47. ଶାଉଲ ରୋମୀୟ ରାଜିତା ହାନିବେଲାତା ଏୱାସି ତାନି ରୋମୀୟ ଦରୁ “ପାଉଲ” ଲେମ୍ବି ମାଚେସି ।
Listen to this story Audio file · 5.1 MB
The words of this recording are below, in Kuvi.
ର ଦିନା ପାଉଲ ଅଡ଼େ ତାନି ତଡ଼ୁ ଶୀଲା ଫିଲିପ୍ପୀ ଯୀଶୁତି ନେହି କାବ୍ରୁ ୱେକ୍ହାଲି ହାଚେରି । ଏୱାରି ଗାଡ଼ା ପାଙ୍ଗାତା କାଡା ଗାଟାତା ମାନି ର ଟାୟୁତା ହାଚେରି ଏମିନିତାଣା ଲୋକୁ ପ୍ରାତନା କିହାଲି ତାକି କୁଡ଼ା ଆତେରି । ଏମ୍ବାଆଁ ଏୱାରି ଲୁଦିଆ ଦରୁ ଗାଟି ବେପାର୍ ଗାଟି ଆୟାଟିଇଁ ମେସ୍ତେରି । ଏୱାସି ମାହାପୁରୁଇଁ ଜୀୱୁ ନହିମାଚେସି ଅଡ଼େ ପ୍ରାତନା କିହିମାଚେସି । ଯୀଶୁ କାତାତି କାବ୍ରୁ ଏନିକି ଲୁଦିଆ ନାମିନେ ଏଦାଆଁ ତାକି ମାହାପୁରୁ ତାନି କାନୁ ଦେତେସି, ଅଡ଼େ ଏୱାସି ଅଡ଼େ ତାନି ଇଜତି ଲୋକୁ ଡୁବନ ଅତୁ ।
ଏୱାସି ପାଉଲ ଅଡ଼େ ଶୀଲାଇଁ ତାନି ଇଜ ଡ଼ୟାଲି ତାକି ହାଟିତେସି, ଏଦାଆଁ ତାକି ଏୱାରି ତାନି ତଲେ ଅଡ଼େ ତାନି ଇଜତି ଲୋକୁ ତଲେ ଡ଼ଇତେସି । ପାଉଲ ଅଡ଼େ ଶୀଲା ପ୍ରାତନା ଟାୟୁତା ହାରେକା ବେଲାତା ଲୋକୁଣି ଆଣ୍ଡି ମାଚେରି ।
ସବୁଦିନାତି ଲେହେଁ ଏୱାରି ଏଚିବେଲା ପ୍ରାତନା ଟାୟୁତା ହାଜି ମାଚେରି, ଏଚିବେଲା ଡୁମ୍ବା ଆଟିତି ର ପଦା ଡାଲୁ ତାନି ଜେଚ ଜେଚ ହାଜି ମାଚେ । ଏ ଡୁମ୍ବା ତାକି ଏଦି ଭବିଷ୍ୟତ କାତା ଲୋକୁଣି ୱେସାଲି ଆଡିମାଚେ ଏଦାଆଁ ତାକି ଏୱାସି ତାନି ମାଲିକ ତାକି ର ଭବିଷ୍ୟତ ୱେହ୍ନି ଲେହେଁ ହାରେକା ଡାବୁଁ କୁଡ଼ି କିହିଁ ହିହିମାଚେ । ଏୱାରି ତାକିଁ ହାନିବେଲା ଏ ଡୁମ୍ବା ଆଟିତି ହଲିଏଣୀ ସବୁବେଲା କିରିଡ଼ିଁ ଏଲେଇଞ୍ଜିମାଚେ “ଇ ଲୋକୁ ଲାକମାନି ମାହାପୁରୁତି ହଲିଆୟାଁ ।”
ଏୱାରି ଗେଲ୍ପି ଆନାଣୀଇଁ ୱେସିମାଞ୍ଜାନେରି !”ଏୱାସି ହାରେକା ବେଲାତା ଇଲେହେଁ କିହିମାଚେ ଯେ ପାଉଲ ଇଦାଆଁ ୱେଞ୍ଜିୱେଞ୍ଜି କାର୍ବି ଆହା ହାଚେସି । ଡାୟୁବେଲାତା ଏଚିବେଲା ଏ ହଲିଏଣୀ ପଦା କିରିଡ଼ିଁ ଏଲେଇଞ୍ଜାଲି ମାଠ୍ହେ, ପାଉଲ ତିର୍ୱାହାଁ ଏ ହଲିଏଣୀତା ମାନି ଆତ୍ମାଇଁ ଏଲେଇଚେସି “ଯୀଶୁ ଦରୁ ତଲେ ଇଦାଣୀଟିଏ ହଚା ହାଲାମୁ ।”
ରେଟୁଲିଏ ଏ ଡୁମ୍ବା ତାଙ୍ଗେ ପିସାହାଁ ହାତୁସ୍ତେ । ଏମିନିଗାଟି ଲୋକୁ ଏ ହଲିଏଣୀ ପଦାଇଁ ହଡାମାଚେ, ଏୱାସି ହାରେକା କାର୍ବି ଆତେସି ।
ଏୱାରି ହିୟାଁତା ଅତେରି ଯେ ଡୁମ୍ବା ଏ ହଲିଏଣୀ ପଦା ଲୋକୁଣି ଭବିଷ୍ୟତ ୱେସାଲି ଆଡେଏ । ଇ ଅର୍ତ ଆହିମାନେ ଲୋକୁତି ଭବିଷ୍ୟତ ୱେସାଲି ତାକି ଏୱାରି ଏ ହଲିଏଣୀ ପଦାତି ମାଲିକଇଁ ଅଡ଼େ ଡାବୁଁ ହିଅରି । ଏଦାଆଁ ତାକି ହଲିଏଣୀ ପଦାତି ମାଲିକୟାଁ ପାଉଲ ଅଡ଼େ ଶୀଲାଇଁ ରୋମୀୟ ତାକି କିନାରାତାଣା ଅତେରି, ଏମିନିଗାଟାରି ପାଉଲ ଅଡ଼େ ଶୀଲାଇଁ ୱେଚାହାଁ ଜେଲତା ମେଥ୍ହେରି ।
ଏୱାରି ପାଉଲ ଅଡ଼େ ଶୀଲାଇଁ ଜେଲ୍ତା ହାରେକା ହଚାଲି ଆଡାଃଗାଟି ଟାୟୁତା ଇଟାହାଁ କଡାଣୀଁ ଦସ୍ପାସ୍ତେରି ।
ଆତିହିଁ ଜିକେଏ ମାଦି ଲାଆଁ ଏୱାରି ମାହାପୁରୁ ତାଣା ଗାଉରମି ଗୀତଁ ପାଚାଲି ମାଠ୍ହେରି । ରେଟୁଏ, ଗାଡି ବୁମି ତିର୍ଗିତେ !
ଜେଲତା ମାନି ବାରେ ଦୁୱେରି ଦେପି ଆତେ, ଅଡ଼େ ବାରେ ବନ୍ଦିଗାଟାରା କେୟୁତି ହିକ୍ଣିଁୟାଁ ହୁଙ୍ଗା ହାଚେ । ଜେଲତା କାନାରି ଇଦାଟି ନିଙ୍ଗିତେରି,ଅଡ଼େ ଏଚିବେଲା ଏୱାସି ମେସ୍ତେସି ଯେ ଜେଲତି ଦାରା ବାରେ ଦେପି ଆହା ହାଜ଼ା ମାଚେ, ଏୱାସି ଆଜା ହାଚେସି ।
ଏୱାସି ଅଣପିତେସି ଯେ ବାରେ ବନ୍ଦି ଗାଟାରି ହାତୁସ୍ତେରି, ଏଦାଆଁ ତାକି ଏୱାସି ତାନୁ ତାନୁ ପାୟା କଡାଲି ତାକି ଅଣପିତେସି ।(ଏୱାସି ପୁଞ୍ଜାମାଚେସି ଯେ ରୋମୀୟ ତାକି କିନାରି ତାଙ୍ଗେ ପାଇନେରି ଏୱାସି ବନ୍ଦିଗାଟାରାଇଁ ପିସ୍ତୁସ୍ତିସାରେ ।)ମାତ୍ର ପାଉଲ ଏଦାଆଁ ମେସାହାଁ କାଲ ଆତେସି “ଡ଼ୟାମୁ”! ଯାହାରାଇଁ ପାୟା କଡାଃନି । ମାମ୍ବୁ ବାରେ ଇମ୍ବାଆଁ ମାନମି ।“ ଜେଲ କାନାସି ଏଚିବେଲା ପାଉଲ ଅଡ଼େ ଶୀଲା ତାଣା ୱାତେସି, ଏୱାସି ଆଜିତାକି ତିର୍ଗିମାଚେସି ଅଡ଼େ ଏଲେଇଚେସି, ଗେଲ୍ପି ଆହାଲି ତାକି ନାନୁ ଏନାଆଁ କିଇଁ? ।
ପାଉଲ ଏଲେଇଚେସି”ଯୀଶୁତାଣା, ନାମାମୁ ଏମିନିଗାଟାସି ଗୁରୁ, ଏଦାଆଁ ତାକି ମିରୁ ଅଡ଼େ ମି ଇଜତି ଲୋକୁ ଗେଲ୍ପି ଆଦେରି । ଏଦାଆଁତାକି ଏ ଜେଲତା କାନାସି ତାନି ଇଜ ଅହାଁ ପାଉଲ ଅଡ଼େ ଶୀଲାଇଁ ତାମି ଗାହାଁଇଁ ନର୍ତେସି । ତାନି ଇଜ ମାନି ବାରେ ଜାଣାଇଁ ପାଉଲ ଯୀଶୁଇଁ ନେହି କାବ୍ରୁ ୱେସ୍ତେସି । ଜେଲ କାନାସି ଅଡ଼େ ତାମି ଇଜତି ଲୋକୁ ବାରେ ନାମାହାଁ ଡୁବନ ଅତେରି ।
ଜେଲତା କାନାସି ପାଉଲ ଅଡ଼େ ଶୀଲାଇଁ ଚିଞ୍ଜାଲି ହିତେସି ଅଡ଼େ ଏୱାରି ବାରେ ର ତାଣା ରାହାଁ ଆତେରି । ର ଦିନା ଗାଡ଼ାତି ନେତାୟାଁ ପାଉଲ ଅଡ଼େ ଶୀଲାଇଁ ଜେଲଟି ଗେଲ୍ପିତେସି ଅଡ଼େ ଏୱାରାଇଁ ଫିଲିପ୍ପୀଟିଏ ହାଜାଲିତାକି ଏଲେଇଚେସି ।
ପାଉଲ ଅଡ଼େ ଶୀଲା ଲୁଦିଆ ଅଡ଼େ ଏଟ୍କାତି କଚେକା ତଡୁଗାଟାରାଇଁ ଆଣ୍ଡିତି ଜେଚ ଏୱାରି ଏ ଗାଡ଼ା ପିସ୍ତେରି ।ଯୀଶୁତି କାତା ନେହି କାବ୍ରୁ ୱେଂଗା ହାଜାମାଚେ, ଅଡ଼େ ମଣ୍ଡଳୀ ଜିକେଏ ପାଡା ଆହାଲି ମାଠ୍ହେ । ପାଉଲ ଅଡ଼େ ଏଟ୍କାତି ଖ୍ରୀଷ୍ଟିୟାନ ନେତାୟାଁ ହାରେକା ଗାଡ଼ା ରେଚେରି ଅଡ଼େ ଯୀଶୁତି ନେହି କାବ୍ରୁ ଜାପ୍ହାଲି ମାଠ୍ହେରି ।
ଏୱାରି ମଣ୍ଡଳୀତା ମାନି ନାମିନାରି ରାହାଁ ଅଡ଼େ ଜାପ୍ନି ତାକି ହାରେକା ଚିଟି କୁତିତେରି । ଇ ଚିଟିଁ ବିତ୍ରା କଚେକା ବାଇବଲତି ବହିଁ ଆତୁ ।
ବାଇବଲତି ର ପୁସ୍ପନି: ପ୍ରେରିତ ୧୬:୧୧-୪୦-୪୮.
Free to use, adapt, and share under an open license (CC BY-SA 4.0).