46. ସ୍ତିଫାନଇଁ ପାଇମାନି ଲୋକୁତି ହେମ୍ବରୀଇଁ କାଚିମାନି ଦାଂଣେଃସି ରଅସି ଶାଉଲ ମାଚେସି ।

ଏୱାସି ଯୀଶୁ ତାଣା ନାମାଃତେସି, ଏଦାଆଁତାକି ଏୱାସି ନାମୁଗାଟାରାଇଁ ସାଦି କିହିମାଚେସି । ରିଣ୍ଡାସ୍କାଣୀ ଜିକେଏ ଆବାଟି ଅଡ଼େ ଆୟାସ୍କାଣୀ ଜିକେଏ ଦସ୍ପା ଚାଚାଲି ତାକି ଏୱାସି ଯିରୁଶାଲମତା ମାନି ବାରେ ନାମିତି ଇଜ ହଡି ମାଚେସି ଅଡ଼େ ଜେଲତା ଦସ୍ପା ଇଟିମାଚେସି । ଦମ୍ମେସକତା ମାନି ଖ୍ରୀଷ୍ଟିୟାନଗାଟାରିଇଁ ଜିକେଏ ଶାଉଲ ଆସାହାଁ ଯିରୁଶାଲମ ଚାଚାଲି ଆଡିନେସି ଏଦାଆଁତାକି ମହାଯାଜକ ତାଂଗେ ହୁକୁମ ହିହାମାଚେରି । ଶାଉଲ ଏଚେଇତା ଦମ୍ମେସକ ଜିରୁତା ହାଜି ମାଚେସି, ହାଗୁଟି ର ଗାଡି ଉଜେଡ଼ି ତାନି ଶାରିୱାକି ମିଣ୍ସା ହାଚେ ଅଡ଼େ ଏୱାସି ବୁମିତା ତର୍ଗା ହାଚେସି ।

ରଅସି ଇଲେହେଁ ଜଲି ମାନାଣୀଇଁ ୱେଚେସି, “ଶାଉଲ! ଶାଉଲ! ନିନୁ ଏନାଆ ତାକି ନାଙ୍ଗେ ସାଦି କିହିମାଞ୍ଜାଦି ?” ଶାଉଲ ୱେଚେସି “ମାହାପୁରୁ, ନିନୁ ଆମ୍ବାଃତି ?” ଯୀଶୁ ଏଲେଇଚେସି “ନାନୁ ଯୀଶୁ ତେଃଏଁ । ନିନୁ ନାଙ୍ଗେ ସାଦି କିହିମାଞ୍ଜାଦି !” ଶାଉଲ ଏଚିବେଲା ନିଙ୍ଗିତେସି, ଏୱାସି ଏନାଆଁ ମେସାଲି ଆଡାଃତେସି ।

ତାନି ତଡ଼ୁଗାଟାରି ତାଙ୍ଗେ ଦମ୍ମେସକ ଜିରୁତା ତାକି କିହାଁ ଅତେରି । ଶାଉଲ ତିନିଦିନା ପାତେକା ଏନାଆଁ ତିନାଃତେସି ଅଡ଼େ ଗହ୍ଆତେସି । ହନନିୟ ଦରୁଗାଟାସି ର ଶିଷ୍ୟ ଦମ୍ମେସକତା ଡ଼ଇମାଚେସି ।

ମାହାପୁରୁ ତାଙ୍ଗେ ଏଲେଇଚେସି “ଶାଉଲ ଡ଼ଇମାନି ଇଜ ହାଲାମୁ । ତାନି ଲେକ କେୟୁ ଇଟାମୁ ଏନିକିକି ଏୱାସି ୱେଣ୍ଡେଏ ମେସାଲି ଆଡିନେସି ।” ମାତ୍ର ହନନିୟ ଏଲେଇଚେସି “ମାହାପୁରୁ, ଇ ଲକୁ ଏନିକିକି ନାମୁଗାଟାରାଇଁ ସାଦି କିହାମାନେସି ଏଦାଆଁ ନାନୁ ୱେଞ୍ଜାମାଇଁ ।” ମାହାପୁରୁ ତାଙ୍ଗେ ଜଲିତେସି” ହାଲାମୁ! ଯିହୂଦୀ ଅଡ଼େ ଏଟ୍କା ଦଲ ତାଣାଟି ନା ଦରୁ ୱେକ୍‌ହାଲି ତାକି ନାନୁ ତାଙ୍ଗେ ନିପ୍‌ହାମାଇଁ । ଏୱାସି ନା ଦରୁତାକି ହାରେକା ଦୁକୁ ବେଟା ଆନେସି । “ଏଦାଆଁ ତାକି ହନନିୟ ଶାଉଲ ଡ଼ଇମାନି ଇଜ ହାଚେସି, ତାନି ଲାକ ତାନି କେୟୁ ଇଟିତେସି ଅଡ଼େ ଏଲେଇଚେସି “ନିନୁ ଇମ୍ବାଆଁ ୱାନିବେଲା ଏମିନି ଯୀଶୁ ନିଙ୍ଗ ଚଞ୍ଜା ଆୟାତେସି, ଏୱାସି ନାଙ୍ଗେ ନି ତାଣା ପାଣ୍ଡା ମାଞ୍ଜାନେସି ଏନିକିକି ନି କାନୁ ୱେଣ୍ଡେଏ ମେସାଲି ଆଡିଦି ଅଡ଼େ ପବିତ୍ରଆତ୍ମା ତଲେ ନେଞ୍ଜିଦି ।

ଶାଉଲ ରେଟୁଏ ୱେଣ୍ଡେଏ ମେସାଲି ଆଡିତେସି, ଅଡ଼େ ହନନିୟ ତାଙ୍ଗେ ଡୁବନ ହିତେସି । ଏଦାଆଁ ଜେଚ ଶାଉଲ ରଚାଣି କାଦି ଚିଚେସି ଅଡ଼େ ୱେଣ୍ଡେଏ ବ୍ଡ଼ାୟୁ ବେଟାଆତେସି । ରେଟୁଏ ଶାଉଲ ଦମ୍ମେସକତା ମାନି ଯିହୂଦୀୟାଁ ତାଣା ଇଲେହେଁ ୱେକ୍ହାଲି ମାଟ୍‌ହେସି “ଯୀଶୁ ଏ ମାହାପୁରୁତି ମିର୍ଏସି !”

ଏମିନିଗାଟାସି ନାମିତାରାଇଁ ପାୟାଲି ତାକି ଚେଷ୍ଟା କିହିମାଚେସି ଅଡ଼େ ଏୱାସି ଯେ ନିଏଁ ଯୀଶୁତାଣା ନାମି ମାନେସି ଏ କାତାତି ଯିହୂଦୀୟାଁ କାବା ଆହା ହାଚେରି । ଶାଉଲ ଯିହୂଦୀତାରା ତଲେ ଯୁକ୍ତି କିହାଁ ପାର୍ମାଣା କିତେସି ଯେ ଯୀଶୁ ଏ ଖ୍ରୀଷ୍ଟ । ହାରେକା ଦିନାଟିଏ, ଶାଉଲଇଁ ପାୟାଲି ତାକି ଯିହୂଦୀତାରି ଅଣ୍‌ପିତେରି ।

ଏୱାରି ତାଙ୍ଗେ ପାୟାଲି ତାକି ଗାଡ଼ାତି ଦୁୱେରିତା କାଚାଲିତାକି ଲୋକୁ ପାଣ୍ଡିତେରି । ମାତ୍ର ଶାଉଲ ଏ ଅଣପିତି କାତାଇଁ ୱେଞ୍ଜାଲି ଆଡାଃତେସି, ଅଡ଼େ ଏମ୍ବାଟିଏ ଡ଼ୁଗା ହାଜାଲି ତାକି ତାନି ତଡ଼ୁଗାଟାରି ସାୟମି ଆତେରି । ର ଲାଆଁ ଏୱାରି ର ଡାଲି ତଲେ ତାଙ୍ଗେ କାତି ଲେକଟି ଡ଼କି ରେପ୍‌ହେରି । ଶାଉଲ ଦମ୍ମେସକଟିଏ ଡ଼ୁଗା ହାଚି ଡାୟୁ, ଯୀଶୁତି କାତାଇଁ ୱେସିହିଁ ମାଚେସି । ଶାଉଲ ଶିଷ୍ୟଁ ତଲେ ଆଣ୍ଡାଲି ତାକି ଯିରୁଶାଲମତା ହାଚେସି, ମାତ୍ର ଏୱାରି ତାଙ୍ଗେ ଆଜି ମାଚେରି ।

ଏଦାଆଁ ଜେଚ ବର୍ଣ୍ଣବା ଦରୁ ଗାଟି ର ନାମିତି ଶିଷ୍ୟଁତି ତାଣା ଶାଉଲଇଁ ଅତେସି ଅଡ଼େ ଏୱାରାଇଁ ଏଲେଇଚେସି ଯେ ଏୱାସି ଏନିକି ଦମ୍ମେସକ ଶାସାଟି ବୋଲୁ ୱେସାମାଚେସି । ଏଦାଆଁ ଜେଚ, ଶିଷ୍ୟଁୟାଁ ଶାଉଲଇଁ ନାମିତେରି । ଏମିନିଗାଟି ନାମିତାରି ସାଦି ତାକି ଯିରୁଶାଲମ ପିସାହାଁ ହାଜାମାଚେରି, ଏୱାରି ଆନ୍ତିୟକିଆ ପାତେକା ହାଜାହାଁ ଯୀଶୁତି କାତା ୱେସାଲି ମାଠ୍‌ହେରି ।

ଆନ୍ତିୟକିଆତା ମାନି ହାରେକା ଲୋକୁ ଯିହୂଦୀ ହିଲାଃତେରି, ମାତ୍ର ପ୍ରତମଦେବା ତାକି ତାମି ବିତ୍ରା ହାରେକା ନାମିତେରି । ବର୍ଣ୍ଣବା ଅଡ଼େ ଶାଉଲ ଏମ୍ବାଆଁ ମାନି ପୁଃନି ନାମିତାରାଇଁ ଯୀଶୁତି କାତା ଗାଡି ଜାପ୍ହାଲି ତାକି ଅଡ଼େ ମଣ୍ଡଳୀଇଁ ଆଣ୍ଟ୍ୱା କିହାଲି ତାକି ହାଚେରି । ଆନ୍ତିୟକିଆ ମଣ୍ଡଳୀତା ମାନି ନାମିତାରାଇଁ ନକେଏ “ଖ୍ରୀଷ୍ଟିୟାନ” ଇଞ୍ଜି ୱେସ୍ପିଆତେ । ର ଦିନା, ଆନ୍ତିୟକିଆ ମଣ୍ଡଳୀତା ମାନି ଖ୍ରୀଷ୍ଟିୟାନୟାଁ ଉପାସ୍ ଅଡ଼େ ପ୍ରାତନା କିହିମାନି ବେଲାତା ପବିତ୍ରଆତ୍ମା ଏୱାରାଇଁ ଏଲେଇଚେ “ବର୍ଣ୍ଣବ୍‍ବା ଅଡ଼େ ଶାଉଲ ଏମିନିଗାଟି କାମା କିହାଲି ତାକି ନାନୁ ଆଚାମାଞ୍ଜାଇଁ ଏଦାଆଁତାକି ଏୱାରାଇଁ ନା ତାକି ଏଟ୍କା କିଦୁ ।”

ଏଦାଆଁ ତାକି ଆନ୍ତିକିଆ ମଣ୍ଡଳୀ ବର୍ଣ୍ଣବା ଅଡ଼େ ଶାଉଲ ତାକି ପ୍ରାତନା କିହାଁ ତାମ୍‌ଗେ ହିତେ । ଏଦାଆଁ ଜେଚ ଏୱାରି ହାରେକା ଟାୟୁତା ଯୀଶୁତି କାତା ନେହି କାବ୍ରୁ ୱେସାଲି ତାକି ଏୱାରାଇଁ ପାଣ୍ଡିତେ । ବର୍ଣ୍ଣବା ଅଡ଼େ ଶାଉଲ ହାରେକା ଲକୁଦଲତା ୱେସାଲି ମାଠ୍‌ହେରି ଅଡ଼େ ହାରେକା ଲୋକୁ ଯୀଶୁତାଣା ନାମାଲି ମାଠ୍‌ହେରି ।