ଏଚରଜାଣା ଖ୍ରୀଷ୍ଟିୟାନ ଆହାଁ ହାନେରି, ଏୱାରି ହାକିଟି ନିଙ୍ଗିନେରି ଅଡ଼େ ତାଙ୍ଗେ ହାଗୁତା ଆଣ୍ଡିନେରି ।

ଏଦାଆଁ ଜେଚ ଏମିନି ଖ୍ରୀଷ୍ଟିୟାନୟାଁ ନିଡିତାରି ଡ଼ଇନେରି ଏୱାରି ହାକିଟି ନିଙ୍ଗାହାଁ ଖ୍ରୀଷ୍ତୟାନଗାଟାରା ତଲେ ଆଣ୍ଡ୍ୱି ଆହାଁ ହାଗୁତା ନିଙ୍ଗିନେରି । ଏୱାରି ବାରେ ଏମ୍ବାଆଁ ଯୀଶୁ ତଲେ ଡ଼ଇନେରି । ଏଦାଆଁ ଜେଚ, ଯୀଶୁ ତାନି ଲୋକୁ ତଲେ ହିତିଡ଼ି ଅଡ଼େ ଆଣ୍ଡ୍ୱି ଆହାଁ କାଲାକାଲାତାକି ଡ଼ଇନେରି ।

ଏମିନିଗାଟାରି ଯୀଶୁତାଣା ନାମିନେରି ଏୱାରାଇଁ ର ମୁକୁଟ୍ ହିହାଲି ତାକି ଯୀଶୁ କାତା ହିହା ମାଞ୍ଜାନେସି । ଏୱାରି ମାହାପୁରୁତଲେ ହିତିଡ଼ି ତଲେ ଡ଼ଇନେରି ।

ମାତ୍ର ଏମିନିଗାଟାରି ଯୀଶୁତାଣା ନାମଃରି ମାହାପୁରୁ ତାମି ବିଚାରା କିନେସି । ଏୱାସି ଏୱାରାଇଁ ନର୍କତା ପାଣ୍ଡିନେସି, ଏମିନିତାଣା ଡ଼ିକି ଅଡ଼େ ପାଲୁ କାର୍କିନାଇ ଆନେ । ଇଲେହେଁ କି ଏ ହିଚୁ ଏଚେଲାଜିକେଏ ଡୁମ୍ବେଏ ଅଡ଼େ ଡ଼ିଞ୍ଜାହାଁ ଡ଼ଇନେ, ଅଡ଼େ ପ୍ଡ଼ିକା ଏୱାରାଇଁ କାର୍କାଲି ପିହ୍‌ଉ ।

ଯୀଶୁ ଏଚିବେଲା ୱେଣ୍ଦିନେସି, ଏୱାସି ଶୟତାନତି ଅଡ଼େ ତାନି ରାଜିତି ଡାମ୍ବେ କୁଡ଼୍‌ପୁନାସ୍ କିନେସି । ଏୱାସି ଶୟତାନଇଁ ଅଡ଼େ ମାହାପୁରୁତି ବୋଲୁ ନାମିନି ବାଟା ତାନି ଜେଚ ତାକାଲି ଆଚିତାରାଇଁ ବାରେ ନର୍କତା ମେତ୍ନେସି ଏମିନିତାଣା କାଲାକାଲାତାକି ଡ଼ିଞ୍ଜି ଡ଼ଇନେ ।

ଏନାଆତାକି ଇଚିସାରେ ଆଦମ ଅଡ଼େ ହବା ମାହାପୁରୁତି ବୋଲୁ ତଲେ ତାକାଃତୁ ଅଡ଼େ ଇ ଦାର୍ତିତା ପାପୁ ହଡ଼୍ୱି କିତୁ, ଏଦାଆଁ ତାକି ଇଦାଆଁ ବାକା ହିତେସି ଅଡ଼େ ଏଦାଣୀ ନାସ୍ କିହାଲି ତାକି ତିରି କିତେସି । ମାତ୍ର ର ଦିନା ମାହାପୁରୁ ର ପୁଃନି ଲାକପୁରୁ ଅଡ଼େ ପୁଃନି ଦାର୍ତି ଗାଡ଼ି କିନେସି ଏମିନିଗାଟାଇ ସିଦ୍ଦ ଅଡ଼େ ପୁରା ଆନେ ।

ଯୀଶୁ ଅଡ଼େ ତାନି ଲୋକୁ ପୁଃନିଦାର୍ତିତା ବାସା କିନେରି, ଅଡ଼େ ଏମିନିଗାଟାଇ ଡ଼ଇନେ ଏ ବାରେ ଲାକ ଏୱାସି କାଲାକାଲାତାକି ତାକି କିୟାନେସି । ଏୱାସି ବାରେ କାଣ୍ଡ୍ରୁ ଜେଜାନେସି ଅଡ଼େ କଷ୍ଟ, ଦୁକୁ,ଡ଼ିକି, ଲାଗେଃତାଇ, କଷ୍ଟ କି ହାକି ଆଃଏଦେ । ଯୀଶୁ ଶାନ୍ତି ଅଡ଼େ ସାତାତଲେ ରାଜି ଲାକ ରାଜି କିନେସି ଅଡ଼େ ଏୱାସି ତାନି ଲୋକୁ ତଲେ କାଲାକାଲାତାକି ଡ଼ଇନେରି ।