48. ମାହାପୁରୁ ଏଚିବେଲା ଦାର୍ତି ଗାଡ଼ି କିତେସି, ଏଚିବେଲା ବାରେ କାତା ସାତା କାତା ମାଚେ ।

ଏଚିବେଲା ଏନି ପାପୁ ହିଲାଃତେ । ଆଦମ ଅଡ଼େ ହବା ରିଣ୍ଡି ବେସି ଜୀୱୁ ନହିଁ ଆହିଁମାଚୁ ଅଡ଼େ ଏୱା ମାହାପୁରୁଇଁ ଜୀୱୁ ନହିମାଚୁ । ଏଚିବେଲା ଏନି ଆଡାଃଗାଟାଇ କି ହାକି ଜିକେଏ ହିଲାଃତେ । ଦାର୍ତି ଇଲେହେଁ ଆପେ ଇଞ୍ଜି ମହାପୁରୁ ଅଣ୍‌ପିମାଚେସି । ହବାଇଁ ଲାଗେଃ କିହାଲି ତାକି ଶୟତାନ ର ରାଚୁ ଟି କାତା ଏଲେଇଚେ ।

ଏଦାଆଁ ଜେଚ ଏଦି ଅଡ଼େ ଆଦମ ମାହାପୁରୁତି ବିରୁଦ୍ଦତା ପାପୁ କିତୁ । ଏନାଆଁତାକି ଇଚିସାରେ ଏୱି ପାପୁ କିତୁ, ଏଦାଆଁତାକି ଦାର୍ତିତା ମାନି ବାରେ ଆଂଗା ନେହି ଡ଼ୟେଏ ଅଡ଼େ ବାରେ ହାନେରି । ଏନାଆଁତାକି ଇଚିସାରେ ଆଦମ ଅଡ଼େ ହବା ପାପୁ କିତୁ, ଇଦାଆଁଟିଏ ଅଡ଼େ ର କାଜା କାତା ଘଟ ଆତେ ।

ଏୱି ମାହାପୁରୁତି ଶାତ୍ରୁ ଆତୁ । ଇ ପାଡ଼େଇ ଲେହେଁ, ଏ ଦିନାଟିଏ ଜାର୍ନା ଆହିମାନି ବାରେ ମାଣ୍‌ସି ପାପୁ କିତି ଲେହେଁ ଜାର୍ନା ଆନେରି ଅଡ଼େ ମାହାପୁରୁତି ଶାତ୍ରୁ ଆନେରି । ମାହାପୁରୁ ଅଡ଼େ ମାଣ୍‌ସି ତଲେ ମାନି ସମ୍ପର୍କ ପାପୁ ତଲେ ଡିକ୍‌ୱି ଆହାମାଚେ । ମାତ୍ର ଏ ସମ୍ପର୍କଇଁ ୱେଣ୍ଡେଏ କେପାଲି ତାକି ମାହାପୁରୁ ଅଣପାମାଚେସି । ମାହାପୁରୁ କାତା ଇଟା ହାଁ ଜଲିତେସି ଯେ ହବାଁ ଗଚିତା ଜାର୍ନା ଆତି ର ଶୟତାନତି ତ୍ରାୟୁଁତି ଗୁଣ୍ଡା କିନେସି, ଅଡ଼େ ଶୟତାନ ତାନି ଗୁଃନାଇଁ କତ୍‌ନେ ।

ଇ ଅର୍ତ ଆହିମାନେ ଯେ ଶୟତାନ ଖ୍ରୀଷ୍ଟଇଁ ପାଇନେ, ମାତ୍ର ମାହାପୁରୁ ତାଙ୍ଗେ ହାତାରାଟିଏ ନିକ୍ନେସି, ଅଡ଼େ ଏଦାଆଁ ଜେଚ ଖ୍ରୀଷ୍ଟ କାଲାକାଲାତାକି ଶୟତାନତି ବ୍ଡାୟୁଇଁ ଗୁଣ୍ଡା କିନେସି । ହାରେକା ବାର୍ଷା ଡାୟୁ, ମାହାପୁରୁ ୱେକ୍ହେସି ଯେ ଯୀଶୁ ଏ ଆହିମାନେସି ଏ ଖ୍ରୀଷ୍ଟ । ମାହାପୁରୁ ଏଚିବେଲା ର କ୍ଡ଼ୁପ୍ନି ଏୟୁତାକି ବାରେ ଦାର୍ତିଇଁ ନାଶ୍ କିତେସି, ଏଚିବେଲା ଏମିନିଗାଟାରି ତାନି ତାଣା ନାମାମାଚେରି ଏୱାରାଇଁ ଗେଲ୍ପାଲିତାକି ଜାଜା ପାଣ୍ଡିତେସି ।

ଏଲେକିଏଁ, ବାରେ ଲୋକୁ ତାମି ପାପୁ ତାକି ନାସ୍ ଆନାଇ ମାଚେ, ମାତ୍ର ଏମିନିଗାଟାରି ତାମି ତାଣା ନାମି ମାଚେରି ତାମ୍‌ଗେ ଗେଲ୍ପାଲି ତାକି ମାହାପୁରୁ ଯୀଶୁଇଁ ହିତେସି । ଶହେ ଶହେ ବାର୍ଷା ତାକି ଲୋକୁ ତାମି ପାପୁ ତାକି ଏମିନି ଦଣ୍ଡ ବେଟା ଆନାଇ ମାଚେ ଏଦାଆଁ ତସାଲି ତାକି ଯାଜକୟାଁ ସବୁବେଲା ମାହାପୁରୁତାଣା ପୂଜା କିହିମାଚେରି ।

ମାତ୍ର ଏ ବାରେ ପୂଜା ତାମି ପାପୁଇଁ ହେକ କିହାଲି ଆଡିଲାଃତେ । ଯୀଶୁ ଆହିମାନେସି କାଜା ମହା ଯାଜକ । ଅର ଯାଜକୟାଁ ଲେହେଁ ଆଃଏ, ଏନିକି ଯୀଶୁ କିହାଁ ତସ୍ତେସି – ରଣ୍ଡିଏ ରଅସି ପୂଜା ହିନି ଲେହେଁ ଏୱାସି ତାଙ୍ଗେ ହିତେସି ଏମିନାଇ ଦାର୍ତିତା ମାନି ବାରେ ପାପୁଇଁ ଗୁଚି କିନେ । ଯୀଶୁ ସିଦ୍ଧଗାଟି ମହାଯାଜକ ଏନାଆତାକି ଇଚିସାରେ ଦାର୍ତିତା ମାନି ଏମିନିଗାଟାସି ଏମିନିବେଲାତା ଜିକେଏ କିହାମାନି ବାରେ ପାପୁତି ବାକାଇଁ ଗୁଚି କିତେସି । ମାହାପୁରୁ ଅବ୍ରାହାମଇଁ ଏଲେଇଚେସି “ଦାର୍ତିତି ବାରେ ଲୋକୁ ନି ଟିଏ ବର ବେଟା ଆନେରି ।“

ଯୀଶୁ ଅବ୍ରାହାମତି ର ଗଚିତାସି ମାଚେସି । ବାରେ ଲୋକୁ ତାନି ତାକି ବର ବେଟା ଆତାରି, ଏନାଆଁତାକି ଇଚିସାରେ ଯୀଶୁ ଦରୁତା ନାମିମାନି ବାରେ ପାପୁଟି ଗେଲ୍ପି ଆହାମାନେରି, ଅଡ଼େ ଅବ୍ରାହାମତି ଆତ୍ମିକ ଗଚିତା ବାଦ୍ଲି ଆହାମାନେରି ।

ଅବ୍ରାହାମ ତାନି ମିର୍ଏସି ଇସାହାକଇଁ ପୂଜା ହିହାଲି ତାକି ଏଚିବେଲା ମାହାପୁରୁ ଏଲେଇଚେସି, ଏଚିବେଲା ତାନି ମିର୍ଏସି ଇସାହାକ ବାଟା ପୂଜା ହିହାଲି ତାକି ର ମେଣ୍ଡା ହିତେସି । ମାମ୍ବୁ ବାରେ ମା ପାପୁ ତାକି ହାନମି ! ମାତ୍ର ମାହାପୁରୁ ତାନି ମିର୍ଏସି ଯୀଶୁଇଁ ମା ଟାୟୁତା ର ପୁଜା ହିତିଲେହେଁ ହାହାଲି ତାକି ହିତେସି । ମାହାପୁରୁ ଏଚିବେଲା ମିଶରତା ଡାୟୁ କାତାରା ପାଣ୍ଡିତେସି, ଏୱାସି ବାରେ ଇସ୍ରାଏଲତାରା ଇଜତି ଲୋକୁଇଁ ର ର ମେଣ୍ଡା ଡାଲୁ ପାୟାହାଁ ତାମ୍ବୁ ଦୁୱେରି ବନ୍ଦୁ ଲାକ ଏ ମେଣ୍ଡାତି କାସା ଉସ୍ପାଲି ଜଲାମାଚେସି ।

ମାହାପୁରୁ ଏଚିବେଲା କାସା ମେସ୍ତେସି, ଏୱାସି ତାମି ଇଲୁ ପିସ୍ତେସି ଅଡ଼େ ତାମି ନକେଏ ଜାର୍ନା ଆତାରାଇଁ ପାୟାଃତେସି । ଇ କାତାଇଁ ନିସ୍ତାର ପାର୍ବୁ ଇନେରି । ଯୀଶୁ ଆହିମାନେସି ନିସ୍ତାର ପାର୍ବୁତି ମେଣ୍ଡା ।

ଏୱାସି ସିଦ୍ଧ ଅଡ଼େ ପାପୁ ହିଲାଃଗାଟାସି ମାଚେସି ଅଡ଼େ ନିସ୍ତାର ପାର୍ବୁ ନାମିନି ବେଲାତାଏ ପାଇୱି ଆହାମାଚେସି । ଏମିନିଗାଟାସି ଯୀଶୁ ତାଣା ନାମିନେସି, ଏଚିବେଲା ଯୀଶୁତି କାସା ଏ ଲକୁତି ପାପୁତି ଗେଲ୍‌ପିନେ, ଅଡ଼େ ମାହାପୁରୁ ଏ ବାକାଇଁ ଏ ଲକୁଟି ଗୁଚି କିନେସି । ମାହାପୁରୁ ଇସ୍ରାଏଲତାରା ତଲେ ର ମେରା କିତେସି, ଏମିନିଗାଟାରି ତାନି ଆଚ୍ୱି ଆତାରି ମାଚେରି ।

ମାତ୍ର ମାହାପୁରୁ ନେଏ ର ମେରା ତିରି କିହାମାନେସି ଏମିନିଗାଟାଇ ବାରେତାକି ମାନେ । ଇ ପୁଃନି ମେରା ତଲେ, ଏମିନିଗାଟି ଲୋକୁଦଲତି ଏମିନିଗାଟି ଲକୁ ଯୀଶୁଇଁ ନାମିତାକି ମାହାପୁରୁତି ଲୋକୁ ଆହାଲି ଆଡିନେରି । ମୋଶା ର କାଜା ଭାବବାଦୀ ମାଚେସି ଏମିନିଗାଟାସି ମାହାପୁରୁତି ବୋଲୁ ୱେକ୍ହେସି ।

ମାତ୍ର ଯୀଶୁ ବାରେ ଭାବବାଦୀୟାଁ ବିତ୍ରା କାଜାସି ମାଚେସି । ଏୱାସି ମାହାପୁରୁ, ଏଦାଆଁ ତାକି ଏୱାସି ଏନା ଏନାଆଁ କିହିମାଚେସି ଅଡ଼େ ଏଦି ମାହାପୁରୁତି କାମା ଅଡ଼େ ମାହାପୁରୁତି ବୋଲୁ ମାଚେ । ଏଦାଆଁ ତାକି ଯୀଶୁଇଁ ମାହାପୁରୁତି ବୋଲୁ ୱେସ୍ପି ଆନେ । ମାହାପୁରୁ ରାଜା ଦାଉଦଇଁ କାତା ହିହା ମାଚେସି ଯେ ତାନି ଗଚିତାରା ବିତ୍ରା ରଅସି ମାହାପୁରୁତି ଲୋକୁଇଁ କାଲାକାଲାତାକି ତାକି କେନେସି ।

ଏନାଆଁ ତାକି ଇଚିସାରେ ଯୀଶୁ ମାହାପୁରୁତି ମିର୍ଏସି ଅଡ଼େ ଖ୍ରୀଷ୍ଟ ମାଚେସି, ଏୱାସି ଦାଉଦତି ଗଚିତାସି ମାଚେସି ଏମିନିଗାଟାସି କାଲାକାଲାତାକି ତାକି କିନେସି । ଦାଉଦ ଇସ୍ରାଏଲତି ରାଜା ମାଚେସି, ମାତ୍ର ଯୀଶୁ ବାରେ ଦାର୍ତିତି ରାଜା !

ଏୱାସି ୱେଣ୍ଡେଏ ୱାନେସି ଅଡ଼େ ସାତା ଅଡ଼େ ହିତିଡ଼ି ତଲେ କାଲାକାଲାତାକି ତାକି କିନେସି ।