49. ମରିୟମ ଦରୁଗାଟି ର ଦାଂଗ୍ଡ଼ିଇଁ ର ଦୁତୁ ଏଲେଇଚେ ଯେ ଏଦି ମାହାପୁରୁତି ମିର୍ଏଣାଇଁ ଜାର୍ନା ହିନେ ।

ଏଦାଆଁ ତାକି ଏଚେବେଲା ଏଦି ଦାଙ୍ଗ୍ଡ଼ିମାଚେ, ପବିତ୍ରଆତ୍ମା ତାଙ୍ଗେ ଜୀୱୁନତେ ଅଡ଼େ ଏଦି ବାଣ୍ଡିତା ଆତେ, ଏଦାଆଁତାକି ଏଦି ର ମିର୍ଏଣାଇଁ ଜାର୍ନା ହିତେ ଅଡ଼େ ତାନି ଦରୁ ଯୀଶୁ ହିତୁ । ଆତିସାରେ, ଯୀଶୁ ଆହିମାନେସି ମାହାପୁରୁ ଜିକେଏ ଅଡ଼େ ମାଣ୍‌ସି ଜିକେଏ ।

ଯୀଶୁ ହାରେକା କାବାଆନି କାମା କିତେସି ଏନିକିକି ଏୱାସି ମାହାପୁରୁତି ମିର୍ଏସି ଇଞ୍ଜି ତସାଲି ଆଡିନେସି । ଏୱାସି ଏୟୁ ଲାକ ତାକିତେସି, ଗାଲିଇଁ ତିରି କିତେସି, ହାରେକା ଆଡାଆ ଗାଟି ଲୋକୁଣି ନେହି କିତେସି, ଡୁମ୍ବାଣୀ ପିସ୍ପି କତେସି, ହାତାରାଇଁ ଜୀୱୁ ହିତେସି ଅଡ଼େ ୫୦୦୦ଟିଏ ଗାଡି ଲୋକୁଣି ପାଶଗାଟି ରୁଟି ଅଡ଼େ ମିଣ୍କାଇଁ ତିସ୍ତେସି ।

ଯୀଶୁ ର ଜାପ୍ନାସି ଜିକେଏ ମାଚେସି, ଅଡ଼େ ଏୱାସି ଅଦିକାରା ତଲେ ଜଲିମାଚେସି ଏନାଆଁ ତାକି ଇଚିସାରେ ଏୱାସି ମାହାପୁରୁତି ମିର୍ଏସି ମାଚେସି । ଏୱାସି ଜାପ୍‌ହାମାଚେସି ଯେ ଏନିକି ମିରୁ ଆପ୍‌ଣାଇଁ ଏନିକି ଜୀୱୁ ନହିମାଞ୍ଜେରି ଏଲେକିଏ ଏଟ୍କାତାରାଇଁ ଜିକେଏ ଜୀୱୁ ନନାଇ ମାନେ ।

ଏୱାସି ଅଡ଼େ ଜିକେଏ ଜାପ୍‌ହେସି ଯେ ମିରୁ ଏନି କାତାଇଁ କି ଦନଇଁ ଜୀୱୁ ନନି ବାଟା ମାହାପୁରୁଇଁ ଗାଡି ଜୀୱୁ ନନାଇ ମାନେ ।

ଯୀଶୁ ଏଲେଇଚେସି ଯେ ଦାର୍ତିତା ମାନି ଏନି ଦାରାଗାଟି ବାଟା ମାହାପୁରୁତି ରାଜି ହାରେକା ଗାଡି ଦାରାଗାଟାଇ । ଏମିନିଗାଟାଇ ମାଣ୍ସି ତାକି ହାରେକା କାଜା କାତା ଆହିମନେ ଯେ ଏୱାସି ମାହାପୁରୁତି ରାଜିତା ହାନାଇ । ମାହାପୁରୁ ରାଜିତା ହାଜାଲି ତାକି, ନିନୁ ନି ପାପୁଟିଏ ଗେଲ୍‌ପି ଆନାଇ ମାନେ ।

ଯୀଶୁ ଏଲିଇଚେସି, କଚେକା ଲୋକୁ ତାଙ୍ଗେ ନାମାହାଁ ଗେଲ୍ପି ଆନେରି, ମାତ୍ର ଏଟ୍କାତାରି ନାମଃରି । ଏୱାସି ଏଲେଇଚେସି ଯେ କଚେକା ଲୋକୁ ନେହି ବୁମି ଲେହେଁ । ଏୱାରି ଯୀଶୁତି ନେହି କାବ୍ରୁ ୱେଞ୍ଜାହାଁ ଗେଲ୍ପି ଆନେରି । ଏଟ୍କାତାରି ଜିରୁଦାରି ମାନି ଆଣ୍ଟ୍ୱା ୱାଲି ବୁମି ଲେହେ, ଏମିନି ତାଣା ମାହାପୁରୁତି ବୋଲୁତି ବିଚା ହଡାଲି ଆଡେଏ ଅଡ଼େ ଆର୍ନା ଆଏ । ଏମିନିଲୋକୁ ଯୀଶୁତି ନେହି କାବ୍ରୁ ନାମଃରି ଏୱାରି ତାନି ରାଜିତା ହାଜାଲି ଆଡଃରି ।

ଯୀଶୁ ଜାପ୍‌ହାମାଚେସି ଯେ ମାହାପୁରୁ ପାପିଣୀ ହାରେକା ଜୀୱୁ ନନେସି । ଏୱାସି ଏୱାରାଇଁ କ୍ଷମା କିହାହାଁ ତାନି ମିର୍କା ମାସ୍କା କିନେସି ।

ଯୀଶୁ ମାଙ୍ଗେ ଅଡ଼େ ଜିକେଏ ଏଲେଇଚେସି, ଯେ ମାହାପୁରୁ ପାପୁଇଁ ଅପଃସି । ଏଚେବେଲା ଆଦମ ଅଡ଼େ ହବା ପାପୁ କିତୁ, ଏଦି ତାମି ବାରେ ଗଚିତାରାଇଁ ଆତେ । ଇଦାଆଁତି ପାଡ଼େଇ ଲେହେଁ, ଦାର୍ତିତା ମାନି ବାରେଜାଣା ପାପୁ କିନେରି ଅଡ଼େ ମାହାପୁରୁଟି ଏଟ୍କା ଆନେରି । ଏଦାଆଁ ତାକି ବାରେଜାଣା ମାହାପୁରୁତି ଶାତ୍ରୁ ଆହାମାନେରି ।

ମାତ୍ର ମାହାପୁରୁ ଦାର୍ତିତା ମାନି ବାରେ ଜାଣାଇଁ ଇଲେହେଁ ଜୀୱୁ ନତେସି ଯେ ତାନି ରଣ୍ଡିଏ ରଅସି ମିର୍ଏଣାଇଁ ହିତେସି ଏନିକିକି ଏମିନି ଗାଟାସି ତାନିତାଣା ନାମିନେସି, ଏୱାସି ତାନି ପାପୁତି ବାକା ବେଟା ଆଆନା ମାହାପୁରୁତଲେ କାଲାକାଲାତାକି ଡ଼ଇନେସି ।

ନି ପାପୁ ତାକି, ନି ଦହ ଅଡ଼େ ହାନି କାତା । ମାହାପୁରୁ କାର୍ବି ଆନି କାତା, ମାତ୍ର ଏୱାସି ନିଙ୍ଗ କାର୍ବି ଆଆନା ଯୀଶୁ ଲାକ ମି କାର୍ବି ହିତେସି । ଯୀଶୁ ଏଚିବେଲା କ୍ରୁଶତା ହାତେସି, ଏଚିବେଲା ଏୱାସି ନି ଦହ ବେଟାଆତେସି ।

ଯୀଶୁ ଏଚେଲା ପାପୁ କିହାଲଃସି, ମାତ୍ର ନିଙ୍ଗେ ଅଡ଼େ ଦାର୍ତିତା ମାନି ବାରେ ପାପୁଇଁ ଡେକାଲି ତାକି ର ସିଦ୍ଧ ପୁଜା ହିତିଲେହେଁ ଦହ ବେଟାଆତେସି । ଏଦାଆଁ ତାକି ଯୀଶୁ ତାନୁ ତାନୁଏ ପୁଜା ହିତେସି, ଏଦାଆଁ ତାକି ମାହାପୁରୁ ଏନି ପାପୁ, ଇଲେହେଁକି ବାରେ କାଜା ପାପୁ ଜିକେଏ କ୍ଷମା କିହାଲି ଆଡିନେସି ।

ନେହି କାମା ନିଙ୍ଗ ଗେଲ୍ପାଲି ଆଡେଏ । ମାହାପୁରୁ ତଲେ ତଡ଼ୁ ଆହାଲିତାକି ଇଲେହେଁ ଏନି କାତା ହିଲେଏ । ୱାର୍ଇ ଯୀଶୁଏ ନି ପାପୁଇଁ ନର୍ହାଲି ଆଡିନେସି । ଯୀଶୁ ଏ ମାହାପୁରୁତି ମିର୍ଏସି ଅଡ଼େ ନି ବାଟା ଯୀଶୁ ଯେ କ୍ରୁଶତା ହାତେସି ଅଡ଼େ ମାହାପୁରୁ ଏ ତାଂଗେ ହାକିଟି ନିକ୍‌ହାହାଁ ଜୀୱୁ ହିତେସି ଇ କାତାଇଁ ନିନୁ ନାମିନାଇ ମାନେ ।

ଏମିନିଗାଟାସି ଯୀଶୁ ତାଣା ନାମିନେସି ଅଡ଼େ ଯାହାରା ମାହାପୁରୁ ଲେହେଁ ନାମିନେସି, ମାହାପୁରୁ ଏ ବାରେ ଜାଣାଇଁ ଗେଲ୍ପିନେସି । ମାତ୍ର ତାନିତାଣା ଏମ୍ବାଃସି ନାମଃସି ଏୱାସି ତାଙ୍ଗେ ଗେଲ୍‌ପଃସି । ନିନୁ ଦନ କି ହିଲାଃଗାଟାତି, ଆବାଟି କି ଆୟାଟି, ବୁଢ଼୍ହା କି ଦାଂଣେଏସି ଅଡ଼େ ଏମିନି ତାଣା ଡ଼ଇତିହିଁ ଏଦି ଏନାଆଁ ଆଏ । ମାହାପୁରୁ ନିଙ୍ଗ ଜୀୱୁ ନୟାନେସି ଅଡ଼େ ନିନୁ ଏନିକି ଯୀଶୁତାଣା ନାମିଦି ଏଦାଆଁ ଅଣପିନେସି ଏନିକିକି ତାନି ତଲେ ନି ତଡ଼ୁ ଡ଼ଇନେ ।

ଯୀଶୁ ନିଙ୍ଗ ତାନିତାଣା ନାମାଲିତାକି ଅଡ଼େ ଡୁବନ ଅହାଲି ହାଟାନେସି । ଯୀଶୁ ଏ ଖ୍ରୀଷ୍ଟ ଅଡ଼େ ମାହାପୁରୁତି ରଣ୍ଡିଏ ର ମିର୍ଏସି ଏଦାଆଁ ଏନାଆଁ ନିନୁ ନାମି ମାଞ୍ଜି ? ନିନୁ ଏନାଆଁ ନାମିମାଞ୍ଜିକି ଯେ ନିନୁ ର ପାପୁଗାଟାତି ଅଡ଼େ ମାହାପୁରୁତାଣାଟି ନିନୁ ବାକା ବେଟା ଆନାତି ? ନିନୁ ଏନାଆଁ ନାମିମାଂଜିକି ଯେ ନି ପାପୁ ଡେକା ଅହାଲିତାକି କ୍ରୁଶ ଲାକ ହାତେସି ?

ଯୀଶୁ ନି ତାକି ଏନାଆଁ କିହା ମାଞ୍ଜାନେସି ଏଦାଆଁ ନାମି ମାଚି ସାରେ, ନିନୁ ର ଖ୍ରୀଷ୍ଟିୟାନତି ! ମାହାପୁରୁ ନିଙ୍ଗ ଶୟତାନତି ଆନ୍ଦେରି ରାଜିଟିଏ ଚାଚା ମାଂଜାନେସି ଅଡ଼େ ମାହାପୁରୁତି ରାଜିତି ଉଜେଡ଼ି ତଲେ ଗାଡ଼ି କିହାମାନେସି । ମାହାପୁରୁ ନି ପୁର୍ବେତି ପାପୁଗାଟି କାମାତି ଜୀରୁ ବାରେ ଅହାମାନେସି ଅଡ଼େ ଏୱାସି ନିଙ୍ଗେ ପୁଃନି ଅଡ଼େ ଦାର୍ମୁତି କାମାତି ଜୀରୁ ହିହା ମାଞ୍ଜାନେସି ।

ନିନୁ ର ଖ୍ରୀଷ୍ଟିୟାନତି ଇଚିସାରେ, ଯୀଶୁ ଏନାଆଁ କିହାମାନେସି ଏଦାଆଁ ତାକି ମାହାପୁରୁ ନି ପାପୁବାରେ କ୍ଷମା କିହା ମାଞ୍ଜାନେସି । ନେଏ, ନିନୁ ମାହାପୁରୁତି ର ଶାତ୍ରୁ ଆଆନା ତାନି ର ତଡ଼ୁ ଅହାଲି ତାକି ମାହାପୁରୁ ଅଣ୍‌ପିମାନେସି ।

ନିନୁ ମାହାପୁରୁତି ତଡ଼ୁ ଇଚିସାରେ ଅଡ଼େ ମାହାପୁରୁ ଯୀଶୁତି ର ସେବା କିନାତି ଇଚିସାରେ, ଆତିସାରେ ଯୀଶୁ ଜାପ୍‌ହିମାଞ୍ଜାନେସି ଯେ ଏଦାଆଁ ନାମାଲିତାକି ନିନୁ ଅଣପିଦି । ନିନୁ ର ଖ୍ରୀଷ୍ତୟାନ ଇଚିସାରେ, ନିନୁ ପାପୁ କିହାଲି ତାକି ଲବୁ ଆଦି । ମାତ୍ର ମାହାପୁରୁ ନାମୁଗାଟାସି ଅଡ଼େ ଏୱାସି ଜଲି ମାଞ୍ଜାନେସି ଯେ ନିନୁ ନି ପାପୁ ବାରେ ଅଣପିଦି, ଏୱାସି ନିଙ୍ଗ କ୍ଷମା ହିୟାନେସି । ପାପୁ ବିରୁଦ୍ଦତା ଯୁଦ୍ଦ କିହାଲିତାକି ଏୱାସି ନିଙ୍ଗ ବ୍ଡ଼ାୟୁ ହିୟାନେସି ।

ନିନୁ ଏନିକି ପାର୍ତନା କିଦି, ତାନି ବୋଲୁ ପଡ଼ ଆଦି, ଏଟ୍କାତି ଖ୍ରୀଷ୍ଟିୟାନ ତଲେ ତାନି ପୁଜା କିଦି ଅଡ଼େ ଏୱାସି ନି ତାକି ଏନା ଏନାଆଁ କିହା ମାନେସି ଏଦାଆଁ ଏଟ୍କାତାରାଇଁ ୱେହ୍ଦି, ଏଦାଆଁ ମାହାପୁରୁ ନିଙ୍ଗ ଜଲିମାଞ୍ଜାନେସି । ଇ ବାରେ ନିଙ୍ଗ ତାନି ତଲେ ର ହରେକା ବିତ୍ରା ତଡ଼ୁ କିହାଲିତାକି ସାୟମି ଆୟାନେ ।